1 Corĩ́tiucü̃ãꞌ 3:1-23
3 Pa Chaueneẽgüx, jexguma noxri petanüwa changuxgu, rü taxucürüwa ngẽma duü̃xü̃gü i Tupanaãẽ nawa ngẽxmaxü̃maã chidexagurüü̃ãcüma pemaã chidexa. Notürü nhama i naãnecü̱̃ã̱x i tama Tupanaxü̃ cua̱xgüxü̃maã chidexagurüü̃ nixĩ ga pemaã chidexaxü̃. Jerü pema rü jexwacax, pejaxõgü ga jexguma, rü jemaca̱x jexwacax jaxõgüxü̃maã chidexagurüü̃ãcüma pemaã nüxü̃ chixu ga Cristuchiga.
2 3:2-3 Rü tauxchaxü̃ ga oremaã pexü̃ changúexẽẽ, ngẽxgumarüü̃ i wüxi i õxchana ega noxri nabuxgu rü naẽgünenixü̃ ja tauxchaãcü jaxaxüne nüxna taxã. Rü jemaãcü tauxchaxü̃ ga oremaã pemaã nüxü̃ chixu ga Tupanaãrü ore ga noxrix, jerü taxucürüwa nüxü̃ pecua̱xéga ga Tupanaãrü ore ga guxchaxü̃. Rü nhu̱xma rü ta tama nüxü̃ pecua̱xéga i Tupanaãrü ore i guxchaxü̃, erü nhama tama jaxõgüxü̃ i duü̃xü̃gürüü̃tama pemaxẽ. Rü dücax, ngẽxguma nhu̱xma rü ta peixauxãchiwa̱xegu rü pegümaã penuẽgu, rü ngẽmawa nango̱x na ngẽma tama jaxõgüxü̃rüü̃tama nagu perüxĩnüẽxü̃ rü nhama i naãnecü̱̃ã̱xrüü̃tama na pemaxẽxü̃.
3 Nüü̃ nadau 3:2
4 Rü ngẽxguma petanüwa wüxie nhagügu rü:
“Chama rü Pauruwe charüxũ”, nhagügu, rü togue rü:
“Chama rü Aporuwe charüxũ”, nhagügu, rü ngẽmawa nüxü̃ tacua̱x na ngẽma duü̃xü̃gü i tama jaxõgüxü̃rüü̃tama na pemaxẽxü̃.
5 Rü ngẽxguma meã nagu rüxĩnüẽgu, ¿rü ṯacü chixĩ i chama i Paurux? rü ¿ṯacü nixĩ i nüma i Aporux? Toma rü Tupanaãrü duü̃xü̃gümare tixĩgü, rü togagu nixĩ ga nüxü̃́ pejaxõgüxü̃ ga tórü Cori ja Ngechuchu. Rü wüxichigü ga toma rü tanaxü ga jema puracü ga tórü Cori toxna ãxü̃.
6 Rü chauxü̃tawa nixĩ ga nüxü̃ pexĩnüẽxü̃ rü pejaxõgüxü̃ ga Tupanaãrü ore ga noxrix, rü Aporu nixĩ ga pexü̃ rüngü̃xẽẽcü na jexeraãcü meã pejaxõgüxü̃ ga jema ore. Notürü Tupana nixĩ ga pexna naxãcü ga maxü̃.
7 Rü ngẽmaca̱x woo jíxema tüxira duü̃xü̃gümaã nüxü̃ ixuxe i Tupanaãrü ore rü woo jíxema wixwena jexeraãcü duü̃xü̃güxü̃ ngúexẽẽ́xẽ, rü taxuü̃ma tixĩgü. Notürü Tupana nixĩ ja guxü̃ma ücü, erü nüma nixĩ i duü̃xü̃güxü̃ namaxẽxẽẽxü̃.
8 Rü ngẽmaãcü ja jíxema tüxira duü̃xü̃gümaã nüxü̃ ixuxe i Tupanaãrü ore, rü jíxema wixwena jexeraãcü duü̃xü̃güxü̃ ngúexẽẽ́xẽ rü tawüxigumare i ngẽma puracüwa. Notürü Tupana rü tá tüxü̃́ nanaxütanü i tümaãrü puracü ja wüxichigü ngẽxgumarüü̃ na nhuxãcü nüxü̃́ tapuracüexü̃.
9 Rü ngẽmaãcü i chama i Pauru rü taeneẽ ja Aporu rü wüxigu Tupanaãxü̃́ tapuracüe. Rü ngẽmaãcü nixĩ i petanüwa napuracüxü̃ ja Tupana. Rü perü maxü̃wa nixĩ i napuracüxü̃ na nüma nanaxwa̱xexü̃ãcüma peixĩgüxü̃ca̱x.
10 Rü chama nixĩ ga Tupana choxü̃ muxü̃ na chaxira pemaã nüxü̃ chixuxü̃ca̱x ga Cristuchiga. Rü togü nixĩ ga chawena jexeraãcü pexü̃ ngúexẽẽxü̃. Notürü guxãma ja texé ja naxǘxe i nhaã puracü rü tanaxwa̱xe i taxuãẽ na meã tanaxüxü̃ca̱x.
