Êxodo 19:1-25
19 19:1,2 Rü yema Iraéutanüxü̃gü rü yexguma Eyítuanewa ínachoxü̃gu rü düxwa Refiyíü̃wa nangugü rü yexma nayapegü. Rü yéma inaxĩãchi rü ma̱xpǘne ga Chinaíarü chianexü̃wa nangugü. (Rü yima ma̱xpǘne rü Orébigu rü ta naxãéga.) Rü yexguma rü marü tamaepü̱x ga tauemacü ningegü nax Eyítuanewa ínachoxü̃xü̃. Rü guma ma̱xpǘnearü to̱xma̱xtagu napegü.
2 --
3 Rü guma ma̱xpǘnegu nixĩ ga naxĩnagüxü̃ ga Moiché nax yexma Tupanamaxã nügü nangaugüxü̃ca̱x. Rü guma ma̱xpǘnewa nixĩ ga Moichémaxã yadexaxü̃ rü nhaxü̃ nüxü̃: —¡Rü nhaatama orexü̃ namaxã ixu i ngẽma Iraéutanüxü̃gü i Yacútanüxü̃gü!:
4 “Rü pema rü marü nüxü̃ pedau ga yema Eyítuanecüã̱xmaxã chaxüxü̃ rü nhuxãcü chaugüxü̃tawa pexü̃ chagagüxü̃ nhama wüxi i ĩyü i mea naxacü tüxü̃ igaxü̃rüxü̃.
5 Rü ngẽxguma aixcuma guxü̃wama chauga pexĩnüegu rü peyanguxẽẽ̱xgu i ngẽma pemaxã ichaxügaxü̃, rü guxü̃ma i nachixü̃anetanüwa rü tá pexü̃ama nixĩ icharüngü̃xẽẽxü̃, erü guxü̃ma i nhaa naane rü choxrü nixĩ.
6 Rü pema tá nixĩ i chorü orearü uruü̃gü i chape̱xewa duü̃xü̃güétüwa pidexagüxü̃, rü wüxi i chorü duü̃xü̃gü i chaugaxicatama ixĩnüexü̃ tá pexĩgü.” Rü guxü̃ma i nhaa cumaxã nüxü̃ chixuxü̃ rü ¡namaxã nüxü̃ ixu i ngẽma Iraéutanüxü̃gü! —nhanagürü.
7 Rü nüma ga Moiché rü natáegu nawa ga guma ma̱xpǘne rü nanangutaque̱xexẽxẽ ga yema Iraéutanüxü̃güarü ãẽ̱xgacügü. Rü namaxã nüxü̃ nixu ga guxü̃ma ga yema ore ga Tupana namaxã nüxü̃ ixuxü̃.
8 Rü yexguma ga yema Iraéutanüxü̃gü rü wüxigu Moichéxü̃ nangãxü̃gü rü nhanagürügü: —Tá tayanguxẽxẽ i guxü̃ma i ngẽma Cori ya Tupana toxü̃ muxü̃ —nhanagürügü. Rü nüma ga Moiché rü Tupanamaxã nüxü̃ narüxu ga yema Iraéutanüxü̃güarü ngãxü̃.
9 Rü nüma ga Cori ya Tupana rü nhanagürü Moichéxü̃: —Dücax, cumaxã nüxü̃ chixu, rü wüxi i caixanexü̃ i pamüemaxü̃wa tá chaugü cuxü̃ chawe̱x nax ngẽmaãcü i ngẽma duü̃xü̃gü rü choxü̃ nax naxĩnüexü̃ca̱x nax cumaxã chidexaxü̃ rü ngẽmaãcü guxü̃guma cuxü̃́ yaxõgüaxü̃ca̱x —nhanagürü. Rü nüma ga Moiché rü wenaxarü Cori ya Tupanamaxã nüxü̃ nixu ga yema duü̃xü̃güarü ngãxü̃.
10 Rü nüma ga Cori ya Tupana rü nhanagürü Moichéxü̃: —¡Ẽcü, namaxã nüxü̃ yarüxu i ngẽma duü̃xü̃gü nax nügü yamexẽẽgüxü̃ca̱x i nhu̱xmax rü moxü̃ nax ngẽmaãcü choxü̃ yacua̱xüü̃güxü̃ca̱x! Rü name i nügü niyauxgüchirugü.
11 Rü ẽcü nügü namexẽẽgü naxca̱x i pa̱xmaacüarü ngunexü̃, erü ngẽma ngunexü̃gu tá nixĩ i ícharüxĩxü̃ nagu ya yima ma̱xpǘne ya Chinaí nape̱xewa i guxü̃ma i ngẽma duü̃xü̃gü.
12 ¡Rü inaxǘ i cua̱xruü̃gü i norü guxü̃cüwawa ya yima ma̱xpǘne nax tama nachopetüxü̃ca̱x i duü̃xü̃gü! ¡Rü namaxã nüxü̃ ixu nax tama nagu naxĩgüxü̃ ya yima ma̱xpǘne, rü bai tá ta nüxna nangaicamagüxü̃! Erü guxãma ya yíxema nüxna ngaicamaxe rü tá tayu.
