• Tupana nüü̃ naunetacü. “Choma rü marü nüxü̃ chaxuneta ya yimá ãẽ̱xgacü.” ‘Rü tchona nacaꞌ naca na cumeꞌwa tchangemagüẽẽü̃caꞌ i guü̃ma i natchiü̃anegü i nhama i naãnewa ngẽmagüü̃ na curü yiĩü̃caꞌ!’ — Salmo 2:6, 8.

• Dawítaa. “Erü tatanügu nabu i wüxi i õxchana . . . Rü ngẽma norü pora nax ãẽ̱xgacü yixĩxü̃ rü guxü̃ i nachixü̃anegüwa tá nangu. Rü ngẽma nügümaxã nax inangüxmüxẽẽãxü̃ i duü̃xü̃gü rü tagutáma inayarüxo.” — Isaías 9:6, 7.

• Beréü̃gu nabu. “Pa Beréü̃ . . . , cugu tá nixĩ i nabuxü̃ ya yimá Iraéanecüã̱xgüarü ãẽ̱xgacü ya woetama marü ngẽxmaechacü.” — Miqueias 5:2, 4.

• Duü̃ü̃gü nüü̃ nao rü nüü̃ nimaꞌ. “Rü yemaacü nüxü̃ taxoe rü tama tanayauxgüchaü̃. . . . Natürü tórü chixexü̃gagu nixĩ ga napi̱xẽẽgüãxü̃. Rü tórü pecádugagu nixĩ ga ngúxü̃ yangexü̃.” — Isaías 53:3, 5.

• Ínadaẽẽ rü nanatatchigaẽẽ ya nüma. “Erü cuma rü taxũtáma tauquewa choxü̃ cuta̱x. Rü taxũtáma wüxi i ãxmaxü̃gu nüxü̃ curüngüma ya yima aixcüma cumücü ixĩcü. . . . Rü cuxü̃tawa nangexma i taxüchixü̃ i taãxẽ, rü ngẽma taãxẽ rü taguma inayagu̱x.” — Salmo 16:10, 11.

Naãnearü ügügucürüwa, wüirica i duü̃ü̃ nüü̃́ nangẽma i guü̃ma i ngẽma nacümagü na meü̃ i ãẽꞌgacü niĩü̃caꞌ, rü ngẽma duü̃ü̃ Ngetchutchu ya Cristu niĩ. Rü nhuꞌmatchi, wüi ãĩyu Maríaü̃ nhanagürü ga Ngetchutchutchiga: “Rü Cori ya Tupana rü tá nuxcümaü̃cü ga ãẽ̱xgacü ga Dabírüü̃ ãẽ̱xgacüxü̃ nayaxĩxẽẽ, . . . rü tagutáma ínanguxuchi na ãẽ̱xgacü na yiĩxü̃.” — Luca 1:31-33.

Notürü Ngetchutchu tama namaã ínacuá yeguma nua ga naãnewa namaü̃gu. Nüma rü duü̃ü̃gümaã ínacuáü̃ tá i dauü̃guü̃ i naãnewa. Tüꞌcüü̃ Ngetchutchu ãẽꞌgacü i meẽtchiü̃ niĩ? Nüü̃ nadau i taꞌacü Ngetchutchu naü yeguma nua ga naãnewa nayemagu.

•   Ngetchutchu nacaꞌ nagutchaãẽ ga duü̃ü̃gü. Ngetchutchu nüü̃ narüngü̃ẽẽ ga nagúü̃raü̃ü̃ ga duü̃ü̃gü. (Mateu 9:36, Marcu 10:16) Wüieꞌpüꞌcünagu, yatü ga tchaünemaã idaꞌawecü rü Ngetchutchucaꞌ naca i nhaü̃: “Pa Corix, ngẽxguma cunaxwa̱xegu na choxü̃ curümexẽẽxü̃, rü cuxü̃́ natauxcha na chauxca̱x cuyataanexẽẽxü̃.” Rü Ngetchutchuaü̃́ nangetchaü̃tümüü̃ ga guma yatü rü nacaꞌ nayataaneẽẽ. — Marcu 1:40-42.

• Ngetchutchu tüü̃ nanguꞌẽẽ na nhuãcü Tupanaü̃ tataãẽẽẽgü. Nüma rü nhanagürü: “Rü taxucürüwa Tupanaca̱x pemaxẽ, ega perü dĩẽruguama perüxĩnüẽgu.” Nüma rü tüü̃ naucuꞌẽ na ngẽma tanawaꞌeü̃ i togü tamaã na naüü̃, rü name niĩ i yiemagü rü ta ngẽmaãcütama namaã tanaü. Rü nhuꞌmatchi, Ngetchutchu nanaweꞌ na Tupana nacaꞌ nagutchaãẽ i taꞌacü iügüü̃. Rü Tupana nüü̃ nacuaꞌü̃ ta i taꞌacügu tarüĩnuẽ. Ngẽmaãcü, na Tupana tamaã nataãẽü̃caꞌ, inawaꞌegü namaã ítacuágü i torü ĩnü. (Mateu 5:28, 6:24, 7:12) Ngetchutchu nananguꞌẽẽ na taãẽãcü tamaẽü̃caꞌ inawaꞌegü nüü̃ icuaꞌgüü̃ i taꞌacü Tupana tüü̃ nawaꞌe rü ngẽmaãcü tamaẽ. — Luca 11:28.

• Ngetchutchu nananguꞌẽẽ na nhuãcü duü̃ü̃güü̃ nangetchaü̃. Ngetchutchuarü ore rü norü ü duü̃ü̃güü̃ nanagútchaü̃ẽẽ. “Rü ga duü̃xü̃gü rü naba̱i̱xãchiãẽgü namaã ga norü ngu̱xẽẽtae. Yerü nüma rü Tupanaãrü poramaã nanangúexẽẽ.” (Mateu 7:28, 29) Nüma rü nüü̃ nanguꞌẽẽ ta: “¡Nüxü̃ pengechaü̃ i perü uwanügü!” Rü ta Ngetchutchu nacaꞌ nayumüẽ ga duü̃ü̃gü na nüü̃ nimaꞌtchaü̃ i nhaü̃: “Pa Chaunatüx, ¡nüxü̃ nangechaü̃ i ñaã duü̃xü̃gü, erü tama nüxü̃ nacua̱xgü na ṯacü rü chixexü̃ naxüexü̃!” — Mateu 5:44, Luca 23:34.

Ngetchutchu niĩ i duü̃ü̃ i meẽtchi nacaꞌ na naãnemaã ínacuáü̃ erü mecümaü̃ niĩ rü duü̃ü̃gücaꞌ nagutchaãẽ. Notürü nhugu tá nüma rü naãnemaã ínacuáü̃?