Buü̃gü nawaꞌe na duü̃ü̃gü nüü̃ narüngü̃ẽẽ rü nüü̃ naucuꞌẽ. Pemagü ya nanatügü rü naegü, peacügücaꞌ meü̃ i duü̃ü̃gü piĩgü na nüü̃ narüngü̃ẽẽgüü̃caꞌ rü ngẽma rü perü puracü niĩ. Notürü, togü i duü̃ü̃gü rü ta nüü̃ narüngü̃ẽẽ i cuacügü.

Muü̃tchi i iãnegüwa, buü̃gü rü tama guü̃guma rü duü̃ü̃gümaã narütcho. Nüü̃ nadau tüꞌcüü̃:

• Erü buü̃gü rü ngúepataü̃wa nangẽmagüetcha, rü nawa nangẽma i buü̃güarü yagüeü̃ tarümumaẽü̃tchi.

• Ngúewena, nümaü̃ napatacaꞌ nawoegu rü nüíca narütcho erü nanatü rü nae napuracüe.

• Wüi nguꞌẽẽtae i Estados Unidos arü, nüü̃ niu na buü̃gü i nüü̃́ nangẽma 8 nhuꞌmata 12 taunecügü rü 6 ngoragu nawa nangẽma i internet, televisão rü videogames i wüitchigü i nguneü̃gu. a

Wüi popera natchiga na nhuãcü naacügüna nadau nhaü̃: “Ngetüꞌü̃gü rü paü̃gü rü namücügüarü ĩnügüwe narüĩü̃ rü tama nacaꞌ nadau i norü ucuꞌẽgü ya nanatügü rü naegü, nguꞌẽẽruü̃gü rü togü.” b

Name guü̃guma cuacügümaã cungẽma.

TUPANAARÜ OREARÜ UCUꞌẼ: “¡Nabuxgutama, mexü̃ i ucu̱xẽmaxã naxuxcu̱xẽ i curü buxü̃, rü ngẽxguma naya̱xgu, rü tagutáma nüxü̃ inarüngüma!” — Provérbios 22:6.

Aiꞌrügumaraü̃ niĩ na naacügü nawaꞌe i papagüarü rü mamagüarü ngü̃ẽẽ rü norü ucuꞌẽgü. Duturugü nüü̃ niugü na ngetüꞌü̃gü rü paü̃gü nüü̃ naĩnüẽ i papagü rü mamagü i namücügüarü yeera naĩnü̃ẽ. Laurence Steinberg ya Duturu iĩü̃ nanawü i norü popera naéga rü Você e Seu Filho Adolescente c i nhaü̃: “Nacaꞌ i paü̃gü rü ngetüꞌü̃gü nanatügü rü naegü rü cuaꞌruü̃ niĩ natchiga i taꞌacü naügü rü nacümagü. Paü̃gü rü ngetüꞌü̃gü nacaꞌ nagutchaãẽ i taꞌacügu narüĩnüẽ ya papagü rü mamagü, rü meã nacaꞌ narüĩnüẽ i taꞌacü nüü̃ niu woo nhuguãcü ngetüꞌü̃gü rü paü̃gü rü nacaꞌ tama name i norü ucuꞌẽgü.”

Nayoniẽ na cuacügü nawaꞌe i curü ucuꞌẽgü rü guü̃guma namaã cungẽma. Namaã nüü̃ niu i  taꞌacügu curüĩnü, taꞌacügu cuyaõ rü taꞌacü marü cuü̃ nangupetüü̃ i curü maü̃wa.

Nüü̃ nauneta i wüi meü̃ i cuaꞌruü̃ i cuacügücaꞌ.

TUPANAARÜ OREARÜ UCUꞌẼ: “Ngẽxguma duü̃xü̃gü i nüxü̃ cuáxü̃maxã cuxãmücügu, rü tá cunayaxu i cua̱x.” — Provérbios 13:20.

Nagu rüĩnü i wüi duü̃ü̃ i meü̃ i cuaꞌruü̃ niĩ nacaꞌ i cuacügü. Name cuacügüü̃ cunangútchaü̃ẽẽ na namaã naãmücügüü̃caꞌ. Ngẽma rü tama nüü̃ niutchaü̃ na ngẽma duü̃ü̃ cuacügüna nadau i cucaꞌ. Notürü ngẽma duü̃ü̃maã naãmücügü rü nanatautchaẽẽ na cuacügü meãma nanayaugüü̃caꞌ i curü ucuꞌẽgü. Tupanaarü Ore nüü̃ niu na Pauruarü cuaꞌruü̃ rü Timutéuü̃́ name woo marü naya. Rü nügümaã naãmücügü rü norü mecaꞌ niĩ. — Piripucü̃ãꞌ 2:20, 22.

Nhamaãcüü, buü̃gü tama naü̃tawa nangẽmagü i norü oꞌi rü noẽ rü to i natanüü̃gü erü yaü̃wa namaẽ. Tchi ngẽma rü cuü̃ ngupetügu i cutanüü̃wa, cugü naporaẽẽ na meü̃ i duü̃ü̃güü̃tawa cungẽmaü̃caꞌ i cuacügümaã.