1 Corĩ́tiucü̃ãꞌ 15:1-58
15 Rü nhu̱xmax, Pa Chaueneẽgüx, rü chanaxwa̱xe i nüxna pecua̱xãchie i ngẽma Tupanaãrü ore i tüxü̃ maxẽxẽẽxü̃ ga pemaã nüxü̃ chixuxü̃. Rü jematama ore nixĩ ga pema pejauxgüxü̃. Rü nhu̱xma rü ngẽmatama oregagu nixĩ i meã pejaxõgüxü̃.
2 Rü ngẽma oregagu nixĩ i pexü̃́ nangẽxmaxü̃ i maxü̃ i taguma gúxü̃, ega aixcuma guxü̃guma pejaxõgüamagu. Notürü ngẽxguma tama guxü̃guma pejaxõgügu, rü notüca̱xmamare nixĩ i ngẽma perü õ.
3 Rü noxri pexü̃ changúexẽẽ ga jema ngu̱xẽẽtae ga chamatama togü ga chamücügüxü̃tawa chajaxuxü̃. Rü pexü̃ changúexẽẽ na Cristu rü tórü pecaduca̱x najuxü̃, ngẽma Tupanaãrü ore i ümatüxü̃wa nüxü̃ ixuxü̃rüü̃.
4 Rü jexgumarüü̃ ta pexü̃ changúexẽẽ na nhuxãcü inata̱xgüãxü̃, rü nhuxãcü norü tamaẽ̱xpü̱x ga ngunexü̃gu rü wena na namaxü̃xü̃, ngẽma Tupanaãrü ore i ümatüxü̃ nüxü̃ ixuxü̃rüü̃.
5 Rü jexgumarüü̃ ta pexü̃ changúexẽẽ ga nhuxãcü Pedruca̱x na nangóxü̃ ga Cristu, rü nhuxãcü jixcüra rü norü ngúexü̃gü ga jamugüxü̃ca̱x na nangóxü̃.
6 Rü jemawena ga Cristu rü noxtacüma 500 arü jexera ga jaxõgüxü̃ca̱x nango̱x. Rü muxü̃ma i ngẽma duü̃xü̃gü rü nhu̱xma rü ta namaxẽ, notürü nümaxü̃ rü marü najue.
7 Rü jemawena rü Tiaguca̱x nango̱x, rü jixcama guxü̃ma ga jema togü ga ngúexü̃gü ga jamugüxü̃ca̱x nango̱x.
8 Rü düxwa chawa inajacua̱x ga chauxca̱x rü ta na nangóxü̃, woo ngürüãchimare nixĩ ga jema, ngẽxgumarüü̃ i wüxi i buxü̃ i tautama norü ngunexü̃wa nangujane buxü̃rüü̃.
9 Rü chama rü guxü̃ma i ngẽma togü i Tupana imugüxü̃tüü̃wa chaxü. Rü tau chima name na Tupana imuxü̃maã choxü̃ naxugüxü̃ i duü̃xü̃gü, jerü nawe chingẽchigü ga Tupanaãrü duü̃xü̃gü rü poraãcü chixexü̃ namaã chaxü.
10 Notürü ga Tupana rü chamaã namecüma, rü ngẽmaca̱x i nhu̱xma rü choxü̃ pedau na ṯacü chiĩxü̃ rü nhuxãcü na chiĩxü̃. Rü jema chamaã na namecümaxü̃ rü tama notüca̱xma nixĩ. Jerü chama rü guxü̃ ga togü ga jamugüxü̃ãrü jexera chanaxü ga Tupanaãrü puracü. Notürü tama chamatama nixĩ ga chanaxüxü̃ ga jema puracü, notürü Tupana ga chamaã mecümacü rü chamaã puracücü nixĩ ga naxücü ga jema puracü na nüxü̃ chixuxü̃ca̱x ga norü ore.
11 Notürü i nhu̱xma rü nüẽ́tama nixĩ ega woo chama chixĩgu rü e̱xna togü jixĩgu ga pemaã nüxü̃ ixuxü̃ ga jema ore. Jerü jema ore ga pemaã nüxü̃ tixuxü̃, rü Tupanaãrü ore i tüxü̃ maxẽxẽẽxü̃ nixĩ, rü jema nixĩ ga peixõgüxü̃.
