Êxodo 8:1-32
8 Rü yexguma ga Cori ya Tupana rü Moichéxü̃ nhanagürü: —¡Paxa Faraóũxü̃tawa naxũ rü nhacugürü tá nüxü̃: “Rü Cori ya Tupana rü nhanagürü cuxü̃: ‘Rü nüxü̃ inge̱x i ngẽma chorü duü̃xü̃gü nax choxü̃ yacua̱xüü̃güxü̃ca̱x!
2 Erü ngẽxguma taxũtáma nüxü̃ quinge̱xgu, rü tá cururugümaxã chanapoxcu i nhaa guxü̃ma i cuchixü̃ane.
3 Rü taxtü rü cururugümaxã tá ninhúmichixü. Rü ngẽma rü tá cuxca̱x ínachõõchi, rü cupatagu tá naxĩgü. Rü curü ucapugu rü curü ngürücaregu tá nachocu. Rü curü ngü̃xẽẽruü̃gü i ãẽ̱xgacügüpatagu, rü guxü̃ma i curü duü̃xü̃güpatagu, rü curü poũpüü̃gu, rü curü poũcharaarü nhúmüruü̃gu tá nachocu.
4 Rü ngẽma cururugü rü tá cuxna niyuxgüetanü. Rü curü ngü̃xẽẽruü̃gü i ãẽ̱xgacügüna rü guxü̃ma i curü duü̃xü̃güna tá niyuxgüetanü’ ”, nhanagürü cuxü̃ ya Cori ya Tupana.
5 Rü yexguma ga Cori ya Tupana rü nhu̱xũchi Moichéxü̃ nhanagürü: —¡Rü namaxã nüxü̃ ixu i Aróũ nax natügüétügu, rü natüxacügüétügu, rü naxtaagüétügu namaxã nawéxme̱xü̃ca̱x ya norü naixmena̱xã! Rü ngẽ́ma tá ínachoxü̃ i cururugü nax guxü̃ma i Eyítuane namaxã napaxü̃ca̱x —nhanagürü.
6 Rü yexguma ga Aróũ rü Eyítuanewa yexmagüxü̃ ga dexáchiüétügügu namaxã nawéxme̱x ga norü naixmena̱xã. Rü guxü̃ma ga Eyítuane rü yema cururugü ga dexáwa íchoxü̃xü̃maxã nanapá.
7 --
8 Rü yexguma ga nüma ga Faraóũ rü Moichéca̱x rü Aróũca̱x nangema, rü nhanagürü nüxü̃: —¡Cori ya Tupanana naxca̱x peca̱xa nax yanaxoxẽẽãxü̃ca̱x i ngẽma cururugü i toxü̃tawa! Rü chama rü tá chayange̱xgü i curü duü̃xü̃gü nax Cori ya Tupanaca̱x nadaiaxü̃ca̱x i naxü̃nagü rü ngẽmamaxã nüxü̃ yacua̱xüü̃güxü̃ca̱x —nhanagürü.
9 Rü nüma ga Moiché rü Faraóũxü̃ nangãxü̃, rü nhanagürü nüxü̃: —¡Chamaxã nüxü̃ ixu i nhuxgu tá nixĩ i cunaxwa̱xexü̃ nax cuxca̱x rü curü ngü̃xẽẽruü̃ca̱x, rü guxü̃ma i curü duü̃xü̃güca̱x Tupanana chaca̱xaxü̃ nax cuxna rü cupatana yaxĩgachixü̃ca̱x i ngẽma cururugü rü dexáwaxicatama nax nangexmagüxü̃ca̱x! —nhanagürü.
10 Rü nüma ga Faraóũ rü Moichéxü̃ nangãxü̃, rü nhanagürü: —Moxü̃tama nixĩ i chanaxwa̱xexü̃ nax nataxuxü̃ i ngẽma cururugü —nhanagürü. Rü Moiché rü nüxü̃ nangãxü̃, rü nhanagürü nüxü̃: —Marü name. Rü ngẽmaãcü tá chanaxü nax nüxü̃ cucuáxü̃ca̱x nax nataxuxü̃ma ya texé ya torü Cori ya Tupanarüxü̃ ixĩxü̃.
