1 Corĩ́tiucü̃ãꞌ 14:1-40
14 ¡Rü naxca̱x peda̱x na pemücügüxü̃ pengechaü̃xü̃! Rü ngẽxgumarüü̃ ta name nixĩ i naxca̱x ípeca na Tupana pexna naxãxü̃ca̱x i ngẽma togü i nacümagü i Naãẽ i Üünexü̃wa ne ĩxü̃. ¡Rü ngẽma nacüma i jexeraãcü naxca̱x ípec̱axü̃ nixĩ na meãma nüxü̃ peixuxü̃ i norü ore!
2 Jíxema duü̃xẽ ja tama nüxü̃ tacuáxü̃ i nagawa idexaxe, rü Tupanamaã nixĩ i tidexaxü̃ rü tama i duü̃xü̃gümaã, erü taxúema nüxü̃ tacua̱x na nhuxũ nhaxü̃chiga jiĩxü̃. Rü Tupanaãẽ i Üünexü̃ nixĩ i tüxü̃ idexaxẽẽxü̃, notürü ngẽma ore i nüxü̃ tixuxü̃ rü ẽxü̃guxü̃ nixĩ.
3 Notürü jíxema nüxü̃ ixuxe i Tupanaãrü ore rü ngẽmaãcü nüxü̃ tarüngü̃xẽẽ i duü̃xü̃gü na jexeraãcü meã jaxõgüãxü̃ca̱x rü nüxü̃́ nangúchaü̃xü̃ca̱x i ngẽma ore rü naporaexü̃ca̱x i ngẽxguma guxchaxü̃ nüxü̃ üpetügu.
4 Rü jíxema duü̃xẽ ja tama nüxü̃ tacuáxü̃ i nagawa idexaxe, rü tümaca̱xtama nixĩ i ngẽma, na jexeraãcü meã Tupanaãxü̃́ tajaxõxü̃ca̱x. Notürü jíxema nüxü̃ ixuxe i Tupanaãrü ore, rü nüxü̃ tixu na jexeraãcü Tupanaãxü̃́ jaxõgüãxü̃ca̱x i guxü̃ma i jaxõgüxü̃.
5 Chama chierü chanaxwa̱xe na guxãma i pema rü ngẽma tama nüxü̃ pecuáxü̃ i nagawa na peidexagüxü̃. Notürü jexeraãcü chanaxwa̱xe na duü̃xü̃gümaã nüxü̃ peixuxü̃ i Tupanaãrü ore. Erü ngẽma to i nagawa na peidexagüxü̃ãrü jexera narümemaẽ na togümaã nüxü̃ peixuxü̃ i Tupanaãrü ore. Notürü ngẽma to i nagawa na idexaxü̃, rü name ega ngẽma jaxõgüxü̃maã nüxü̃ ixuxgu na ṯacüchiga jiĩxü̃ i ngẽma dexa, na nümagü rü ta jexeraãcü meã Tupanaãxü̃́ jaxõgüãxü̃ca̱x.
6 Rü ngẽmaca̱x, Pa Chaueneẽgüx, rü ngẽxguma chi pexü̃tawa chaxũxgu, rü chi to i nagawa chidexagu, ¿rü ṯacüwa chi pexü̃́ namexü̃ i ngẽma? Notürü ngẽxguma chi pemaã nüxü̃ chixuxgu i ngẽma Tupana tüxü̃ nüxü̃ cua̱xẽẽxü̃, rü e̱xna ngẽma chamatama nüxü̃ chacuáxü̃ na aixcuma jiĩxü̃, rü e̱xna ngẽma ẽxü̃guxü̃ i nhu̱xma Tupana tüxü̃ nüxü̃ cua̱xẽẽxü̃, rü e̱xna ṯacü rü to i ngu̱xẽẽtae i Tupanachiga, rü ngẽma waxi nixĩ i pexü̃́ mexü̃.
7 ¡Rü dücax i ngẽma paxetaruü̃ i woweru rü e̱xna arpa! Rü ngẽxguma tau chima texé meã napaüxgu, rü tau chima nüxü̃ tacua̱x na ṯacügu tanapaxüxü̃.
8 Rü ngẽma churaragü, rü ngẽxguma norü uwanügümaã nügü nadaixchaü̃gu, ¿rü nhuxãcü tá nügü namexẽẽ na nügü naḏaixü̃ca̱x ega tama meã nangógagu ja jima corneta ja da̱i̱xca̱x nagu jacuexü̃ne?
9 Rü ngẽxgumarüü̃ ta pemaã nangupetü. Rü ngẽxguma chi perü conümaã nüxü̃ peixuxgu i dexa i taxúema nüxü̃ cuáxü̃, ¿rü nhuxãcü tá nüxü̃ tacua̱x na nhuxũ nhaxü̃chiga jiĩxü̃ i ngẽma nüxü̃ peixuxü̃? Rü nhama ngürüanewa peidexagüxü̃rüü̃ tá peixĩgü.