13 Rü yíxema ma̱xpǘnegu ĩnagüamáxe rü taxúetáma tüxü̃ pingṍgü, notürü nutagümaxã rü würagümaxã tá nixĩ i tüxü̃ pima̱xgüxü̃. Rü nüétama nixĩ ega wüxi i duü̃xü̃ yixĩgu rüe̱xna wüxi i naxü̃na yixĩgu, rü taxũtáma penamaxẽxẽ. Notürü nüma i duü̃xü̃gü rü ngẽxguma marü nüxü̃ naxĩnüegu nax yacueãxü̃ i carnéruchatacu̱xre, rü marü name nax yima ma̱xpǘneca̱x naxĩxü̃ —nhanagürü.
14 Rü nüma ga Moiché rü ínarüxĩ nawa ga guma ma̱xpǘne nax duü̃xü̃güxü̃ yaxucu̱xẽgüxü̃ca̱x nax nhuxãcü Tupanaxü̃ yacua̱xüü̃güxü̃ca̱x. Rü nüma ga duü̃xü̃gü rü nügü niyauxchirugü.
15 Rü nüma ga Moiché rü nhanagürü nüxü̃: —¡Pegü pimexẽẽgü naxca̱x i pa̱xmaacüarü ngunexü̃! ¡Rü naxü̃pa i ngẽma rü taxũtáma pexma̱xmaxã pemaxẽ! —nhanagürü.
16 Rü yexguma noxri yangunegu ga pa̱xmaacüarü ngunexü̃gu rü naxãẽmacüane rü niduruane. Rü wüxi ga caixanexü̃ ga pamüemaxü̃ guma ma̱xpǘneétügu ínarüxĩ. Rü wüxi ga tagaxü̃ ga nacornétagaraxü̃xü̃ yéma inanaxũ, rü yexguma yemaxü̃ naxĩnüegu ga duü̃xü̃gü rü muü̃maxã nidu̱xru̱xe.
17 Rü yemawena rü nüma ga Moiché rü yéma ínapegüxü̃wa duü̃xü̃gümaxã ínaxũxũ nax Tupanaxü̃ íyadaugüxü̃ca̱x. Rü guma ma̱xpǘnepechinüwa nayachaxãchitanü.
18 Rü guxü̃wama ga guma ma̱xpǘne ga Chinaí rü narücaxi yerü Tupana rü üxüemamaxã yexma ínarüxĩ. Rü yema caxixü̃ rü nhama wüxi ga üxüemarüxü̃ nixĩ. Rü yexgumatama ga guma ma̱xpǘne rü poraãcü nixĩã̱xcüxü.
19 Rü yema naga ga nacornétagaraü̃xü̃ rü yexeraãcü nitagachigü. Rü nüma ga Moiché rü Tupanamaxã nidexa, rü nüma ga Tupana rü nanangãxü̃. Rü yema naga ga Tupana rü nhama duruanexü̃rüxü̃ nixĩ.
20 Rü nüma ga Cori ya Tupana rü yexeraãcü ma̱xpǘne ga Chinaítape̱xegu nixĩ ga ínaxĩxü̃, rü yéma Moichéca̱x naca nax naxü̃tagu naxĩnagüxü̃ca̱x. Rü nüma ga Moiché rü yexma naxĩnagü.
21 Rü Cori ya Tupana rü nhanagürü nüxü̃: —¡Ẽcü írüxĩ rü namaxã nüxü̃ ixu i duü̃xü̃gü nax tama nawa nachopetüxü̃ca̱x i ngẽma cua̱xruxü̃ i pexüxü̃! Rü tama chanaxwa̱xe nax nagu naxĩnüexü̃ nax choxü̃ nadaugüxü̃, erü ngẽxguma choxü̃ nadaugügu rü tá nayue.
22 Rü woo i ngẽma chacherdótegü i chape̱xewa duü̃xü̃güétüwa chogügüxü̃ rü nanaxwa̱xegü i nügü namexẽẽgü nax tama natanüwa rü ta chanadaixü̃ca̱x —nhanagürü.
23 Rü nüma ga Moiché rü Cori ya Tupanaxü̃ nangãxü̃ rü nhanagürü: —Ngẽma duü̃xü̃gü rü taxũtáma nagu naxĩgüama ya daa ma̱xpǘne ya Chinaí, erü cuma toxü̃ cumu nax tayapoxyeanexü̃ nax tama nachopetüxü̃ca̱x i duü̃xü̃gü, rü nhu̱xũchi tomaxã nüxü̃ quixu rü daa ma̱xpǘne nax naxüünexü̃ —nhanagürü.
24 Notürü nüma ga Cori ya Tupana rü nhanagürü: —¡Ẽcü írüxĩ rü nhu̱xũchi Aróũmaxã naxĩnagü! Notürü ngẽma chacherdótegü rü ngẽma duü̃xü̃gü rü tama chanaxwa̱xe i nüxü̃ nachopetü i ngẽma cua̱xruü̃gü nax chauxü̃tawa naxĩxü̃ca̱x, erü tá ngürüãchi natanüwa rü tá chanadai —nhanagürü.
25 Rü nüma ga Moiché rü ínarüxĩ rü yema Iraéutanüxü̃gümaxã nüxü̃ nixu ga yema Tupana namaxã nüxü̃ ixuxü̃.