Nhuxãcü wena tá namaxẽ i duü̃xü̃gü i juexü̃
12 Marü pemaã nüxü̃ tixu na Cristu rü juwa ínadaxü̃. ¿Rü tü̱xcüü̃ nhuxre i pema rü nhaperügügü:
“Juexü̃ rü tagutáma wena namaxẽ”, nhaperügügü?
13 Rü ngẽxguma chi ngẽma juexü̃ rü tagu chima wena namaxẽgu rü ga Cristu rü chi ta tau chima wena namaxü̃.
14 Rü jexguma chi Cristu tama wena maxü̃gu, rü ngẽma ore i nüxü̃ tixuxü̃ i nachiga rü taxuwa chima name, rü notüca̱xmamare chi nixĩ i perü õ.
15 Rü ngẽxguma chi ngẽmaãcü jixĩgu, rü toma rü Tupanaãrü orearü uruü̃gü i dorata̱a̱xgüxü̃ chi tixĩgü. Erü nüxü̃ tixu na Tupana Cristuxü̃ wena maxẽẽxü̃. Rü ngẽxguma chi tama aixcuma jixĩgu na wena namaxẽxü̃ i juexü̃, rü chi wüxi i doramare nixĩ na Tupana Cristuxü̃ wena maxẽẽxü̃.
16 Rü ngẽxguma chi ngẽma juexü̃ rü tagu chima wena namaxẽgu, rü ga Cristu rü chi ta tau chima wena namaxü̃.
17 Rü jexguma chi Cristu tama wena maxü̃gu, rü notüca̱xmamare chi nixĩ i pejaxõgüxü̃, rü chi nhu̱xma rü ta perü pecadugagu ipejarütauxe.
18 Rü chi ngẽmaãcü jixĩgu rü ngẽma duü̃xü̃gü i Cristuaxü̃́ jaxõgüxü̃ i marü juexü̃, rü chi ta tau chima nüxü̃́ nangẽxma i maxü̃ i taguma gúxü̃.
19 Rü ngẽxguma chi nhama i maxü̃ca̱xicatama jixĩgu na Cristuaxü̃́ jaxõgüxü̃, rü chi guxü̃ i togü i duü̃xü̃güarü jexera tangechaü̃tümüü̃gü.
20 Notürü aixcumaxü̃chi nixĩ ga Cristu ga juwa na ínadaxü̃. Rü natanüwa i guxü̃ma i ngẽma juexü̃ i jixcüra tá írüdagüxü̃, rü Cristu nixĩ ga namaã inaxügücü na ínadaxü̃, jerü nüma nixĩ ga nüxĩra wena namaxü̃xü̃.
21 Rü jexgumarüü̃ wüxi ga jatügagu na najuexü̃ ga duü̃xü̃gü, rü ngẽxgumarüü̃ tá ta nixĩ na wüxi i jatügagu wena namaxẽxü̃ i ngẽma marü juexü̃.
22 Rü ngẽxgumarüü̃ Adã́ũgagu guxãma na juexü̃, rü ngẽxgumarüü̃ tá ta nixĩ na Cristugagu namaxẽxü̃ i guxü̃ma i duü̃xü̃gü i nüxü̃́ jaxõgüxü̃.
23 Notürü wüxichigü tá tümawa nangu na wena tamaxü̃xü̃. Rü Cristu nixĩ ga nüxĩra maxü̃cü. Rü ngẽxguma wena núma naxũxgu i nümax, rü ngẽxguma tá nixĩ i wena namaxẽxü̃ i ngẽma duü̃xü̃gü i noxrü ixĩgüxü̃.
24 Rü ngẽmawena tá nixĩ i nagúxü̃ i naãne. Rü ngẽxguma tá nixĩ ja Cristu i nüxü̃ naporamaẽxü̃ i guxü̃ma i norü uwanügü. Rü ngẽxguma tá nixĩ i Nanatü ja Tupanana naxããxü̃ i guxü̃ma na nüma namaã inacuáxü̃ca̱x.
25 Erü nüma ja Cristu rü ãẽ̱xgacü tá nixĩ nhu̱xmatáta nüxü̃ naporamaẽ i guxü̃ma i norü uwanügü.
26 Rü ngẽma nawa ijacuáxü̃ i norü uwanü i tá nüxü̃ naporamaẽxü̃, rü ju nixĩ.
27 Jerü Tupana rü marü Cristume̱xẽwa nanajexmagüxẽẽ ga guxü̃ma. Notürü woo Tupanaãrü ore nüxü̃ ixuxgu na Cristume̱xẽwa nangẽxmagüxü̃ i guxü̃ma, notürü nümatama ja Tupana rü tama Cristume̱xẽwa nangẽxma. Jerü nüma ga Tupana nixĩ ga Cristume̱xẽwa najexmagüxẽẽãxü̃ ga guxü̃ma.