10 Rü aixcuma nixĩ i namuxü̃ i nagagü i nhama i naãnewa. Rü guxü̃ma i ngẽma nagagü rü name naxca̱x i ngẽma duü̃xü̃gü i nawa idexagüxü̃.
11 Notürü ngẽxguma chi tama nüxü̃ chacua̱xgu i ngẽma naga i to i duü̃xü̃ chamaã nawa idexaxü̃, rü ngẽma duü̃xü̃ca̱x rü nhama to i nachiü̃ãnecü̱̃ã̱xrüü̃ chixĩ, rü chauxca̱x rü nhama to i nachiü̃ãnecü̱̃ã̱x i duü̃xü̃rüü̃ nixĩ i nümax.
12 Chama nüxü̃ chacua̱x rü pema rü pexü̃́ nangúchaü̃ na pexü̃́ nangẽxmaxü̃ i ngẽma nacümagü i Tupanaãẽ i Üünexü̃ tüxna ãxü̃. Notürü name nixĩ i naxca̱x pedau na guxü̃ãrü jexera pexna naxããxü̃ i ngẽma nacümagü i namaã nüxü̃ perüngü̃xẽẽxü̃ i guxü̃ma i jaxõgüxü̃ na jexeraãcü meã Tupanaãxü̃́ jaxõgüãxü̃ca̱x.
13 Rü ngẽmaca̱x jíxema duü̃xẽ ja taxúema nüxü̃ cuáxü̃ i nagawa idexaxe, rü name nixĩ i Tupanana naxca̱x taca na tüxna naxããxü̃ca̱x i cua̱x na togümaã nüxü̃ tixuxü̃ca̱x na nhuxũ nhaxü̃chiga jiĩxü̃ i ngẽma nüxü̃ tixuxü̃.
14 Rü ngẽxguma chi taxúema nüxü̃ cuáxü̃ i nagawa chajumuxẽgu, rü chauãẽ nixĩ i ngẽma jumüxẽ́xü̃. Notürü chamatama rü taxuü̃ma chacua̱x na ṯacüchiga jiĩxü̃ i ngẽma.
15 ¿Rü ṯacü tá chaxü i nhu̱xmax? Rü marü name nixĩ ega taxúema nüxü̃ cuáxü̃ i nagawa chajumuxẽgu, notürü chanaxwa̱xe i guxãma nüxü̃ cuáxü̃ i nagawa rü ta chajumuxẽ. Rü marü name nixĩ ega taxúema nüxü̃ cuáxü̃ i nagawa chawijaegu, notürü chanaxwa̱xe i guxãma nüxü̃ cuáxü̃ i nagawa rü ta chawijae.
16 Erü ngẽxguma chi taxúema nüxü̃ cuáxü̃ i nagawa Tupanaxü̃ cuicua̱xüü̃gu, rü jíxema duü̃xẽgü ja ngẽ́ma irüxĩnüẽxẽ, rü taxucürüwa cumaã wüxigu Tupanaxü̃ ticua̱xüü̃gü, erü tama nüxü̃ tacua̱x na nhuxũ nhaxü̃chiga jiĩxü̃ i ngẽma nüxü̃ cuixuxü̃.
17 Rü woo ngẽma curü jumuxẽ rü namexẽchi̱xgu, notürü jíxema duü̃xẽgü ja ngẽ́ma irüxĩnüẽxẽ rü taxuü̃ma i mexü̃ nawa tajaxu ega to i nagawa cuidexagu.
18 Tupanana moxẽ chaxã, erü perü jexera taxúema nüxü̃ cuáxü̃ i nagawa chidexa.
19 Notürü woo muxü̃ma i ore i taxúema nüxü̃ cuáxü̃ i nagawa na chidexaxü̃, notürü ngẽma jaxõgüxü̃ãrü ngutaque̱xegüwa rü chauxca̱x rü narümemaẽ chi nixĩ ega woo noxre i ore i meãma nüxü̃ icuáxü̃wa namaã nüxü̃ chixuxgu i Tupanaãrü ore na ngẽmaãcü ngẽmamaã meã chanangúexẽẽxü̃ca̱x.
20 Pa Chaueneẽgüx, tama name nixĩ i buxü̃gürüü̃ peixĩgü i ngẽma nagu perüxĩnüẽxü̃wa. Rü name nixĩ i wüxi i buxü̃ i ngexwacax íraxü̃rüü̃ tama chixexü̃ pexü, notürü ngẽma nagu perüxĩnüẽxü̃wa rü penaxwa̱xe i duü̃xü̃ i marü jaxü̃rüü̃ nagu perüxĩnüẽ.
