Ngetchutchu nhanagürü: “Erü wüxi i ãẽ̱xgacüarü churaragü rü to i ãẽ̱xgacüarü churaragümaã tá nügü nadai. Rü wüxi i nachiü̃ãne rü to i nachiü̃ãnemaã tá nügü nadai. Rü nümaxü̃ i nachiü̃ãnegüwa rü poraãcü tá naxĩã̱xãchiane, rü poraãcü tá nangu̱x i taiya, rü tá nataxüchi i ḏaaweane.” (Luca 21:10, 11) Guü̃ma i ngẽma ngupetügü nanaweꞌ na marü ningaica i nguneü̃ na Tupana inaügü nhama i naãnemaã ínacuáü̃. Ngẽma ngupetügü wüigu nangupetüü̃ i guü̃ma i naãnewa. Eꞌna ngẽma aicuma rü nangupetüü̃? Nüü̃ nadau.

1. DAIGÜ

Nagu ga 1914, inaügü wüi dai na nangupetüü̃ ga naãnearü tawa, yema niĩ ga Nüíra Dai i Taü̃ i guü̃ i naãnewa. Yatügü na nacaꞌ nangúẽẽ i ngẽma rü nüü̃ niugü na 1914 nanaütchicüü ga duü̃ü̃güarü maü̃ i guü̃ma i naãnewa. Yema daiwa nayema i muü̃tchi i ngẽmaü̃gü i dairuü̃ ga nũcümaarü yeera niĩ, cuaꞌãtchiruü̃, bombas, metralhadoras rü toomatchigü. Rü yemawena nangupetüü̃ ga Norü Tare Dai i Taü̃ i guü̃ i naãnewa, yeguma inaügügu togümaã nügü nadai namaã ga bombas atômicas. Rü 1914gucürüwa, guü̃guma nangupetüü̃ i daigü rü muü̃tchi i duü̃ü̃güü̃ nimaꞌgü.

2. NAĨÃꞌÃTCHIANE

Wüi popera a nüü̃ niu na guü̃ i taunecügu bemana nangupetüü̃ 100 naĩãꞌãtchianegü na poraãcü nanatchiẽẽ i naãne. Rü Serviço Geológico dos Estados Unidos nüü̃ niu na “norü poperagüwa nanaweꞌü̃rüü̃ (1900gucürüwa), na bemana nangupetüü̃ 16 taü̃ i naĩãꞌãtchianegü wüitchigü i taunecü.” Nümaü̃ nüü̃ niugü na yeera naĩãꞌãtchianegü nangupetüü̃ erü nhuꞌma natautchaü̃ na nüü̃ nacuaꞌü̃ i ngẽma. Notürü, aicuma niĩ na ngẽma naĩãꞌãtchianegü poraãcü ngúü̃ nüü̃ yangeẽẽgü rü nayueẽẽ a muü̃tchi i duü̃ü̃gü.

3. PORAÃCÜ NANGUꞌ I TAIYA

Guü̃ i naãnewa, duü̃ü̃gü nüü̃ natau i õna nagagu i daigü, rü womüẽẽwaꞌegüü̃, dĩẽruarü gutchaü̃gü rü tchiri namaã ínacuáü̃ i õna. Wüi popera ya 2018gu nawa i Programa Mundial de Alimentos nhanagürü: “Naãnearü tawa, 821 milhões i duü̃ü̃gü ngúü̃ i taiya nüü̃́ nangẽma, rü 124 milhões ya yíema duü̃ü̃gü rü poraãcü ngúü̃ ningegü i taiyagagu.” Wigütaꞌa 3,1 milhões i buẽgü nayue erü tama meã natchibüe i guü̃ i taunecügu.

4. DAꞌAWEGÜ RÜ TAÜTCHIÜ̃ I DAꞌAWEANEGÜ

Organização Mundial da Saúde arü popera rü nhanagürü: “Rü 2001gucürüwa nangẽma taütchiü̃ i daꞌaweanegü i naãnearü tawa. Duü̃ü̃gü wenaarü nidaꞌawegü namaã i cólera, peste rü febre amarela, rü ngẽwacaü̃ü̃ i daꞌawegümaã ta, cuaꞌãtchiruü̃, SARS [síndrome respiratória aguda severa], MERS [síndrome respiratória do Oriente Médio], ebola, zika rü na.” Rü nhamaãcüü nangupetüü̃ i covid-19 arü daꞌaweane. Woo duturugü rü cientistagü yeera nüü̃ nacuaꞌgüü̃ i daꞌawegütchiga, nagutchaü̃tchi nanameẽẽ tá i guü̃ma i ngẽma daꞌawegü.

5. TUPANAARÜ PURACÜ I NAÃNEARÜ TAWA

Ngetchutchu nüü̃ niu ta i to ngupetüü̃tchiga i nhaü̃: “Rü ngẽma Tupanaãrü ore i mexü̃ rü guxü̃ i naãnewa tá nüxü̃ nixugügü na guxü̃ i duü̃xü̃gü nüxü̃ na cua̱xgüxü̃ca̱x. Rü ngẽmawena tá nixĩ i nagúxü̃.” (Mateu 24:14) Woo muü̃tchi i gutchaü̃gü naãnewa nangupetüü̃ rü yeera i 8 milhões i duü̃ü̃gü rü Tupanaarü Oreü̃ tiugü i 240 natchiü̃ãnewa rü nüna naã i poperagü i 1.000 nagawaarü yeera. Ngẽma rü taguma nũcüma nangupetüü̃!

Taꞌacü Ngetchutchu nüü̃ niu na nangupetüü̃ rü nhuꞌma yangu. Tüꞌcüü̃ name nüü̃ icuaꞌgüü̃ i ngẽma? Erü Ngetchutchu nhanagürü: “Ngẽxguma nüxü̃ peda̱u̱xgu na nangupetüxü̃ i ngẽma pemaã nüxü̃ chixuxü̃, rü ngẽmawa tá nüxü̃ pecua̱x na yimama yiĩxü̃ ya Tupana na ãẽ̱xgacü yiĩxü̃ca̱x.” — Luca 21:31.

Ngẽma taꞌacü Ngetchutchu nüü̃ niu rü ta to Tupanaarü Orearü üyegü, rü tüü̃ narüngü̃ẽẽ na nüü̃ icuaꞌgüü̃caꞌ na Tupana nayamucutchi ga Ngetchutchu na ãẽꞌgacü niĩü̃caꞌ i dauü̃guü̃ i naãnewa. b (Salmo 2:2, 4, 6-9) Paãma, Ngetchutchu naãnemaã ínacuá tá rü nüü̃ narüoẽẽ i guü̃ma i natchiü̃ãnecü̃ãꞌgüarü ãẽꞌgacügü, rü nanameẽẽ tá i naãne na meẽtchiü̃ i naãne niĩü̃caꞌ na duü̃ü̃gü guü̃gutáma nawa namaẽü̃caꞌ.

Ngẽma Ngetchutchuarü ore paãma yangu tá: “¡Rü núma naxũ na torü ãẽ̱xgacü quiĩxü̃ca̱x! Rü tanaxwa̱xe i curü ngúchaü̃ na naxügüxü̃ i duü̃xü̃gü i ñoma i naãnewa ngẽxgumarüü̃ i daxũguxü̃ i naãnewa na curü ngúchaü̃ ínaxügüxü̃rüü̃.” (Mateu 6:10) Notürü, taꞌacü Ngetchutchu marü naü ga 1914gucürüwa? Rü taꞌacü tá nangupetüü̃ ngẽguma nhama naãnemaã ínacuágu?