MUŨTCHI tupaucagüwa norü duü̃ü̃gü nacaã́püꞌü̃ na nayumüẽü̃caꞌ rü norü yumüẽwa rü nayumüẽ guü̃guma nideagü wüigu i oregü urü yumüẽarü librugüwa naugutae. Notürü Tupanaarü Ore tüü̃ narüngü̃ẽẽ na nüü̃ icuaꞌgüü̃ natchiga i ngema ca: “Nhuãcü inawaꞌe iyumüẽ?”

Rü Tupanaarü Ore nüü̃ nawe ga Tupanaarü duü̃ü̃gü nayumüẽgü natchi, nacaã́püü̃ rü to i nacümagü. Yegumarüü̃ norü ngupetügu, nümagü rü nayumüẽgü i norü ĩnüwa urü tagaãcü idea. Rü ga yema duü̃ü̃gü dauü̃wa idauü̃ urü ínanapo na iyumüẽgüü̃caꞌ. Nümagü rü tama tupananetatchicünaꞌãgücaꞌ iyumüẽ, rü bai rosáriogümaã urü yumüẽarü librumaã. Yeguma Tupanaarü duü̃ü̃gü iyumüẽgu rü nayumüẽ i taꞌacü i norü maü̃newa ngemaü̃, rü Tupanamaã ideagü i norü ĩnütchiga. Rü tüꞌcüü̃ norü yumüẽgü ga Tupana nüü̃ naĩnü?

Yema ga duẽẽgü wüitama Tupanacaꞌ iyumüẽgü. Ngema Tupana Yeuwa niĩ. Rü 1 Juã́ũ 5:14 nhanagürü: “Rü nüü̃ tacuaꞌgü ega taꞌacücaꞌ nüna icagu, rü nüma tüü̃ naĩnü i ngẽguma norü ngútchaü̃ yiĩgu i ngẽma nacaꞌ nüna icaü̃.” Rü inawaꞌe iyumüẽ nawüigu Tupanaarü ngútchaü̃. Taꞌacütchiga niĩ i ngema?

Rü na iyumüẽgücaꞌ wüigu Tupanaarü ngútchaü̃, naũpa inanawaꞌe nüü̃ icuaꞌgüü̃ ngeü̃rüüü̃ yiĩ i Norü ngútchaü̃. Ngemacaꞌ, inawaꞌe Tupanaarü orecaꞌ inguꞌ na nüü̃ icuaꞌgüü̃caꞌ i yumüẽtchiga. Rüeꞌna Yeuwa torü yumüẽgü tüü̃ naĩnü tchi meãmaü̃tchi nüü̃ icuaꞌgüü̃mare i Bíbliatchiga? Tama, notürü Tupana nanawaꞌe na norü ngútchaü̃tchigawa inguꞌ rü ta mea imaẽü̃ ngegumarüü̃ i Norü mugü. (Mateu 7:21-23)Rü guãma i yiema inawaꞌe iyumüẽgü wüigu i Tupanaarü ngútchaü̃.

Ngẽguma yeera i Yeuwatchiga inguꞌeẽẽgu, rü yeeraãcü tórü õü̃ naporaẽẽ. Ngema name niĩ na Tupana tüü̃ naĩnüü̃ca. Erü Ngetchutchu rü nhanagürü: “Rü guü̃ma i taꞌacü i nacaꞌ ípecaü̃ i perü yumüẽwa, rü tá penayaugü ega aicuma peyaõgüãcüma nacaꞌ ípecagu.” (Mateu 21:22) Ngẽguma tayaõgügu tama nhaü̃tchiga niĩ na guü̃wa tayaõgü. Notürü, ngẽguma wüi oregu tayaõgügu, woo tama nüü̃ tadaugu, nüü̃ tacuaꞌgü na ngema ore aicuma iĩü̃. (Ebréugü 11:1) Rü Tupanaarü Ore nüü̃ nawe na Yeuwa aicuma ngemaü̃, woo taucürüwa nüü̃ tadaugu, Nüma rü aicuma tüü̃ naĩnüü̃ tchi Tupanagu tayaõgügu. Rü tanawaꞌe tacaꞌ i naca na yeeraãcü tayaõgüü̃caꞌ, rü Yeuwa tüna naãtchaü̃ guü̃ma i inawaeü̃. — Luca 17:5; Tiagu 1:17.

Rü to ngemaü̃ natchiga i yumüẽ na name niĩ nüü̃ icuaꞌgüü̃. Ngetchutchu nhanagürü: “Rü tchaugaguicatama niĩ i Tchaunatüü̃tawa nangugüü̃ i duü̃ü̃gü.” (Juã́ũ 14:6) Rü Ngetchutchugaguicatama niĩ i Yeuwa ya Tanatüü̃tawa ingugüü̃. Ngemacaꞌ, Ngetchutchu nüü̃ nangúeẽẽ norü ngueü̃gü na guü̃ma i taꞌacü i naégagu Tupanaü̃tawa nacaꞌ ínacaü̃ rü tá nüna nanaã. (Juã́ũ 14:13; 15:16) Ngema tama nüü̃ nawe na tanawaꞌe Ngetchutchucaꞌ tayumüẽgü. Tanawaꞌe Yeuwacaꞌicatama tayumüẽgü Ngetchutchuégagu. Rü ngema nüü̃ nawe na Ngetchutchugaguicatama inawaꞌe Yeuwaü̃tawa ingugüü̃.

Rü wüi ga nguneü̃gu, Ngetchutchucaꞌ ínaca norü ngueü̃gü ga yema: “Pa Cori toü̃ nangúeẽẽ na nhuãcü tayumuẽgüü̃.” (Luca 11:1) Taꞌacütchiga nüü̃ nacuaꞌgütchaü̃? Nümagü rü marü nüü̃ nacuaꞌgü na nhuãcü nayumüẽgü. Notürü, nümagü rü nüü̃ nacuaꞌgütchaü̃ taꞌacü i natchigagü name niĩ nayumüẽgü.