MUÜ̃MA ya duẽẽgü nüü̃ niu na yumüẽ Pai-Nosso na yaõgü nayumüẽgü, ngema niĩ na Ngetchutchu norü ngueü̃güü̃ nanguꞌẽẽ i Mateu capituru 6wa, yeera niĩ na duü̃ü̃gü muẽꞌpüꞌcüna ngematama oreü̃ iueü̃. Ngema yumüẽtchiga muẽma ya duẽẽgü tama mea nüü̃ cuaꞌgüü̃. Guü̃ i nguneü̃gü muü̃tchiema i duü̃ü̃gü ngema yumüẽ muẽꞌpüꞌcüna nügü iuü̃. Notürü Ngetchutchu tama nanawaꞌe ga yema yumüẽ na nayumüẽ i ngema nacüma. Nhuãcü nüü̃ icuaꞌgüü̃ i ngematchiga?

Naü̃pa na norü ngueü̃güü̃ nanguꞌẽẽ ga yema yumüẽ, Ngetchutchu nhanagürü: “Rü tama name i notücaꞌma cunamaꞌẽẽ i curü yumüẽ narüü̃ i ngẽma duü̃ü̃gü i tama Tupanaü̃ cuaꞌgüü̃.” (Mateu 6:7) Eꞌna ga Ngetchutchu nüü̃ nananguꞌẽẽ na muẽꞌpüꞌcüna yematama oreü̃ iueü̃caꞌ? Tama! Ngetchutchu nacaꞌ nanguꞌẽẽ taꞌacütchiga tayumüẽgü rü taꞌacü name yiĩ yegumarüü̃ i Tupanaarü ngútchaü̃ rü ta i taꞌacü yeera name niĩ i torü yumüẽgüwa. Ngĩã yeera nüü̃ icuaꞌgüü̃ i yema Ngetchutchuarü oretchiga. Ngema yumüẽ nawa nangema i Mateu 6:9-13.

Yema oremaã, Ngetchutchu norü ngueü̃güna nacuaꞌãtchiẽẽ na guü̃ma i yumüẽgü nanawaꞌe na Nanatü ya Yeuwacaꞌ nayumüẽgü. Notürü eꞌna nüü̃ cucuaꞌ na tüꞌcüü̃ Tupanaéga nameetchicü niĩ rü tüꞌcüü̃ nanawaꞌe na nanaüüneẽẽ?

Noriarü ügügu, rü meetchicü Tupanaéga tchiri nüü̃ niutchiga doragümaã. Rü Tupanaarü uwanü ya Tchataná nüü̃ niu na Yeuwa wüi ãẽꞌgacü na dorataꞌáü̃ rü tama ngetchaü̃waꞌecü niĩ, rü na Nüma ya Tupana tama norü ü mea namaã inacuaꞌü̃. (Gênesis 3:1-6) Muü̃tchi i duü̃ü̃gü Tchatanágu nayaõgü, erü ngema duü̃ü̃gü nüü̃ yauü̃ na Tupana tama taca nagutchaãẽ, rü ta na Nüma ya Tupana tchiecümaü̃tchiü̃ rü nhuꞌmata ngema tchieü̃ i duü̃ü̃gü nüü̃ niu na Tupana tama ngemaü̃. Rü to i duü̃ü̃gü Tupanaéga ínanaütchigü i muũma i Tupanaarü Ore.

Rü Tupanaarü Ore tüü̃ nawe na Yeuwa tórü Tupana nayaguẽẽ tá guü̃ma i tchieü̃gü. (Ezequiel 39:7) Ngẽguma tá ngema nanaügu, Nüma nameẽẽ guü̃ma i gutchaü̃gü na nhuꞌma ngemaü̃. Nhuãcü? Rü to i ore ga Ngetchutchu nüü̃ niu na ngema yumüẽwa tüü̃ nawe i ngematchiga.

Nhuꞌma, guü̃ i tupaucagüwa muũma i duü̃ü̃gü tama nüü̃ yacuaꞌgüü̃ i taꞌacü niĩ i Tupanaarü Reinu. Notürü teégü ga Ngetchutchuü̃ taĩnüẽ nüü̃ tacuaꞌgüü̃ i taꞌacü Tupanaarü Orearü uruü̃gü naümatüü̃ i Cristutchiga ga nüma ya Tupana nüü̃ unetacü na yima Cristu wüi meetchi ãẽꞌgacü tá na mea naanemaã inacuaꞌ. (Isaías 9:6, 7; Daniel 2:44) Yima ãẽꞌgacü ya Cristu nanaüüneẽẽ Tupanaéga erü nüü̃ nawe tá na Tchataná dorataꞌáü̃ niĩ. Yicama, ngema uwanüü̃ narüporamae rü Ngetchutchu rü nhama i naãnewa naũ tá na iyanaoẽẽü̃caꞌ ga jema ga guü̃ma Tchataná üü̃. Rü Tupanaarü Reinu guü̃ma i guerra inayanaoẽẽ tá, rü ta tá nüü̃ inanaoẽẽ i daꞌawe, taíya rü yu. (Salmo 46:9; 72:12-16; Isaías 25:8; 33:24) Ngẽguma cuyumüẽgu na ‘núma naũ na torü ãẽꞌgacü cuiĩü̃caꞌ’, rü Tupanacaꞌ ícuca na ngema unetagü yanguẽẽü̃caꞌ i ngẽma nüü̃ yauü̃ i Tupunaarü Orewa.

