1 Corĩ́tiucü̃ãꞌ 12:1-31
12 Pa Chaueneẽgüx, chanaxwa̱xe i nüxü̃ pecua̱x na nhuxãcü jiĩxü̃ i ngẽma nacümagü rü ngẽma cua̱x i Tupanaãẽ i Üünexü̃ tüxna ãxü̃. Rü ngẽmachiga nixĩ i pemaã nüxü̃ chixuxchaü̃xü̃ i nhu̱xmax.
2 Rü pema meãma nüxü̃ pecua̱x ga jexguma taũta Cristuaxü̃́ pejaxõgügu, rü pegü nüxna pexãgü ga tupananetachicüna̱xãgü ga ingeáxü̃.
3 Rü ngẽmaca̱x i nhu̱xma rü chanaxwa̱xe i meã nüxü̃ pecua̱x rü ngẽxguma Tupanaãẽ i Üünexü̃ texéxü̃ idexaxẽẽgu, rü taxucürüwama nhatarügü:
“Rü wüxi ja chixecü nixĩ ja Ngechuchu”, nhatarügü. Rü ngẽxgumarüü̃ ta, rü taxucürüwama texé nhatarügü:
“Ngechuchu rü tórü Cori nixĩ”, nhatarügü ega tama Tupanaãẽ i Üünexü̃ tüxü̃ mu̱xgu na ngẽmaãcü tidexaxü̃ca̱x.
4 Rü namu nixĩ i nacümagü i duü̃xü̃gü jaxuxü̃, notürü ngẽma tüxna naxãxü̃ rü wüxitama nixĩ. Rü nüma nixĩ i Tupanaãẽ i Üünexü̃.
5 Nangẽxma i nagúxü̃raü̃xü̃ i nacüma na nhuxãcü tórü Corica̱x ipuracüexü̃, notürü wüxitama nixĩ ja tórü Cori ja tüxü̃ mucü na nüxü̃́ ipuracüexü̃ca̱x.
6 Rü Tupanaãrü pora rü nagúxü̃raü̃ãcü tawa napuracü, notürü wüxitama nixĩ ja Tupana ja guxü̃ma ücü i guxü̃ i duü̃xü̃güwa.
7 Rü Tupana rü wüxichigü i duü̃xü̃na nanaxã i cua̱xruü̃ i nawa nüxü̃ icuáxü̃ na Naãẽ i Üünexü̃ tawa ngẽxmaxü̃. Rü ngẽmaãcü nanaxü ja Tupana na guxü̃ma i jaxõgüxü̃xü̃ nangü̃xẽẽxü̃ca̱x.
8 Rü Tupana rü Naãẽ i Üünexü̃xü̃ namu na nüma tüxna naxããxü̃ca̱x i cua̱x na tümáxẽ rü nüxü̃ tacuáxü̃ca̱x na meã ṯoguã̱xü̃ taxucu̱xẽxü̃ca̱x. Rü ngẽmatama Naãẽ i Üünexü̃ ṯoguã̱xna nanaxã i cua̱x na meã nüxü̃ tacuáxü̃ca̱x na nhuxãcü meã tangúexẽẽtaexü̃.
9 Rü tümaxẽ, rü ngẽmatama Naãẽ i Üünexü̃ tüxü̃́ nanatauxchaxẽẽ na meã tajaxõxü̃ca̱x. Rü togue rü tüxna nanaxã i pora na ngẽmamaã naxca̱x tajataanexẽẽxü̃ca̱x i ngẽma iḏaaweexü̃.
10 Rü togue rü tüxna nanaxã i pora na tanaxüxü̃ca̱x i ṯacü rü mexü̃ i Tupanaãrü poramaã üxü̃. Rü togue rü tüxna nanaxã i cua̱x na nüxü̃ tixuxü̃ca̱x i Tupanaãrü ore. Rü togue rü tüxna nanaxã i cua̱x na nüxü̃ tacuáxü̃ca̱x i ṯacü jiĩxü̃ i ṉg̱oxogüarü ixĩxü̃ rü ṯacü jiĩxü̃ i Tupanaãẽ i Üünexü̃ãrü ixĩxü̃. Rü togue rü tüxna nanaxã i cua̱x na ngẽma tama nüxü̃ tacuáxü̃ i nagawa tidexaxü̃ca̱x. Rü togue rü tüxna nanaxã i cua̱x na tanango̱xẽẽxü̃ca̱x na ṯacüchiga jiĩxü̃ na tidexaxü̃ ja jíxema to i nagawa idexáxe.
