Êxodo 31:1-18
31 Rü nüma ga Cori ya Tupana rü Moichémaxã nidexa rü nhanagürü nüxü̃:
2 —Dücax, rü Yudátaatanüwa rü chanayaxu ya Becharéu ya Urí nane ya Úrtaxa ixĩcü.
3 31:3-5 Rü marü nüxna chanaxã i Chauãxẽ i Üünexü̃, rü nüxna chanaxã i cua̱x nax paxama nüxü̃ nacuáxü̃ca̱x i ta̱xacüarü ü rü nüxü̃́ natauxchaxü̃ca̱x nax guxü̃raxü̃xü̃ i meruü̃gü naxüxü̃ i úiruwa, rü diẽrumüwa, rü brṍchewa, rü naiwa. Rü nüxna chanaxã i cua̱x nax nüxü̃ nacuáxü̃ca̱x nax nuta ya nga̱xãẽruxü̃ nangoraxẽẽãxü̃ca̱x rü chacherdótegüchiruwa nanhaxcuãxü̃ rü guxü̃ma i meruü̃gü naxüxü̃ca̱x.
4 Nüü̃ nadau 31:3
5 Nüü̃ nadau 31:3
6 Rü ngẽxgumarüxü̃ ta nüxü̃ chaxuneta ya Becharéuarü ngü̃xẽẽruxü̃ ya Auriábi ya Ichamá nane, ya Dáü̃tanüxü̃ ixĩcü. Rü guxü̃ma i ngẽma yatügü i nüxü̃ icua̱xüchigüxü̃ rü yexeraãcü cua̱x nüxna chaxã nax naxügüãxü̃ca̱x i guxü̃ma i ngẽma cuxü̃ chamuxü̃ nax cunaxüxü̃.
7 --
8 --
9 --
10 --
11 --
Ngü̃xchigaarü ngunexü̃chiga
12 Rü yexguma ga nüma ga Cori ya Tupana rü nayadaxẽxẽ ga Moichémaxã nax yadexaxü̃, rü nhanagürü nüxü̃:
13 —¡Rü namaxã nüxü̃ ixu i ngẽma Iraéutanüxü̃gü rü nhacurügü tá nüxü̃! “Rü name nixĩ i nagu perüngü̃gü i ngẽma ngunexü̃ i cha̱u̱xca̱x ípexüxüchixü̃. Erü ngẽma nixĩ i guxü̃gutáma tórü cua̱xruxü̃ i yigümaxã ixüxü̃ nax ngẽmaãcü guxü̃ma nüxü̃ nacuáxü̃ca̱x nax chama pexü̃ chadexü̃.
14 Rü ngẽma ngü̃xchigaarü ngunexü̃ rü nachu̱xu nax nagu pepuracüexü̃, rü ngẽmaca̱x penaxwa̱xe i mea penaxaure. Rü yíxema tama naxaurexe i ngẽma ngunexü̃ rü tá tayu. Rü yíxema ngü̃xchigaarü ngunexü̃gu puracüxe rü name nixĩ i noxtacüma petanüwa tüxü̃ ipeyarüxoxẽxẽ.
15 Rü marü name i 6 i ngunexü̃ pepuracüe, notürü ngẽma norü 7 i ngunexü̃gu rü nagu tá iperüngü̃gü rü cha̱u̱xca̱x tá ípenaxüxüchi. Rü texé ngẽma ngunexü̃gu puracüxe rü tá tayu.
16 Rü ngẽmaca̱x i pema i Iraéutanüxü̃gü rü penaxwa̱xe nax penaxaurexü̃ i ngẽma ngü̃xchigaarü ngunexü̃ erü ngẽma nixĩ i chorü üga i guxü̃gutáma nüxna pecua̱xãchiexü̃.
17 Rü ngẽma ngunexü̃ nixĩ i guxü̃gutáma tórü cua̱xruxü̃ i yigümaxã ixüxü̃ i pema i Iraéutanüxü̃gü rü chamax. Yerü chama ya perü Cori ya Tupana rü 6 ga ngunexü̃gu chayanguxẽxẽ ga nax chanaxüxü̃ ga dauxü̃guxü̃ i naane rü nhama i naane. Rü yema norü 7 ga ngunexü̃gu rü nüxü̃ charüchau ga nax chapuracüxü̃, rü icharüngü̃” —nhanagürü ga Tupana.
Nutatachinügü i Tupanaarü mugü nagu ümatüxü̃chiga
18 Rü yexguma Cori ya Tupana nüxü̃ rüchaxgu ga Moichémaxã nax yadexaxü̃ ga ma̱xpǘne ga Chinaíwa, rü nüxna nanaxã ga taxre ga nutatachinügü ga nümatama ga Tupana naxme̱xmaxã norü mugü nagu naxümatüxü̃.
