“Ípeuãẽgü! Erü tama nüü̃ pecuaꞌ i taꞌacü rü nguneü̃ rü taꞌacü rü ngora.” — MATEU 25:13.

“Rü ngẽmacaꞌ, ipedaue rü peuãẽgü! Erü tama nüü̃ pecuaꞌ i taꞌacü rü ngora tá ítchangu i tchama.” — MARCU 13:33.

Ngẽmacaꞌ taúema nüü̃ tacuaꞌ nhugu tá nangupetü i ngẽma. Notürü Tupanarica nüü̃ nacuaꞌ i ngẽma nguneü̃ rü ngora i nagu tá nangupetü i tchieü̃arü guꞌ. (Mateu 24:36) Notürü eꞌna na taguma nüü̃ icuaꞌgüü̃ nhugu tá nangupetüü̃ i ngẽma? Tama. Taꞌacü Ngetchutchu norü ngúeü̃gümaã nüü̃ niu nanaweꞌtchi taꞌacü nangupetüü̃ naü̃pa na nagúü̃ i naãne.

Ngetchutchu nüü̃ niu i nümaü̃ i ngupetügü na nüü̃ icuaꞌgüü̃caꞌ na marü ningaica i naãnearü guꞌ. Ngetchutchu nhanagürü: “Wüi i natchiü̃ãne rü to i natchiü̃ãnemaã tá nügü nadai. Rü wüi i ãẽꞌgacü rü to i ãẽꞌgacümaã tá nanu, rü norü tchuraragü rü ngẽma to i ãẽꞌgacüarü tchuraragümaã tá nügü nadai. Rü tá taiya nanguꞌ, rü tá nataütchi i daꞌaweanegü, rü muü̃ma i natchicawa rü tá naĩãꞌãtchiane.” (Mateu 24:3, 7; Luca 21:11) Eꞌna nhuꞌma inguü̃ i Ngetchutchuarü Ore?

Nhamaãcüü duü̃ü̃gü niõẽgü nagagu i gueragü, ngúü̃ i taiya, daꞌaweanegü rü naĩãꞌãtchianegü. Cuaꞌãtchirüü̃, 2004gu, már ga Oceano Índicowa, poraãcü naĩãꞌãtchiane nangupetü rü yemacaꞌ 225 mil duü̃ü̃gü nayue. Rü tamaẽꞌpüꞌ taunecügügu, wigutaꞌa 7 milhões i duü̃ü̃gü nayue i guü̃ i naãnewa nagagu i ngẽma taütchiü̃ i daꞌaweane ya COVID-19. Ngetchutchu nüü̃ niu na ngẽguma ngẽma rü nangupetügu marü ningaica i naãnearü guꞌ.

Tupanaarü Ore nüü̃ niu na naü̃pa i nagúü̃, ngẽma torü nguneü̃gu nagutchaü̃tchi tá. (2 Pedru 3:3, 4) Rü 2 Timúteu 3:1-5wa nüü̃ iurüü̃, nguneü̃güarü guꞌgu nangẽmagü i duü̃ü̃gü na tama Tupanaga ĩnüẽü̃ tá. (Nüü̃ nadau i quadru “ Naü̃pa na nagúü̃ i naãne.”) Nhamaãcüü, marü nüü̃ cudau na duü̃ü̃gü nügüguicatama rüĩnüẽ, nidĩẽruãgüü̃tchaü̃, máetagüü̃, rü ta tama nangetchaü̃waꞌegü. Ngẽma rü nanaweꞌ na nguneü̃güarü guꞌwa ingẽmagüü̃.

Nhuguratáta ngẽma rü nangupetüü̃? Tupanaarü Ore nüü̃ niu na marü ningaica i nguneü̃gu na Tupana inayaoẽẽü̃ i ‘ngẽma duü̃ü̃gü i nhama i naãneü̃ natchieẽẽü̃.” — Apocaríchiu 11:15-18; 12:12.

Tupana marü nüü̃ nacuaꞌ na nhugu tá inayaoẽẽ i guü̃ma i tchieü̃. (Mateu 24:36) Notürü, Tupana tama nanawaꞌe na teé íyarütauü̃. (2 Pedru 3:9) Notürü nanawaꞌe na guãma nüü̃ rüoe i tacüma i tchieü̃ erü nüma rü nanawaꞌe na wüitchigü i yiemagü tamaẽama naãnearü guꞌwena ngẽguma nhama i naãne meẽtchiü̃ i naãne niĩ tá.

Guü̃ i naãnewa Tupana duü̃ü̃güü̃ narüngü̃ẽẽ na nüü̃ nacuaꞌgüü̃caꞌ i taꞌacü tá naügüü̃ na meẽtchiü̃ i naãnewa namaẽü̃caꞌ. Ngetchutchu nhanagürü: “Tupanaarü ore i meü̃ rü guü̃ i naãnewa tá nüü̃ niugügü na guü̃ i duü̃ü̃gü nüü̃ na cuaꞌgüü̃caꞌ.” (Mateu 24:14) Rü naãnearütawa Yeuwaarü Orearü Uruü̃gü ngẽma ore i meü̃tchiga duü̃ü̃gümaã nüü̃ niugü i bilhões i ngoragügu. Ngetchutchu nüü̃ niu na guü̃ i naãnewa ngẽma puracü nangupetü na duü̃ü̃güü̃ ingúeẽẽü̃caꞌ naü̃pa na nagúü̃ i naãne.

Natchiü̃ãnegüarü ãẽꞌgacügü paãma niguꞌ tá. Notürü cuma rü cumaü̃ tá i meẽtchiü̃ i naãnewa. Taꞌacü tá cuüü̃ na nawa cumaü̃ü̃caꞌ? To naátü nanaweꞌ i ngẽma.