Êxodo 3:1-22
3 Rü nüma ga Moiché, rü na̱xtü ga Yéturuarü carnérugüarü daruxü̃ nixĩ. Rü guma na̱xtü ga Yéturu ga Reuégu ãégacü rü chacherdóte nixĩ ga Miyiã́ũanewa. Rü wüxi ga ngunexü̃ ga yexguma maxẽ ga mexü̃ca̱x namaxã nada̱xgux ga na̱xtüarü carnérugü, rü ínachianexü̃arü tocüwawa nangu ga ma̱xpǘne ga Orébigu ãéganearü ngaicamána. Rü guma ma̱xpǘnewa nixĩ ga Moichémaxã yadexaxü̃ ga Tupana.
2 Rü yéma rü wüxi ga chuchuxü̃eta ga iya̱u̱xraxü̃wa nixĩ ga Moichéca̱x nangóxü̃ ga Cori ya Tupanaarü orearü ngeruxü̃ ga dauxü̃cüã̱x. Rü nüma ga Moiché rü mea nüxü̃ nadawenü rü nüxü̃ nicua̱xãchi ga yema chuchuxü̃eta ga nax yaya̱u̱xraxü̃, notürü tama nixa.
3 Rü yemaca̱x nagu narüxĩnü nax ta̱xacüca̱x tama yaxaxü̃ ga yema chuchuxü̃eta, rü ínayadau.
4 Rü yexguma Cori ya Tupana nüxü̃ da̱xgu ga yema chuchuxü̃eta ga iya̱u̱xraxü̃ca̱x nax yaxũxü̃ ga Moiché, rü nüma ga Cori ya Tupana rü yema chuchuxü̃etawa Moichéna naca, rü nhanagürü: —Pa Moichéx, Pa Moichéx —nhanagürü. Rü nüma ga Moiché rü nanangãxü̃, rü: —Daxe chixĩ —nhanagürü.
5 Rü yexguma ga Tupana rü nhanagürü nüxü̃: —¡Tauxü̃́ i nüxna cungaicamaxü̃! ¡Rü ínacua̱xichi i curü chapatu! Erü nhaa nachica i nawa cungexmaxü̃ rü naxüüne —nhanagürü.
6 Rü nhanagürü ta: —Rü chama nixĩ ga curü o̱xigüarü Tupana chixĩxü̃. Rü chama nixĩ ga Abraáũarü rü Isáquiarü rü Yacúarü Tupana chixĩxü̃ —nhanagürü. Rü yexguma ga Moiché rü nügü nidüxchiwe, yerü namuü̃ nax Tupanaxü̃ nadawenüxü̃.
7 Notürü nüma ga Cori ya Tupana rü nhanagürüama nüxü̃: —Meaxü̃chima nüxü̃ chadau nax nhuxãcü ngúxü̃ yangegüxü̃ i ngẽma chorü duü̃xü̃gü i Eyítuanewa ngẽxmagüxü̃. Rü norü yumüxẽwa nüxü̃ chaxĩnü nax nhuxãcü norü daruü̃güxü̃ nax ínaxuaxü̃güxü̃. Rü ngẽmaãcü meama nüxü̃ chacua̱x nax nhuxãcü ngúxü̃ yangegüxü̃.
8 Rü ngẽmaca̱x nixĩ i nhu̱xmax ícharüxĩxü̃ nax Eyítuanecüã̱xme̱xẽwa íchananguxü̃xẽẽ̱xü̃ca̱x i ngẽma chorü duü̃xü̃gü. Rü ngẽma naane i nawa tá chanagagüxü̃, rü wüxi i naane i taxü̃ rü mexü̃ nixĩ. Rü ngẽ́ma rü meama narüxügü i naguxü̃raü̃xü̃ i nanetügü. Rü õna taguma nataxu. Rü ngẽma naanegu nixĩ i naxãchiü̃güxü̃ i Canaã́tanüxü̃gü rü Etéutanüxü̃gü, rü Amuréutanüxü̃gü, rü Ferechéutanüxü̃gü, rü Ewéutanüxü̃gü rü Yebuchéutanüxü̃gü.
9 Rü dücax, rü marü nüxü̃ chaxĩnü nax nhuxãcü ngẽma Eyítuanecüã̱xgüxü̃ ínaxuaxü̃güxü̃ i ngẽma Iraéutanüxü̃gü, rü nüxü̃ chadau nax nhuxãcü poraãcü chixri namaxã nachopetüxü̃.
10 Rü ngẽmaca̱x ¡rü paxa cugü namexẽxẽ! Erü Faraóũpe̱xewa tá cuxü̃ chamu nax Eyítuanewa ícunamuxü̃xü̃ca̱x i ngẽma chorü duü̃xü̃gü i Iraéutanüxü̃gü —nhanagürü.
