1 Corĩ́tiucü̃ãꞌ 6:1-20
6 Rü ngẽxguma wüxie i pema pexü̃́ nangẽxmagu i ṯacü rü guxchaxü̃ i wüxi i peeneẽ i jaxõxü̃maã, ¿rü tü̱xcüü̃ wüxi i ãẽ̱xgacü i tama jaxõxü̃ãrü ngü̃xẽẽca̱x ípejaca na nüma pexü̃́ namexẽẽãxü̃ca̱x i ngẽma perü guxchaxü̃gü? ¿Rü tama e̱xna inamexü̃ i ngẽma peeneẽgü i jaxõgüxü̃ na namexẽẽgüxü̃ i ngẽma perü guxchaxü̃gü?
2 ¿Tama e̱xna nüxü̃ pecua̱x na jixema na jaxõgüxü̃ tá jiĩxü̃ i naãneãrü gu̱xgu nüxna icagüxü̃ i guxü̃ma i nhama i naãnecü̱̃ã̱x i duü̃xü̃gü? Rü nhu̱xma na pema tá jiĩxü̃ i nhama i naãnecü̱̃ã̱x i duü̃xü̃güxü̃ peicagüxü̃, ¿rü tü̱xcüü̃ taxucürüwa i pematama penamexẽẽ i ngẽma perü guxchaxü̃gü i írachiréxü̃?
3 ¿Tama e̱xna nüxü̃ pecua̱x rü woo ngẽma dauxü̃cü̱̃ã̱x i Tupanaãrü orearü ngeruü̃gü, rü jixema tá jiĩxü̃ i nüxü̃ icagüxü̃? Rü ngẽmaca̱x nixĩ i jexeraãcü peme̱xwa nangẽxmaxü̃ na nhuxãcü penamexẽẽxü̃ i ngẽma guxchaxü̃gü i nhama i naãnewa pexü̃́ ngẽxmagüxü̃.
4 Rü ngẽmaca̱x, ngẽxguma ṯacü rü guxchaxü̃ pexü̃́ ngẽxmagu i nhama i naãnewa, ¿rü tü̱xcüü̃ i ngẽma ãẽ̱xgacügü i tama jaxõgüxü̃xü̃tawa pegü ípejaxuaxü̃güxü̃ na pexü̃́ namexẽẽgüãxü̃ca̱x i ngẽma?
5 Rü pemaã nüxü̃ chixu i ngẽma ore na pexãneẽxü̃ca̱x. ¿E̱xna tataxuma i petanüwa ja wüxie ja nüxü̃ cuáxe na tanamexẽẽxü̃ i ngẽma guxchaxü̃gü i petanüwa ngẽxmaxü̃?
6 Rü tama pegümaã penuẽxĩcatama, notürü naẽ́tü rü ãẽ̱xgacügü i tama jaxõgüxü̃xü̃tawa pexĩ na penamexẽẽxü̃ca̱x i ngẽma perü guxchaxü̃gü.
7 Rü ngẽma na pegümaã penuẽxü̃, rü ngẽma rü poraãcü chixexü̃ nixĩ. ¿Rü tü̱xcüü̃ tama jaxna namaã pexĩnüẽ i ngẽma guxchaxü̃gü i peeneẽ pemaã üxü̃? ¿Rü tü̱xcüü̃ tama namaã peporae ega texé perü ṯacüca̱x ngĩ̱xgux?
8 Notürü i pema rü peeneẽmaãtama chixexü̃ pexüe, rü nüxü̃́ pengĩ̱x i ngẽma peeneẽgü i jaxõgüxü̃.
9 6:9-10 ¿Tama e̱xna nüxü̃ pecua̱x na ngẽma duü̃xü̃gü i chixexü̃ ügüxü̃ rü nataxuxü̃táma i nachica i ngextá Tupana ãẽ̱xgacü íjiĩxü̃wa? ¡Rü tama name i pegütama pewomüxẽẽgü! Erü ngextá Tupana ãẽ̱xgacü íjiĩxü̃wa rü nataxutáma i nachica i ngẽma duü̃xü̃gü i naĩ i ngemaã ipexü̃, rü ngẽma duü̃xü̃gü i tupananetachicüna̱xãxü̃ icua̱xüü̃güxü̃, rü ngẽma duü̃xü̃gü i naxma̱xẽchita rü e̱xna nateechita ngẽãẽxü̃, rü ngẽma jatügü i naxrüü̃ jatüxü̃maã ngẽãẽxü̃, rü ngẽma ngĩ́ta̱a̱xgüxü̃, rü ngẽma duü̃xü̃gü i nügünaxica nanuxãchixü̃ i norü ngẽmaxü̃gü, rü ngẽma duü̃xü̃gü i ngãxẽwa̱xegüxü̃, rü ngẽma duü̃xü̃gü i oregüta̱a̱xgüxü̃, rü ngẽma duü̃xü̃gü i womüxẽẽwa̱xegüxü̃. Rü guxü̃ma i ngẽmagü rü nataxutáma i nachica i ngextá Tupana ãẽ̱xgacü íjiĩxü̃wa.
