“Rü tama name i natüca̱xma cunama̱xẽxẽ i curü yumüxẽ.”—Mateu 6:7.

Yeuwa tama nanawaꞌe na yeü̃cü yaꞌuutchigüetchaü̃ i yumuꞌẽgü i poperagu ümatügüü̃. Rü nüma nanawaꞌe na torü yumüẽwa namaã nüü̃ iuü̃ i taꞌacü torü maü̃newa ne ĩü̃. Taꞌacügu curüĩnü? Cucaꞌ name tchi cumücü guü̃guma cumaã ngẽmaü̃tama niugu? Rü meü̃ i ãmücügü rü nüü̃ niu i taꞌacü norü maü̃newa ne naũ. Rü ngẽguma Tupanamaã nüü̃ tiugu i taꞌacü torü maü̃newa ngẽmaü̃ rü ngẽma nanaweꞌ na Yeuwamaã taãmücügütchaü̃.

“Rü ngẽxguma naxca̱x ípecaxgu, rü tama penayaxu, erü naxca̱x ípeca i ngẽma tama Tupana pexü̃́ naxwa̱xexü̃.”—Tiagu 4:3.

Tchi Tupanacaꞌ ítacagu i taꞌacü tama name i napeꞌewa rü nüma rü tama nüü̃ naĩnü i torü yumüẽ. Rü cuaꞌãtchiruü̃, rü Tupanaarü Ore meãma nanangoꞌẽẽ na Tupana tama nüü̃́ name na diẽruguicatama rüĩnü rü tama tanawaꞌegü nagu itayaõ i dora eü̃guü̃ ngẽma na meü̃ iyauü̃caꞌ. Ngẽmacaꞌ, tchi teé tanaügu i wüi nhagütaẽ rü nacaꞌ tayumüẽgü na meü̃ tayauü̃, eꞌna Tupana nüü̃ naĩnü̃ i ngẽma yumüẽ? (Isaías 65:11; Luca 12:15) Tupana nüü̃ naĩnü i yumüẽgü ya teé norü orega ĩnüe.

 “Yíxema tama naga ĩnüxe i Tupanaarü mugü, rü nüma ya Tupana rü taxũtáma tüxü̃́ nüxü̃ naxĩnü i tümaarü yumüxẽ.”—Provérbios 28:9.

Nũcuma Tupana tama ga yumüẽgü nüü̃ naĩnü rü yeguma wüi duü̃ü̃ tama norü mugüga naĩnüegu. (Isaías 1:15, 16) Rü Tupana taguma nanaütchicüü i norü nacüma. (Malaquías 3:6) Na Tupana nüü̃ naĩnüü̃caꞌ i torü yumüẽgü rü tanawaꞌegü yigü taporaẽẽ na norü mugüga taĩnüeü̃caꞌ. Tchi naũpa yiemagü taü̃ma tchiẽü̃gü taügügu? Eꞌna Yeuwa taguma nüü̃ naĩnü i torü yumüẽgü? Tama. Rü Tupana tüü̃́ nüü̃ nangetchaü̃ i torü pecadugü notürü tanawaꞌegü na aicuma ngẽma tchieü̃ tarüo rü yigü taporaẽẽ na naügüü̃caꞌ i taꞌacü Yeuwapeꞌewa weguü̃ iĩü̃.—Puracügü 3:19.