21 Tupanaãrü ore ga nuxcümaxü̃xü̃ ga norü orearü uruü̃ ümatüxü̃ rü nhanagürü:“Rü nuã tá chanamugü i to i nachiü̃ãnecü̱̃ã̱x i duü̃xü̃gü na to i nagawa jadexagüxü̃ca̱x namaã i nhaã Judéugü i tama jaxõgüxü̃. Notürü woo ngẽmaãcü chanaxü̱xgu, rü tãũxü̃táma chauga naxĩnüẽ i ngẽma Judéugü i tama irüxĩnüẽchaü̃xü̃”,
nhanagürü ga Tupana.
22 Rü ngẽmaca̱x ngẽma na taxúema nüxü̃ cuáxü̃ i nagawa idexaxü̃, rü wüxi i cua̱xruü̃ nixĩ naxca̱x i ngẽma duü̃xü̃gü i tama irüxĩnüẽchaü̃xü̃. Rü tama duü̃xü̃gü i marü jaxõgüxü̃ca̱x nixĩ i ngẽma. Notürü ngẽma Tupanaãrü orexü̃ na ixuxü̃, rü duü̃xü̃gü i marü jaxõgüxü̃ca̱x nixĩ na jexeraãcü meã Tupanaãxü̃́ jaxõgüãxü̃ca̱x. Rü tama duü̃xü̃gü i tama irüxĩnüẽchaü̃xü̃ca̱x nixĩ i ngẽma.
23 Rü ngẽxguma chi pema i jaxõgüxe pengutaque̱xegügu, rü guxã chima to i nagawa peidexagügu, ¿rü nhuxũ nhaxü̃ tá ega petanügu naxücuxgu i wüxi i duü̃xü̃ i ngẽ́ma ijarüxĩnüxü̃ rü e̱xna wüxi i duü̃xü̃ i taũta jaxõxü̃? ¿Taux e̱xna i nagu tá naxĩnüxü̃ na pexãũãẽgüxü̃ i pemax?
24 Notürü ngẽxguma chi guxãma i pema nüxü̃ peixuxgu i Tupanaãrü ore, rü chi petanügu naxücuxgu i wüxi i duü̃xü̃ i tama jaxõxü̃ rü e̱xna wüxi i duü̃xü̃ i ngẽ́ma ijarüxĩnüxü̃, rü tá nüxü̃ naxĩnü i ngẽma Tupanaãrü ore i nüxü̃ peixuxü̃. Rü ngẽmaãcü tá nüxü̃ nacua̱x na nüma rü wüxi i pecaduã́xü̃ na jiĩxü̃. Rü nügügu tátama ínarüxĩnü i ngẽxguma nüxü̃ naxĩnügu i ngẽma nüxü̃ peixugüexü̃.
25 Rü ngẽma chixexü̃ i nüxĩcatama nüxü̃ nacuáxü̃ rü tá naxca̱x ínicua̱x. Rü nüma rü ngẽxma tá nacaxã́pü̱xü, rü tá Tupanaxü̃ nicua̱xüü̃. Rü tá nüxü̃ nixu na aixcuma Tupana petanüwa nangẽxmaxü̃.
Guxü̃ma i ṯacü i ngutaque̱xewa pexüxü̃, rü name nixĩ i meã peãẽta ipexüãcüma penaxü
26 Dücax, Pa Chaueneẽgüx, nhu̱xma tá pemaã nüxü̃ chixu na nhuxãcü tá penaxüxü̃ ega ngẽxguma pengutaque̱xegügu. Rü nhuxre i pema rü marü name na Tupanaãrü wijaegu pewijaegüxü̃, rü togue rü tangu̱xẽẽtaegüxü̃, rü togue rü nüxü̃ tixuxü̃ i ngẽma ore i Tupana tüxü̃ nüxü̃ cua̱xẽẽxü̃, rü togue rü nawa tidexagüxü̃ i naga i tama nüxü̃ tacua̱xgüxü̃, rü togue rü tanango̱xẽẽgüxü̃ i ngẽma dexa i to i nagawa nüxü̃ jaxugüxü̃. Notürü guxü̃ma i ngẽma rü tanaxwa̱xe i jaxõgüxü̃ãrü ngü̃xẽẽca̱x na jiĩxü̃, na jexeraãcü jaxõgüãxü̃ca̱x rü meã Tupanaca̱x namaxẽxü̃ca̱x.
27 Rü ngẽxguma to i naga i pema tama nüxü̃ pecuáxü̃wa peidexagügu, rü name nixĩ i taxre rü e̱xna tamaẽ̱xpü̱xicatama tidexagü. Rü tanaxwa̱xe i wüxiexira tidexa i noxri rü jixcama ja togue. Rü ngẽxguma chi texé to i nagawa idexagu, rü name nixĩ na tangẽxmaxü̃ ja wüxie ja nüxü̃ ixuchigüxe na ṯacüchiga jiĩxü̃ i ngẽma ore i to i nagawa nüxü̃ jaxuxü̃.
