Romaãnewa tchabu, rü nawa tchanayaẽẽgüne ga gumá ĩane ga nangearu diẽruãꞌgü ga duü̃ü̃gü. Nagutchaü̃tchi imaü̃. Taguma nüü̃ tchacuaꞌ ga tchorü mama, rü taguma meã nügü tchamaü̃ i tchorü papamaã. Inawaꞌe nüü̃ tchacuaꞌ na nhuãcü imaü̃ ga yema nagutchaü̃tchi ga natchica.

Yeguma 10 ga taunecü tchoü̃ tchayemagu rü marü ngĩ́taaꞌ tchiĩ. Yeguma 12 ga taunecü tchoü̃ tchayemagu, rü nüíraepüꞌcüna tchinha ga tchapatatchawa. Muũepüꞌcüna tchorü papa rü tchaucaꞌ nayadau ga purítchiapataü̃wa rü yicama tchoü̃ naga ga ĩpatawa. Tchama rü guü̃guma duü̃ü̃gümaã tchiporagatanücüü̃, rü máwaꞌeü̃ rü guü̃guma duü̃ü̃gümaã nanuwaꞌeü̃. Yeguma 14 ga taunecü tchoü̃ tchayemagu rü wüicanatama tchapatatchawa quinha. Itchanaügü na droga tchayiĩü̃, rü namawatama tchapeü̃. Nacaꞌ tchangĩ́ꞌ i caru na norü aiepewa tchapeü̃caꞌ. Yicama rü tchaugü tchayauü̃ne ga wüi ga ngeü̃rüüü̃mare ga deáwa.

Yeguma tchama rü ngĩ́taaꞌ i nüü̃ cuaꞌütchiü̃gu. Guü̃ne i ngemaü̃gü nacaꞌ tchangĩ́, ngẽma buchagü rü ta ĩpatagü. Guü̃ma ga duü̃ü̃gü rü marü tchoü̃ nacuaꞌü̃, ngemacaꞌ paa rü wüi ga taü̃ ngĩ́taaꞌgütücumüarü tchiĩ rü yemawena rü “nanaütchica” na tchama rü diẽrupataü̃arü ngĩtaꞌaü̃ tchiĩẽẽ. Erü poraãcü tchanuwaꞌeü̃ tchamucügü ga ngĩ́taaꞌtücumüwa rü tchoü̃ nangetchaü̃. Tchama rü taguma itchaũü̃ i ngeãneãcü, rü nhuꞌmatchi guü̃guma tchape ga tchorü nane cüeruü̃tüü̃gu.

Wüi ga nguneü̃gu yeguma tchoü̃ inanguutchiẽẽgu ga pocupataüwa, rü tchorü tíagu tchanaũane. Tama nüü̃ tchacuaꞌü̃ ga ngĩma rü tare tchautanüü̃gü rü marü Yeuwaarü Orearu Uruü̃güü̃ nayiĩẽẽ. Tümagü rü tchona nataugü nacaꞌ wüi ga norü ngutaqueꞌewa tchangu. Nacaꞌ nüü̃ tchadaumareü̃ rü nawa tchaũ. Yeguma Ngutaqueꞌepataü̃wa ítangugügu, rü ücutchicawa ingaicamawa tcharüto nacaꞌ meã nüü̃ tchadawenü ga guü̃ma ga duü̃ü̃gü ga nawa inangugüü̃. Yeguma tchaãnegu ga aiꞌrügumarüü̃tama.

Gumá ngutaqueꞌe rü nanaütchicüü ga tchorü maü̃. Tama tchayaõcüraü̃ü̃! Meã tchoü̃ nanayaugü ga yema namecümagü ga duü̃ü̃gü. Nhuꞌma rü ta nüna tchacuãꞌtchi na nhuãcü tchamaã namecüma rü norü ngútchaü̃maã meü̃ tchamaã naügü ga yema Yeuwaarü Orearü Uruü̃gü. Taguma nüü̃ tchadau ga yema, erü tama nüü̃ tchacuaꞌama ga yema meü̃ ga nacümagü.