11 Rü nhaã puracü rü Ngechuchu ja Cristuwa nixĩ ga inaxügüxü̃, rü ngẽmaca̱x taxucürüwama texé tajangucuchixẽẽ i to i tüxü̃ maxẽxẽẽxü̃.
12 Rü nhu̱xma na norü puracü ixüxü̃ i wüxichigü i jixema, rü tanaxwa̱xe i taxuãẽ na aixcuma meã naxüxü̃ i ngẽma. Erü jíxema aixcuma meã naxǘxe i norü puracü, rü nhama wüxi i ĩpataarü üruü̃ i uirumü rü dĩẽrumü rü nuta i mexẽchixü̃maã üpataxü̃rüü̃ tixĩ. Notürü jíxema tama aixcuma meã naxǘxe i ngẽma Cristuarü puracü rü nhama ĩpataarü üruü̃ i chixexü̃ i naĩ rü naĩxã́tü rü dexnemena̱xãmaremaã üpataxü̃rüü̃ tixĩ.
13 Notürü ngẽxguma nagu̱xgu i naãne, rü tá nango̱x na nhuxãcü naxüãxü̃ i Tupanaãrü puracü i wüxichigü i duü̃xü̃. Erü ngẽma ngunexü̃gu rü tá nangẽxma ja üxü ja taxüchine. Rü nhama ṯacü üxüwa figuxü̃rüü̃ tá nixĩ i Tupana nüxü̃ na üxü̃ i wüxichigü i duü̃xü̃ãrü puracü na nüxü̃ nacuáxü̃ca̱x ngoxi aixcuma name rü e̱xna tama.
14 Rü jíxema aixcuma meã naxǘxe i Cristuarü puracü, rü jima ĩpata ja taixü̃ne ja tama üxümaã ixaxü̃nerüü̃ tá nixĩ i ngẽma tümaãrü puracü. Rü tá Tupanaxü̃tawa tanajaxu i tümaãrü natanü naxca̱x i ngẽma taxüxü̃.
15 Notürü jíxema tama aixcuma meã naxǘxe i ngẽma puracü, rü jima ĩpata ja tama taixü̃ne ja üxümaã ixaxü̃nerüü̃ tá nixĩ i ngẽma tümaãrü puracü. Rü tá ngẽxma inajarüxomare i guxü̃ma i ngẽma taxüxü̃. Rü tüxicatama tãũxü̃táma tixa nhama wüxi i duü̃xü̃ i üxüemawa ijagoxü̃rüü̃.
16 ¿Tama e̱xna nüxü̃ pecua̱x i pema rü Tupanapata na peixĩgüxü̃, rü Tupanaãẽ i Üünexü̃ rü petanüwa na namaxü̃xü̃?
17 Rü ngẽxguma texé pexü̃ chixetanüxẽẽgu, rü Tupana tá tüxü̃ napocu, erü Tupanapata ja nawa namaxü̃ne rü naxüüne. Rü pematama nixĩ ja jima Tupanapata na peixĩgüxü̃.
18 Tama name i texé tügütama tawomüxẽẽ. Rü ngẽxguma petanüwa texé tügügu rüxĩnügu na wüxi i duü̃xü̃ i nüxü̃ cuáxe na tiĩxü̃ i nhama i naãnewa, rü name nixĩ i nhama taxuü̃ma tacuáxü̃rüü̃ tügü tixĩxẽẽ. Rü ngẽxguma tá nixĩ i wüxi i duü̃xü̃ i aixcuma nüxü̃ cuáxe tá tiĩxü̃.
19 Erü nhama i naãneãrü cua̱x rü wüxi i ngẽãẽmarexü̃ nixĩ i Tupanaca̱x. Erü Tupanaãrü ore i ümatüxü̃wa rü nhanagürü:“Rü ngẽma duü̃xü̃gü i nügügu rüxĩnüẽxü̃ na nüxü̃ cua̱xü̃chigüxü̃ jiĩxü̃, rü norü cua̱xgutama ínanatüexẽẽ ja Tupana”,
nhanagürü.
20 Rü ngẽma ore rü nhanagürü ta:“Tórü Cori ja Tupana rü nüxü̃ nacua̱x na taxuwama namexü̃ i ngẽma nagu naxĩnüẽxü̃ i ngẽma duü̃xü̃gü i nüxü̃ icua̱xüchixü̃”,
nhanagürü.
21 Rü ngẽmaca̱x tama name na texé tügü icua̱xüü̃xü̃ na ṯacü rü jatüarü ngu̱xẽẽtaewe na tarüxũxü̃ca̱x. Erü Tupana rü marü pexna nanaxã i guxü̃ma na pexrü jiĩxü̃ca̱x.
22 Rü ngẽmaca̱x i chama i Pauru, rü taeneẽ ja Aporu, rü taeneẽ ja Pedru, rü nhama i naãne, rü torü maxü̃, rü torü ju, rü nhamatama i ngunexü̃, rü moxü̃ãrü ngunexü̃, rü guxü̃ma i ngẽma rü pexrü nixĩ.
23 Rü pematama rü Cristuarü peixĩgü. Rü Cristu rü Tupanaãrü nixĩ.