11 Rü guxü̃ma i ngẽma rü Tupanaãẽ i Üünexü̃tama nixĩ i naxüxü̃. Rü nüma nixĩ i wüxichigü i duü̃xü̃na naxããxü̃ i ngẽma cua̱x i nüma nanaxwa̱xexü̃ na nüxna naxããxü̃.
Guxãma i jixema i jaxõgüxü̃ rü wüxitama i duü̃xü̃rüü̃ tixĩgü
12 Rü wüxi i naxü̃ne rü woo nüxü̃́ nangẽxmagu i naẽru rü nachacüügü rü naparagü rü muxü̃ma i to i norü ngẽmaxü̃gü, notürü wüxitama i naxü̃ne nixĩ. Rü ngẽxgumarüü̃tama nixĩ i guxü̃ma i Cristuarü duü̃xü̃gü na wüxitama i naxü̃nerüü̃tama jixĩgüxü̃.
13 Tupanaãẽ i Üünexü̃ rü wüxitama nixĩ. Rü jexguma íibaiü̃gu ga jixema, rü wüxitama i naxü̃nerüü̃ tüxü̃ nixĩgüxẽẽ. Rü woo Judéugü na ixĩgüxü̃, rü e̱xna duü̃xü̃gü i tama Judéugü na ixĩgüxü̃, rü e̱xna duü̃xü̃gü i ṯacü rü corime̱xẽwa ngẽxmagüxü̃ na ixĩgüxü̃, rü e̱xna duü̃xü̃gü i taxúxeme̱xẽwa ngẽxmagüxü̃ na ixĩgüxü̃, notürü wüxitama i naxü̃nerüü̃ tüxü̃ nixĩgüxẽẽ i nüma i Naãẽ i Üünexü̃. Rü guxãma i jixema rü aixcuma marü tüxna nangu i ngẽma Naãẽ i Üünexü̃.
14 Wüxi i naxü̃ne rü tama nüxĩcatama nixĩ, notürü nüxü̃́ nangẽxma i naẽru rü nachacüügü rü naparagü. Rü ngẽmaãcü muxü̃gu nixüje.
15 Rü ngẽxguma chi wüxi ja nacutü nhaxgu:
“Rü nhu̱xma na tama naxme̱x chiĩxü̃, rü ngẽmaca̱x tama ngẽma naxü̃newa changẽxma”, nhaxgu, rü tama ngẽmaca̱x nüxü̃ narüxo na naxü̃neãrü jiĩxü̃.
16 Rü ngẽxguma chi wüxi ja nachinü nhaxgu:
“Rü nhu̱xma na tama naxẽtü chiĩxü̃, rü ngẽmaca̱x tama naxü̃newa changẽxma”, nhaxgu, rü tama ngẽmaca̱x nüxü̃ narüxo na naxü̃neãrü jiĩxü̃.
17 Erü ngẽxguma chi guxü̃ma i naxü̃ne rü naxẽtü jixĩgu, ¿rü ṯacümaã chi i nüxü̃ ixĩnüẽxü̃? Rü ngẽxguma chi guxü̃ma i naxü̃ne rü naxmachi̱xẽ jixĩgu, ¿rü ṯacümaã chi i nüxü̃ iwãxĩxü̃?
18 Notürü Tupana ga naxücü ga taxüne, rü ngexta nüma ínanaxwa̱xexü̃gu nanaxü ga taeru rü tachacüügü rü taparagü i norü guxü̃ma i taxüne.
19 Rü ngẽxguma chi guxü̃ma i taxüne rü taeruxicatama jixĩgu, rü ¿ngẽxü̃ chi jiĩxü̃ i taxüne ixĩxü̃?
20 Rü woo nangẽxma i taeru rü tachacüügü rü taparagü, notürü wüxitama nixĩ i taxüne.
21 Rü taxetü rü taxucürüwa taxme̱xü̃ nhanagürü:
“Chama rü tama chacuxwa̱xe”, nhanagürü. Rü ngẽxgumarüü̃ ta i taeru rü taxucürüwa tacutügüxü̃ nhanagürü:
“Chama rü tama chapexwa̱xe”, nhanagürü.
