1 Corĩ́tiucü̃ãꞌ 7:1-40
7 Rü nhu̱xma rü tá pexü̃ changãxü̃ ga jema ãma̱xchiga ga choxna naxca̱x pec̱axü̃ ga perü poperawa. Rü narümemaẽ chi nixĩ i noxtacüma tama naxãmax ja jatü.
2 Notürü ngẽma na naxü̃neãrü ngúchaü̃ na naxügümarexü̃ i duü̃xü̃gü, rü narümemaẽ nixĩ i wüxichigü ja jatü rü na naxãmaxü̃, rü wüxichigü i nge rü na naxãtexü̃.
3 Rü jima jatü ja ãmacü rü taxucürüwama naxma̱xna nügü ninuxũ. Rü ngẽma nge i ãtecü rü taxucürüwama ngĩtena ngĩgü ijanuxũ.
4 Erü ngẽma nge i ãtecü rü tama ngĩgüxü̃neãrü joratama ijixĩ, erü ngĩte nixĩ ja ngĩxĩneãrü jora ixĩcü. Rü ngẽxgumarüü̃ ja ngĩte rü tama nügüxü̃neãrü jora nixĩ, erü naxma̱x ijixĩ i naxü̃neãrü jora ixĩcü.
5 Rü tama name i wüxi ja jatü rü nama̱xna nügü ninuxũ, rü e̱xna wüxi i ngecü rü ngĩtena ngĩgü ijanuxũ, ega tama nügümaã namexẽẽãgu na nhuxre i ngunexü̃ tama nügümaã namaxẽxü̃ naxca̱x na najumuxẽgüxü̃. Rü ngẽmawena rü name nixĩ na wenaxãrü noxrirüü̃ nügümaã namaxẽxü̃ na tama Chataná nüxna ĩnüxü̃ca̱x na chixexü̃gu najixẽẽãxü̃ca̱x.
6 Rü guxü̃ma i nhaã ore i pemaã nüxü̃ chixuxü̃ i ãma̱xchiga rü ãtechiga rü tama wüxi i mu nixĩ i ngẽma. Notürü pemaã nüxü̃ chixumare na nüxü̃ pecuáxü̃ca̱x na namexü̃ i ngẽmaãcü na penaxüxü̃.
7 Rü chamatama nagu charüxĩnü rü chierü name nixĩ ega chama chamaxü̃xü̃rüü̃ namaxẽgu i guxü̃ma i duü̃xü̃gü. Notürü Tupana rü wüxichigü i duü̃xü̃na nanaxã i nacüma na nhuxãcü namaxẽxü̃ca̱x rü nhuxãcü nagu naxĩnüxü̃ca̱x. Rü ngẽmaca̱x tama guxãma tawüxigu.
8 Rü ngẽma ngema̱xgüxü̃ rü ngetegüxü̃ rü jutegüxü̃ rü namaã nüxü̃ chixu rü narümemaẽ nixĩ i chauxrüü̃ tama naxãma̱x rü tama naxãte.
9 Notürü ngẽxguma wüxi i duü̃xü̃ taxucürüwa naxü̃neãrü ngúchaü̃maã naporagu, rü name nixĩ na naxãmaxü̃ rü e̱xna naxãtexü̃. Erü narümemaẽ nixĩ i noxtacüma naxãma̱x rü e̱xna naxãte na tama jeü̃cürü ngẽmagu naxĩnüẽchaxü̃ca̱x.
10 Notürü jíxema marü ãmaxẽ rü ãtexe, rü tümamaã nüxü̃ chixu na tama namexü̃ na tümatexü̃ na ítatáxü̃. Rü ngẽma mu rü tórü Coriarü mu nixĩ, rü tama choxrü nixĩ.
11 Notürü ngẽxguma chi ngürüãchi wüxi i ngexü̃ natexü̃ íta̱xgu, rü name nixĩ i noxtacüma nangete rü e̱xna wena nateca̱x nataegu. Rü ngẽxgumarüü̃ ta ja jatü rü tama name i nama̱xü̃ ínata̱x.