28 Rü ngẽxguma guxü̃ma Cristume̱xẽwa ngẽxmagügu, rü nhu̱xmachi nümatama ja Cristu ja Tupana Nane rü tá Nanatüme̱xẽwa nügü nangẽxmaxẽẽ. Jerü nüma ga Tupana nixĩ ga noxri Cristume̱xẽwa najexmagüxẽẽãxü̃ ga guxü̃ma. Rü ngẽmaãcü ja Tupana rü guxü̃ãrü ãẽ̱xgacü tá nixĩ.
29 Rü nangẽxma i nhuxre i duü̃xü̃gü i petanüwa i Tupanaẽ́gagu juexü̃chicüü íbaiü̃xü̃. ¿Rü tü̱xcüü̃ ngẽma naxügü? Rü ngẽxguma chi tama wena namaxẽgu i duü̃xü̃gü i juexü̃, ¿rü tü̱xcüü̃ ngẽma juexü̃chicüü ínabaiü̃?
30 ¿Rü tü̱xcüü̃ i toma rü guxü̃guma ãũcümaxü̃wa tangẽxmagü?
31 Pemaã nüxü̃ chixu, Pa Chaueneẽgüx, rü guxü̃ i ngunexü̃gu rü ãũcümaxü̃wa changẽxma, rü tama nüxü̃ chacua̱x i ṯacü rü ngunexü̃gu Tupanaãrü oregagu tá na chajuxü̃. Rü ngẽma rü aixcumaxü̃chi nixĩ, ngẽxgumarüü̃ na aixcuma jiĩxü̃ na choxü̃́ nangẽxmaxü̃ i wüxi i taãẽ i taxü̃ i nhu̱xma na tórü Cori ja Ngechuchu ja Cristuaxü̃́ pejaxõgüxü̃.
32 Chama rü nuã Epéchiuwa rü Tupanaãrü orechigagu chorü uwanümaã poraãcü togü tachoxü̃gagü. Rü nhama naẽxü̃ i idüraexü̃maã togü taḏaixü̃rüü̃ tixĩgü. ¿Notürü ṯacüwa choxü̃́ namexü̃ ga jema ega chorü maxü̃ i nhama i naãnewa choxü̃́ ngẽxmaxü̃ca̱xicatama jixĩgu? Rü ngẽxguma chi aixcuma jixĩgu na tama wena namaxẽxü̃ i juexü̃, rü marü name i nhatarügügü:
“¡Ngĩxã tachibüe rü taxaxegü, erü paxa tá tajue!” nhatarügügü.
33 ¡Notürü tãũxü̃táma nawe perüxĩ i ngẽma duü̃xü̃gü i ngẽmaãcü chixri idexagüxü̃! Erü aixcuma nixĩ i ngẽma ore i nhaxü̃:
“Rü texé ja chixexü̃ i duü̃xü̃maã ãmücüxe, rü tüxü̃́ inajanaxoxẽẽ i tümacümagü i mexü̃”, nhaxü̃.
34 Rü name nixĩ i meã pegüãẽgu perüxĩnüẽ rü nüxü̃ perüxoe i ngẽma perü chixexü̃gü. Rü wüxi i perü ãne nixĩ na pemaã nüxü̃ chixuxü̃ rü nhuxre i pema rü tama aixcuma Cristuarü duü̃xü̃gü peixĩgüxü̃ rü tama aixcuma Tupanaxü̃ pecua̱xgüxü̃.
Nhuxãcü wena namaxẽ i juexü̃gü
35 Notürü bexmana wüxie tá pexna taca rü nhatarügü pexü̃:
“¿Nhuxãcü tá wena namaxẽxü̃ i juexü̃? ¿Rü nanhuxraü̃xü̃ i naxü̃nemaã tá ínadagüxü̃?” nhatarügü pexü̃.
36 Rü pemaã nüxü̃ chixu rü wüxi i ngẽãẽxü̃ nixĩ na ngẽmaãcü pexna tac̱axü̃. Erü ngẽxguma wüxi ja nanetüchire itoxgu, rü jima nanetüchire rü naju na naxüxü̃ca̱x i ngẽma nanetü.
