Ngẽguma meã naacügümaã nüü̃ niugu tama nügümaã ãnewaꞌeü̃ na nüü̃ niu i taꞌacü nagu narüĩnüe.

Bemana tama natautcha ngetüꞌücümaã rü pacümaã nüü̃ niu. Ngẽguma cuacügü ga buü̃gü yiĩ guü̃guma peü̃ ga niu notürü nhuꞌma na ngetüꞌücü urü pacü niĩgü íraü̃ peü̃ nidea rü pema tama nüü̃ pecuaꞌgü i taꞌacü nagu narüĩnüegü. Rü nhuꞌmatchi papagü rü mamagü rü to ideꞌatücutüwa nangẽmagü rü naacügü na tocutüwa nangẽmagüü̃rüü̃.

Ngẽguma cuacügü cumaã nideatchaü̃gu meã nüü̃ inaĩnü. Woo tchi ngema nangupetügu tchutaü̃wa ngẽguma pepetchaü̃gügu.

“Bemana cuacü cumaã nideatchaü̃ ngoragu na tama cucaꞌ name. Notürü rüeꞌna name niĩ nhaã ngoragu cuacümaã narüutaga? Ngema tama name erü guü̃ i papagü rü mamagü nüü̃́ nangútchaü̃tchi na naacügü nüü̃ nidea taꞌacü guü̃ naãẽwa ngemaü̃.” — Lisa.

“Tama tchapetchaü̃ ngẽguma marü nayáuanegu. Notürü nhureeꞌpüꞌcüna na meã tchauacügümaã tcharüdea ga ngãü̃cüüwena.” — Herbert.

TUPANAARÜ ORE RÜ NHANAGÜRÜ: “Rü tama name nixĩ i tóxrütama mexü̃ca̱x tadaugü, natürü name nixĩ i togüarü mexü̃ca̱x tadaugü.” — 1 Corĩ́tiucü̃ãꞌ 10:24.

Naũãẽ na tama natoṍẽmare. Wüi nanatü nüü̃ niu: “Nhuguacü tchauacügü tchamaã nidea rü nagu tcharüĩnü i toomatchigügu. Notürü nüü̃ nacuaꞌgü na tama meã nüü̃ tchaĩnü!”

Rü cumaã marü ga nangupetü i ngema? Nhuꞌmatchi nanatchiãtchiẽẽ i televisão rü curüngüma i curü celular rü curü tablet. Aicuma nüü̃ naĩnü i cuacügü ngẽguma cumaã yadeagütchaü̃gu woo tchi tama taütchiü̃ niĩ i norü oégaãẽ.

“Name niĩ naacügümaã nideagü na toü̃ name na nüü̃ icuaꞌgüü̃ i norü ĩnügütchiga. Tchi tama nüü̃ nacuaꞌgügu i ngematchiga rü tama tacaꞌ nadau ngẽguma gutchaü̃gü nangẽmagügu notürü nümagü rü to i duü̃ü̃caꞌ nadaugütchaü̃.” — Maranda.

“Yana namaã naĩnü woo tchi cuacü tama weꞌguü̃ãcüma nagu narüĩnügu.” — Anthony.

TUPANAARÜ ORE RÜ NHANAGÜRÜ: “¡Mea iperüxĩnüe i ñu̱xmax!” — Luca 8:18.

Nayoniẽ ngẽguma cuacümaã cungemaü̃gu. Muü̃ma i naacügücaꞌ nüü̃ natautcha papamaã rü mamamaã nideatchaü̃ ngẽguma ĩnüca nangemagu.

“Ngẽguma carrowa taĩgu to i natchicacaꞌ rü tayoniẽ na yigümaã tideagü. Ngẽguma irüto nacüwawa nangẽmagu rü yeera natautcha na meã narüdeagüü̃caꞌ.” — Nicole.

Ngẽguma natchibüegu rü ta meü̃ i ngora na taãẽ nugümaã narüdeagüü̃caꞌ.

“Ngẽguma yáuanecüarü õna tatchibüegu yigümaã tideagü natchiga i taꞌacü tchieü̃ urü meü̃ ngema nguneü̃gu toü̃ nangupetü. Ngema nüü̃ natautcha yigümaã nawüigu rü ta nanangenagü i gutchaü̃gü.” — Robin.

TUPANAARÜ ORE RÜ NHANAGÜRÜ: “Rü ngẽxguma texé pemaxã idexagu, rü name nixĩ i mea iperüxĩnüe. Rü tama name i penue rü tüxü̃ pechoxü̃gagü.” — Tiago 1:19.