12 Rü nhu̱xma rü choxü̃́ nangẽxma i wüxi i ore i tümaca̱x ja jíxema ãmaxẽ ngĩmaã i wüxi i nge i tama jaxõ̱xcü. Rü ngẽma ore rü choxrütama nixĩ rü tama tórü Coriarü nixĩ. Rü ngẽxguma wüxi ja jatü ja õcü ngĩmaã ãmaxgu i wüxi i nge i tama jaxõ̱xcü, rü tama name i ngĩxü̃ ínata̱x, ega ngĩma rü aixcuma namaã naxãtechaü̃gu.
13 Rü ngẽxguma wüxi i nge i jaxõ̱xcü ãtegu namaã ja wüxi ja jatü ja tama jaxõcü, rü tama name i íinata̱x ja jima ngĩte ega nüma ja jima jatü rü aixcuma ngĩmaã naxãma̱xchaü̃gu.
14 Rü jima jatü ja tama jaxõcü, rü nama̱x i jaxõ̱xcügagu Tupana nüxü̃ nacua̱x. Rü ngẽma ngecü i tama jaxõ̱xcü, rü ngĩte ja jaxõcügagu Tupana ngĩxü̃ nacua̱x. Erü ngẽxguma chi tama ngẽmaãcü jixĩgu, rü chi ngẽma naxãcügü rü duü̃xü̃gü i tama jaxõgüxü̃ãcügürüü̃ tá nixĩgü. Notürü i nhu̱xma ja naxãcügü rü marü Tupana tüxü̃ nacua̱x.
15 Notürü ngẽxguma jima jatü ja tama jaxõcü rü nama̱xü̃ ínatáxchaü̃gu rü ¡noxtacüma ngĩxü̃ ínatá! Rü ngẽxgumarüü̃ ega ngẽma ngecü i tama jaxõcü rü ngĩtexü̃ ínatáxchaü̃gu, rü ¡noxtacüma ngĩtexü̃ ínatá! Rü ngẽxguma ja jima jatü ja jaxõcü rü marü name ega wena naxãma̱xgu. Rü ngẽma ngecü i jaxõcü rü marü name ega wena naxãtegu. Erü Tupana pexü̃ nidexechi na meã pegümaã pemaxẽxü̃ca̱x.
16 Rü ngẽmaca̱x, Pa Ngecü i Tupanaãxü̃́ Jaxõ̱xcüx, rü ngẽxguma cute i tama jaxõxü̃ cuxü̃ ítáxchaü̃gu, rü narümemaẽ nixĩ i tama cunachu̱xu, erü tama nüxü̃ cucua̱x ngoxi tá cunamaxẽẽ i ngẽma cute rü e̱xna tama. Rü cumax, Pa Jatü ja Jaxõ̱xcüx, rü ngẽxguma cuxma̱x i tama jaxõxü̃ cuxü̃ ítáxchaü̃gu, rü narümemaẽ nixĩ i tama cunachu̱xu, erü tama nüxü̃ cucua̱x ngoxi tá cunamaxẽẽ i ngẽma cuxma̱x rü e̱xna tama.
17 Rü nhu̱xma rü pemaã nüxü̃ chixu rü nüma ga Tupana rü wüxichigü ga duü̃xẽna nanaxã ga tümaãrü cua̱x na tümaãrü maxü̃maã itacuáxü̃ca̱x rü meã tanaxüxü̃ca̱x i ngẽma puracü ga noxri tüxü̃́ jexmaxü̃ ga taũta Tupana tümaca̱x caxgu. Rü ngẽma ngu̱xẽẽtae nixĩ i namaã chanangúexẽẽxü̃ i guxü̃ma i jaxõgüxü̃ i wüxichigü ja tupaucawa ngẽxmagüxü̃.
18 Rü ngẽxguma Tupana naxca̱x caxgu i wüxi i duü̃xü̃ i marü Judéugürüü̃ íwiecha̱xmüpe̱xechiraü̃xü̃, rü nüẽ́tama nixĩ ega ngẽmaãcütama jixĩgu. Rü ngẽxguma Tupana najau̱xgu i wüxi i duü̃xü̃ i tama íwiecha̱xmüpe̱xechiraü̃xü̃, rü nüẽ́tama nixĩ ega ngẽmaãcütama jixĩgu.