28 Notürü ngẽxguma chi tatau̱xgu na texé nüxü̃ ixuchigüxü̃ na ṯacüchiga jiĩxü̃ i ngẽma ore i to i nagawa nüxü̃ jaxuxü̃, rü narümemaẽ nixĩ na noxtacüma tama to i nagawa peidexagü i perü ngutaque̱xewa. Rü narümemaẽ i wüxichigü tüxica Tupanamaãxĩcatama bexma tidexagü.
29 Rü ngẽxgumarüü̃ ta ngẽxguma pengutaque̱xegügu, rü name nixĩ i taxre rü e̱xna tamaẽ̱xpü̱xicatama nüxü̃ tixu i Tupanaãrü ore. Rü ngẽma togü i ngutaque̱xetanüxü̃ rü name nixĩ na meã nangugügüãxü̃ i ngẽma ore.
30 Notürü ngẽxguma chi íjadexajane i wüxi i duü̃xü̃, rü Tupana tümamaã idexagu ja togue ja ngẽ́ma rütoxe, rü name nixĩ na ijanachianexü̃ i ngẽma nüxĩra idexaxü̃ na tidexaxü̃ca̱x ja jíxema duü̃xẽ ja Tupana tümamaã idexaxe.
31 Rü ngẽmaãcü guxãma i pema na Tupana pemaã idexaxü̃, rü name nixĩ i wüxichigü ípenaṉg̱uxẽẽ na pewa nanguxü̃ na peidexagüxü̃ i Tupanaãrü ore. Rü ngẽmaãcü i ngẽma togü i ngutaque̱xetanüxü̃gü rü tá Tupanachiga meã nangúe rü tá nataãẽgü.
32 Rü ngẽmaãcü tanaxwa̱xe i meãma tümaãẽmaã itacua̱x ja wüxichigü ja jíxema Tupanaãrü orexü̃ ixuxe.
33 14:33-34 Erü perü ngutaque̱xegüwa rü Tupana nanaxwa̱xe na meã penaxüxü̃ i guxü̃ma, rü tama nanaxwa̱xe na ngẽ́ma pexãũgatanüxü̃ rü pegü ípetüexẽẽxü̃. Rü guxü̃ma i togü i jaxõgüxü̃ãrü ngutaque̱xegüwa rü marü nüxü̃ najapue na tama jadexagüxü̃ i ngexü̃gü. Rü name nixĩ i pema rü ta ngẽmaãcü penaxü, erü nachu̱xu na jadexagüxü̃ i ngexü̃gü i ngutaque̱xegüwa. Rü name nixĩ na jatügüga naxĩnüẽxü̃ i ngexü̃gü, ngẽma Tupanaãrü ore tüxü̃ muxü̃rüü̃.
34 Nüü̃ nadau 14:33
35 Rü ngẽxguma chi ṯacüxü̃ nacuáxchaü̃gu i wüxi i ngexü̃, rü name nixĩ i nachiü̃watama natena naca i nachiga i ngẽma. Erü wüxi i ãne nixĩ ega ngutaque̱xewa jadexagu i wüxi i ngexü̃.
36 Pa Corĩ́tiucü̱̃ã̱xgüx, name nixĩ na nüxna pecua̱xãchiexü̃ na tama pewaxira ne naxũxü̃ i Tupanaãrü ore. Rü tama pexicatama nixĩ i penajauxgüxü̃ i ngẽma.
37 Rü ngẽxguma chi texé tügügu rüxĩnügu na Tupanaãrü orearü uruü̃ tiĩxü̃ rü e̱xna tügügu tarüxĩnügu na Tupanaãẽ i Üünexü̃ tüxna naxãxü̃ i ṯacü rü cua̱x, rü name nixĩ i nüxna tacua̱xãchi na tórü Coriarü ore jiĩxü̃ i nhaã ore i pexca̱x chaxümatüxü̃.
38 Notürü ngẽxguma chi texé tama nüxü̃ cuáxchaü̃gu i ngẽma pemaã nüxü̃ chixuxü̃, rü name nixĩ i tama tüxü̃ pecuáxchaü̃.
39 ¡Rü ngẽmaca̱x, Pa Chaueneẽgüx, rü Tupanana naxca̱x peca i cua̱x na meãma nüxü̃ peixuxü̃ca̱x i norü ore! ¡Rü tama penachu̱xu na to i nagawa jadexagüxü̃ i duü̃xü̃gü!
40 Rü perü ngutaque̱xegüwa, rü name nixĩ na meã penaxüxü̃ i guxü̃ma. Rü tama name i ngẽ́ma pexãũgatanü rü pegü ípetüexẽẽ.
