“Chaunatü tá pexna nanaxã i guxü̃ma i chauégagu nüxna naxca̱x pecaxü̃.”—Juã́ũ 16:23.

Taꞌacü Ngetchutchu nüü̃ niu nanaweꞌ na Yeuwa tama nanawaꞌe na nacaꞌ tayumüẽgü i nũcümaü̃ü̃ ga oꞌigügagu rü nümaü̃ i üüneü̃gagu rü ãĩyugügagu. Notürü nanawaꞌe nacaꞌ tayumüẽgü i Ngetchutchuégagu. Ngẽguma Yeuwacaꞌ tayumüẽgügu i Ngetchutchuégagu rü tanaweꞌgü na Yeuwa tüü̃ naĩnüẽ nagagu taꞌacü Ngetchutchu tacaꞌ naü. Ngetchutchu nhanagürü: “Rü chaugaguxicatama nixĩ i Chaunatüxü̃tawa nangugüxü̃ i duü̃xü̃gü.”—Juã́ũ 14:6.

“¡Rü perü yumüxẽwa namaxã nüxü̃ pixu i perü guxchaxü̃gü!”—Salmo 62:8.

Rü nhama i wüi nanerüü̃ na norü papamaã ngetchaü̃waꞌecü nidea rü name niĩ Yeuwamaã nüü̃ tiugü. Yeuwa tama nanawaꞌe na yeü̃cü yaꞌuutchigüetchaü̃ i yumüẽgü i poperagu ümatügüü̃. Ngẽguma Yeuwacaꞌ tayumüẽgügu nüü̃ tiugü taꞌacü torü maü̃newa ngẽmaü̃ rü tanaweꞌgü na nüü̃ tangetchaü̃güü̃.

“Rü nüxü̃ tacua̱x rü nüma tüxü̃ naxĩnü i ngẽxguma norü ngúchaü̃ yixĩxgu i ngẽma naxca̱x nüxna ica̱xaxü̃.”—1 Juã́ũ 5:14.

Rü Tupanaarü Ore nanaweꞌ i taꞌacü Yeuwa tá tacaꞌ naü rü taꞌacü yiemagü tanawaꞌegü nacaꞌ taügü. Rü Yeuwa nanangãü̃ i yumüẽ ngẽguma norü ngútchaü̃ yiĩgu. Ngẽmaãcü, name niĩ rü Tupanaarü Orecaꞌ tangue na meã Tupanaü̃ tacuaꞌgüü̃caꞌ. Nhuꞌmatchi, Tupana nüü̃ naĩnü i torü yumüẽgü.

Tupanacaꞌ ícuca i taꞌacü cunawaꞌe. Rü Tupanacaꞌ ítaca na tüna nanaã i õna rü natchirugü rü tatchiü̃. Rü ta nacaꞌ ítaca na tüna naãü̃caꞌ i cuaꞌ na meã nüü̃ taunetagü i ngẽma iügütchaü̃ü̃ i norü poramaã na nüü̃ rüporamaẽü̃caꞌ i torü gutchaü̃gü. Rü ta nacaꞌ ítaca na yeeraãcü tayaõgüü̃caꞌ rü yeeraãcü ingetchaü̃waꞌeü̃caꞌ rü tüü̃ narüngü̃ẽẽü̃caꞌ.—Luca 11:3, 4, 13; Tiagu 1:5, 17.

Togücaꞌ nayumüẽ. Rü papagü rü mamagü na ngetchaü̃waꞌegüü̃ niĩgü rü nataãẽgü rü ngẽguma nanegü rü naacügü nügümaã rüngümüẽẽgügu rü nügü nangetchaü̃gü. Rü narüü̃ Yeuwa nanawaꞌe yigücaꞌ taoegaãẽgü. Rü Tupanacaꞌ nayumüẽ rü natanüü̃gücaꞌ rü natecaꞌ rü namaꞌcaꞌ rü nanegücaꞌ rü naacügücaꞌ rü namücügücaꞌ. Rü Tiagu nhanagürü: “Rü pegüca̱x peyumüxẽgü”.—Tiagu 5:16.

Tupanana moẽ naãgü. Rü Tupanaarü Ore nüü̃ niu i Tupanatchiga: “Rü nümatama nixĩ i núma namuaxü̃ ya pucü rü mea pexü̃́ nayaexẽẽãxü̃ i penetügü. Rü nüma nixĩ i pexna naxããxü̃ i pewemü nax ngẽmaãcü petaãẽgüxü̃ca̱x.” (Puracügü 14:17) Ngẽguma nagu tarüĩnüegu i guü̃ma i taꞌacü marü tacaꞌ naü rü Yeuwana moẽ taãgütchaü̃ i yumüẽwa. Rü ngẽguma Yeuwaga taĩnüegu rü ngẽma nanaweꞌ na nüna moẽ taãgü.—Corochacü̃ãꞌ 3:15.

