Êxodo 2:1-25
2 Rü wüxi ga yatü ga Lewítanüxü̃ ixĩcü rü wüxi ga nge ga natanüxü̃tama ixĩcümaxã naxãxma̱x.
2 Rü ngĩma ga yema ngecü rü nüxü̃́ ixãxacü, rü yema ngĩxacü rü nayatü. Rü yexguma tüxü̃ nada̱xgux ga guxema ngĩne ga nax tamexechixü̃, rü tamaepü̱x ga tauemacü tüxü̃ iyacu̱x,
3 notürü taxucürüwa yexü̃cürü tüxü̃ iyacúecha. Rü yemaca̱x inayaxu ga wüxi ga pexchi ga dexnenaxca̱x rü o̱xwümaxã inawacuchita nax tama dexá ixücuxü̃ca̱x. Rü nhu̱xũchi yexma tüxü̃ iyamue ga guxema ngĩne, rü dexnenecügu tüxü̃ iyangütaü̃xẽxẽ ga taxtü ga Nírupechinüwa.
4 Rü yemawena ga tümaé rü wüxi ga tümaeya̱xü̃ imu nax yéma yáxü̃waxüra tüxü̃ nadawenüxü̃ca̱x rü ta̱xacü tüxü̃ ngupetü ga guxema õxchana.
5 Rü yixcüamaxü̃ra Faraóũacü rü iyarüxüe ga taxtüpechinüwa nax yaxaiyaxü̃ca̱x. Rü ngĩxü̃taxü̃gümaxã yexma taxtüpechinügu iyarüxũ, rü yéma dexnenecüwa nüxü̃ idau ga guma pexchi ga yexma ngücü. Rü ngĩma ga Faraóũacü rü wüxi ga ngĩxü̃taxü̃xü̃ imu ga nax yayauxãxü̃ca̱x ga guma pexchi rü ngĩxü̃tawa nax nangeaxü̃ca̱x.
6 Rü yexguma ínangegüã̱xgu ga guma pexchi, rü yexma tüxü̃ iyangau ga wüxi ga õxchana ga ixaxúe. Rü ngĩma ga Faraóũacü rü poraãcü ngĩxü̃́ tangechaü̃tümüxü̃, rü ngĩgürügü: —Nhaa õxchana rü wüxi i Iraéutanüxü̃acü nixĩ —ngĩgürügü.
7 Rü yexguma ga tümaeya̱x ga guxema õxchana, rü Faraóũacüna ica rü ngĩgürügü: —¿Namexü̃ chi wüxi i ngexü̃ i Iraéutanüxü̃ i ãgüneníü̃xü̃ca̱x chaca̱xgu nax tüxü̃ nama̱i̱xü̃ca̱x ya daxe õxchana? —ngĩgürügü.
8 Rü yexguma ga ngĩma ga Faraóũacü rü ngĩxü̃ ingãxü̃ rü ngĩgürügü:—¡Ẽcü, tayadau! —ngĩgürügü. Rü yexguma ga yema bucü rü tümaéxü̃ iyaga ga guxema õxchana.
9 Rü ngĩma ga Faraóũacü rü ngĩgürügü ngĩxü̃: —¡Ẽcü cugüxü̃tawa naga i nhaa õxchana rü choxü̃́ nayaxẽxẽ! Rü chama rü tá cuxü̃́ chanaxütanü naxca̱x i ngẽma curü puracü —ngĩgürügü. Rü ngĩma ga tümaé rü tüxü̃ iyaga rü tüxü̃ iyaxẽxẽ.
10 Rü yexguma marü tayaxüragu, rü Faraóũacüna tüxü̃ imu. Rü ngĩma rü ngĩnexü̃ tüxü̃ iyaxĩxẽxẽ. Rü Moichégu tüxü̃ ixüéga rü ngẽma naéga rü “dexáwa chayaxuxü̃” nhaxü̃chiga nixĩ.
