Nhaa poperawa marü nüü̃ icuaꞌgüü̃ na paãma Tupana nüü̃ narüoe i guü̃ma i tchieü̃ rü gutchaü̃gü i nhama i naãnewa ngẽmaü̃. Ngẽma rü aicuma nangupetüü̃ erü Tupanaarü Ore rü nhanagürü:

“Nhama i naãne rü guü̃ma i ngútchaü̃gü i nawa ngẽmaü̃ rü tá naguꞌ.” — 1 JUÃ́Ũ 2:17.

Notürü nagu tayaõgüü̃ na ngẽmawena muü̃ma i duü̃ü̃gü namaẽama erü Tupanaarü Ore rü nhanagürü:

“Yíema Tupanaga ĩnüẽ rü guü̃gutáma tamaü̃.”

Ngẽmaãcü, na tamaẽamaü̃caꞌ inawaꞌegü Yeuwaarü ngútchaü̃ iügüü̃. Notürü na nüü̃ nacuaꞌü̃caꞌ i Tupanaarü ngútchaü̃ nanawaꞌe nüíraü̃ nüü̃ nacuaꞌü̃.

Ngetchutchu nhanagürü: “Rü ngẽma duü̃ü̃gü tá nüü̃́ nangẽma i maü̃ i taguma gúü̃ ega cuü̃ nacuaꞌgügu na cuicatama Tupana na quiĩü̃.” (Juã́ũ 17:3) Inawaꞌegü Tupanaü̃ icuaꞌgüü̃ na tanayaugüü̃caꞌ i maü̃ i taguma gúü̃. Woo Tupanaü̃ icuaꞌgüü̃ rüeꞌna nagu tayaõgüü̃, inawaꞌegü Tupanamaã iãmücügüü̃. Rü ngẽmacaꞌ, inawaꞌegü yigü iporaẽẽ na nüna tangaicamaü̃caꞌ. Ngiã nüü̃ tadaugü i nümaü̃ i Tupanaarü Ore i aicumaü̃ na tüü̃ narüngü̃ẽẽ na Tupanamücügüü̃tchi tiĩgüü̃caꞌ.

Na tamaü̃amaü̃caꞌ inawaꞌegü guü̃ i nguneü̃gu tatchibüe. Notürü Ngetchutchu rü nhanagürü: “Tãũü̃táma põũĩca nanamaẽẽẽ i duü̃ü̃gü, notürü guü̃ma i ore i Tupana nüü̃ iuü̃ niĩ i duü̃ü̃güü̃ maẽẽẽü̃, nhanagürü.” — Mateu 4:4.

Nhuꞌma, nüü̃ itayangau i Yeuwaarü Ore i norü Ore i ümatüü̃wa. Ngẽguma Tupanaarü Orewa iugütaegu rü nüü̃ icuaꞌgüü̃ taꞌacü Tupana marü tacaꞌ naü, rü taꞌacü naü i nhuꞌma rü wipeꞌewa tá.

Bemana cunawaꞌe Tupanaga naĩnüü̃, notürü cucaꞌ nagutchaü̃tchi narüoe i nacüma i tchieü̃? Taꞌacü cuü̃ narüngü̃ẽẽ? Meãma Tupanaü̃ cucuaꞌü̃.

Cuaꞌãtchiruü̃, wüie ya ngeꞌe ya Ásiacü̃ãꞌ tchieü̃ taü i Tupanapeꞌewa. Notürü, yeguma inaügügu na Tupanaarü Orecaꞌ tangú, tüma rü nüü̃ tacuaꞌ na Tupana nanawaꞌe na name niĩ na ‘nüü̃ rüoü̃ i naü̃nearü ngútchaü̃’ nanaüü̃. (1 Corĩ́tiucü̃ãꞌ 6:18) Tupanaarü ngü̃ẽẽcaꞌ ítaca rü yemacaꞌ marü tama tchieü̃ taüü̃. Notürü, tüma rü tügü taporaẽẽ na tama tchieü̃ taüü̃caꞌ. Tüma rü nhatarügü: “Ngẽguma tchieü̃gu tcharüĩnügu, Tupanacaꞌ tchayumüẽ erü nüü̃ tchacuaꞌ na Yeuwa tchoü̃ narüngü̃ẽẽ. Na Yeuwacaꞌ tchayumüẽgu yeeraãcü nüna tangaicama.” Ngẽgumarüü̃, nhuꞌma muü̃tchiema ya duẽẽgü Tupanaü̃ nacuaꞌgüü̃, rü nüma rü nüna nanaã i pora na nüü̃ narüoeü̃caꞌ i nacüma i tchieü̃ na meã namaẽü̃caꞌ i napeꞌewa. — 2 Corĩ́tiucü̃ãꞌ 4:7.

Ngẽguma yeera Tupanaü̃ cucuaꞌgu yeera Tupanamaã cuãmücü. (Gáratanecü̃ãꞌ 4:9; Salmo 25:14) Rü ngẽmagagu, cuma rü cunayau tá maü̃ i taguma gúü̃ i meẽtchiü̃ i naãnewa. Notürü, nhuãcü tá niĩ i meẽtchiü̃ i naãne? To i naátü yeera i ngẽmatchiga nidea.