Na nhama i naãnemaã ínacuáü̃caꞌ, Tupana Ngetchutchuü̃ nauneta na nhama i naãnemaã ínacuáü̃caꞌ. Rü ngẽguma Ngetchutchu nhama i naãnemaã nacuágu rü duü̃ü̃gü wüigu taãẽãcü namaẽ tá. Ngetchutchu rü tama nhama i naãnecü̃ãꞌarü ãẽꞌgacügürüü̃ niĩ erü guü̃ma i duü̃ü̃gücaꞌ nagutchaãẽẽ. Rü ngẽmacaꞌ nüma rü tá ngetchaü̃ãcüma rü mecümaãcüma duü̃ü̃gümaã ínacuá. — Isaías 11:4.

Meẽtchiü̃ i naãnewa nagúü̃raü̃ü̃ i duü̃ü̃gü taãẽcü wüigu namaẽ rü wüiicatama i natanüü̃ niĩ tá. (Apocaríchiu 7:9, 10) Rü guü̃ma i duü̃ü̃gü aicuma Tupanaü̃ nangetchaü̃gü rü ngẽmacaꞌ nügü nangetchaü̃gü. Rü wüigu nüna nadaugü i nhama i naãne na Yeuwaarü ngútchaü̃ naügüü̃caꞌ. — Salmo 115:16.

Wipeꞌewa tá Tupana nanameẽẽ i nhama i naãnearü gutchaü̃gü. (Salmo 24:1, 2) Nũcüma, Ngetchutchu ga Tupanaarü poramaã ínayatchaãtchi ga buanecü. (Marcu 4:39, 41) Yema rü nanaweꞌ na ngẽguma Ngetchutchu naãnemaã ínacuágu, tagutáma taütchiü̃ i gutchaü̃gü nangupetü. — Oséias 2:18.

Rü taúetama tidaꞌawegü rü tayaẽgüü̃ rü tayueü̃ i meẽtchiü̃ i naãnewa. (Isaías 35:5, 6, TNM) Edéü̃ãnerüü̃ meẽtchiü̃ i naãnewa nangẽma tá i muü̃tchiü̃ i õnagü na guü̃ma i duü̃ü̃güü̃ natchibüeü̃caꞌ. Rü ta, ngẽ́ma natautáma i gutchire. (Gênesis 2:9) Nũcümarüü̃ ta, Tupana norü duü̃ü̃güna nadau, wipeꞌewa tá meẽtchiü̃ i naãnewa muü̃tchi i õna ngẽmaü̃. — Levítico 26:4, 5, TNM.

Wipeꞌewa i meẽtchiü̃ i naãnewa duü̃ü̃gü meã nügümaã namaẽ rü nügümaã namecümaü̃. Rü nhuꞌmatchi tauü̃táma gueragü nangupetü rü bai womüẽẽwaꞌegüü̃. Notürü duü̃ü̃gü nüü̃ nangẽma i taꞌacü nüü̃ tau. Tupanaarü Ore rü nhanagürü: “Rü guãtáma taũtáma muü̃eãcü tamaẽ. Rü wüíetchigü rü tá tümaarü úwapetchitagu, rü tümaarü fígupetchitagu tarüngü̃.” — Miquéias 4:3, 4.

Guü̃ma i natanüü̃gü nüü̃ nangẽma i ĩpata rü tama ĩpata taücatanü. Guü̃ma i puracü i nawa ngẽmaü̃ meẽtchiü̃ niĩ. Tupanaarü Ore nüü̃ niu na meẽtchiü̃ i naãnewa duü̃ü̃gü taãẽãcü napuracüe tá. — Isaías 65:21-23, TNM.

Tupanaarü Ore rü nhanagürü: “Rü nhama i naãne rü ngẽma duü̃ü̃gü i tchoü̃ cuaꞌgüü̃maã tá nanapá.” (Isaías 11:9) Meẽtchiü̃ i naãnewa duü̃ü̃gü nüü̃ nacuaꞌgüü̃ i guü̃ma i taꞌacü Yeuwa naüü̃tchiga rü nüü̃ tacuaꞌãtchi na Yeuwa rü guü̃ma cuácü niĩ. Rü tauéma nanaü tá i nanegü na namaã nügümaã nadaigüü̃caꞌ rü bai togüü̃ natchieü̃caꞌ. (Isaías 2:4) Rü ngẽmaãcü, duü̃ü̃gü nüü̃ nacuaꞌgü tá na nhuãcü wüigu meã namaẽẽü̃caꞌ rü ta na nhuãcü meẽtchiü̃ i naãnena nadauü̃caꞌ. — Salmo 37:11.

Tupana ngetchaü̃maã nanaü i nhama i naãne na guü̃ma i duü̃ü̃gü taãẽãcü tamaẽü̃caꞌ. Nüma rü nanawaꞌe na guü̃guma i duü̃ü̃gü ngẽ́ma nangẽmagüetcha. (Salmo 37:29; Isaías 45:18, TNM) Naüü̃caꞌ i ngẽma Tupana yuü̃ narüyeera tá. (Isaías 25:8, TNM) Tupanaarü Ore tamaã iunetaü̃ rü nhanagürü: “Rü marü tãũü̃táma teé tayu, rü teé tümaãrü ngetchaü̃maã taau, rü teé ngúü̃ tingegü.” (Apocaríchiu 21:4) Teé naãnearü guꞌwena tamaẽama rü teé wenaarü namaẽ i meẽtchiü̃ i naãnewa nanayaugü tá i maü̃ i taguma gúü̃. — Juã́ũ 5:28, 29; Puracügü 24:15.

 Nhuꞌma, muü̃tchiẽma ya duẽẽgü nügü nameẽẽ na meẽtchiü̃ i naãnewa namaẽü̃caꞌ. Woo nipecaduãgüü̃ nümagü rü nügü naporaẽẽ na meü̃ i duü̃ü̃gü Tupanapeꞌewa niĩgüü̃caꞌ. Nhuãcü? Nümagü rü Yeuwatchigaü̃ rü Ngetchutchutchigaü̃ nacuaꞌgüü̃. — Juã́ũ 17:3.

Nüü̃ nadau taꞌacü tá cuü na cumaü̃amaü̃caꞌ i naãnearü guꞌwena rü ta na cumaü̃ü̃caꞌ i meẽtchiü̃ i naãnewa na Tupana tamaã iunetaü̃. Wüi Yeuwaarü Orearü Uruü̃na naca na Tupanaarü Orecaꞌ cuü̃ nanguꞌẽẽü̃caꞌ namaã i popera Guü̃gutáma Cutaãẽ!.