Yema ore ga Ngetchutchu nüü̃ niu tüü̃ nawe na Tupanaarü ngútchaü̃ na naügüü̃ tá i duü̃ü̃gü i nhama i naãnewa ngẽgumarüü̃ i dauü̃guü̃ i naãnewa na Tupanaarü ngútchaü̃ ínaügüü̃rüü̃, ngetá Tupana naãtchiü̃. Rü Tupanaarü ngútchaü̃ guü̃guma ínaügüü̃ i dauü̃guü̃ i naãnewa, rü yeawa ga Ngetchutchu ga ãẽꞌgacü iĩcü rü guü̃ma ga natanüü̃ ga anyugü, rü poraãcü nügü nadai namaã ga yema Tchataná rü norü anyugü i tchieü̃, rü nüma rü norü orearü ngeruü̃gümaã nhama ga naãnegu narüwoü̃. (Apocaríchiu 12:9-12) Ngema tamaeꞌpüꞌ nacaꞌ nacaꞌaü̃ tüü̃ narüngü̃ẽẽ na nüü̃ tacuaꞌgüü̃ na Tupanaarü ngútchaü̃ rüyeeramaeü̃ niĩ rü tama i torü. Norü ngútchaü̃ guü̃gutáma tacaꞌ name. Woo Ngetchutchu nameetchicü niĩgu, norü Papaü̃ nhanagürü: “Notürü tchanawaꞌe i cunaü i curü ngútchaü̃ rü tama i tchorü —nhanagürü.” — Luca 22:42.

Rü yicama ga Ngetchutchu nüü̃ niu rü na tama tchieü̃ niĩ na Tupanacaꞌ ínaca i torü õna. Ngẽguma Yeuwacaꞌ tayumüẽgügu tüna nacuaꞌãtchiẽẽ na “nümatama guãna nanaã i maü̃, rü tüna nanaã ya buanecü ya namaã ingü̃ãtanücüücü. Rü nümatama tüna nanaã i guü̃ma.” (Puracügü 17:25) Rü Tupanaarü Ore tüü̃ nawe na Yeuwa wüi papa ngetchaü̃waꞌecü niĩ na mea naacügüna nadau rü guü̃ma inawaꞌeü̃ tüna naãü̃. Notürü, torü Papa ya Yeuwa nanangãü̃rica i yumüẽgü na tacaꞌ meü̃ i torü maü̃wa.

Rüeꞌna tipecaduãꞌgü? Rüeꞌna inawaꞌe na Tupana toü̃́ nüü̃ nangetchaü̃ i torü tchieü̃ i taüü̃? Woo muema ya duẽẽgü nüü̃ yaugu na tama tipecaduãꞌgü, rü Tupanaarü Ore nüü̃ niu na torü gutchaü̃gü ngemaü̃ nagagu i pecadu. Rü pecadugagu niĩ i inaügüü̃ na nayueü̃ i duü̃ü̃gü. Erü guü̃ma tipecaduãꞌ tabugügumama, muẽꞌpücüna tchieü̃ taüü̃, rü inawaꞌe na Tupana toü̃́ nüü̃ nangetchaü̃ i torü tchieü̃ na tangemaü̃caꞌ maü̃ i taguma gúü̃. (Romacü̃ãꞌ 3:23; 5:12; 6:23) Rü tacaꞌ name niĩ i nhaa Tupanaarü ore: “Erü cuma, Pa Cori, rü cumecüma rü nüü̃ icurüngüma i torü tchieü̃gü.” — Salmo 86:5.

Rüeꞌna cunawaꞌe na Tupana cuü̃ ínapoü̃? Muũtchi i duü̃ü̃gü tama nagu nayaõgü na Tchataná aicuma ngemaü̃. Notürü Ngetchutchu ya Cristu nüü̃ niu na “Tchataná i nhama i naãnemaã icuáü̃.” (Juã́ũ 12:31; 16:11) Rü Tchataná nanawomüẽẽ guãma i duü̃ü̃gü i nhama i naãnewa, rü nüma tama nanawaꞌe na ngema duü̃ü̃gü Tupanamücü yiĩgü. (1 Pedru 5:8) Notürü, Yeuwa yeera Poraütchicü niĩ rü tüü̃ ínapoü̃tchaü̃ i norü duü̃ü̃gü na nüü̃ tangetchaü̃gü.

Rü ngema ore natchiga i ngema yumüẽ Pai-Nosso rü tama guü̃ma niĩ na inawaꞌe Tupanamaã tideagü i torü yumüẽgüwa. Nüna nacuaꞌãtchi i taꞌacü 1 Juã́ũ 5:14 nüü̃ niu i Tupanatchiga: “Rü nüü̃ tacuaꞌgü ega taꞌacücaꞌ nüna icagu, rü nüma tüü̃ naĩnü i ngẽguma norü ngútchaü̃ yiĩgu i ngẽma nacaꞌ nüna icaü̃.” Ngemaãcü, natchiga guü̃ma i curü gutchaü̃gü cunawaꞌe Tupanamaã quideaü̃ i curü yumüẽwa. — 1 Pedru 5:7.

Notürü, Nhugu rü ngetá tanawaꞌe tayumüẽgü? Taácü Tupanaarü Ore nüü̃ niu i ngematchiga? Rü to nai i naátüwa ngĩã tá ingãü̃ i ngema oretchiga.