Êxodo 20:1-26
20 Rü nüma ga Tupana rü nidexa rü nüxü̃ nixu ga guxü̃ma ga nhaa mugü rü nhanagürü:
2 —Chama nixĩ i curü Tupana ga Eyítuanewa cuxü̃ íchanguxuchixẽẽxü̃, naxme̱xwa ga Eyítuanecüã̱xgü ga nüxü̃́ cupuracümarexü̃.
3 Rü nhu̱xmax nax curü Tupana chixĩxü̃, rü tama chanaxwa̱xe i chaupe̱xewa ta̱xacürü ucaxü̃maremaxã cutupanaã̱x.
4 ¡Rü taxuxü̃táma i ta̱xacü cugüca̱x cuxüxchicüna̱xã nax ngẽmamaxã cutupanaã́xü̃ca̱x, rü bai i ta̱xacü i dauxü̃guxü̃ i naanewa nüxü̃ cudauxü̃, rü bai i ta̱xacü i nhama i naanewa ngẽxmaxü̃, rü bai i ta̱xacü i márwa ngẽxmaxü̃ tá cuxüxchicüna̱xã nax ngẽmamaxã cutupanaã́xü̃ca̱x!
5 ¡Rü taxũtáma ta̱xacürü naxchicüna̱xãpe̱xegu cucaxã́pü̱xü rü nüxü̃ quicua̱xüxü̃! Erü chama ya curü Cori ya Tupana ya poracü rü poraãcü cuxü̃ chinuxü̃, rü ngẽmaca̱x tümaarü chixexü̃ca̱x tá tüxü̃ chapoxcu ya yíxema chauxchi aixe, rü nhu̱xmata tümaxacügüwa, rü tümataagüwa chananguxẽxẽ i ngẽma poxcu.
6 Notürü ya yíxema choxü̃ ngechaü̃güxe rü naga ĩnüexe i ngẽma chorü mugü, rü tüxü̃ changechaü̃, rü tá nüxü̃ changechaü̃ i tümataagü ega woo 1,000 e̱xpü̱xcüna yamuxgu.
7 ¡Rü taxũtáma chauéga cunaxuxuchi ega ta̱xacürü chixexü̃ cuxü̱xgux! Erü chama ya curü Cori ya Tupana rü taxũtáma tüxü̃ chaxüpetümare nax tüxü̃ chapoxcuxü̃ ya yíxema chauégamaxã tügü ipoxü̃netaxe ega ta̱xacürü chixexü̃ taxü̱xgu.
8 ¡Rü nüxna nacua̱xãchi i ngẽma ngü̃xchigaarü ngunexü̃ nax cha̱u̱xca̱xicatama nax ícunaxüxüchixü̃ca̱x!
9 Rü 6 i ngunexü̃gu tá nixĩ i cunaxüxü̃ i guxü̃ma i curü puracü i cuxüxchaü̃xü̃.
10 Notürü ngẽma norü 7 i ngunexü̃gu rü tá icurüngü̃ rü nagu tá choxü̃ quicua̱xüxü̃. ¡Rü taxuxü̃táma ta̱xacürü puracü nagu cuxü i ngẽma ngunexü̃, rü woo cunegü, rü woo cuxacügü, rü woo curü puracütanüxü̃gü, rü woo cuxü̃taxü̃gü, rü woo cuxü̃nagü rü woo i ngẽma duü̃xü̃ i to i nachixü̃anecüã̱x i cuxü̃tawa ngẽxmaxü̃!
11 Yerü chama i Cori ya Tupana rü 6 ga ngunexü̃gu nixĩ ga chanaxüxü̃ ga dauxü̃guxü̃ ga naane, rü nhama ga naane rü taxü̃ ga már, rü guxü̃ma i ta̱xacü i nawa ngẽxmagüxü̃. Rü nhu̱xũchi icharüngü̃ ga norü 7 ga ngunexü̃gu. Rü yemaca̱x mexü̃ namaxã chaxuegu ga yema ngunexü̃, rü cuxna chanachu̱xu nax nagu cupuracüxü̃.
12 ¡Rü tüxü̃ nangechaxü̃ ya cunatü rü cué nax ngẽmaãcü namáxü̃ca̱x i curü maxü̃ i nhaa naane i chama i Cori ya Tupana cuxna chaxãxü̃wa!
13 ¡Rü taxũtáma cumáeta!
14 ¡Rü cuma nax cuxãxmagüxü̃ rü cuxãtegüxü̃ rü taxũtáma cugüechita nai i nge rüe̱xna nai ya yatümaxã cumaxü̃!
15 ¡Rü taxũtáma cungĩ́ta̱xa!
16 ¡Rü taxũtáma doraxü̃ quixu i cumücüchiga!
17 ¡Rü taxũtáma cugüxü̃́ cunangúchaü̃xẽxẽ ya cumücüpata, rüe̱xna naxma̱x, rüe̱xna norü puracütanüxü̃, rüe̱xna naxü̃taxü̃, rüe̱xna norü wocagü, rüe̱xna norü búrugü, rü bai i ta̱xacü i noxrü ixĩxü̃! —nhanagürü ga Tupana.
Nüma ga Iraéutanüxü̃gü rü Tupanaxü̃ namuü̃e
18 Rü guxü̃ma ga yema Iraéutanüxü̃gü rü nüxü̃ naxĩnüe ga yema duruanexü̃ rü guma cornétagüga. Rü nüxü̃ nadaugü ga yema ãẽmacü rü guma ma̱xpǘne ga caixanexü̃ nagu nguxü̃ne. Rü yexguma yemaxü̃ naxĩnüegu rü nüxü̃ nadaugügux, rü namuü̃e rü nüxna nayáxü̃gugü ga guma ma̱xpǘne.
19 Rü yemaca̱x Moichéxü̃ nhanagürügü: —Tama tanaxwa̱xe i Tupana tomaxã nidexa erü ngürüãchi tá tayue. Rü narümemae nixĩ nax cumatama tomaxã nüxü̃ quixuxü̃ i ngẽma Tupana cumaxã nüxü̃ ixuxü̃ rü toma rü tá naga taxĩnüe —nhanagürügü.
20 Rü nüma ga Moiché rü nanangãxü̃ rü nhanagürü nüxü̃: —¡Tauxü̃́ i peba̱i̱xãchiexü̃! Erü nüma ya Tupana rü núma naxũ nax pexü̃ nawéãxü̃ca̱x i norü pora nax nüxü̃ pemuü̃exü̃ca̱x rü guxü̃guma naga pexĩnüexü̃ca̱x rü tama chixexü̃ pexügüxü̃ca̱x —nhanagürü.
21 Rü yexguma yema Iraéutanüxü̃gü rü guma ma̱xpǘnearü yáxü̃wa yachaxãchitanüyane, rü yoxni ga nüma ga Moiché rü yema waemaxü̃ ga caixanexü̃ca̱x nixũ ga Tupana nawa yexmaxü̃.
22 --
23 --
24 --
25 --
26 --
