Nagu curüĩnü, wüi ya papa i norü nane ya 7 taunecüãü̃ namaã nidea. Nüma rü nhanagürü: “Nucümaü̃tchima, Tupana naüü̃ nhaa naane rü guü̃ma i taꞌacü nawa ngemaü̃; nüma naü i Üaꞌacü, rü Tauemacü rü ẽtagü.” Rü buü̃ íraü̃ nagu rüĩnü, rü ngẽmawena nüna naca: “Pa papa teé Tupanaü̃ iüü̃?”

Rü nanatü nanangãü̃ rü nhanagürü: “Tauema teé ya Tupanaü̃ taüü̃, nüma rü guü̃guma nangẽmaetcha.” Ngẽma ngãü̃ i natautchaü̃ rü buü̃caꞌ name. Notürü, ngẽguma nayatchigügu nügüna nacaetcha. Erü guü̃ma naügüü̃ rü ngẽmacaꞌ nüma rü tama meã nüü̃ nacuaꞌ na nhuãcü Tupana guü̃guma nangẽmaetcha. Rü nüma nhaãgu narüĩnü: ‘Ngeta ne naũ ya Tupana?ꞌ.

Ngeü̃rüü̃ü̃ niĩ i Tupanaarü Orearü ngãü̃? Nhama papa nanagãü̃rüü̃ niĩ. Moiché ga nanaümatüü̃: “Pa Cori Pa Tupana [ya Yeuwa], . . . rü nũcümaü̃tchima naü̃pa na cunaüü̃ ga nhama ga naane rü norü maꞌpǘnegü rü woetama marü Tupana quiĩ. Rü cuma rü guü̃gutáma cungemaetcha.” (Salmo 90:​1, 2) Ngemaãcütama ga Itchaía rü nhanagürü: “Rü nüma ya Cori ya Tupana ya guü̃guma ngẽmacü rü naanearü üruü̃ iĩcü.” (Isaías 40:28) Rü ta Yudaarü popera rü nüü̃ niu na “Tupanaü̃ ticuaꞌüü̃gü, erü nüma rü guü̃ãrü yeera name rü napora . . . rü yemaãcü niĩ ga nucümaü̃tchima, rü ngẽmaãcü niĩ i nhuꞌma, rü guü̃gutáma ngẽmaãcü yiĩü̃.”​—Juda 24, 25.

Ngẽma wetchicurugü tüü̃ naweꞌü̃ na Tupana rü “guü̃guma tórü Ãẽꞌgacü ya Rei niĩ rü tagutáma nayu”, rü ngẽma naümatüü̃ ga Pauru. (1 Timúteu 1:​17) Taꞌacütchiga niĩ i ngẽma? Nucümaü̃tchimagu írüĩnü. Taꞌacü ga nguneü̃ nüna cucuaꞌãtchi? Tupana rü marü nayema ga yema nguneü̃gu. Rü nüma rü guü̃gutáma ngẽmaetcha. (Apocaríchiu 1:8) Ngemaãcü, ya Tupana ya Guü̃étüwa Ngẽmacü guü̃guma nangẽma rü tagutáma nayu. Rü ngẽma niĩ i wüi meẽtchiü̃ i aicumaü̃ ya Tupanatchiga.

Tüꞌcüü̃ tacaꞌ nagutcha niĩ i ngẽma ĩnü? Erü tórü maü̃ paaü̃tchi naüpetütchigü rü ngẽmaca tama Tupana nagu rüĩnüãcüma rü tarüĩnüe i temputchiga. Notürü Tupana tagutáma nayu, nacaꞌ rü mil ya taunecü rü wüitama i nguneü̃rüü̃ yiĩü̃. (2 Pedru 3:8) Wüi cuaꞌruü̃: tarüme, wüi munü wiguta 50 nguneü̃gü namaü̃ rü ngẽmagagu rü natchiga nüü̃ nacuaꞌü̃tchi na wüi duü̃ü̃ 70 urü 80 taunecügü namaü̃? Taguma. Tupanaarü Orearü nüü̃ niu na Tupana rü torü Taü̃tchicü ya Ücü niĩ, rü yiema rü munügürüü̃ tiĩgü. Rü ta nüü̃ niu na norü ĩnü rü torü ĩnüétüwa nangema. (Isaías 40:22, Tradução do Novo Mundo, 55:​8, 9) Ngẽmagagu, nhure i Yeuwacümagütchiga duü̃ü̃gü rü tagutáma meã nüü̃ nacuaꞌü̃tchi tá.

Woo nagutcha niĩ nüü̃ tacuaꞌgü na Tupana guü̃guma ngẽmaü̃, ngẽma aicumaü̃ rü mea ngóü̃ niĩ. Ega wüie duü̃ẽtama naügutchi ya Tupana, yíema duü̃ẽtchitama niĩ i üruü̃ iĩẽ. Notürü, ngẽgumarüü̃ Tupanaarü Ore nüü̃ niu, Yeuwa niĩ ga ‘nanaü ga guü̃maꞌ. (Apocaríchiu 4:​11) Rü ta, nüü̃ tacuaꞌgü na guü̃ma i dauü̃wa ngẽmaü̃ rü nhaa naane rü nanangoꞌ. (Gênesis 1:​1, 2) Teé tanangoꞌẽẽ? Norü ügüü̃pa rü Norü Naneü̃pa rü ãĩyugüü̃pa yima Naücü marü nayemaü̃. (Jó 38:4, 7, TNM, Corochacü̃ãꞌ 1:15) Ngemaãcü nüü̃ tacuaꞌgü na naü̃pa ga guü̃ma nanaü, Tupanaica marü nayemaü̃ rü ngẽmacaꞌ natauma to Ücü.

Torü maü̃, rü guü̃ma i taꞌacü i dauü̃wa ngẽmaü̃, rü nhaa naane nanaweꞌgü na Tupana guü̃guma nangemaü̃. Na namaã nacuaꞌü̃caꞌ i guü̃ma i dauü̃wa ngẽmaü̃ rü nhaa naane nanawaꞌe wüi Ücü ya guü̃guma ngẽmacü. Nüicatama nüü̃ namaẽẽ i guü̃ma.​—Jó 33:⁠4.