Êxodo 4:1-31
4 Rü nüma ga Moiché rü Cori ya Tupanaxü̃ nangãxü̃, rü nhanagürü: —Notürü i ngẽma chautanüxü̃gü rü taxũtáma choxü̃́ nayaxõgü, rü taxũtáma chauga naxĩnüe. Rü tá nhanagürügüama choxü̃: “Rü nüma ya Cori ya Tupana rü tama nixĩ i aixcuma cuxca̱x nangóxü̃”, nhanagürügüama tá choxü̃ —nhanagürü.
2 Rü nüma ga Cori ya Tupana rü Moichéna naca, rü nhanagürü: —¿Rü ta̱xacü nixĩ i ngẽma cuxme̱xwa ngẽxmaxü̃? —nhanagürü ga Cori. Rü Moiché nanangãxü̃ rü nhanagürü: —Wüxi ya naixmena̱xã nixĩ —nhanagürü.
3 Rü yexguma ga Cori ya Tupana rü nhanagürü nüxü̃: —¡Rü nhaxtüanegu nanha! —nhanagürü. Rü nüma ga Moiché rü inananha ga guma naixmena̱xã. Rü yexgumatama ãxtapexü̃ nananguxuchi. Rü nüma ga Moiché rü naxcha̱xwa ninha.
4 Notürü ga nüma ga Cori ya Tupana rü nhanagürü nüxü̃: —¡Naréü̃gu yayaxu! —nhanagürüama. Rü yexguma yayauxã̱xgu rü wenaxarü naixmena̱xãxü̃ nananguxuchi.
5 Rü nüma ga Cori ya Tupana rü nhanagürü: —Rü ngẽma cuxü̃ chawéxü̃, rü ngẽma nixĩ i cua̱xruxü̃ nax cuxü̃́ yaxõgüaxü̃ca̱x i ngẽxguma namaxã nüxü̃ quixuxgu nax aixcuma cuxca̱x changóxü̃ i chamax nax curü o̱xigüarü Tupana chixĩxü̃ rü Abraáũarü, rü Isáquiarü, rü Yacúarü Tupana nax chixĩxü̃ —nhanagürü.
6 Rü nhanagürüama ga Tupana: —¡Rü cugüchiruremügu ixu̱xme̱x! —nhanagürü. Rü yexguma ga nüma ga Moiché rü nügüchiruremügu nixu̱xme̱x. Rü yexguma ínaxuxuchime̱xẽgu, rü nüxü̃ nadau ga naxme̱x nax chaxünemaxã nax yada̱xawexü̃, rü nachoxochixü̃.
7 Rü yexguma ga Tupana rü nhanagürü nüxü̃: —¡Rü wena cugüchiruremügu ixu̱xme̱x! —nhanagürü. Rü yemaacü nanaxü ga Moiché. Rü yexguma ínaxuxuchime̱xẽgu, rü nüxü̃ nadau ga naxme̱x ga marü noxrirüxü̃ nax namexü̃.
8 Rü nhu̱xũchi ga Cori ya Tupana rü nhanagürü nüxü̃: —Rü ngẽxguma chi tama ngẽma nüxíraxü̃xü̃ i cua̱xruü̃gagu cuxü̃́ yaxõgüã̱xgu, rü ngẽma to i cua̱xruü̃gagu tá nixĩ i cuxü̃́ yaxõgüaxü̃.
9 Notürü ngẽxguma tama ngẽma taxre i cua̱xruü̃gagu cuxü̃́ yaxõgüã̱xgu ¡rü dexáta nayauxü̃ i taxtüwa, rü nhaxtüanegu naba! Rü ngẽxguma tá ngẽma dexá nhaxtüanegu cubaxgu, rü tá nagüxü̃ nanaxĩxĩchi i ngẽma dexá —nhanagürü.
10 Rü yexguma ga Moiché rü Tupanaxü̃ nangãxü̃, rü nhanagürü nüxü̃: —Dücax, Pa Corix, chama rü choxü̃́ naguxcha nax chidexaxü̃. Rü taguma choxü̃́ natauxcha woo ga ü̃pa rü woo i nhu̱xmax rü ta ngẽxgumarüü̃tama chixĩ —nhanagürü.
11 Notürü ga nüma ga Cori ya Tupana rü nanangãxü̃ rü nhanagürü: —¿Texé tixĩ ga guxema duü̃xü̃xü̃ ǘxe? ¿Rü texé tixĩ ga guxema yadexaxexẽ́xẽ rü nangegaxexẽ́xẽ rü nangauxchixẽẽ́xẽ rü naxüxchixẽ́xẽ rü nangexetüxe rü naxüxétüxe? ¿Tama ẽ̱xna ga chama yixĩxü̃?
12 Rü ngẽmaca̱x ¡rü paxa ngẽ́ma naxũ rü nüxü̃ yarüxu! Rü chama rü tá cuxü̃ charüngü̃xẽxẽ i ngẽxguma quidexa̱xgu. Rü tá cuxü̃ changu̱xẽxẽ i ngẽma tá nüxü̃ quixuxü̃ —nhanagürü.
