Marü nüü̃ icuaꞌgüü̃ i taꞌacü Ngetchutchu nüü̃ niu na nangupetüü̃tchi yeguma inaügügu na namaã ínacuáü̃. Ngẽma ngupetügü nanaweꞌ na Tupana marü nayamucutchi i Ngetchutchu na ãẽꞌgacü niĩü̃caꞌ i daũwa.

Tupanaarü Ore nüü̃ niu na yeguma Ngetchutchu inaügügu na ãẽꞌgacü niĩ, nüma rü ínataꞌütchi ga daũguü̃ ga naãnewa ga Tchataná rü ngoꞌogü. Nhuꞌma nümagü nhama i naãnewa nangẽma, rü ngẽmagagu 1914gucürüwa nua nangẽma i muü̃tchi i gutchaü̃gü. — Apocaríchiu 12:7, 9.

Woo muü̃tchi i gutchaü̃gü na nua i naãnewa ngupetüü̃, Ngetchutchu ya ãẽꞌgacü, marü muü̃ma i duü̃ü̃güü̃ narüngü̃ẽẽ i naãnearü tawa. Rü ngẽmagagu duü̃ü̃gü nüü̃ nacuaꞌgüü̃ i Tupanaarü Ore rü nawaꞌeãcüma namaẽ. (Isaías 2:2-4) Muü̃tchi i duü̃ü̃gü marü nüü̃ nacuaꞌgüü̃ na nhuãcü meã natanüü̃gümaã namaẽ, rü ta na nhuãcü tama naguicatama rüĩnüẽ i dĩẽru rü puracügü. Ngẽma duü̃ü̃gü nüü̃ nacuaꞌgüü̃ na nhuãcü nüü̃́ nangẽma meü̃ i maü̃ i nhuꞌma rü ta Tupana nawaꞌeãcüma namaẽ.

Woo Ngetchutchu namaã ínacuá i daũguü̃ i naãnewa, natchiü̃ãnegüarü ãẽꞌgacügü nhama i naãnemaã ínacuágüü̃. Notürü, Tupana rü Ngetchutchuü̃ nhanagürü: “Namaxã icucuáxü̃ca̱x i ngẽma curü uanügü.” (Salmo 110:2) Paãma, Ngetchutchu nüü̃ narüoẽẽ tá i guü̃ma i norü uwanügü rü nanameẽẽ i guü̃ma i gutchaü̃gü nacaꞌ i yíema Tupanaga ĩnüẽe.

Ngẽguma ngẽma rü nangupetügu, taꞌacü tá Ngetchutchu naüü̃?

• Nüü̃ narüoẽẽ i guü̃ma yaõgüü̃tücumügüneta. Yaõgüü̃tücumügü na Tupanatchiga doragüü̃ niugü rü nanagutchaẽẽ i duü̃ü̃güarü maü̃ rü yagúü̃ tá. Tupanarü Ore nüü̃ niu na yaõgüü̃tücumügüneta nhama wüi i nge i ngẽãẽü̃tchicürüü̃ niĩ i norü pecadugagu. Ngẽma ngupetüü̃ nabaiꞌãtchiẽẽ i muü̃tchi i duü̃ü̃gü. — Apocaríchiu 17:15, 16.

• Nüü̃ narüoẽẽ i guü̃ma i natchiü̃ãnegüarü ãẽꞌgacügü. Ngetchutchu i Tupanaarü poramaã nüü̃ narüoẽẽ tá i guü̃ma natchiü̃ãnegüarü ãẽꞌgacügü. — Apocaríchiu 19:15, 17, 18.

• Nüü̃ narüoẽẽ i guü̃ma i duü̃ü̃gü i tchieü̃. Taꞌacü tá nangupetüü̃ namaã i duü̃ü̃gü na norü ngútchaü̃maã tama Tupanaga naĩnüẽtchaü̃? “Ngẽma duü̃xü̃gü i chixexü̃gu maxẽxü̃ i tama Tupanaga ĩnüexü̃ rü tá ínawoxü̃ i ñoma i naanewa.” — Provérbios 2:22.

• Nüü̃ narüoẽẽ i Tchataná rü ngoꞌogü. Tchataná rü ngoꞌogü taucürüwama wenaarü ‘duü̃ü̃güü̃ nawomüẽẽü̃.’ — Apocaríchiu 20:3, 10.

Rü ngeü̃rüüü̃ i meü̃gü nangupetüü̃ tá namaã ya teé Tupanaga ĩnüẽe?

Guü̃ma i meü̃gü na Ngetchutchu naü tá tama namaã nawüigu i taꞌacü natchiü̃ãnegüarü ãẽꞌgacügü marü naügüü̃. Rü 144 mil i duü̃ü̃gü ya ideetchigüü̃ Ngetchutchuü̃ narüngü̃ẽẽ tá na naãnemaã ínacuáü̃caꞌ i daũguü̃ i naãnewa. (Apocaríchiu 5:9, 10, 14:1, 3) Nüma rü nayanguẽẽ tá i guü̃ma i Yeuwaarü ngútchaü̃ i naãnecaꞌ. Nüü̃ nadau i taꞌacü Ngetchutchu naü tá i Tupanaarü poramaã:

• Nüü̃ narüoẽẽ i daꞌawegü rü yu. “Rü taxuxü̃táma i duü̃xü̃ rü ñanagürü: “Chidaxwe”” rü “marü tãũtáma texé tayu.” — Isaías 33:24, Apocaríchiu 21:4.

• Duü̃ü̃gü meãma wüigu namaẽ. “Peacügü tá nameãmaregüü̃,” rü “guxãtáma taxũtáma muü̃eãcü tamaxẽ. Rü wüxíxechigü rü tá tümaarü úbapechitagu, rü tümaarü iguérapechitagu tarüngü̃.” — Isaías 54:13, TNM, Miqueias 4:4.

• Guãtáma tüü̃́ nangẽma meü̃ i puracü. “Rü nüü̃́ namegü tá na nameꞌẽgümaã napuracüeü̃ i tchama tchideetchigüü̃. Rü norü puracü rü taũtáma notücaꞌma niĩ.” — Isaías 65:22, 23, TNM.

• Nanameẽẽ i naãnearü gutchaü̃gü. “Rü nataãxẽ i ngẽma ngexta taxuema ixãpataxü̃wa ngẽxmaxü̃ i naane, naane ga ipamarexü̃, rü taãxẽmaxã yapa.” — Isaías 35:1.

• Duü̃ü̃güü̃ nanguꞌẽẽ i taꞌacü tá naügüü̃ na maü̃ i taguma gúü̃ nüü̃́ ingẽmagüü̃caꞌ. “Rü ngẽma duü̃xü̃gü tá nüxü̃́ nangẽxma i maxü̃ i taguma gúxü̃ ega cuxü̃ nacua̱xgügu na cuxicatama Tupana na quiĩxü̃, rü choxü̃ nacua̱xgügu na choma rü Cristu ga núma choxü̃ cumucü na chiĩxü̃.” — Juã́ũ 17:3.

Tupana ãũrima nanawaꞌe na cunayau tá i ngẽma meü̃gü. (Isaías 48:18, TNM) To i naátü nanaweꞌ taꞌacü nhuꞌma cuüü̃ na cunayauü̃caꞌ i ngẽma i wipeꞌewa.