Êxodo 1:1-22
1 1:1-4 Rü nhaa nixĩ i naégagü ga Yacú nanegü ga wüxigu guxü̃ma ga naxma̱xgü rü naxacügümaxã Eyítuanewa namaxã nangugüxü̃. Rü Rubéü̃ nixĩ ga wüxi rü Chimiáũ nixĩ ga to, rü Lewí, rü Yudá, rü Ichacá rü Yeburóũ rü Bẽyamí rü Dáü̃, rü Natarí, rü Gáyi, rü Aché.
2 Nüü̃ nadau 1:1
3 Nüü̃ nadau 1:1
4 Nüü̃ nadau 1:1
5 Rü guxü̃ma ga yema Yacútanüxü̃gü ga Eyítuanewa ngugüxü̃ rü 70 nixĩ. Rü nüma ga Yúche rü woetama marü Eyítuanewa nayexma.
6 Rü nüma ga Yúche rü nayu, rü naeneegü rü guxü̃ma ga yema togü ga natanüxü̃gü ga yexguma maxẽxü̃, rü nayue.
7 Notürü ga yema Iraéutanüxü̃ rü nimuxacü. Rü yemaacü paxama nimu, rü pora nüxü̃́ nayexma yerü namuxũchi. Rü nanapáxẽẽgü ga guxü̃ma ga Gochéü̃ane ga Eyítuanewa yexmaxü̃.
8 1:8-9 Notürü yemawena ga Eyítuanewa rü nixücu ga wüxi ga ãẽ̱xgacü ga tama Yúchexü̃ cuácü. Rü nüma rü norü duü̃xü̃gümaxã nhanagürü: —Ngẽma duü̃xü̃gü i Iraéutanüxü̃gü rü namuxũchi rü tüxü̃ narüporamaegü.
9 Nüü̃ nadau 1:8
10 ¡Rü ngẽmaca̱x, ngĩxã naxca̱x tadaugü nax nhuxãcü íyachaxãchixẽẽxü̃ nax yamuxü̃! Erü ngẽxguma chi ngürüãchi to i nachixü̃ane tamaxã nügü daixgu, rü nüma i Iraéutanüxü̃ rü tá tórü uanügütanügu naxãgü nax tüxü̃ nadaixü̃ca̱x rü nhu̱xũchi ngẽmaãcü nayoxniegü nax tüxna naxĩgüxü̃ —nhanagürü.
11 Rü yemaca̱x ga yema Eyítuanecüã̱xgü rü nüxü̃ naxuneta ga nhuxre ga yatügü ga puracümaxã icua̱xgüxü̃ nax poraãcü yema Iraéutanüxü̃güxü̃ napuracüexẽẽxü̃ca̱x. Rü nüxü̃ nanaxüxẽxẽ ga taxre ga ĩanegü ga Pitóũgu rü Raü̃chégu ãégane. Rü guma ĩanegu nixĩ ga namaxã nanguxü̃xü̃ ga naxnegü rü churaragüarü õnagü ga Eyítuanecüã̱xarü ãẽ̱xgacü ga Faraóũ.
12 Notürü yexguma yexeraãcü chixriãcü namugüã̱xgu, rü yexeraãcü nimuetanüama ga Iraéutanüxü̃gü. Rü yemaca̱x nixĩ ga Eyítuanecüã̱xgü ga poraãcü nüxü̃ namuü̃exü̃.
13 1:13-14 Rü nüma ga Eyítuanecüã̱xgü rü yexeraãcü chixri namaxã nachopetü rü poraãcü nanapuracüexẽẽxü̃chi. Rü yemaacü yema Iraéutanüxü̃güxü̃ nachixeãxẽgü. Rü mairaxü̃arü puxmücharawa nanamugü nax tiyúrune naxügüxü̃ca̱x rü dexámaü̃arü üwa nanapuracüexẽxẽ nax naanewa nayáxü̃ca̱x ga taxtüarü dexá. Rü yemaacü nixĩ ga yema Iraéutanüxü̃gümaxã chixeãcüma namaxẽxü̃.
14 Nüü̃ nadau 1:13
15 1:15-16 Rü nüma ga Eyítuanecüã̱xarü ãẽ̱xgacü rü ngĩmaxã nidexa ga Chífra rü Púa ga Iraéutanüxü̃güarü buexacüxẽẽruxü̃. Rü nhanagürü ngĩxü̃: —Ngẽxguma penaxíraxacüxẽẽ̱xgu i ngẽma Iraéutanüxü̃güarü ngexü̃, rü ega nayatüxacüxgu rü tá peyama̱x i ngẽma naxacü, notürü ega nangexgu rü taxũtáma peyama̱x —nhanagürü.
16 Nüü̃ nadau 1:15
17 Notürü ga ngĩmagü ga yema buexacüxẽẽruü̃gü rü Tupanaxü̃ imuü̃e. Rü yemaca̱x tama inaxü ga yema Eyítuanecüã̱xarü ãẽ̱xgacü ngĩmaxã nüxü̃ ixuxü̃. Rü tama tüxü̃ idai ga guxema õxchanagü ga iyatüxe.
18 Rü yexguma ga guma ãẽ̱xgacü ga Eyítuanecüã̱x rü ngĩxca̱x nangema, rü nhanagürü ngĩxü̃: —¿Tü̱xcüü̃ penamaxẽxẽxẽ i ngẽma buxü̃gü i yatüxü̃? —nhanagürü.
19 Rü yexguma ga ngĩmagü rü inangãxü̃ rü ngĩgürügügü: —Erü ngẽma Iraéutanüxü̃ i ngexü̃gü rü tama Eyítuanecüã̱x i ngexü̃gürüxü̃ iyixĩgü. Rü ngexü̃gü i paxama íxraxacügüxü̃ nixĩgü, rü tauxtama ngẽ́ma ngĩxü̃tawa tangugügu rü marü ixíraxacügü —ngĩgürügügü.
20 1:20-21 Rü yemaacü ga yema Iraéutanüxü̃gü rü nimuetanüama, rü wüxichigü ga taunecügu rü niyexeragüchigü nax naporaexü̃. Rü yema nax Tupanaxü̃ namuü̃exü̃ ga yema buexacüxẽẽruü̃gü, rü Tupana rü ngĩxü̃ narüngü̃xẽxẽ nax ngĩmagü rü ta yamuxãcügüxü̃ca̱x.
21 Nüü̃ nadau 1:20
22 Rü yemaca̱x ga nüma ga Faraóũ rü norü duü̃xü̃güxü̃ namu nax taxtü ga Níruwa tüxü̃ nawoü̃xü̃ca̱x ga guxema Iraéutanüxü̃arü õxchanagü ga iyatüxe. Notürü ga guxema ingexe ga õxchanagü rü tama tüxü̃ nadai.
