1. Taꞌacügu narüĩnüẽ i nhamaãcüü i muü̃tchi i duü̃ü̃gü?

 CUMA rü marü nagu curüĩnü na muü̃tchi i duü̃ü̃gü rü nügüicatama narüĩnüẽü̃? Cuaꞌãtchiruü̃, rü internetwa rü nümaü̃gü i duü̃ü̃gü rü guü̃raü̃ naügü na togü nüü̃ tatchigaẽẽgüü̃caꞌ. Notürü, noretama i duü̃ü̃gü rü Tupana ya Yeuwaü̃ natatchigaẽẽgüü̃. Nhaa ngúwa rü nüü̃ tadau tá rü taꞌacütchiga yiĩ na Yeuwaü̃ itatchigaẽẽgüü̃ rü taꞌacü tüü̃ nanangútchaü̃ẽẽ na naüü̃ tá i ngẽma. Rü nhuꞌmatchi rü nüü̃ tadaugü tá na nhuãcü Tupanaü̃ natatchigaẽẽü̃ i nüma nanawaꞌeãcü rü na nhuãcü natatchigaẽẽü̃ tá i wipeꞌewa i naéga ya Yeuwa.

TAꞌACÜTCHIGA NIĨ I YEUWAÜ̃ ITATCHIGAẼẼÜ̃?

2. Taꞌacü Yeuwa naüü̃ ga maꞌpǘne ga Chinaíwa? (Nüü̃ nadau i natchicünaꞌã.)

² Tupanaarü Ore nanaweꞌ na Tupana ya Yeuwa rü Guãétüwa nangẽmaü̃ yiĩ. Rü nawena na Yeuwa rü Iraéutanüü̃ü̃ inanguü̃ẽẽü̃ ga Equítuanewa rü ngẽma naüü̃wa rü nügü natatchigaẽẽ ya Yeuwa. Rü nhaü̃gu rüĩnü: rü muü̃tchima ga iraéutanüü̃ rü naĩtaqueꞌe ga maꞌpǘne ga Chinaígu na ngéma Yeuwaü̃ naĩnüẽü̃caꞌ. Rü wüi ga caianeü̃ ga waemaü̃ irüĩemaü̃ ga maꞌpǘnewa. Rü ngürüãtchi naduruane yerü ga yema iããtchiane poraütchiü̃ niĩ rü nhuꞌmatchi gúma maꞌpǘne üütchara nawa inayagó. Rü yema nguneü̃gu rü naãẽmacüane rü poraãcü nabaibeane rü wüi tagaü̃ ga yéma inaũü̃ ga nhama cornétagaraü̃ü̃ iĩü̃. (Êxo. 19:16-18; 24:17; Sal. 68:8) Rü aicuma niĩ i ngẽma iraéutanüü̃ namaã nabaiꞌãtchiaẽü̃ ga Yeuwaarü pora.

3. Nhuãcü tá Yeuwaü̃ itatchigaẽẽü̃?

 ³ Eꞌna duü̃ü̃gü Yeuwaü̃ natatchigaẽẽgüü̃? Ngẽmaãcü niĩ. Rü wüi nacümawa na Yeuwaü̃ itatchigaẽẽü̃ rü togüemaã nüü̃ niuü̃ i natchiga rü norü poratchiga rü nacümatchiga. Rü nhuꞌmatchi, Yeuwaü̃ itatchigaẽẽü̃ ta ngẽguma moẽ nüna iãgügu erü nüma tüü̃ narüngü̃ẽẽ i taꞌacü iügüü̃wa. (Isa. 26:12) Ãẽꞌgacü ga Dawí rü meẽtchiü̃ i cuaꞌruü̃ niĩ na nhuãcü Yeuwaü̃ natatchigaẽẽü̃. Rü nüma rü yumüẽ naü i iraéugüpeꞌewa rü Dawí rü Yeuwaü̃ nhanagürü: “Rü cumax [Pa Yeuwa], Pa Corix, rü guxü̃étüwa cungexma, rü cuxicatama cupora rü cuxüüne, rü namaxã icucua̱x i guxü̃ma, rü guxü̃ma i ãẽ̱xgacügüétüwa cungexma. Erü guxü̃ma i daxũguxü̃ i naanewa rü ñoma i naanewa ngẽxmagüxü̃ rü cuxrü nixĩgü.” Rü yaguꞌearü yumüẽü̃ ga Dawí rü guü̃ma ga iraéutanüü̃gü rü Yeuwaü̃ nicuaꞌüü̃gü. — 1 Crô. 29:11, 20.

