Londreswa tchabugu rü tchaué rü tchaueyagümaã tchapeü̃. Tchaunatü rü ngãwaꞌeü̃ rü yemagagu muẽꞌpüꞌcüna torü ĩpatana niũ.

Yeguma tchabucü tchiĩgu tchaué tchoü̃ tanguꞌẽẽ na tchutaü̃gutchigü tchayumüẽü̃caꞌ. Rü tchayemaü̃ wüi Tupanaarü Ore i ümatüü̃ na nawa nayemaü̃ i Salmo rica. Rü tchaugütae rü namaã tchawiyae. Wüi nguneü̃gu tchaugütae i to poperawa i nhaã: “Bemana ngẽma moü̃arü nguneü̃ tama ínangu tá.” Yemagu tcharüĩnüetcha rü tchaugüna tchaca: “Tüꞌcüü̃ tamaẽ”? Tamatchire tchayutchaü̃!

Tchama rü ga yueü̃maã tchideatchaü̃ rü ngoꞌotchiga tchacuaꞌtchaü̃. Rü tchamücügümaã tchemiterawa tchaũ rü filmegüü̃ i ngoꞌotchiga rü yuuetchiga tadaugüü̃. Rü tacaꞌ nameẽtchi notürü tamuü̃e.

Yeguma 10 tchorü taunecügu tama tchauega tchaĩnütchaü̃ rü guü̃guma tchayipe. Rü ta yeguma 11 tchorü taunecügu deꞌ tchaae yerü tchaucaꞌ name na tchangãü̃ü̃. Rü petagüwa tchaũ rü yemagagu tama ngúepataü̃wa tchaũtchaü̃. Rü nhuguacü ngúepataü̃wa tchangu notürü tchama ngúepataü̃wa deꞌ tchaae.

Tama meã tchangúe i ngúepataü̃wa. Rü yeguma tchaué nüü̃ tacuaꞌgu ga yema, poraãcü tchamaã tanu rü yemagagu tügü tadaigü. Rü tchapatana tchiũgatchi rü tchorü ãarüaꞌmaã tchapeü̃ naéga rü Tony. Nüma rü ngĩ́taꞌaü̃ rü ta tchoteꞌenemaã natae rü duü̃ü̃gü nüü̃ niugü na nüma rü poraãcü nuwaꞌeü̃. Yicüamaüra tchama rü iãacü rü yeguma 16 tchorü taunecügu tchaune nabugu.

Yeuwaarü Orearü Uruü̃gümaã tchiu yeguma wüi natchicawa i mamagücaꞌ ya ngetecü tchapeü̃gu tamaã tchidea yerü tüü̃ tchaweꞌtchaü̃ na tümaarü ngúeẽtaegü tama aicumaü̃ niĩ. Notürü ngĩmagü rü meã yana tchamaã taĩnüe rü tchorü cagüü̃ tanangaü̃gü i Tupanaarü Oremaã. Ngĩmagü rü tchamaã namecüma rü yemagagu Tupanaarü Orecaꞌ tchanguꞌ.

Yeguma tchabucü tchiĩgu tchamuü̃ na tchayu. Notürü Tupanaarü Orewa nüü̃ tchacuaꞌ na wipeꞌewa teé marü tayu itarüdagü tá. (Juã́ũ 5:28, 29) Ngẽma aicumaü̃ natoraẽẽ ga tchorü ĩnü. Rü ta nüü̃ tchacuaꞌ na Tupana tchaugu narüĩnü. (1 Pedru 5:7) Rü Jeremias 29:11 poraãcü tchoü̃ rüngü̃ẽẽ, nawa nhanagürü: “‘Rü tchama rü nüü̃ tchacuaꞌ i ngẽma pecaꞌ nagu tcharüĩnüü̃. Rü ngẽma tchorü ĩnü rü perü mecaꞌ niĩ rü tama i perü tchieü̃caꞌ.... Rü tá pena tchanaã i wüi i taãẽ i aicuma iĩü̃.’” Yemagagu nagu tchayaõ na wipeꞌewa guü̃gutáma tchamaü̃ i wüi i meẽtchiü̃ i naanewa i nhamawatama. — Salmo 37:29.