Eyítuanewa nixũ ga Moiché
11 Rü yexguma marü naya̱xgu ga Moiché, rü wüxi ga ngunexü̃ rü natanüxü̃gütanüwa ínayadau. Rü yéma nüxü̃ nadau ga nhuxãcü poraãcü chixri natanüxü̃güxü̃ namuxü̃ ga Eyítuanecüã̱xgü. Rü yexgumatama nüxü̃ nadau ga wüxi ga Eyítuanecüã̱x nax wüxi ga Iraéutanüxü̃na nax nacua̱i̱xcaãxü̃.
12 Rü nüma ga Moiché rü nanadauáane. Rü yexguma marü taxuxü̃ma ga duü̃xü̃xü̃ nada̱xgux, rü yema Eyítuanecüã̱xü̃ rü nima̱x rü naxnecüte̱xegu inanata̱x ga naxü̃ne.
13 Rü moxü̃ãcü rü wenaxarü ínaxũxũ, rü natanüxü̃gütanüwa ínayadau. Rü nüxü̃ nadau ga taxre ga Iraéutanüxü̃gü ga nügü idaixü̃. Rü yexguma ga Moiché rü yema namücüxü̃ imáxü̃na naca, rü nhanagürü: —¿Tü̱xcüü̃ cuyama̱x i ngẽma cutanüxü̃tama ixĩxü̃? —nhanagürü.
14 Rü nüma ga yema Iraéutanüxü̃ rü nanangãxü̃ rü nhanagürü: —¿Texé cuxü̃ tamu nax cuma rü torü ãẽ̱xgacü i guxchaxü̃arü mexẽẽruxü̃ quixĩxü̃ca̱x? ¿Ẽ̱xna cuma nagu curüxĩnügu rü choxü̃ rü tá ta quimáxü̃ ga yema Eyítuanecüã̱x ga ĩne quimáxü̃rüxü̃? —nhanagürü. Rü yexguma yemaxü̃ naxĩnügu ga Moiché, rü namuü̃, yerü marü nüxü̃ nacua̱xgüama ga duü̃xü̃gü ga nax yema Eyítuanecüã̱xü̃ yamáxü̃.
15 Rü yexguma Faraóũ nüxü̃ cua̱xgu ga Moiché rü wüxi ga Eyítuanecüã̱xü̃ nax yamáxü̃, rü norü churaragüxü̃ namu nax Moichéca̱x yadaugüxü̃ca̱x nax yama̱xgüaxü̃ca̱x. Notürü ga nüma ga Moiché rü Miyiã́ũanewa nanha nax yexma yaxãchiü̃xü̃ca̱x. Rü yéma puchuanacüwa narütomare.
16 --
17 --
18 --
19 --
20 --
21 Rü yemaacü ga Moiché rü Miyiã́ũarü chacherdóte ga Reuépatawa nangu, rü yexma naxãchiü̃. Rü nüma ga Reué rü nanaxüxma̱x naxacü ga Yípuramaxã.
22 Rü ngĩma ga naxma̱x ga Yípura rü nüxü̃́ ixãxacü. Rü nüma ga Moiché rü Yersóü̃gu nanaxüéga ga guma nane. Rü ngẽma naéga rü “Chama rü tama númacüã̱x chixĩ”, nhaxü̃chiga nixĩ.
23 2:23-24 Rü yexgumayane ga Eyítuanecüã̱xarü ãẽ̱xgacü rü yoxni nayu. Notürü ga yema Iraéutanüxü̃gü rü guxchaxü̃wa nayexmagüecha, rü Tupanape̱xewa naxauxe naxca̱x ga yema ngúxü̃ nax yangegüxü̃. Rü yemaca̱x ga Tupana rü nüxü̃́ nüxü̃ naxĩnü ga norü axu, yerü nüxna nacua̱xãchi ga norü uneta ga Abraáũmaxã rü Isáquimaxã rü Yacúmaxã naxueguxü̃.
24 Nüü̃ nadau 2:23
25 Rü nüxü̃ nadau ga nhuxãcü ngúxü̃ nax yangegüxü̃ ga yema Iraéutanüxü̃gü, rü yemaca̱x namaxã nixãũãchi.