4. Nhuãcü Ngetchutchu Yeuwaü̃ natatchigaẽẽ?

⁴ Yeguma nhama i naãnewa nayemagu ga Ngetchutchu rü nüma rü Yeuwaü̃ natatchigaẽẽ erü nüma rü nüü̃ niu na Nanatüwa ne naũü̃ i pora na ngẽmaãcü taü̃ma i meü̃ naüü̃caꞌ. (Mar. 5:18-20) Ngetchutchu rü duẽẽgüü̃ narüngü̃ẽẽ ta na nüü̃ nacuaꞌgüü̃caꞌ na nhuãcü Yeuwa namecümaü̃ i taꞌacüü̃ niuwa rü taꞌacü naüü̃wa. Wüi ga nguneü̃gu, Ngetchutchu nananguꞌẽẽ ga yudeugüarü ngúepataü̃wa. Rü yéma iyema ga wüi ga ngecü ga 18 ga taunecü idaꞌawecü. Rü ipücaꞌwe yerü wüi ga ngoꞌo ngĩü̃ ipücaꞌweẽẽ, rü tauacüma iyarüweꞌãtchi. Yema rü nagutchauü̃tchi! Rü Ngetchutchu rü tüü̃ idau ga guema ngeꞌe na ãũrima tiõẽü̃, rü meããcüma tümacaꞌ naca rü nhanagürü: “Pa Ngecüx, ñu̱xma rü marü cuxca̱x nitaane i curü da̱xawewa —ñanagürü.” Rü yeguma rü ngĩü̃ ningõgü, rü yegumatama iyarüweꞌãtchiwemüü̃, rü inaügü na “Tupanaxü̃ yacua̱xüxü̃xü̃”. Rü guema ngeꞌe rü poraãcü Yeuwana moẽ taã erü tümacaꞌ nayataaneẽẽ! (Luca 13:10-13) Rü yemagagu yema ngeꞌe rü Yeuwaü̃ itatchigaẽẽ, rü ngẽma rü ta tüü̃ nanangútchaü̃ẽẽ na Yeuwaü̃ itatchigaẽẽü̃.

TAꞌACÜ TÜÜ̃ NANANGÚTCHAÜ̃ẼẼ NA YEUWAÜ̃ ITATCHIGAẼẼGÜÜ̃CAꞌ?

5. Tüꞌcüü̃ Yeuwamaã meã tiĩgü?

⁵ Yeuwaü̃ itatchigaẽẽgüü̃ erü ãũrima meã namaã iĩgüü̃. Nüü̃ icuaꞌgüü̃ tüꞌcüü̃ meã Yeuwamaã iĩgüü̃. Nüma rü Guãétüwa nangẽma, rü norü pora taguma niguꞌ. (Sal. 96:4-7) Meãma nüü̃ tadau i norü cuaꞌ i taꞌacü i naüwa i Yeuwa. Nüma rü tüü̃ naüü̃ rü tüna nanaã i guü̃ma i taꞌacü inawaꞌeü̃ na ngẽmaãcü imaẽü̃caꞌ. (Apo. 4:11) Nüma rü aicumacü niĩ. (Apo. 15:4) Guü̃ma i taꞌacü i nüma naüü̃wa meã nüü̃́ ínanguutchi, rü nüma rü guü̃guma nayanguẽẽ i norü unetagü. (Jos. 23:14) Rü ngẽmagagu ga Orearü Uruü̃ ga Yeremía rü Yeuwatchigaü̃ niu rü nhanagürü: “Rü natanüwa i guxü̃ma i ngẽma nüxü̃ cua̱xüchixü̃ rü ãẽ̱xgacügü ixĩgüxü̃ i ñoma i naanewa ngẽxmagüxü̃, rü nataxuma i to i cumaxã wüxiguxü̃”! (Jer. 10:6, 7) Aicuma niĩ, meãma nüü̃ icuaꞌgüü̃ na tüꞌcüü̃ na Tanatü ya dauü̃gucümaã meã iĩgüü̃. Notürü ngẽmaétüwa yiãgü rü Yeuwaü̃ tangetchaü̃gü.