11 Rü yexguma ga Moiché rü Tupanaxü̃ nangãxü̃ rü nhanagürü: —¿Ẽ̱xna ta̱xacüwa chame i chamax i Faraóũpe̱xewa chaxũxü̃ nax Eyítuanewa íchanguxü̃xẽẽ̱xü̃ca̱x i ngẽma Iraéutanüxü̃gü? —nhanagürü.
12 Rü nüma ga Tupana rü nanangãxü̃, rü nhanagürü: —Chama rü tá chacuxü̃tagu. Rü nhaa tá nixĩ i cua̱xruxü̃ nax chamatama cuxü̃ ngẽ́ma chamuxü̃. Rü ngẽxguma tá marü Eyítuanewa ícunamuxü̃gu i chorü duü̃xü̃gü, rü guxãma i pema rü daa tátama ma̱xpǘnewa choxü̃ peyarücua̱xüxü̃gü —nhanagürü.
13 Notürü nüma ga Moiché rü Tupanaxü̃ nangãxü̃ rü nhanagürü: —Notürü ngẽxguma chi natanüwa chaxũxgu rü nhachaxgu namaxã: “Yimá perü o̱xigüarü Tupana nua petanüwa choxü̃ namu”, nhachaxgu namaxã, rü nümagü rü tá choxna nacagüama rü: “¿Ta̱xacü nixĩ i naéga ya yimá Tupana ya tomaxã nüxü̃ quixucü?” nhanagürügü tá choxü̃. ¿Rü ta̱xacümaxã tá chanangãxü̃xü̃ i ngẽxguma? —nhanagürü ga Moiché.
14 Rü nüma ga Tupana rü nanangãxü̃ rü nhanagürü: —Chamatama chixĩ i guxãétüwa changexmaxü̃, rü woetama changexma. Rü ngẽmaca̱x Chama ya Woetama Ngẽxmacü nixĩ i chauéga. Rü ngẽmamaxã tá cunangãxü̃ i ngẽma Iraéutanüxü̃gü. ¡Rü namaxã nüxü̃ ixu, rü nhacugürü tá nüxü̃: “Yimá Woetama Ngẽxmacü nixĩ ya petanüwa choxü̃ mucü”, nhacugürü tá nüxü̃! —nhanagürü.
15 Rü nhanagürü ta ga Tupana Moichéxü̃: —¡Rü namaxã nüxü̃ ixu i ngẽma Iraéutanüxü̃, rü nhacugürü tá: “Rü nüma ya Cori ya Tupana ya perü o̱xigüarü Tupana ya Abraáũarü rü Isáquiarü rü Yacúarü Tupana, rü gumá nixĩ ga petanüwa choxü̃ mucü”, nhacugürü tá nüxü̃! Rü Cori ya Tupana nixĩ i chauéga i tagutáma iyagúxü̃. Rü ngẽma chauégamaxã tá nixĩ i guxü̃gutáma duü̃xü̃gü choxü̃ cuáxü̃.
16 ¡Rü ngẽ́ma naxũ rü nangutaque̱xexẽxẽ i guxü̃ma i Iraéutanüxü̃güarü ãẽ̱xgacügü, rü namaxã nüxü̃ ixu rü nhacugürü nüxü̃!: “Rü nüma ya Cori ya Tupana ya perü o̱xigüarü Tupana ya Abraáũarü rü Isáquiarü rü Yacúarü Tupana, rü gumá nixĩ ga cha̱u̱xca̱x ngócü. Rü gumátama nixĩ ga chamaxã nüxü̃ ixucü nax pegu naxĩnüxü̃ rü nüxü̃ nacuáxü̃ nax nhuxãcü chixri pemaxã nachopetüxü̃ i ngẽma Eyítuanecüã̱xgü.
17 Rü yimá Tupana nixĩ ya chamaxã nüxü̃ ixucü rü tá pexü̃ ínanguxü̃xẽxẽ nawa i perü guxchaxü̃gü i Eyítuanewa pingegüxü̃. Rü Canaã́arü naanewa tá pexü̃ nagagü i ngexta ínaxãchiü̃güxü̃gu i Canaã́tanüxü̃gü, rü Etéutanüxü̃gü, rü Amuréutanüxü̃gü, rü Ferechéutanüxü̃gü, rü Ewéutanüxü̃gü rü Yebuchéutanüxü̃gü. Rü ngẽmaãcü ngẽma naane i ngextá mexü̃ i õna rü léchi rü ira taguma ítaxuxü̃wa tá pexü̃ chagagü” —nhanagürü ya Tupana.
18 --
19 --
20 --
21 --
22 --
