Êxodo 25:1-40
25 Rü nüma ga Cori ya Tupana rü Moichémaxã nidexa rü nhanagürü nüxü̃:
2 —¡Namaxã nüxü̃ ixu i ngẽma Iraéutanüxü̃gü nax cha̱u̱xca̱x nanutaque̱xeãxü̃ca̱x i norü ãmaregü! ¡Rü nade naxü̃tawa i ngẽma duü̃xü̃gü i aixcuma norü ngúchaü̃maxã inaxãgüchaü̃xü̃!
3 Rü nhaa tá nixĩ i ngẽma pedexü̃: úirumü, rü diẽrumü, rü cóbremü,
4 rü naxchiru i dauxraacü wẽ̱xcharaxü̃, rü naxchiru i dauxracharaxü̃, rü naxchiru i daucharaxü̃, rü naxchiru i líũchi i mexechixü̃naxca̱x, rü bóyita̱xagü,
5 rü carnérucha̱xmüxü̃gü i dauxü̃maxã ichagüxü̃, rü togü i naxcha̱xmüxü̃ i mexechixü̃, rü mürapewagü i acáchianaxca̱x,
6 rü chíxü̃ i omüxü̃́ü̃wa mexü̃, rü pumára i chíxü̃éü̃ i chacherdóte ya chorü puracütanüxü̃eru namaxã nangégüxü̃, rü pumárate̱xe i guwa mexü̃,
7 rü nutagü ya oníchinaxca̱x rü naigü ya nutagü ya nga̱xãẽruxü̃ nax chacherdótegüarü ãẽ̱xgacüarü türemüchiruarü meruxü̃ yixĩxü̃ca̱x.
8 ¡Rü cha̱u̱xca̱x penaxü ya wüxi ya chapata nax yimawa duü̃xü̃gütanüwa changexmaxü̃ca̱x!
9 Notürü yima chapata ya nawa tá changexmane, rü guxü̃ma i norü ngẽmaxü̃gü rü tá ngẽma cuxü̃ nüxü̃ chadauxẽẽxü̃ãcü cunaxü.
Baú i Tupanaarü mugüchixü̃
10 ¡Ẽcü naxü i wüxi i baú i acáchianaxca̱x i mürapewawa, i wüxi métru rü 10 centímetru i norü ma̱x rü 65 centímetru i norü tachiã, rü ngẽxgumarüxü̃ ta 75 centímetru i norü máchane!
11 ¡Rü naxü̃mawa rü úirumaxã natüxüma! Rü norü düxétüwa rü ngẽxgumarüxü̃ tá ta úirumaxã cunatüxüne. Rü naberawa rü tá úirumaxã ícunaxüáegubera.
12 ¡Rü naxü i ãgümücü i bochicuxü̃ i úirunaxca̱x, rü wüxichigü ya naparawa nanucu!
13 ¡Rü ngẽxgumarüxü̃ ta naxü ya taxremena̱xã ya nai ya acáchianaxca̱x, rü nhu̱xũchi úirumaxã yatümena̱xã!
14 ¡Rü yima naxpaweru i ngẽma baú i bochicuxü̃maxetüwa yawe̱xgü nax yimamaxã nachü̱xnagüxü̃ca̱x i ngẽma baú!
15 Rü yima naxpaweru rü marü taxũtáma cunade. Rü ngẽma baúarü bochicuxü̃maxetüwa tátama nangexmagüecha.
16 ¡Rü ngẽma baúgu yaxǘcuchi i ngẽma nutatachinügü i nagu naxümatüxü̃ i ngẽma mugü i tá cuxna chaxãxü̃!
17 ¡Rü ẽcü naxü i wüxi i naxã́taxü̃ i úirunaxca̱x ixĩxü̃! Rü norü ma̱x rü wüxi métru rü 10 centímetru tá nixĩ, rü norü tatachinü rü 75 centímetru tá nixĩ.