13 Rü yexguma ga Moiché rü nhanagürü: —Dücax, Pa Corix, chierü to i duü̃xü̃xü̃ ngẽ́ma cumu̱xgux —nhanagürü.
14 Rü yexguma ga Cori ya Tupana rü Moichémaxã nanu, rü nhanagürü: —Dücax, rü yimá nixĩ ya cuenexẽ ya Aróũ ya Lewítanüxü̃. Rü chama nüxü̃ chacua̱x i nüma rü meama nidexa. Rü nhu̱xũchi i nüma rü nuxã tá cuxü̃ nayangau, rü poraãcü tá nataãxẽ i ngẽxguma cuxü̃ nada̱xgux.
15 ¡Rü yimámaxã idexa, rü namaxã nüxü̃ ixu i guxü̃ma i ngẽma cuma nüxü̃ quixuxchaxü̃xü̃! Rü chama rü tá pexü̃tawa changexma i ngẽxguma pidexagügu. Rü tá pexü̃ changu̱xẽxẽ nachiga i ngẽma tá pexüxü̃.
16 Rü cuma rü tá Aróũmaxã nüxü̃ quixu i ngẽma chorü ore, nhama chamatama nüxü̃ chixuxü̃rüxü̃. Rü nüma ya Aróũ rü tá chorü duü̃xü̃gümaxã nüxü̃ nixu i ngẽma cuma tá namaxã nüxü̃ quixuxü̃.
17 ¡Ẽcü, yange ya daa naixmena̱xã! Erü yimamaxã tá cunaxü i ta̱xacü i taguma nüxü̃ nadaugüxü̃ —nhanagürü.
Moiché rü Eyítuaneca̱x natáegu
18 Rü yemawena ga Moiché rü na̱xtü ga Yéturuchiü̃ca̱x natáegu, rü nhanagürü tüxü̃: —Tupana nanaxwa̱xe nax Eyítuaneca̱x chatáeguxü̃ nax íchayadauxü̃ca̱x i chautanüxü̃gü rü ngoxi namaxẽ —nhanagürü. Rü na̱xtü ga Yéturu tanangãxü̃, rü nhatagürü nüxü̃: —¡Ẽcü ngẽ́ma naxũ, rü mea cuxü̃ naxüpetü! —nhatagürü.
19 Rü yexguma taũta Miyiã́ũanewa inaxũãchigu ga Moiché, rü Cori ya Tupana rü nhanagürü nüxü̃: —¡Natáegu Eyítuaneca̱x, erü guxü̃ma i ngẽma duü̃xü̃gü i cuxü̃ ima̱xgüchaü̃xü̃, rü marü nayue! —nhanagürü.
20 Rü yexguma ga Moiché rü inaxũãchi rü tüxü̃ niga ga naxma̱x rü nane. Rü búruétügu tüxü̃ namugü, rü yemaacü Eyítuaneca̱x natáegu. Rü nügüme̱xẽgu nayange ga guma naixmena̱xã ga Tupanaarü pora nawa yexmane.
21 --
22 --
23 --
24 --
25 --
26 --
27 Rü yoxni ga Cori ya Tupana rü Moichéenexẽ ga Aróũmaxã nidexa, rü nhanagürü: —¡Rü yéa ínachianexü̃wa naxũ! Rü ngẽxma tá nüxü̃ icuyangau ya Moiché —nhanagürü nüxü̃. Rü nüma ga Aróũ rü yéma ínachianexü̃wa naxũ, rü yexma guma ma̱xpǘne ga Orébigu Moichéxü̃ nayangau. (Rü guma ma̱xpǘnewa nixĩ ga Moichémaxã yadexaxü̃ ga Tupana.) Rü taãxẽãcüma nüxü̃ narümoxẽ.
28 Rü nüma ga Moiché rü Aróũmaxã nüxü̃ nixu ga guxü̃ma ga yema ore ga Cori ya Tupana namaxã nüxü̃ ixuxü̃. Rü yexgumarüxü̃ ta namaxã nüxü̃ nixuchiga ga yema mexü̃gü ga Tupana namuxü̃ nax naxügüãxü̃ca̱x.
29 Rü nhu̱xũchi ga nümagü rü inaxĩãchi nax yangutaque̱xexẽẽãxü̃ca̱x ga yema Iraéutanüxü̃güarü ãẽ̱xgacügü.
30 Rü nüma ga Aróũ rü yema duü̃xü̃gümaxã nüxü̃ nixu ga guxü̃ma ga yema ore ga Tupana Moichémaxã nüxü̃ ixuxü̃. Rü yexgumarüxü̃ ta nape̱xewa inanawe̱x ga yema mexü̃gü ga Tupana nüxü̃ üxẽẽxü̃.
31 Rü nüma ga duü̃xü̃gü rü aixcuma nayaxõgü. Rü yexguma nüxü̃ yacua̱xãchitanügu nax Cori ya Tupana rü nüxü̃́ nüxü̃ naxĩnüxü̃ ga norü yumüxẽ rü nüxü̃ nax nadauxü̃ ga nhuxãcü ngúxü̃ nax yangegüxü̃, rü yemaca̱x ga nüma ga duü̃xü̃gü rü nataãxẽgü, rü nhaxtüanegu nanangücuchitanü, rü Tupanaxü̃ nicua̱xüxü̃gü.