11 Rü ngẽma cururugü rü tá nixĩgachi nawa ya cupata. Rü taxtüwaxica tátama nangexmagü. Rü ngẽmaãcü marü taxũtáma cuxü̃ nachixewe, rü taxũtáma nanachixewe i curü ngü̃xẽẽruü̃gü rü curü duü̃xü̃gü —nhanagürü.
12 Rü yexguma ga Moiché rü Aróũ rü ínachoxü̃ ga Faraóũpatawa. Rü nhu̱xũchi ga Moiché rü Cori ya Tupanana naca nax yaxĩgachitanüxẽẽãxü̃ca̱x ga yema cururugü ga noxri Faraóũca̱x yéma namugüxü̃.
13 Rü nüma ga Cori ya Tupana rü nanaxü ga yema Moiché nüxna naxca̱x ca̱xaxü̃. Rü nayue ga yema cururugü ga napatagüwa rü naa̱xtügüwa rü naanegüwa yexmagüxü̃.
14 Rü ga duü̃xü̃gü rü nanade ga yema yuexü̃ ga cururugü, rü nananutaque̱xe. Rü guxü̃wama namaxã nayipetüane.
15 Notürü yexguma yema guxchaxü̃güwa ínanguxuchigu ga Faraóũ, rü yema Cori ya Tupana nüxü̃ ixuxü̃rüxü̃ rü wenaxarü nanuama ga Faraóũ, rü tama Moiché rü Aróũga naxĩnüchaü̃.
Tupana rü Faraóũca̱x naxchigü ínangugüxẽxẽ
16 Rü yexguma ga nüma ga Cori ya Tupana rü nhanagürü Moichéxü̃: —¡Aróũmaxã nüxü̃ ixu nax nhaxtüte̱xewa namaxã nacua̱i̱xcaãxü̃ca̱x ya norü naixmena̱xã nax ngẽmaãcü naxchixü̃ nanguxü̃xü̃ca̱x i nhaxtüte̱xe i guxü̃ma i Eyítuanewa! —nhanagürü.
17 Rü yemaacü nanaxügü ga Moiché rü Aróũ. Rü nüma ga Aróũ rü norü naixmena̱xã nawe̱xnagü, rü nhaxtüanewa namaxã nanacua̱i̱xca. Rü guxü̃ma ga yema nhaxtüte̱xe ga Eyítuanewa yexmaxü̃, rü naxchixü̃ nananguxuchitanü. Rü yema naxchigü rü poraãcü yema duü̃xü̃güxü̃ rü naxü̃nagüxü̃ nachixewe.
18 Rü yema Faraóũarü yuüxü̃gü rü norü yuümaxã nüxü̃ naxügü nax naxchi yamuxẽẽgüxü̃, notürü tama nüxü̃́ nananguxuchi. Rü yoxni ga yema naxchigü rü poraãcü yema duü̃xü̃güxü̃ rü naxü̃nagüxü̃ nachixewe.
19 Rü yexguma ga yema yuüxü̃gü rü Faraóũxü̃ nhanagürü: —Nhaa guxchaxü̃ rü aixcuma Tupanawa ne ũxü̃ nixĩ —nhanagürü. Notürü ga nüma ga Faraóũ rü yema Cori ya Tupana nüxü̃ ixuxü̃rüxü̃ nanuama rü tama inaxĩnüchaü̃.
Tupana rü Faraóũca̱x murenü ínangugüxẽxẽ
20 Rü yexguma ga Cori ya Tupana rü Moichéxü̃ nhanagürü: —Nüma i Faraóũ rü moxü̃ pa̱xmamaxü̃chi rü tá türewa narüxüe nax taxtücutüwa naxũxü̃ca̱x. Rü ngẽmaca̱x chanaxwa̱xe nax ngunetüxü̃ ícurüdaxü̃ nax namaxã nüxü̃ cuyarüxuxü̃ca̱x i nhaa chorü dexa. ¡Rü nhacuxü̃ tá nüxü̃!: “Rü ngẽma nhanagürü ya Cori ya Tupana: ‘¡Nüxü̃ inge̱x i chorü duü̃xü̃gü nax choxü̃ yacua̱xüü̃güxü̃ca̱x!