37 Rü ngẽma waixü̃mügu itoxü̃, rü wüxi ja triguchire rü e̱xna ṯacü rü to i nanetüchire nixĩ. Rü tama nane i rüxüxü̃ nixĩ i itoxü̃.
38 Rü ngẽxguma marü ipenatoxguwena, rü Tupana nanaxüxẽẽ ja jima naxchire na nüma nanaxwa̱xexü̃ãcüma jiĩxü̃ca̱x i ngẽma nanetü.
39 Rü tama guxü̃ i naxü̃negü rü nawüxigu. Rü duü̃xẽxü̃ne rü nanatoraxü̃, rü naẽxü̃güxü̃ne rü to nixĩ, rü werigüxü̃ne rü to nixĩ, rü choxnigüxü̃ne rü to nixĩ.
40 Rü ngẽxgumarüü̃ ta nangẽxma i naxü̃negü i dauxü̃guxü̃ i naãnecü̱̃ã̱x, rü nangẽxma i naxü̃negü i nhama i naãnecü̱̃ã̱x. Rü ngẽma dauxü̃guxü̃ i naãnecü̱̃ã̱x i naxü̃negü rü nüxü̃́ nangẽxma i noxrütama mexü̃, rü ngẽma nhama i naãnecü̱̃ã̱x i naxü̃negü rü ta nüxü̃́ nangẽxma i noxrütama mexü̃. Notürü tama nawüxigu i ngẽma norü mewa.
41 Rü üa̱xcüarü j̱auracüü rü to nixĩ, rü tawemacüarü j̱auracüü rü to nixĩ. Rü woramacurigüarü j̱auracüü rü to nixĩ. Rü nügütanüwatama ja woramacurigü, rü tama nawüxigu i norü j̱auracüü.
42 Rü ngẽxgumarüü̃ tá ta naxüpetü namaã i naxü̃negü i ngẽma duü̃xü̃gü i juexü̃. Erü ngẽma naxü̃ne i noxri nüxü̃́ ngẽxmaxü̃ rü ijarüxoxwa̱xexü̃ nixĩ. Notürü ngẽma naxü̃ne i tá nüxü̃́ ngẽxmaxü̃ i ngẽxguma wena namaxẽgu, rü ngẽma rü tagutáma inajarüxo.
43 Rü ngẽma naxü̃ne i juxü̃ rü taxuwama name i ngẽxguma inata̱xgux. Notürü ngẽxguma wena namaxü̃gu rü tá namexẽchi. Rü ngẽma naxü̃ne i nhu̱xma turaxü̃ rü ngẽxguma wena namaxü̃gu rü tá napora.
44 Rü itanata̱x i ngẽma naxü̃ne i nhama i naãnecü̱̃ã̱x ixĩxü̃. Notürü ngẽxguma ínadaxgu, rü dauxü̃cü̱̃ã̱x i naxü̃ne tá nixĩ. Rü nhu̱xma na nangẽxmaxü̃ i naxü̃ne i nhama i naãnecü̱̃ã̱x rü ngẽmawa nüxü̃ tacua̱x na nangẽxmaxü̃ ta i naxü̃ne i dauxü̃cü̱̃ã̱x.
45 Tupanaãrü ore i ümatüxü̃wa rü nhanagürü:“Guma nüxĩraü̃cü ga jatü ga Adã́ũ rü nüxü̃́ najexma ga nhama ga naãnecü̱̃ã̱x ga naxü̃ne ga paxaãchi maxü̃xü̃”,
nhanagürü. Notürü ja Cristu rü dauxü̃cü̱̃ã̱x nixĩ. Rü nüma nixĩ i tüxna naxããxü̃ i maxü̃ i taguma gúxü̃.
46 Noxri rü tüxü̃́ nangẽxma i nhama i naãnecü̱̃ã̱x i taxüne. Notürü jixcama rü Tupana tá tüxna nanaxã i to i taxüne i dauxü̃cü̱̃ã̱x ixĩxü̃.
47 Guma nüxĩraü̃cü ga jatü ga waixü̃müwa ücü, rü nhama ga naãnecü̱̃ã̱x nixĩ. Notürü tórü Cori ja Cristu rü dauxü̃guxü̃ i naãnecü̱̃ã̱x nixĩ.
