DUÜ̃Ü̃GÜ

Tupanaarü Ore rü nhanagürü: “Notürü ngẽma meü̃gü rü norü tá niĩ i nhaa naãne rü guü̃gutáma nawa namaẽ.” — SALMO 37:29.

NHAMA I NAÃNE

Tupanaarü Ore rü nhanagürü: “Rü duü̃ü̃gü rü nibuetanü rü togü rü niyuetanü, notürü nhama i naãne rü nanaairügumaraü̃mare.” — ECLESIASTES 1:4.

TAꞌACÜTCHIGA NIĨ I NGẼMA: Tupanaarü Ore nüü̃ iurüü̃, na nhama naãne nangẽmaetchaü̃ rü duü̃ü̃gü guü̃gutáma nawa namaẽ. Rü ngẽmaãcü, taꞌacü niĩ i naãnearü guꞌ?

NHAÜ̃GU RÜĨNÜ: Tupanaarü Ore nüü̃ niu na naãnearü guꞌ yeguma Noéarü nguneü̃gurüü̃tátama niĩ. Yema nguneü̃gu nayema i “taü̃ i máeta i nhaa i naãnewa.” (Gênesis 6:13) Notürü, yatü i meü̃ niĩ ga Noé. Yemagagu, Tupana nüü̃ namaẽẽẽ ga Noé rü natanüü̃, notürü nüü̃ narüoe ga duü̃ü̃gü i tchieü̃gü ga taütchicü ga mucümaã. Yema ngupetütchiga Tupanaarü Ore nüü̃ niu i nhaü̃: “Guma mucü ga tacü ga iyanaoẽẽcü ga guü̃ma ga taꞌacü ga nhama ga naãnewa yemaü̃.” (2 Pedru 3:6) Ngẽma wetchicuru tüü̃ naweꞌ na Tupana tama inayarüo i nhama i naãne. Notürü inayarüo ga guü̃ma i duü̃ü̃gü i tchieü̃. Ngẽmaãcü, ngẽguma Tupanaarü Ore nüü̃ yaugu na nhama i naãne naguꞌ tá, ngẽma rü tama i nhama i naãnetchiga niĩ. Notürü, taꞌacü tá naguꞌ i wipeꞌewa? Duü̃ü̃gü i tchieü̃ rü gutchaü̃gü i naãnewa ngẽmaü̃.

GUTCHAÜ̃GÜ RÜ TCHIEÜ̃GÜ

Tupanaarü Ore rü nhanagürü: “Rü noretama i nguneü̃ natau na ngẽma tchieü̃ ügüü̃ rü na iyanaoü̃. Rü woo tá nacaꞌ cudaꞌgu rü taugutáma nüü̃ icuyangau. Notürü yíema Cori ya Tupanapeꞌewa meü̃gu rüĩnüee rü yíemagü tá tiĩ ya nayaugüe i nhaa naãne rü ngẽmawa tá niĩ i aicuma tataãẽgüü̃.” — SALMO 37:10, 11.

TAꞌACÜTCHIGA NIĨ I NGẼMA: Woo guü̃ma i duü̃ü̃gü i tchieü̃ nayue ga taütchicü ga mucü ga Noéarü nguneü̃gu, yemawena duü̃ü̃gü wenaarü tchieü̃ naügüü̃ rü gutchaü̃gü nüü̃́ nayema. Notürü, marü ningaica i nguneü̃gu na Tupana guü̃ma i tchieü̃ inayarüo tá. Rü Salmo 37 nüü̃ iurüü̃ rü nhanagürü: “Rü noretama i nguneü̃ natau na ngẽma tchieü̃ ügüü̃.” Tupana inayarüo i guü̃ma i tchieü̃ ngẽguma nhama i naãnemaã inacuágu tá, notürü yíema na Tupanaga iĩnüẽ nanayaugüe i nhaa naãne.

NHAÜ̃GU RÜĨNÜ: Eꞌna natchiü̃ãnegüarü ãẽꞌgacügü Tupanaga naĩnüẽ? Tupanaarü Ore nüü̃ iugu rü tama. Rü Tupanaarü uwanügü tá niĩgü i nümagü. (Salmo 2:2) Rü taꞌacü tá ngupetü? ‘Tupana ya dauü̃wa ngẽmacü rü tá nayamucutchi i wüi i ãẽꞌgacü i tagutáma teé iyanaoẽẽcü rü tagutáma to i natchiü̃ãne nüü̃ rüyeeracü, rü nüma rü guü̃gutáma ãẽꞌgacü niĩ.’ (Daniel 2:44) Notürü, tüꞌcüü̃ tanawaꞌegü na natchiü̃ãnegüarü ãẽꞌgacügüü̃ narüoe tá?

Tupanaarü Ore rü nhanagürü: “Naãnecü̃ãꞌgü rü tama nüü̃ nanguü̃gü na nügütama nüü̃ nacuaꞌgüẽẽ i norü nama.” — JEREMIAS 10:23, TNM.

TAꞌACÜTCHIGA NIĨ I NGẼMA: Tupana tama nanaü i duü̃ü̃gü na nügümaã nacuágüeü̃caꞌ. Rü nümagü taucürüwa meã togümaã nacuá rü bai duü̃ü̃güarü gutchaü̃güü̃ nameẽẽ.

NHAÜ̃GU RÜĨNÜ: Wüi popera a nüü̃ niu na wüitchigü i natchiü̃ãnegüarü ãẽꞌgacügü taucürüwama ínameẽẽ i “gutchaü̃gü i naãnearütawa ngẽmaü̃, cuaꞌãtchirüü̃ ngúü̃ i taiya, ngearü dĩẽruãgüü̃, daꞌawegü, taütchiü̃ i gutchaü̃gü, máetagüü̃ rü gueragü.” Rü ta nüü̃ niu i nhaü̃: “Nümaü̃ . . . nagu nayaõgüü̃ na nawaꞌe wüirica i ãẽꞌgacü na nhama i naãnemaã inacuáü̃caꞌ na ínameẽẽü̃caꞌ i guü̃ma i gutchaü̃gü.” Notürü, tchi guü̃ma i natchiü̃ãnegüarü ãẽꞌgacügü wüigu napuracüegu taucürüwama inayarüo i guü̃ma i gutchaü̃gü erü ipecaduãgüü̃ niĩgü. Rü Tupana ya ãẽꞌgacürica nüü̃́ nangẽma i pora na nameẽẽ i guü̃ma i gutchaü̃gü i nhama i naãnewa na tagutáma wenaarü gutchaü̃gü ngẽmaü̃caꞌ.

Tupanaarü Ore nüü̃ iurüü̃ na narüo tá i guü̃ma i tchieü̃ i nhuꞌma ngẽmaü̃ rü tama nhama i naãne, erü Tupana tá wipeꞌewa meẽtchiü̃ i naãne nayaĩẽẽ i naãne!

Notürü, nhugu tá nangupetüü̃ i ngẽma? To i naátü nangãü̃ i ngẽma ca i Tupanaarü Orewa.