Acul ya ĩanewa tchabugu. Ngẽma ĩane ya oéstchi ya Guatemalaanewa ngẽmaü̃, rü nawa nhure iãpataü̃wa ngẽmaü̃. Tchautanüü̃ rü ixilarü duü̃ü̃gü niĩgü rü maiatanüü̃ i duü̃ü̃gü. Tchama rü espanholgawa tchidea rü nhuꞌmatchi toga ya ixilgawa tchidea i tchabugumama. Yeguma tchama rü buü̃ rü Guatemalaanewa gueraãü̃. Ngẽma guera 36 ga taunecügücaꞌ. Muü̃ma ga tchorü duü̃ü̃gütanüü̃ nayueü̃ ga yema guerawa.

Yeguma tchama rü 4 ga taunecü tchoü̃ nangẽma rü tchauene rü 7 ga taunecü nüü̃ nangẽma, rü nügü inücawaꞌegüü̃ ga wüi dairuü̃ i iwãĩü̃ ga yeguma nhuruãtchi niwãĩü̃. Ngemagagu tchama rü tchangeetü rü tchauene nayugu. Yicama tchama rü wüi buü̃güarü ngeetüarü ngúepataü̃wa tchaũ ya Guatemalaanewa. Nawa rü braile i nagaü̃ tchacuaꞌẽẽ. Tauema tchamaã tidea rü tchorü amücügü rü tchoü̃ naoe. Guü̃guma ãũrima tchangetchaü̃ rü tchananguü̃ẽẽ na tchapatawa tchaũü̃caꞌ i tare tauemacücaꞌ, rü tchorü mamamaã nawa itcharüãũꞌ. Tchorü mama rü guü̃guma tchoü̃ namecüma rü ngetchaü̃waꞌeü̃. Wüi ngetchaü̃ niĩ ga ngeguma ngĩma iyugu yeguma tchama rü 10 ya taunecü tchoü̃ nangẽmagu. Tchaucaꞌ nagutchaütchi erü tchoü̃ ingetchaü̃ ga tchorü mama.

Yeguma 11 ya taunecü tchoü̃ nangẽmagu rü tchaanewa tchataegu na tchauene rü natanüü̃ wüigu tchapeü̃caꞌ. Tümarü tchona nadaugü, notürü tchangetchaü̃ama. Nhuguacü tchama rü Tupanana tchauca: “Tüꞌcüü̃ iyugu ga tchorü mama? Tüꞌcüü̃ tchama rü ngeetü?” Togü i duü̃ü̃gü tchamaã niugü rü ngẽma tchieü̃gü rü Tupanaarü ngútchaü̃ niĩ. Ngemacaꞌ niĩ tchaucaꞌ tama namecüma ya Tupana. Rü nagu tcharüĩnüü̃ na tchagü tchimaꞌü̃.

Erü tchangeetü rü nüü̃ natautcha na tchieü̃ tchoü̃ naüẽẽ. Yeguma buü̃gu rü muũẽꞌpücüna tchamaã tümagü nidaugu. Taguma namaã nüü̃ tchiu i ngẽma tchieü̃tchiga. Erü tchaucaꞌ tauema nacaꞌ naoegaãẽẽ. Tauema tchamaã tidea. Guü̃guma tchaica rü tauemagu tchayaõ.

Wüi nguneü̃gu tchorü ngúẽẽrüü̃ na tchaucaꞌ ngetchaü̃ rü nüna inacaꞌ na tare Yeuwaarü Orearü Uruü̃gü rü tchamaã niugü. Ngema tare rü tchamaã niugü i Tupanaarü unetagütchiga. Rü wenaarü tá namaẽẽ i yueü̃, rü wenaarü nangoꞌetü i ngeetügü. (Isaías 35:5, TNM; Juã́ũ 5:28, 29) Tchorü me niĩ i ngẽma ore, notürü tchaucaꞌ nagutchaütchi namaã tcharüyadea. Woo tchama rü ãnewaꞌeü̃, nümagü tchoü̃ namecüma rü yana namaã naĩnüãcüma tchoü̃ nangúeẽẽ i Tupanaarü Oretchiga. Nacaꞌ tchapatawa ínangu, rü ngẽma tare rü 10 quirúmetrugü naĩ rü nagu naĩnagü ga mapǘꞌne.

Tchauene nüü̃ niutchigaü̃ na ngẽma namaꞌ rü nate rü nügü nangaꞌãẽ woo nangearü ngẽmaü̃ãꞌ. Notürü guü̃guma tchaugu narüĩnüe rü tautchaãcü ãmaregü tchona naãü̃. Tchaucaꞌ aicuma yaõgüü̃icatama rü aicuma togüü̃ nangetchaü̃gü.