6. Tüꞌcüü̃ Yeuwaü̃ tangetchaü̃gü?

⁶ Yeuwaü̃ itatchigaẽẽgüü̃ erü ãũrima nüü̃ tangetchaü̃gü. Nagu rüĩnü i Yeuwacümagü na tüü̃ nanangútchaü̃ẽẽ na nüü̃ ingetchaü̃güü̃caꞌ. Nüma rü nüü̃ tangetchaü̃tümüü̃gü rü tamaã namecüma. (Sal. 103:13; Isa. 49:15) Nüma rü tacaꞌ nagutchaãẽ rü nüü̃ nacuaꞌ i taꞌacü tüü̃ ngúü̃. (Zac. 2:8) Nüma rü tüü̃ narüngü̃ẽẽ na nüü̃ icuaꞌü̃caꞌ rü namaã iãmücügüü̃caꞌ. (Sal. 25:14; Pur. 17:27) Nüma rü nügü ínarüíra, rü “ngéma nüxü̃ nadawenü i daxũguxü̃ i naane rü ñoma i naane. Rü tüxü̃ narüngü̃xẽxẽ ya yíxema ngearü diẽruã́xẽ rü tüxü̃ ínarüdaxẽxẽ.” (Sal. 113:5-7) Ngẽmagagu ãũrima Yeuwaü̃ tatatchigaẽẽgü, caã? — Sal. 86:12.

7. Taꞌacücaꞌme iyoniẽü̃ naügüü̃?

 ⁷ Yeuwaü̃ itatchigaẽẽgüü̃ erü tanawaꞌegü na togüe nüü̃ cuaꞌgüü̃caꞌ. Muẽma rü tama nüü̃ tacuaꞌ i aicumaü̃ i Yeuwatchiga. Tüꞌcüü̃me? Erü Tchataná muü̃ma i duü̃ü̃güü̃ nawomüẽẽ namaã i dora i Yeuwatchiga rü ta norü duü̃ü̃gütchiga. (2 Cor. 4:4) Tchataná duẽẽgüü̃ nawomüẽẽ na nüü̃ tacuaꞌü̃caꞌneta na Yeuwa rü tchieü̃maã nanaütanüü̃, rü tama duẽẽgücaꞌ nagutchaãẽü̃ rü ta nagagu yiĩ i muẽma i duẽẽgü tiõẽgüü̃. Notürü yiãgü nüü̃ tacuaꞌ i Yeuwatchiga i aicumaü̃! Rü yiãgü tayoniẽgü na togüeü̃ nüü̃ dauẽẽü̃caꞌ na nhuãcü Yeuwa aicuma nameẽtchiü̃. (Isa. 43:10) Rü Salmo 96wa nüü̃ niu i natchiga i Yeuwaü̃ itatchigaẽẽü̃. Ngiã nüü̃ tadaugü i nümaü̃ i wetchicurugü i ngẽma salmowa na nüü̃ icuaꞌgüü̃caꞌ na nhuãcü Yeuwa nawaeꞌãcü nüü̃ itatchigaẽẽü̃caꞌ.