Yeuwaarü Orearü Uruü̃gü tchoü̃ naweꞌgü na aicuma tchoü̃ nangetchaü̃gü. Rü ga nüíra ga ngutaqueꞌewa ga nawa tchangugu rü tchaucaꞌ nameẽtchi ga yema natchica! (Juã́ũ 13:34, 35) Rü nüü̃ tchadau na tama nawüigu namaã ga wüi tupauca na naü̃pa nawa tchangugu, yerü yéawa tama meã tchoü̃ nayaugü, notürü Yeuwaarü Orearü Uruü̃gü meã tchoü̃ nayaugü woo ga tchorü gutchaü̃gü. Rü nümagü rü tchona nadaugü rü tchoü̃ narüngü̃ẽẽgü. Nümagü rü tchautanüü̃rüü̃ ga niĩgü.

Yerü Tupanaarü Orecaꞌ tchanguꞌ, nüü̃ tchacuaꞌãtchi na tchanawaꞌetchire nüü̃ tcharüo ga tchorü tchiecüma. Rü tchaucaꞌ nagutchaü̃tchi nüü̃ tcharüo na tchayipe i maconha. Rü nüü̃ tchacuaꞌãtchi na nümaü̃ i wiyaegü tchoü̃́ nangutchaü̃ẽẽ na tchayipe rü yemagagu tama nüü̃ tchaĩnüetcha. Rü na tama deꞌ tchaae tama petagüwa tchanguguetcha, rü ta namaã tchaãmücü ya teé tchoü̃ tangutchaü̃ẽẽ na nüü̃ tcharüoü̃caꞌ ga tchorü tchiecümagü. — Provérbios 13:20.

Guma nai ga taunecügu, Tony rü ta Tupanaarü Orecaꞌ nanguꞌ. Yerü Yeuwaarü Orearü Uruü̃gü norü cagüü̃ nanangãü̃gü nüma ga Tony nagu nayaõ na yema nguꞌẽẽtaegü rü aicumaü̃ yiĩü̃. Nüma rü nüü̃ narüo ga norü tchiecümagü rü nawa niũgatchi ga norü amücügü ga mawaégüü̃ rü tama tchieütchiü̃ naüetcha rü bai nayipeetcha i maconha. Rü tomagü rü nüü̃ tacuaꞌãtchie na tanawaꞌegü yigümaã iningĩgü na Yeuwaü̃ tataãẽgüẽẽü̃caꞌ rü ta na meã tonena tadaugüü̃caꞌ rü yemagagu yigümaã iningĩgü ga 1982gu.

Muẽꞌpücüna nacaꞌ tchadau nawa i poperagü i Dauü̃taecü rü Despertai! * natchiga ga duü̃ü̃gü na nüü̃ narüoe ga norü tchiecümagü ta. Yema cuaꞌãtchiruü̃gü ãũrima tchoü̃ naporaẽẽ rü ta tchoü̃ nangútchaü̃ẽẽ na tchaugü tchaporaẽẽetcha rü ta tchayumüẽetcha na Yeuwana tchacaꞌ na tama tchoü̃ nao. Rü yemaãcü Yulioarü 1982gu, tchama rü Tony itabaiü̃ na Yeuwaarü Orearü Uruü̃gü tiĩgüü̃caꞌ.

Yeuwamaã tchaãmücü rü nüma rü tchoü̃ namaẽẽ. Tchama rü Tony rü nüü̃ tacuaꞌãtchie na Yeuwa tüü̃ narüngü̃ẽẽ yeguma gutchaü̃gü tüü̃ nangupetügu. Yeuwagu tayaõgü woo ga torü gutchaü̃gü rü nüü̃ tacuaꞌãtchie na nüma rü guü̃guma tatanüü̃na nadau rü tüü̃ narüngü̃ẽẽ. — Salmo 55:22.

Rü poraãcü tataãẽgü yerü nüü̃ tarüngü̃ẽẽgü i tone rü toacü na Yeuwamaã naãmücügü ta. Rü nhuꞌma tatãẽgüü̃tchi erü totaa Yeuwatchigacaꞌ nangúe ta.

Rü nhuꞌma rü tama tchaoégaãẽ nagagu i taꞌacü na wipeꞌewa nangupetü tá rü bai yugagu. Rü ta tchama rü Tony guü̃ i yüügu to ĩãnewa taĩ na Yeuwaarü Orearü Uruü̃güarü natücümügüwa nüü̃ tataãẽgüẽẽ i taenegü rü taeyagü rü wüigu duü̃ü̃güü̃ itanguꞌẽẽ na Ngetchutchuü̃ nayaõgü na nanayaugüꞌ ü̃caꞌ i maü̃ i taguma guꞌü̃.