Tupanaarü Orecaꞌ tchanguꞌ i namaã i poperagü i brailegawa. Meã nüü̃ tchacuaꞌü̃ i tchauãnewa, notürü tchaucaꞌ nagutchaütchi na tchanayauü̃caꞌ i nhure i ore. Cuaꞌãtchiruü̃: tchaucaꞌ nagutchaütchi tchayaõ na Tupana aicuma tchaugu narüĩnü rü nhuꞌmatchi na togü i duü̃ü̃gü tchoü̃ na nangetchaü̃gü nhama Tupana tchoü̃ na nangetchaü̃rüü̃. Meã nüü̃ tchacuaꞌ na tüꞌcüü̃ Tupana tama nanatchuꞌu i tchieü̃ ngupetüü̃, notürü tchaucaꞌ nagutchaütchi Tupanaü̃ tchadau nhama wüi ngetchaü̃cü Nanatürüü̃. *

Yicama tchorü ĩnügü nanatoraẽẽ. Cuaꞌãtchiruü̃: Nüü̃ tchacuaꞌ na Tupana nüü̃ nangetchaü̃tümüü̃ ya yíema tioeẽgüü̃. Natchiga norü duü̃ü̃gü ga yeguma ngúü̃ ningegügu, Tupana rü nhanagürü: “Meaü̃tchima nüü̃ tchadau na nhuãcü ngúü̃ yangegüü̃ i ngẽma tchorü duü̃ü̃gü”. (Êxodo 3:7) Ngeguma nüü̃ tchangetchaü̃gu i Yeuwacümagü rü tchaugü inaã i tchorü maü̃. Rü 1998gu tchabaiü̃ẽẽ rü wüi Yeuwaarü Orearü Uruü̃ü̃ tchiĩẽẽ.

Tchabaieguwena tchama rü nawa tchaũ i Escuintla ĩanegu nangaica na tchangúü̃ü̃caꞌ i ngeetüarü ngúepataü̃wa. Wüi ngémacüãꞌ i anciãũ nüü̃ nacuátchigagu na tchaucaꞌ nagutchaütchi ngutaqueꞌewa tchangu ngeta tchape. Ngutaqueꞌepataü̃wa na tchaũ rü nayáü̃. Ngẽma anciãũ nacaꞌ ínaca na wüi natanüü̃ i Yeuwaarü Orearü Uruü̃güü̃ niĩ na tchoü̃ narüngü̃ẽẽü̃caꞌ i ngutaqueꞌegüwa tchangu. Nhuꞌma rü tá i ngẽma natanüü̃ tchona nadaugü.

Togü i yaõgüü̃ rü ta aicuma ngetchaü̃waꞌeü̃. Ngemaãcü aicuma tchayaõ na Yeuwaarü duü̃ü̃gü rü aicuma Ngetchutchuã́ü̃ yaõgüü̃ iĩgü.— Juã́ũ 13:34, 35.

Nhuꞌma rü tchataãẽ rü tama nagu tcharüĩnüü̃ rü tchama rü taucaꞌ nameü̃. Tchama rü guü̃ nguneü̃gu tchorü ngútchaü̃maã tchapuracüü̃ nacaꞌ duü̃ü̃güü̃ rüngü̃ẽẽü i Yeuwaü̃ icuaꞌgü. Ngemaãcü tama nagu tcharüĩnüü̃mare i tchadaꞌawe. Rü nhuꞌmatchi tchama rü anciãũ tchiĩ i yaõgüü̃tücumüwa. Rü guẽmacaꞌ ore tchiu i yaõgüü̃tücumügüwa rü nawa i Ngutaqueꞌe Ãũ.

Rü 2010gu ngẽma Treinamento Ministerial i Ngúepataü̃wa tchangú (nhuꞌma nagu naẽ́ga Orearü Uruü̃gü Ngúepataü̃). Ngẽma ngúepataü̃ tchoü̃ narüngü̃ẽẽ na meã tchapuracü i yaõgüü̃tücumüwa. Rü nhuꞌmatchi tchoü̃ nacuaꞌẽẽ na Yeuwa rü poraãcü tchoü̃ nangetchaü̃ rü tchamaã nataãẽ. Rü Yeuwa nüü̃ nangúeẽẽ i nanhuraü̃ü̃ i duü̃ü̃gü na nacaꞌ napuracüü̃.

Ngetchutchu nhanagürü nhaü̃: “Rü narümemaẽ niĩ i pema na togüena penaãü̃ rü tama i tüma pena tanaãü̃”. (Puracügü 20:35) Nhuꞌma aicuma tchataãẽ rü tchaucaꞌ natautchaẽẽ na togüü̃ tcharüngü̃ẽẽ.