NHUÃCÜ NATATCHIGAẼẼÜ̃ YA YEUWA I NÜMA NANAWAꞌEÃCÜ?

8. Taꞌacü niĩ i wüi nacüma na Yeuwaü̃ itatchigaẽẽgüü̃caꞌ? (Salmo 96:1-3)

⁸ Nawa naugütae Salmo 96:1-3. Yeuwaü̃ itatchigaẽẽgüü̃ nawa i taꞌacüü̃ tiu i natchiga i togüemaã. Ngẽma wetchicurugüwa nüü̃ niu na ‘Yeuwacaꞌ tawiyaegü’, rü ‘nüü̃ ticuaꞌüü̃gü’, rü ‘tanaunagü na nüma yiĩü̃ i tüü̃ namaẽẽẽü̃’ rü ta “guxü̃ma i nachixü̃anecüã̱xmaxã” nüü̃ tiutchiga na Guãétüwa Nangẽma. Guü̃ma i ngẽma niĩ i nacümagü na nüü̃ itatchigaẽẽgüü̃caꞌ ya Tanatü ya dauü̃gücü. Yeuwaarü duü̃ü̃gü i nũcümaü̃güü̃ rü tama muü̃ãcüma nüü̃ niugügü natchiga i guü̃ma i meü̃gü ga Yeuwa nacaꞌ naüü̃ rü ta nüü̃ ínapoü̃ i naéga. (Dan. 3:16-18; Pur. 4:29) Nhuãcü tá narüü̃ naügüü̃?

9-10. Taꞌacüü̃ nawa cucuaꞌü̃ i Angelina arü cuaꞌruü̃wa? (Nüü̃ nadau ta i natchicünaꞌã.)

⁹ Nüü̃ tadau tá taꞌacü tümamaã ngupetüü̃ ya wüie taeya Estados Unidoswa ngẽmaẽ, tümaéga rü Angelina niĩ. a Tüma rü tama muü̃ãcüma Yeuwaéga ítapoü̃ i tümaarü puracütchicawa. Ngẽguma tüma tanaügügu i tümaarü puracüwa Angelinacaꞌ nacagü rü ngewacaü̃ü̃ i puracütanüü̃gücaꞌ ta nacagü na nügü niutchigagüü̃caꞌ i wipeꞌewa. Tüma rü tügü imeẽẽ na ideaü̃caꞌ na nhuãcü nataãẽü̃ i Yeuwaarü Orearü Uruü̃gütanüwa. Notürü naü̃pa na tideatchaü̃, wüi to i puracütanüü̃ nüü̃ niu na Yeuwaarü Orearü Uruü̃ tüü̃ yaeü̃. Nüma rü inanaügü na tchiri natchiga nideaü̃ i Yeuwaarü duü̃ü̃gü rü norü õgütanüü̃. Angelina nhatarügü: “Tchorü maü̃ne ãũrima nabunecü. Notürü nagu tcharüĩnü: ‘Tchama nüü̃ tchacuaꞌ na Yeuwatchiga doraü̃ niuü̃. Tama tchanawaꞌe  niĩ tchangeamareü̃, tchanawaꞌe niĩ namaã nüü̃ tchiuü̃ i Yeuwatchiga i aicumaü̃.’”