22 Notürü ngẽma jexeraãcü ãũcümaxü̃ i taxünewa, rü ngẽma nixĩ i jexera nanaxwa̱xexü̃ i taxüne.
23 Rü ngẽma taxünewa jexeraãcü naxca̱x ixãnexü̃, rü ngẽma nixĩ i jexera meã ixüxchiruxü̃. Rü ngẽma taxünewa ngẽxmaxü̃ i tama inaxwa̱xexü̃ na nangexchiruxü̃, rü ngẽma nixĩ i jexera meã idüxüxü̃.
24 Notürü tama ngẽmaãcü tanaxü namaã i ngẽma taxünewa ngẽxmaxü̃ i guxãxü̃ma iwéxü̃. Rü ngẽmaãcü Tupana nanaxü i taxüne, na jexeraãcü nüxna idauxü̃ca̱x i ngẽma jexera naxca̱x ixãnexü̃ i taxünewa.
25 Rü ngẽmaãcü Tupana nanaxü i taxüne na wüxichigü i ngẽma taxünewa ngẽxmaxü̃ rü nüxna nadauxü̃ca̱x i natanüxü̃, rü guxü̃ma meã nügümaã na napuracüexü̃ca̱x.
26 Rü ngẽxguma chi wüxi i ngẽma taxünewa ngẽxmaxü̃ ṯacü nüxü̃́ ngu̱xgux, rü guxü̃ma i ngẽma togü i natanüxü̃gü rü ta nüxü̃́ nangu̱x. Rü ngẽxguma chi wüxi i ngẽma taxünewa ngẽxmaxü̃ ṯacümaã taãẽ̱xgu, rü guxü̃ma i ngẽma togü i natanüxü̃gü rü ta nataãẽ.
27 Rü nhu̱xma i pema rü Cristuxü̃ne peixĩgü. Rü wüxichigü i pema rü ngẽma naxü̃nena pexügü.
28 Rü ngẽmaca̱x ja Tupana rü norü duü̃xü̃gü i jaxõgüxü̃tanüwa tüxü̃ naxuneta ja nhuxre na norü puracüwa tüxü̃ namugüxü̃ca̱x. Rü tüxü̃ naxuneta ja ṯoguã̱x na nüxü̃ tixuxü̃ca̱x i norü ore. Rü tüxü̃ naxuneta ja ṯoguã̱x na duü̃xü̃güxü̃ tangúexẽẽxü̃ca̱x i norü ore, rü ṯoguã̱x na tanaxüxü̃ca̱x i mexü̃gü i taxü̃gü i Tupanaãrü poramaã üxü̃. Rü tüxü̃ naxuneta ja ṯoguã̱x na tanameẽxẽẽxü̃ca̱x i iḏaaweexü̃, rü ṯoguã̱x na togüxü̃ tarüngü̃xẽẽgüxü̃ca̱x, rü ṯoguã̱x na jaxõgüxü̃ãrü ãẽ̱xgacügü na tixĩgüxü̃ca̱x. Rü tüxü̃ naxuneta ja ṯoguã̱x na ngẽma tüma tama nüxü̃ tacuáxü̃ i nagawa na tidexagüxü̃ca̱x.
29 Rü tama guxãma rü Tupana tüxü̃ imugüxe tixĩgü, rü tama guxãma Tupanaãrü orearü uruü̃ tixĩgü. Rü tama guxãma norü orewa ngu̱xẽẽtaegüxe tixĩgü, rü tama guxãma nüxü̃ tacua̱x na tanaxüxü̃ i mexü̃gü i taxü̃gü i Tupanaãrü poramaã üxü̃.
30 Rü tama guxãma nüxü̃ tacua̱x na tanameẽxẽẽxü̃ i duü̃xü̃gü i iḏaaweexü̃. Rü tama guxãma nüxü̃ tacua̱x na nawa tidexagüxü̃ i wüxi i naga i tama nüxü̃ tacuáxü̃. Rü tama guxãma nüxü̃ tacua̱x na tanango̱xẽẽxü̃ na ṯacüchiga jadexaxü̃ i ngẽma duü̃xü̃gü i tama nüxü̃ nacuáxü̃ i nagawa idexaxü̃.
31 ¡Rü naxca̱x peda̱x na Tupanaxü̃tawa penajaxuxü̃ca̱x i ngẽma cua̱x i rümemaẽxü̃!
Notürü i nhu̱xma rü tá pexü̃ changúexẽẽ i ṯacü nixĩ i guxü̃ma i ngẽma pemaã nüxü̃ chixuxü̃ãrü jexera rümemaẽxü̃.