18 Rü úirumüwa tá cunaxüxüchi i taxre i dauxü̃cüã̱xchicüna̱xã i ixãpe̱xátüxü̃ i norü wüxichigüpe̱xewa ngẽxmaxü̃ i ngẽma baúátaxü̃.
19 Rü ngẽma dauxü̃cüã̱xchicüna̱xã i ixãxpe̱xátügüxü̃ rü naxã́taü̃wa tátama cunaxüxüchigü. Rü wüxi rü tá norü wüxipe̱xewa nangexma rü ngẽma to rü norü tope̱xewa nangexma.
20 Rü ngẽma taxre rü tá nügüarü to̱xma̱xtawa nangexmagü. Rü naxã́taü̃étügu tá narüdaunü. Rü yima naxpe̱xátü rü tá nayadüxü i ngẽma naxã́taxü̃.
21 ¡Rü ngẽxma baúgu nanucu i ngẽma nutatachinügü i chorü mugü nagu ümatüxü̃! ¡Rü nhu̱xũchi yaxǘcuchiã́taxü̃!
22 Rü ngẽmawa tá nixĩ i changexmaxü̃ i naxã́taü̃étüwa i norü ngãxü̃wa i ngẽma taxre i dauxü̃cüã̱xchicüna̱xã i ixãpe̱xátüxü̃. Rü ngẽ́ma tá nixĩ i cumaxã nüxü̃ chixuxü̃ i ngẽma chorü ucu̱xẽgü naxca̱x i ngẽma Iraéutanüxü̃gü.
Mecha i poũ i üünegüxü̃arü nuchicaxü̃
23 ¡Rü naxü i wüxi i mecha i acáchianaxca̱x i mürapewawa! Rü 90 centímetru tá nixĩ i norü ma̱x, rü 45 centímetru i norü tatachinü rü 65 centímetru i norü máchane.
24 Rü úirumümaxã tá cunatütachinü, rü úirumaxã tá ícunaxüáegupechinü.
25 Rü ngẽma mecha rü tá cunaxübera i naétüwa rü 7 centímetru tá nixĩ i norü tatachinü i ngẽma naberagü. Rü ngẽma naberaétüwa rü tá úirumaxã ícunaxüáegubera.
26 ¡Rü naxü i ãgümücü i bochicuxü̃ i úirunaxca̱x, rü wüxichigü ya naparacüwawa nanucu!
27 Rü ngẽma naberaxü̃tawa tá cunanucu i bochicuxü̃ nax ngẽmawa yawe̱xgüãxü̃ca̱x ya yima naxpaweru ya norü ngetaxü̃ruxü̃.
28 Rü ngẽma norü ngetaxü̃ruxü̃ rü nai ya acáchiamena̱xã tá nixĩ, rü guxü̃wama úirumaxã tá cuyatümena̱xãgü.
29 Rü úiruwa tá cunaxü i ngẽma norü poratugü rü cuyeragü rü baeruü̃gü rü axepáxü̃gü i ngẽma ãchiüxü̃ i ãmarearü axruxü̃.
30 Rü ngẽma mechaétügu tá cunanú i ngẽma poũ i üünexü̃ nax guxü̃táma chape̱xewa ngẽxmaxü̃ca̱x.
Omüpaweru i úirunaxca̱x
31 ¡Rü ngẽxgumarüxü̃ ta naxü i wüxi i omüpaweru i úirunaxca̱x i pomüxü̃! Rü ngẽma nachipatü rü namena̱xã rü ngẽma nachacüügü rü ngẽma nanágugü i naputüragüraxü̃xü̃, rü wüxiwatama tá cunaxüxüchigü.
32 Rü ngẽma omü rü wüxichigü i nacüwawa rü tá nüxü̃́ nangexma i tamaepü̱xchigü i nachacüügü.
33 --
34 --
35 --
36 --
37 --
38 --
39 --
40 --