¹⁰ Ngẽguma yatüü̃ iguꞌearü deaãgu, Angelina tanaü i paaãcü iyumüẽ i íragaãcü. Ngẽmawena, tüma rü mecümaãcü rü nüü̃ nhatarügü: “Tchorü maü̃ rü cumaã nawüigu. Tchama ta ngẽgumarüü̃ Yeuwaarü Orearü Uruü̃gütanüwa tchaya, notürü nhuꞌma rü ta Yeuwaarü Orearü Uruü̃ tchiĩ.” Rü guü̃ma initchigaãtchitanü. Woo i ngẽma, Angelina imeãẽmareama. Tüma rü nüü̃ tanaweꞌ i natchicünaꞌãgü i tataãẽgüü̃wa i ngutaqueꞌewa rü mecüãcü ítanapoü̃ i õgütanüü̃. (1 Pe. 3:15) Taꞌacü nangupetü? Ngẽguma Angelina taguꞌarü deaãgu, ngẽma yatü rü naütchicüüarü ĩnüã. Ngẽmagagu nüna nacuaꞌãtchi yeguma nangetüꞌügu na nhuãcü yiĩ i Yeuwaarü duü̃ü̃gütanüwa nangẽmaü̃ rü nataãẽ niĩ. Angelina nhatarügü: “Wüi taãẽü̃tchi niĩ na Yeuwaégaü̃ ípoü̃. Narümemaẽ niĩ i ngẽma.” Woo togü tchiri Yeuwaégatchiga nideagü, notürü yiemagü nüü̃ ticuaꞌüü̃gü rü ta tatatchigaẽẽ i naéga, ngẽma rü tüü̃́ nameẽtchi.

11. Nhuãcü Yeuwaarü duü̃ü̃gü naga naĩnüẽ i Salmo 96:8wa ngẽmaü̃wa?

¹¹ Yeuwaü̃ itatchigaẽẽgüü̃ namaã i torü ngẽmaü̃gü. (Nawa naugütae Salmo 96:8.) Yeuwaarü duü̃ü̃gü rü guü̃guma nüü̃ natatchigaẽẽgüü̃ i norü ngẽmaü̃güü̃maã. (Pro. 3:9) Cuaꞌãtchiruü̃, iraéutanüü̃gü nüna nanaã i norü ngẽmaü̃gü nacaꞌ naügüü̃ rü nüna nadau ga napata. (2 Reis 12:4, 5; 1 Crô. 29:3-9) Rü nümaü̃ i Ngetchutchuarü ngúeü̃gü rü nüna nanaã i norü ngẽmaü̃gü na nüü̃ narüngü̃ẽẽü̃caꞌ i Ngetchutchu rü norü ngúeü̃gü imugüü̃ taꞌacü nümagü nanawaꞌegüü̃wa. (Luca 8:1-3) Rü nümaü̃ i nüíraü̃ nũcüma i yaõgüü̃ rü nüü̃ narüngü̃ẽẽ i norü ngẽmaü̃gümaã i taenegü rü taeyagü. (Pur. 11:27-29) Ngẽgumarüü̃tama i nhuꞌma, Yeuwaü̃ tatatchigaẽẽü̃ nagagu i torü ofertagü.

12. Nhuãcü i torü ofertagü Yeuwaü̃ natatchigaẽẽ? (Nüü̃ nadau ta i natchicünaꞌã.)

¹² Nüü̃ nadau na nhuãcü i torü oferta rü Yeuwaü̃ natatchigaẽẽü̃. Rü 2020gu i deapanewa nüü̃ niutchiga na inaeaneü̃ mucü taunecügu i Zimbábuewa. Rü muü̃tchiema i duẽẽgü rü tayuetchaü̃ nagagu na natauma i õnagü rü wüie taeya tümamaã nangupetüü̃ ta, tümaéga Prisca. Woo i ngẽma, Prisca rü tanaügüama i Tupanaarü Oreü̃ tauü̃ i guü̃ yüüarü tamaẽꞌpügu rü yicacugu, wootchire ngẽma nguneü̃gu tatoegütchaü̃. Rü tümaarü dauetchita rü tchiri tümatchiga nidea erü Yeuwaarü oreü̃ tiu, rü nhanagürügü tüü̃: “Cuma tá cutaiya.” Prisca rü aicuma nüü̃ tacuaꞌ na Yeuwa tüna dau. Rü  ngẽmacaꞌ, tüma rü guü̃guma tanangãü̃: “Yeuwa rü taguma nüna niũgatchi i norü duü̃ü̃gü.” Nümaü̃ i nguneü̃guwena, Prisca tanayau i õnagü rü toomatchigü i ngẽmaü̃gü nagagu i torü ofertagü. Rü tümaarü dauetchita i Prisca rü ãũrima nabaiꞌãtchiãẽgü i namaã, rü nümagü rü nhanagürügü: “Tupana rü taguma cuna niũgatchi, rü toma tanawaꞌegütchaü̃ na nüü̃ tacuaꞌü̃ i natchiga.” Rü 7 i tümaarü dauetchita rü itanaügü na ngutaqueꞌewa taĩ.