10 Nüü̃ nadau 6:9
11 Rü jexgumarüü̃tama peixĩgü ga nhuxre ga pema ga ü̃pax. Notürü i nhu̱xma ja Tupana rü marü pexü̃́ ínanapi i perü chixexü̃ na noxrüxicatama peixĩgüxü̃ca̱x. Rü nhu̱xma rü aixcuma nape̱xewa peime jerü Naãẽ i Üünexü̃ rü tórü Cori ja Ngechuchu ja Cristuégagu marü perü pecaduna pexü̃ ínanguxü̃xẽẽ.
Nhuxãcü naxüüne i taxüne
12 Rü nhuxre i pema rü nhaperügügü:
“Rü marü name na chanaxüxü̃ i ngẽma chanaxwa̱xexü̃”, nhaperügügü. Rü aixcuma nixĩ i ngẽma, notürü tama guxü̃ i ngẽma ixügüxü̃ rü tüxü̃́ name. Rü aixcuma nixĩ i Tupana choxü̃ ínguxuchixẽẽxü̃ na chanaxüxü̃ca̱x i ngẽma chanaxwa̱xexü̃, notürü tama name na ṯacü rü chixexü̃gu chaugü changuxẽẽxü̃ na chamaã inacuáxü̃ca̱x.
13 Rü ngẽxgumarüü̃ ta rü nhuxre i duü̃xü̃gü rü nhanagürügü:
“Rü õna rü taxüneca̱x nixĩ, rü taxüne rü õnaca̱x nixĩ”, nhanagürügü. Rü aixcuma ngẽmaãcü nixĩ, notürü ja Tupana rü tá inajanaxoxẽẽ i guxü̃ma i ngẽma. Rü taxüne rü tama naĩ i ngemaã namaã na ingẽãẽmarexü̃ca̱x nixĩ. Erü taxünemaã nixĩ i naxüxü̃ i tórü Coriarü ngúchaü̃. Rü tórü Cori nixĩ ja taxünexü̃ maxẽẽcü.
14 Rü jema Tupana wena namaxẽẽxü̃rüü̃ ga tórü Cori ja Ngechuchu, rü ngẽxgumarüü̃ tá ta norü poramaã wena tüxü̃ namaxẽxẽẽ.
15 ¿Rü tama e̱xna nüxü̃ pecua̱x na ngẽma pexene rü Cristuarü na jiĩxü̃? ¿Rü nhuxãcü i ngẽma chaxune i Cristuarü ixĩxü̃ rü ngexü̃ i ngẽãẽxü̃maã inapexü̃? Taxucürüwama ngẽmaãcü nixĩ.
16 ¿Rü e̱xna tama nüxü̃ pecua̱x ega wüxi i ngexü̃ i ngẽãẽxü̃maã inapexgu ja wüxi ja jatü rü ngẽma taxre i naxü̃ne rü wüxitama i naxü̃ne jiĩxü̃? Erü Tupanaãrü ore i ümatüxü̃wa rü nhanagürü:“Ngẽma taxre i naxü̃ne rü wüxitama i naxü̃ne tá nixĩ”,
nhanagürü.
17 Notürü ngẽxguma wüxi i duü̃xü̃ rü tórü Cori ja Cristuaxü̃́ jaxõõxgu, rü ngẽma naãẽ i ngẽma duü̃xü̃ rü Cristuãẽmaã wüxigutama narüxĩnüẽ.
18 Rü ngẽmaca̱x name nixĩ na nüxü̃ perüxoexü̃ i pexeneãrü ngúchaü̃ na pexüxü̃. Rü guxü̃ma i togü i pecadu i wüxi i duü̃xü̃ üxü̃ rü tama naxü̃nexü̃ nachixexẽẽ. Notürü ngẽma na naĩ i ngemaã nangẽãẽxü̃ rü ngẽma waxi nixĩ i naxü̃nexü̃ chixexẽẽxü̃.
19 ¿Tama e̱xna nüxü̃ pecua̱x i pexene rü Tupanaãẽ i Üünexü̃pata na jiĩxü̃? Rü pegu nixĩ i naxãchiü̃xü̃ i ngẽma Naãẽ i Üünexü̃ i Tupana pexna muxü̃. Rü ngẽmaca̱x i pema rü tama pegüarü joratama peixĩgü.
20 Erü Tupana rü marü pexca̱x nataxe rü poraãcü nüxü̃́ petatanü. Rü ngẽmaca̱x penaxwa̱xe i ngẽma pexenemaã meã Tupanaca̱x pemaxẽ na ngẽmaãcü namaã penataxẽẽxü̃ ja Tupana.
