NGẼGUMA iyumüẽgügu eꞌna aicuma tüü̃ narüngü̃ẽẽ? Ngemaãcü, erü Tupanaarü Ore nüü̃ nawe na Tupanaarü duü̃ü̃güarü yumüẽgü aicuma nüü̃ narüngü̃ẽẽ. (Luca 22:40; Tiagu 5:13) Rü ngema aicuma yiĩ, ngẽguma iyumüẽgügu ãũrima tüü̃ narüngü̃ẽẽ na mea tamaẽ i Tupanapeꞌewa rü ta tüü̃ narüngü̃ẽẽ torü ĩnü rü taü̃ne. Nhuãcü?

Nagu curüĩnü tchi wüi nane cungemagu rü nüma nanagana wüi ãmare, Eꞌna cuma nananguꞌẽẽ naca na duẽẽgüna moẽ inaãü̃caꞌ? Ngẽguma ngẽma cunaügu nüü̃ cuwe na cune cucaꞌ name niĩ rü ta nüü̃ cutaãẽẽẽ. Rüeꞌna ngema nangupetü ta ngẽguma Tupanamaã tideagügu? Ngemaãcü! Ngĩã nüü̃ tadau nhuꞌre i cuaꞌruü̃gü.

Yumüẽgü na Tupanana moẽ naãü̃. Ngẽguma Pa Tonatüna moẽ inaãgügu naca na guü̃ma i meü̃ tüna naãü̃, yiema rü nagu inarüĩnüẽ i Norü ngü̃ẽẽ na tüna naãü̃. Rü ngema tüü̃ naporaeẽẽ rü ta tüü̃ nataãẽẽẽ. — Piripucü̃ãꞌ 4:6.

Cuaꞌãtchiruü̃: Ngetchutchu norü Papana moẽ nanaãü̃ nagagu nüü̃ naĩnü i norü yumüẽgü. — Juã́ü̃ 11:41.

Yumüẽgü na Tupana tüü̃́ nüü̃ nangetchaü̃ü̃caꞌ. Ngẽguma Tupanacaꞌ ínacagu na tüü̃́ nüü̃ nangetchaü̃ü̃caꞌ, nananguꞌẽẽ torü ĩnü i taãẽwa, rü tüü̃ narüngü̃ẽẽ na nüü̃ narüoeü̃caꞌ i nacümagü i tchieü̃ rü ta tüü̃ nacuaꞌẽẽ na ngema pecadu ãũrima tchieü̃ yiĩü̃. Rü tüü̃ narüngü̃ẽẽ na tataãẽgü erü Tupana tüü̃́ nüü̃ inarüngüma i torü pecadu.

Cuaꞌãtchiruü̃: Davi nayumüẽ Tupanacaꞌ ínaca na nüü̃́ nüü̃ nangetchaü̃ü̃caꞌ yerü ga nüma ga norü tchieü̃ narüotchaü̃ rü nangetchaü̃ũtchi. — Salmo 51.

Yumüẽgü na Tupana norü cuaꞌmaã tüü̃ naucuꞌẽü̃caꞌ. Ngẽguma Yeuwacaꞌ ínacagu na tüü̃ naucuꞌẽü̃caꞌ rü tüna naãü̃ i Norü cuaꞌ na mea inaunetagüü̃caꞌ i torü maü̃wa, tüü̃ narüngü̃ẽẽ na irüíraü̃ tiĩgüü̃. Ngema rü ta tüü̃ narüngü̃ẽẽ na nüna tacuaꞌãtchiü̃caꞌ na pecaduãgüü̃ rü tüü̃ rüngü̃ẽẽ na yeera Yeuwagu tayaõgü. — Provérbios 3:5, 6.

Cuaꞌãtchiruü̃: Tcharumáũ Tupanacaꞌ ínaca irüíraãcü na Tupana nacaꞌ naãü̃ Norü cuaꞌ na mea Iraeuanemaã ínacuaꞌü̃caꞌ. — 1 Reis 3:5-12.

Yumüẽgü ngẽguma gutchaü̃gü tüü̃ nangupetügu. Ngẽguma Tupanacaꞌ tayumüẽgu guü̃ i tórü maü̃nemaã ega gutchaü̃gü tüü̃ ngupetügu, tüü̃ narüngümüẽẽ rü tüü̃ narüngü̃ẽẽ na Yeuwagu tayaõgü rü tama i yiemagu. — Salmo 62:8.

Cuaꞌãtchiruü̃: Rü ãẽꞌgacü ya  Atcha nayumüẽ yeguma ga uwanü ãũrima tchieü̃ nügü nadaigügu. — 2 Crônicas 14:11.

Yumüẽgü na togüü̃ narüngü̃ẽẽü̃caꞌ. Ngema yumüẽgü tüü̃ narüngü̃ẽẽ na tama nügü irütaü̃ tiĩgü rü ta na nüü̃ iwe na togüü̃ nangetchaü̃tümüü̃gü.

Cuaꞌãtchiruü̃: Ngetchutchu norü ngueü̃güü̃ nayumüẽ yeguma ga nüma nua naanewa nayemagu. — Juã́ü̃ 17:9-17.

Yumüẽgü na Tupanaü̃ ticuaꞌügüü̃caꞌ. Ngẽguma Yeuwaü̃ ticuaꞌüü̃gügu nagagu i norü ü rü norü mecümagü, yeeraãcü nüü̃ tangetchaü̃gü. Rü ngema yumüẽgü tüü̃ rüngü̃ẽẽ na yeera Tanatü ya Tupanana ingaicamagü.

Cuaꞌãtchiruü̃: Dawí taãẽcümaã Tupanaü̃ nicuaꞌüü̃ nagagu i norü ü. — Salmo 8.

Rü to na tacaꞌ meü̃ i yumüẽtchiga rü yiĩ na ‘Tupana rü tá tüü̃ nataãẽẽẽ namaã i wüi i taãẽ i meẽtchiü̃ i guü̃ma i taãẽ i nüü̃ icuáü̃ãrü yeera meẽtchiü̃’. (Piripucü̃ãꞌ 4:7) Rü taãẽ i nhama i naanewa woo gutchaü̃gü tüü̃ ngupetügu, nhuꞌma ngema wüigu uirurüü̃ iĩü̃. Ngẽma na meü̃gu rüĩnüü̃ rü taü̃ne rü maü̃ nüü̃́ nangema. (Provérbios 14:30) Notürü, nhuãcü ngema taãẽ tanayaugü? Rüeꞌna nagagu i torü pora urü to i yeera inawaꞌe iügüü̃?