Nhuguãcü, cungetchaü̃ erü Tupana tama paa nanangãü̃ i curü yumüẽ. Eꞌna Tupana tama cucaꞌ naoegaãẽ? Tama! Nüü̃ nadau i cuaꞌruü̃gü nanaweꞌ rü narümemae niĩ rü tama nüü̃ tarütchaü̃ i Tapanacaꞌ tayumüẽgü.

Steve, na marü nüü̃ niu i nhaa artchigu rü nhanagürü: Rü yumüẽ tchoü̃ narüngü̃ẽẽ rü wenaarü tchataãẽ. Taꞌacü nayatomaraü̃ẽẽ ga Steve nagu rüĩnüü̃ i yumüẽtchiga? Rü nüma inanaügü rü Tupanaarü Orecaꞌ nangu rü nüü̃ nacuaꞌ rü narümemae niĩ Tupanacaꞌ nayumüẽ rü tama nüü̃ narütchaü̃. Steve nüü̃ niu: “Rü Tupanana moẽ tchaã erü tchoü̃ narüngü̃ẽẽ i tchamücügügagu. Rü nhuꞌma, yeera tchataãẽ.”

Rü Jenny nagu tarüĩnüü̃ na tama tamecüma rü ngẽmacaꞌ Tupana tama nüü̃ naĩnü̃ i tümaarü yumüẽ. Rü ngĩgürügü: “Ngẽguma tchangetchaü̃ü̃tchigu rü Tupanacaꞌ tchayumüẽ na tchoü̃ narüngü̃ẽẽü̃caꞌ na nüü̃ tchacuaꞌü̃caꞌ rü tüꞌcüü̃ ngẽmaãcü nagu tcharüĩnü”. Nhuãcü yumüẽ tüü̃ narüngü̃ẽẽ? “Rü Yeuwacaꞌ tchayumüẽ na tchoü̃ narüngü̃ẽẽü̃caꞌ, rü woo tchauãẽwa nagu tcharüĩnügu na tama Yeuwaacü tchiĩ, notürü nüü̃ tchacuaꞌ na tchauãẽarü yeera yiĩü̃ ya Tupana rü nüma rü guü̃ma nüü̃ nacuaꞌ rü tchoü̃ nüü̃ nangetchaü̃. Rü ta Yeuwacaꞌ tchayumüẽ na tchoü̃ narüngü̃ẽẽü̃caꞌ na tama nüü̃ tcharütchau”. Taꞌacü ngupetüü̃? “Rü yumüẽ tchoü̃ narüngü̃ẽẽ rü nüü̃ tchadau na Yeuwa rü narüü̃ i wüi papa ngetchaü̃waꞌecü niĩ rü wüi aicuma ãmücü niĩ erü tchaucaꞌ naoegaãẽ. Tchi guü̃guma tchaugü tchaporaẽẽgu rü nüma tá tchoü̃ narüngü̃ẽẽama”.

Nüü̃ nadau i Isabel arü cuaꞌruü̃. Yeguma iãacügu rü Duturugü tümamaã nüü̃ niugü nayadaꞌaweẽẽü̃ ga yema buü̃. Rü ngẽmagagu rü poraãcü tangetchaü̃. Nümaü̃gü i duü̃ü̃gü tümamaã nüü̃ niugü na ngĩgü yamáacü. Isabel ngĩgürügü: “Rü poraãcü tchangetchaü̃”. Taꞌacü tanaüü̃? “Rü poraãcü tchayumüẽ i Yeuwacaꞌ ítchaca na tchoü̃ narüngü̃ẽẽü̃caꞌ.” Rü yemawena rü Gerard rü woetama yadaꞌaweacü nabu. Eꞌna Tupana nanangãü̃ tümaarü yumüẽ? Ngü̃́! Rü ngigürügü: “Nhuꞌma tchauacü 14 taunecü nüü̃ nangẽma rü woo nidaꞌaweü̃ rü nataãẽ. Rü nüü̃ tchadau i ngẽma tchoü̃ nanaweꞌ na Yeuwa nanangãü̃ i tchorü yumüẽgü rü taétü nawémeꞌ”.

Ngẽma cuaꞌruü̃gü nüna tacuaꞌãtchieẽẽ i taꞌacü nüü̃ yau i ngẽma Salmo: “Pa Corix, cuma rü nüxü̃ cuxĩnü i tümaarü yumüxẽ ya yíxema tama tügü icua̱xüxü̃güxe. Rü cuma rü tüxü̃ cutaãẽgüxẽxẽ rü tüxü̃ curüngü̃xẽxẽ.” (Salmo 10:17) Ngẽmaãcü rü tanawaꞌegü Tupanacaꞌ tayumüẽgüama rü tama nüü̃ tarütchau!

Rü Tupanaarü Ore nüü̃ nangema muü̃tchi i yumüẽgü na nanaü ga Ngetchutchu. Taꞌacü nüü̃ icuaꞌgü i yumüẽtchiga na Ngetchutchu nüü̃ nanguꞌẽẽ i norü duü̃ü̃gücaꞌ?