NHUꞌMA muü̃ma i duü̃ü̃gü nagu narüĩnüẽ na guü̃ma i yumüẽgü, woo togü tupananetatchicunaꞌãgücaꞌ iyumüẽgügu, rü Tupana nüü̃ naĩnü. Ngema nacüma duü̃ü̃gücaꞌ nameü̃ erü nanawaꞌe na guü̃ma i tupaucagü nawüigu yiĩü̃ rü nagu narüĩnüẽ na guü̃ma i religiãogü name niĩ. Notürü, eꞌna ngema nacüma weguü̃ niĩ?

Rü Tupanaarü Ore tüü̃ nawe na muũtchi i yumüẽgü ga duẽẽgü ga naü tama wüitama Tupanacaꞌ yiĩü̃. Rü yeguma Tupanaarü Oreü̃ ga naümatügu, muü̃ma ya duẽẽgü tupananetatchicunaꞌãgücaꞌ iyumüẽgü. Rü muũtchi i eꞌpücüꞌna ga Tupana nüü̃ niu na yema nacüma tchieü̃ yiĩü̃. Cuaꞌãtchiruü̃, Salmo 115:4-6 natchiga ga yema tupananetatchicunaꞌãgü rü nhanagürü: “Rü naãtchinü notürü tama taꞌacüü̃ naĩnüe.” Rü nagu narüĩnü i ngema: Tüꞌcüü̃ wüi tupanacaꞌ iyumüẽgü tchi nüma rü tama tüü̃ naĩnü?

Rü to i cuaꞌãruü̃ i Tupanaarü Orewa tüü̃ nawe i yeera i ngematchiga. Rü meü̃ i yatü ya Tupanaarü Orearü uruü̃ ya Ería nüü̃ niu i Baáarü orearü uruü̃gümaã na norü tupanacaꞌ nayumüẽü̃caꞌ, rü yicama Ería Yeuwacaꞌ nayumüẽ. Rü Ería nüü̃ niu ga Tupana na aicumacü ga iĩcü nanangãü̃ tá, notürü to i tupana na tama nangãü̃ tama aicuma iĩcü. Rü Baáarü orearü uruü̃gü rü ngü nhanagürügü ga yema, rü nümagü rü poraãcü Baácaꞌ iyumüẽgü muũtchi oragü “notürü tauü̃ma nanangãü̃ rü bai ga wüi ga naga ga nüü̃ naĩnüeü̃.” (1 Reis 18:29) Notürü taꞌacü ga nangupetü Eríamaã?

Rü nüma ga yumüẽwena, norü Tupana paꞌatchi nanangãü̃, rü ‘Cori [Yeuwa] ya Tupanaarü üüema rü ngürüãchi yema naétü nangu ga yema wocaacümatchi.’ Taꞌacü i natoraü̃ẽẽ ga yema tare yumüẽgü? Norü ngãü̃ Eríaarü yumüẽwa nangema, nawa i 1 Reis 18:36, 37. Yema yumüẽwa nayemamare 30 deagü i Hebraicogawa. Rü woo norü yumüẽ naíra yiĩgu rü Ería nüü̃ niu tamaepüꞌeꞌpücüꞌna Tupanaéga: Yeuwa.

Baá, na ngema naéga nhaü̃tchiga niĩ: “yora”. Yema tupana Canaãanecüãꞌgüarü, na nüü̃ nacuaꞌgüü̃ muũtchi toraü̃ü̃ i nacümagü wüitchigü natchicawa ga nayema. Notürü, Yeuwaicatama ngema naãéga, guü̃ i Universowa. Rü Nüma ya Cori ya Tupana norü duü̃ü̃gücaꞌ nüü̃ niu: “Rü Tchama Yeuwa tchiĩ. Rü ngema tchauéga niĩ, rü penawaꞌe tchoü̃ peicuaꞌüü̃gü rü tchanachuꞌutchi na to i tupananetagüü̃ peicuaꞌüü̃gü.” — Isaías 42:8,TNM.