21 Erü ngẽxguma taxũtáma nüxü̃ quinge̱xgux, rü cuxca̱x rü curü ngü̃xẽẽruü̃ca̱x rü guxü̃ma i curü duü̃xü̃güca̱x rü tá murenügü ngẽ́ma chamugü. Rü ngẽmaãcü tá murenügümaxã nanapágü ya guxü̃ne ya Eyítuanecüã̱xgüpata. Rü woo i nhaxtüane rü tá ta murenügümaxã naxãanemare.
22 Notürü ngẽxguma petanüwa ngẽma ínguxgux, rü Gochéü̃anewa i chorü duü̃xü̃gü íxãchiü̃güxü̃wa rü taxũtáma ngẽmaãcü nangupetü. Erü ngẽ́ma rü bai tá i wüxi i murenü ingexmaxü̃ nax ngẽmaãcü nüxü̃ cucuáxü̃ca̱x nax chama ya Cori ya Tupana rü aixcuma naanearü yora chixĩxü̃.
23 Rü tá cuxü̃ chanawe̱x nax nüxü̃ chaxunetaxü̃ i ngẽma Iraéutanüxü̃gü rü tama i pexü̃. Rü moxü̃ tá nixĩ i ngẽmaãcü chanaxüxü̃’, nhanagürü cuxü̃ ya Tupana” —nhanagürü.
24 Rü yemaacü nanaxü ga Cori ya Tupana. Rü nhama wüxi ga caixanexü̃rüxü̃ Faraóũpatawa nangugü ga murenügü. Rü norü ngü̃xẽẽruü̃güpatawa rü ta rü guxü̃ma ga Eyítuanewa nangugü. Rü yema murenügü rü guxü̃wama nanachixexẽxẽ ga yema nachixü̃ane.
25 --
26 --
27 --
28 Rü yexguma ga Faraóũ rü nhanagürü: —Tá pexü̃ chinge̱xgü nax perü Cori ya Tupanaca̱x peyadaixü̃ca̱x i pexü̃nagü. ¡Notürü taxũtáma yáxü̃waxüchi pexĩ! ¡Rü cha̱u̱xca̱x rü ta perü Tupanana pecagüe! —nhanagürü.
29 Rü yexguma ga Moiché rü nanangãxü̃ rü nhanagürü: —Nhu̱xma nua ne chaxũxgu tátama nixĩ i Cori ya Tupanana chaca̱xü̃ nax moxü̃tama cuxna rü curü ngü̃xẽẽruü̃güna rü curü duü̃xü̃güna yaxĩgachixẽẽãxü̃ca̱x i ngẽma murenügü. Notürü tama tanaxwa̱xe i toxü̃ cuwomüxẽxẽ nax nüxna nax cunachu̱xuxü̃ i ngẽma Iraéutanüxü̃gü nax norü Cori ya Tupanaca̱x nadaiãxü̃ca̱x i naxü̃nagü —nhanagürü.
30 Rü yexguma Faraóũpatawa ínaxũxguwena ga Moiché, rü Cori ya Tupanana naca nax yaxĩgachixü̃ca̱x ga murenü.
31 Rü nüma ga Cori ya Tupana rü nanaxü ga yema Moiché naxca̱x ica̱xaxü̃. Rü yema murenügü rü Faraóũna rü norü ngü̃xẽẽruü̃güna rü guxü̃ma ga norü duü̃xü̃güna nixĩgachitanü ga yema murenügü.
32 Notürü nüma ga Faraóũ rü yemawena rü nanuama, rü tama nayange̱xgü ga Iraéutanüxü̃gü.
