Teé tügümaã tacuáü̃ rü:

• yana taĩnü

• tügüünemaã tacuáü̃

• tayanguẽẽ i puracü

• togügu tarüĩnü

Buü̃gü i nüü̃ cuaꞌgüü̃ na nügümaã nacuágüü̃ rü nüü̃ narüporamaẽgü i tchieü̃gü, woo nhuguãcü nawaꞌe nüü̃ naoe i nümaü̃ i ngẽmaü̃gü. Notürü buü̃gü i tama nüü̃ nacuaꞌü̃ na nhuãcü nügümaã nacuáü̃ rü bemana:

• nanueü̃tchi rü togüü̃ nacuáitchaü̃

• nangetchaü̃ü̃tchi

• nayipe i pori rü tchóteꞌene, nangãẽ

• tama meã natchibüe

Wüi popera nüü̃ niu na buü̃gü i nügümaã nacuágüü̃ rü duü̃ü̃gü i tama guü̃guma nidaꞌawegü niĩ tá, rü tama muü̃tchi i gutchaü̃gü i dĩẽrugagu rü mugügagu nüü̃́ nangẽma tá. Ngẽma rü tüü̃ nanangútchaü̃ẽẽ i ngúeruü̃ ya Angela Duckworth nhatagürü: “Guü̃guma nüü̃́ name nüü̃ nacuaꞌ na nhuãcü nügümaã nacuáü̃.”

Nüü̃ nacuaꞌ na nhuãcü “tama” nhacuü̃ rü tama nanatchicüü i ngẽma.

TUPANAARÜ OREARÜ UCUꞌẼ: “Rü ngẽxguma icuxunetagu rü narümemae nixĩ i: ‘Ngü̃, tá chanaxü’, ñaperügü, rüe̱xna: ‘Taxũtáma chanaxü’, ñaperügü.” — Mateu 5:37.

Ngẽguma nanatü rü nae rü “tama” nhaü̃gu, buü̃gü rü aiꞌrügumaraü̃ãcüma tama meã narütchoꞌ i duü̃ü̃güpeꞌewa. Tchi nanatü rü nae norü ngútchaü̃ naügu, buü̃ nüü̃ nacuaꞌ na ngẽma rü nüna naã i taꞌacü nawaꞌe.

Notürü, ngẽguma nanatü rü nae rü tama nanaütchicüügu i taꞌacü nideagü, buü̃ nawa nacuaꞌü̃ i wüi aicumaü̃ i nhaü̃: tama guü̃guma tanayaugü i taꞌacü inawaꞌegü. “Rü duü̃ü̃ na ngẽmaü̃ nacuaꞌ rü yeera nataãẽ niĩ”, nanawü i Duturu David Walsh. “Tama taacügüü̃ tarüngü̃ẽẽ tchi nüü̃́ tanguꞌẽẽgu na guü̃guma nüü̃ nangẽma i guü̃ma i taꞌacü nawaꞌegü.” a

 “Tama” nhacurügü nüü̃ rü nabugucürüwa rü cuacügüü̃ rüngü̃ẽẽ na nawena “tama” nhaü̃ nacaꞌ i tchieü̃gü, cuaꞌãtchiruü̃ porigü, nangẽãẽ rüeꞌna togü i tchiecümagü.

Curü buü̃ü̃ rüngü̃ẽẽ na nüü̃ nadauü̃caꞌ i taꞌacü ngupetüü̃ nawena i taꞌacü naü.

TUPANAARÜ OREARÜ UCUꞌẼ: “Rü yíxema chixexü̃ ǘxe, rü chixexü̃ tá tayaxu. Rü yíxema mexü̃ ǘxe, rü mexü̃ tá nixĩ i tayaxuxü̃.” — Gárataanecü̃ãꞌ 6:7.

Cuacügü nawaꞌe nüü̃ nacuaꞌ i taꞌacü ngupetüü̃ nawena i taꞌacü naügü, rü ta na tama nügümaã nacuáü̃ rü nanatautchaẽẽ na tchieü̃ nangupetüü̃caꞌ. Cuaꞌãtchiruü̃, ngoi cuacü rüeꞌna cune tama yana naĩnü ngẽguma narümaãtchigu, taúema nüna ngaicamatchaü̃. Notürü tchi nüma rü nüü̃ nacuaꞌgu na nhuãcü nügümaã nacuáü̃ ngẽguma togü nüü̃ naügu, rüeꞌna nüü̃ nacuaꞌ nhugu name togümaã nidea, duü̃ü̃gü rü namaã naãmücütchaü̃. Cuacügüü̃ rüngü̃ẽẽ na nüü̃ nicuaꞌãtchigüü̃caꞌ na norü maü̃ rü natautcha niĩ tchi nümagü rü meã nügümaã nacuágügu.

Curü buü̃ü̃ nanguꞌẽẽ na nüü̃ nacuaꞌü̃caꞌ i taꞌacü rümemaẽü̃ niĩ.

TUPANAARÜ OREARÜ UCUꞌẼ: “Mea penangugüxü̃ i ta̱xacü nixĩ i aixcüma mexü̃.” — Piripucü̃ãꞌ 1:10.

Meã nügümaã nacuáü̃ rü natchiga niĩ ta nawaꞌe naü i norü puracü woo tama nüü̃́ name. Rü buü̃güarü mecaꞌ niĩ nüü̃ nacuaꞌgüü̃ i taꞌacü nawaꞌe naüíra erü narümemaẽ niĩ. Cuaꞌãtchiruü̃, nüma rü nawaꞌe nanaü i ngúepataü̃arü puracü naü̃pa i iãwaꞌe.

Meü̃ i cuaꞌruü̃ cugü niĩẽẽ.

TUPANAARÜ OREARÜ UCUꞌẼ: “Choma rü pexü̃ nüxü̃ chadauxẽxẽ nax ñuxãcü tá penaxüxü̃ nax pema rü ta ngẽma pemaxã chaxüxü̃ãcü penaxüxü̃ca̱x.” — Juã́ũ 13:15.

Cuacügü nüü̃ nadau i taꞌacü cuüü̃ ngẽguma gutchaü̃ cuü̃ nangupetügu. Curü cuaꞌruü̃wa nüü̃́ naweꞌ na guü̃guma name niĩ nügümaã nacuáü̃. Cuaꞌãtchiruü̃, taꞌacü cuü ngẽguma curü buü̃ rü tchieü̃ naügucüraü̃? Namaã cunu rüeꞌna cumeãẽmare?