13. Nhuãcü i tacümagü rü Yeuwaü̃ natatchigaẽẽü̃? (Salmo 96:9)

¹³ Nawa naugütae Salmo 96:9. Yeuwaü̃ itatchigaẽẽgüü̃ i tacümagüwa. Na Tupanapatawa napuracüeü̃caꞌ, nawaꞌe i tchatcherdótegü rü nügü nameẽẽgüü̃ i naü̃newa. (Êxo. 40:30-32) Ngẽgumarüü̃tama i yiemagü nawaꞌe i yigü imeẽẽgü i taü̃newa. Notürü tanawaꞌe yigü imeẽẽgüü̃ i torü maü̃newa na ngẽmaãcü tama naüü̃caꞌ i taꞌacü Yeuwa natchi ai. (Sal. 24:3, 4; 1 Pe. 1:15, 16) Tanawaꞌegü nüna taĩgatchi i nũcüma i tacüma i tchieü̃gü i taꞌacü Yeuwa natchi ai na ngẽmaãcü ngẽwacaü̃ i tacüma iücutchiü̃caꞌarü. Ngẽma natchiga niĩ na nagu rüĩnüü̃caꞌ na Yeuwarüü̃ naügüü̃caꞌ i ngewacaü̃ i nacüma i megüü̃. (Co. 3:9, 10) Rü Yeuwaarü ngü̃ẽẽgagu, woo i duü̃ü̃gü ãũrima ngẽãẽgüü̃ urü nuwaꞌegüü̃ rü ngẽma rü nanaütchicüü tá i norü maü̃ i meü̃ma.

14. Taꞌacüü̃ nawa cucuaꞌü̃ i Jack arü ore? (Nüü̃ nadau ta i natchicünaꞌã.)

¹⁴ Nüü̃ nadau taꞌacü Jack maã ngupetüü̃, nüma rü wüi yatü ãũrima nuwaꞌeü̃ niĩ rü ãũcümaü̃ niĩ rü ngẽmacaꞌ ngoꞌogu nanaüéga. Nagagu na namáetaü̃ i nüma, rü Jack maã nanauegugü na nayuü̃caꞌ. Notürü natauata na nawa nangu ngẽma nguneü̃, Jack rü inanaügü na Tupanaarü Orecaꞌ nangúü̃ i wüi taenemaã i pocupataü̃wa. Woo na nüma rü ãũrima natchiecümaü̃, Jack rü naütchicüüarü maü̃ãü̃, nümaü̃ i nguneü̃gügu rü ínabaie rü Yeuwaarü Orearü Uruü̃ niĩ. Jack rü ãũrima naütchicüüarü i maü̃ã, ngẽmagagu nawa nangutchaü̃ i norü yu, nümaü̃ rü pocupataü̃arü dauruü̃gü rü auãcü nüü̃ narümoẽgü. Rü wüi ga pocupataü̃arü ãẽꞌgacü naü̃pa ngéma puracüü̃, rü nhanagürü: “Jack wüi pocutanüü̃ ãũrima tchieü̃tchi niĩ nua. Nhuꞌma, nüma rü wüi meü̃ i duü̃ü̃ niĩ.” Rü wüie yüüarü yuwena i Jack arü yutchiga, rü taenegü i guü̃ i yüügu rü pocupataü̃wa naĩ na nanaüü̃caꞌ i ngutaqueꞌe rü nüü̃ nacuaꞌ i wüi pocutanüü̃ i nüíraeꞌpüꞌcüna ngutaqueꞌeü̃ rüĩnüü̃. Tüꞌcüü̃ nüma rü ngutaqueꞌewa naũtchaü̃? Ngẽma pocutanüü̃ rü namaã  nabaiꞌãtchiãẽ erü Jack rü nanaütchicüü i norü maü̃ rü nüü̃ nacuaꞌtchaü̃ na taꞌacü naüü̃ na Yeuwaü̃ nacuaꞌüü̃caꞌ. Ngẽma cuaꞌruü̃ nanaweꞌ na tacümagü rü nanatatchigaẽẽü̃ i Tanatü ya dauü̃gücü! — 1 Pe. 2:12.