Rüeꞌna Eríaarü yumüẽ rü Baáarü orearü uruü̃güarü yumüẽgü wüigu i natchicawa nangu? Tama. Rü Baáarü cuaꞌüü̃ tama name duẽẽgücaꞌ yerü norü nacüma ga ãũrima tchieü̃gü yiĩü̃ na duü̃ü̃ i namaꞌetchita rüeꞌna nateetchita ngeãẽü̃ rü nhumata duü̃ü̃güü̃ nadaigü. Notürü, Yeuwaarü cuaꞌüü̃ norü duü̃ü̃gücaꞌ nameẽtchima yiĩ, rü ta nüü̃ nataãẽẽẽ yerü tama ngúü̃ ingee ga yema nacüma ga tchieü̃gagu. Nagu narüĩnü i ngematchiga: Tchi cuma namuü̃ wüi carta cumücücaꞌ na nameãcüma, eꞌna cuü̃ name tchi ngema carta rü to i duü̃ü̃caꞌ na tchieü̃ãcüma nangu? Tama!

Rü ngẽguma Yeuwacaꞌ cuyumüẽgu, curü Ücücaꞌ cuyumüẽ, na Nüma ya Tanatü Niĩcü. * “Cuma rü Pa Yeuwa ya Tonatü niĩ”, nhaü̃ ga Itchaía ga norü yumüẽwa. (Isaías 63:16) Ngemacaꞌ, rü natchiga ngema Tupana rü Ngechuchu rü nhanagürü norü ngúeü̃güü̃: “Tchama rü tá Tchaunatü ya tchorü Tupana ya Penatü ya perü Tupanaü̃tawa tchaũü̃! —nhanagürü.” (Juã́ũ 20:17) Rü Yeuwa rü Ngetchutchunatü niĩ. Rü ngema Tupana niĩ ga Ngetchutchu ga guü̃guma nayumüẽ rü norü ngúeü̃güü̃ nangúeẽẽ na ngema Tupanacaꞌ iyumüẽgüü̃caꞌ. — Mateu 6:9.

Rüeꞌna Tupanaarü Ore nüü̃ niu na inawaꞌe Ngetchutchucaꞌ iyumüẽgü, rü Mariacaꞌ iyumüẽgü, rü tupananetatchicünaꞌãgücaꞌ iyumüẽgü urü anyugücaꞌ iyumüẽgü? Tama. Yiema rü inawaꞌegü Yeuwacaꞌicatama iyumüẽgü. Tüꞌcüü̃? Nüíra, Yumüẽ nacüma niĩ na Tupanaü̃ icuaꞌüü̃güü̃caꞌ, rü Tupanaarü Ore nüü̃ nawe na tanawaꞌegü Yeuwaicatama ticuaꞌügüü̃. (Êxodo 20:5) Rü ngĩma nüü̃ yauü̃ na ‘nüma ya Yeuwa rü nüü̃ naĩnü i torü yumüẽ’. (Salmo 65:2) Woo Yeuwa togüü̃ puracügü nüna naãgu, ngẽma puracü na tüü̃ naĩnüü̃caꞌ i torü yumüẽgü Yeuwatama tüü̃ naĩnü. Nümatama ya Tupana na nüü̃ nauneta na tüü̃ naĩnü i torü yumüẽgü.

Ngemacaꞌ, tchi cunawaꞌegu na Tupana cuü̃ naĩnü i curü yumüẽ rü nüna cucuaꞌãtchi i nhaa ore: “Rü guãma ya yíema Corina cae na tüü̃ nangü̃ẽẽü̃caꞌ, rü tá tamaẽ.” (Puracügü 2:21) Notürü, eꞌna Yeuwa guü̃ma i yumüẽgü nüü̃ naĩnüü̃? Rueꞌna inawaꞌe yeera nüü̃ icuaꞌgüü̃ na Tupana tüü̃ naĩnüü̃caꞌ i torü yumüẽgü?