Itchanaügü na Tupanaarü Orecaꞌ tchangu ga Yeuwaarü Orearü Uruü̃gümaã. Yeguma yeeraãcü nüü̃ tchacuaꞌgu rü yeeraãcü tchanawaꞌe nanaütchicü i tchorü maü̃. Wüi ga wetchicuru ga tchorü maü̃newa iucü rü Provérbios 13:20 niĩ. Nawa nhanagürü: “Ngẽxguma duü̃xü̃gü i nüxü̃ cuáxü̃maxã cuxãmücügu, rü tá cunayaxu i cua̱x. Natürü ngẽxguma ngẽma duü̃xü̃gü i naechitamare maxẽxü̃maxã cuxãmücügu, rü tá icuyarütaxu.” Tchanawaꞌe nüna tchaũgatchi ga yema ngĩ́taaꞌgütücumü. Tchaucaꞌ nagutchaütchi na yiĩü̃, notürü Yeuwa rü marü tchoü̃ narüngü̃ẽẽ.

Tchorü düétüwa rü ta marü nanaütchicüü. Tchiporatchigüü̃ rü marü nüü̃ tcharüo ga pori rü to drogagü. Marü tchiyoeru i namaꞌyaeü̃. Rü yema ngeü̃gü rü ítchanachoü̃ ga namatchinügü.

Taguma namaã tchataãẽ ga ugütaeü̃ rü nacaꞌ inguꞌü̃. Ngemacaꞌ tchaucaꞌ nagutchaü̃tchi na meã Tupanaarü Orecaꞌ tchanguꞌü̃. Tchaporatchigü rü yicama Yeuwaü̃ tchangetchaü̃. Yeguma tchaãẽwa rü tama nameü̃ rü tchieü̃gu i tchautchiga tcharüĩnüetcha. Tchaucaꞌ Yeuwa rü taugutáma nüü̃ inarügüma ga tchorü nori ga tchieü̃gü. Nawa ugütae na nhuãcü ya Yeuwa marü nüü̃́ nüü̃ nangetchaü̃ ga poraãcü tchieü̃gü ga ãẽꞌgacü ga Dawí, rü tchoü̃ nataãẽẽẽ. — 2 Samuel 11:1–12:13.

To gutchaü̃ niĩ rü pregação i ĩpatawatchigü namaã nüü̃ niu i tchorü õtchiga. (Mateu 28:19, 20) Poraãcü tchamuü̃ pregaçãowa nüü̃ tchayangau ga wüi ga duü̃ü̃ ga marü nügü tchadaiü̃ rüeꞌna marü nüü̃ tchatchieẽẽü̃. Írarüwatchigü nüü̃ tcharüporamare i ngẽma tchorü muü̃. Rü itchanaügü na taãẽãcü to duü̃ü̃güü̃ tcharüngü̃ẽẽ na nüü̃ nacuaꞌü̃ ya tórü meẽtchicü ya poraãcü nüü̃ nüü̃ nangetchaü̃cü ya tanatü ya Yeuwa.

Nüü̃ tchacuátchiga ya Yeuwa rü marü nanameẽẽ ga tchorü maü̃. Wigutaaꞌ i guü̃ma i nori tchamücügü rü marü nayueü̃ rüeꞌna pocupataü̃wa nangemagü i nhuꞌma. Notürü aicuma namaã tchataãẽ i tchorü maü̃, rü aicuma tchayaõ na wipeꞌewa tchataãẽü̃tchi. Nüü̃ tchacuaꞌü̃ na nhuãcü nügü írüíraü̃ rü tchaugümaã icuáü̃, rü ngẽmagagu niĩ na yeraãcü meã togümaã tchamaü̃ü̃. Tchorü ngĩgüwa rü tchataãẽü̃ i ngĩmaã i namaꞌ ya Carmen. Tügümaã wüigu rü taããeãcü togü i duü̃ü̃güü̃ tarüngü̃ẽẽ na Tupanaarü Oreü̃ icuaꞌü̃caꞌ.

A, nhuꞌma meü̃ i puracü tchoü̃́ nangema. Nhuguacü diẽrupataü̃wa tchapuracü, notürü tama na nacaꞌ nangĩꞌü̃caꞌ, notürü nacaꞌ ínanapiü̃caꞌ!