48 Rü ngẽma taxünegü i nhama i naãnewa tüxü̃́ ngẽxmaxü̃, rü guma Adã́ũxü̃ne ga waixü̃müwa ücürüü̃ nixĩgü. Notürü ngẽma naxü̃negü i dauxü̃wa nüxü̃́ ngẽxmaxü̃ i duü̃xü̃gü, rü Cristuxü̃nerüü̃ nixĩgü.
49 Rü nhgexgumarüü̃ na Adã́ũ ga waixü̃müwa ücürüü̃ na jiĩxü̃ i taxüne, rü ngẽxgumarüü̃ tá ta Cristu ja dauxü̃wa ngẽxmacürüü̃ nixĩ i taxüne i jixcüra.
50 Rü dücax, Pa Chaueneẽgüx, pemaã nüxü̃ chixu rü nhaã taxüne i namachinaxca̱x rü naxchina̱xãnaxca̱x, rü taxucürüwa Tupana ãẽ̱xgacü íjiĩxü̃wa nangu. Erü ngẽma ijarüxoxü̃, rü taxucürüwama Tupanaxü̃tawa i ngextá taxuü̃ma íjarüxoxü̃wa nixücu.
51 Notürü chanaxwa̱xe na nüxü̃ pecuáxü̃ i wüxi i ore i ẽxü̃guxü̃ ga noxri Tupanaxĩcatama nüxü̃ cuáxü̃. Rü dücax, tãũxü̃táma guxã tajue, notürü guxãxü̃ne rü tá naxüchicüü.
52 Rü ngürüãchimare wüxi i peãxẽtügu tá nixĩ i ngẽma na naxüchicüüxü̃ i taxüne i ngẽxguma naãneãrü gu̱xgux naxãgagu ja corneta. Rü tá naxãga ja jima corneta, rü ngẽxguma i ngẽma duü̃xü̃gü i juexü̃ rü tá ínarüdagü na tagutáma wena najuexü̃ca̱x. Rü jixema na imaxẽxü̃ rü tá naxüchicüü i taxüne.
53 Erü ngẽma taxüne i juxwa̱xexü̃ rü woetama tama taixü̃ rü tá naxüchicüü. Rü wüxi i ngexwacaxü̃xü̃ i naxü̃ne i aixcuma taixü̃ rü tagutáma juxü̃ tá nixĩ.
54 Rü ngẽxguma ngẽmaãcü naxüchicüügu i taxüne i juxwa̱xexü̃, rü tüxü̃́ nangẽxmagu i taxüne i ngexwacaxü̃xü̃ i taguma juxü̃, rü ngẽxguma tá nixĩ i janguxü̃ i Tupanaãrü ore i ümatüxü̃ i nhaxü̃:“Marü inajarüxo na najuexü̃ i duü̃xü̃gü. Rü Tupana rü marü juxü̃ narüjexera.
55 Rü dücax, Pa Jux, ¿ngẽxü̃ i curü pora i namaã toxü̃ curüjexeraxü̃? ¿Rü ngẽxü̃ i ngẽma cuxne i namaã toxü̃ cuḏaixü̃?”
nhanagürü i ngẽma Tupanaãrü ore.
56 Rü ngẽma naxne i ju, rü pecadu nixĩ. Erü ngẽma pecadu nixĩ i naporaxẽẽxü̃ i ngẽma ju na tüxü̃ naḏaixü̃ca̱x. Rü ngẽma mugü ga Muĩsé ümatüxü̃ nixĩ i naporaxẽẽxü̃ i pecadu, erü woo namexgu i ngẽma mugü, notürü taxucürüwama texé aixcuma tajanguxẽẽ.
57 Notürü name nixĩ i Tupanana moxẽ taxã jerü núma nanamu ga tórü Cori ja Ngechuchu ja Cristu na ngẽma juxü̃ tüxü̃ naporamaẽxẽẽxü̃ca̱x.
58 Rü ngẽmaca̱x, Pa Chaueneẽgü ja Pexü̃ Changechaü̃güxex, rü name nixĩ i meã pejaxõgüama rü taguma ípenata̱x i Tupanaãrü ore. Rü name nixĩ i guxü̃guma meã penaxü i tórü Coriarü puracü, erü pema nüxü̃ pecua̱x rü ngẽma puracü i nüxü̃́ pexüxü̃, rü tama notüca̱xma nixĩ.