TAꞌACÜ TÁ YEUWA NAÜÜ̃ NA NAÉGAÜ̃ NATATCHIGAẼẼÜ̃ I DÜWAACÜ?

15. Taꞌacü tá Yeuwa naüü̃ na naégaü̃ natatchigaẽẽü̃ i düwaacü? (Salmo 96:10-13)

¹⁵ Nawa naugütae Salmo 96:10-13. Norü guꞌ i wetchicurugü nawa i Salmo 96 nüü̃ niu i Yeuwatchiga rü nüna caꞌcü rü meü̃ i ãẽꞌgacü niĩü̃. Taꞌacü tá Yeuwa naüü̃ na naégaü̃ natatchigaẽẽü̃ i düwaacü? Rü nanaü tá i taꞌacü i weꞌguü̃. Yima taüne i Babirónia rü inanaoẽẽ tá i Yeuwa i düwaacü erü ngẽma tchieü̃ naügü rü doramaã nanguꞌẽẽtae i natchiga. (Apo 17:5, 16; 19:1, 2) Ngẽguma ngẽma ngupetügu, nümaü̃ rü ta tamaã naĩtaqueꞌe rü Yeuwaü̃ nicuaꞌüü̃gü. Norü guꞌ nacü, rü Armaguedóü̃gu, Yeuwa inayanaoẽẽü̃ i guü̃ma i taꞌacü Tchataná namaã icuaꞌü̃, rü ta inanaoẽẽ teé Yeuwaarü uwanügü iĩgüe rü doraü̃ ugüe i natchiga. Notürü nüma rü tüü̃ ínapoü̃ ya teé nüü̃ ngetchaü̃ẽ rü teé naga iĩnüẽ rü teé nüü̃ tatchigaẽẽ. (Mar. 8:38; 2 Te 1:6-10) Nhuꞌmata Ngetchutchu mil taunecü namaã ínacuágu i naãne, Yeuwa tá rü nanaüüneẽẽ i naéga. (Apo. 20:7-10) Ngẽguma ngẽma ngupetügu, “rü ngẽma Cori ya Tupanaarü üüne rü tá ñoma i naane namaxã nanapa ñoma már nax meama dexámaxã yapaxü̃rüxü̃.” — Hab. 2:14.

16. Taꞌacü tá cunawaꞌe cuüü̃? (Nüü̃ nadau ta i natchicünaꞌã.)

¹⁶ Wüi meẽtchiü̃ niĩ tá ngẽguma duü̃ü̃gü Yeuwaü̃ natatchigaẽẽgügu i nüma nawaꞌeãcü. Nhuꞌmatáta ngẽma nguneü̃wa nangu, tanawaꞌegü naügüamaü̃ i torü memaẽü̃ na Yeuwaü̃ itatchigaẽẽgüü̃caꞌ. Na meã taãẽwa nüü̃ icuaꞌü̃caꞌ i ngẽma, Natücumü i Wipeꞌe Ãgüü̃ nüü̃ naunetagü i Salmo 96:8 nacaꞌ i taunecü i 2025 arücaꞌ: Rü nüü̃ pengetchaü̃güãcüma nüü̃ picuaꞌüü̃gü i naéga ya Yeuwa!