19 Erü Tupanape̱xewa rü nüẽ́tama nixĩ ega wüxi i duü̃xü̃ rü ínawiecha̱xmüpe̱xechiraü̃gu rü e̱xna tama. Erü ngẽma Tupana aixcuma naxwa̱xexü̃ nixĩ na naga naxĩnüxü̃ i wüxichigü i duü̃xü̃.
20 Rü wüxichigü i duü̃xü̃ rü name nixĩ i nawatama napuracü ga jema puracü ga nüxü̃́ jexmaxü̃ ga jexguma Tupana noxri naxca̱x caxgu.
21 Rü jexguma wüxi ga coriarü duü̃xü̃ cuixĩjane Tupana cuxca̱x caxgu, rü tama name i ngẽmaca̱x cuxoegaãẽ. Notürü ngẽxguma cuxü̃́ natauxchagu na nüxna ícunguxuchixü̃ i ngẽma cori, rü marü name na ícunguxuchixü̃.
22 Rü cuma ga na cucoriã̱xjane cuxca̱x nac̱axü̃ ga Tupana, rü name nixĩ i nüxna cucua̱xãchi na Cori ja Cristu pecaduwa cuxü̃ ínguxuchixẽẽxü̃. Rü cuma ga na cungearü coriã̱xjane cuxca̱x nac̱axü̃ ga Tupana, rü name nixĩ i nüxna cucua̱xãchi na tórü Cori ja Cristuarü duü̃xü̃ cuiĩxü̃ i nhu̱xma na nüxü̃́ cupuracüxü̃ca̱x.
23 Tupana rü marü pexca̱x nataxe rü poraãcü nüxü̃́ petatanü. ¡Rü ngẽmaca̱x i nhu̱xma rü tãũxü̃táma naga pexĩnüẽ i ngẽma duü̃xü̃gü i wenaxãrü nhama i naãneãrü chixexü̃wa pexü̃ gagüchaü̃xü̃!
24 Rü name nixĩ, Pa Chaueneẽgüx, i wüxichigü i pema rü meã Tupanape̱xewa penaxüama ga jema puracü ga pexü̃́ jexmaxü̃ ga jexguma noxri Tupana pexca̱x caxgu.
25 Rü nhu̱xma rü tá pemaã nüxü̃ chixu i nachiga i ngẽma duü̃xü̃gü i ngema̱xgüxü̃ rü ngetegüxü̃. Rü tórü Cori ja Ngechuchu rü taxuü̃ma i mu choxna naxã i ngẽmachiga. Notürü tá pemaã nüxü̃ chixu i nhuxãcü nagu charüxĩnü i ngẽmachiga. Rü ngẽma chorü ore rü aixcuma nixĩ erü chama nixĩ i wüxi i duü̃xü̃ ga nüxü̃́ changechaü̃tümüü̃ãcüma choxü̃ najaxuxü̃ ga tórü Cori.
26 Jixema na jaxõgüxü̃ rü nhu̱xma rü poraãcü guxchaxü̃gü tüxü̃́ nangẽxma. Rü ngẽmaca̱x chauxca̱x narümemaẽ i tama nixãma̱x i ngẽma jatügü i ngema̱xgüxü̃.
27 Rü ngẽxguma marü cuxãma̱xgu rü tama name i ngĩxü̃ ícuta̱x. Notürü ngẽxguma cungema̱xgu rü narümemaẽ i tama cuxãma̱x.
28 Notürü ngẽxguma cuxãma̱xgu rü tama pecadu nixĩ i ngẽma. Rü ngẽxguma wüxi i paxü̃ ãtegu rü tama pecadu nixĩ i ngẽma. Notürü ngẽma ixãma̱xgüxü̃ rü ixãtegüxü̃ rü tá najexera i norü guxchaxü̃gü i nhama i naãnewa, rü ngẽma nixĩ i tama chanaxwa̱xexü̃ na nüxü̃ nangupetüxü̃.
29 Pa Chaueneẽgüx, pemaã nüxü̃ chixu rü tama muxü̃ i ngunexü̃ tüxü̃́ nangẽxma na naxüxü̃ca̱x i Tupanaãrü puracü. Rü ngẽmaca̱x ja jíxema ixãma̱xgüxe rü name nixĩ i meã tanaxügü i Tupanaãrü puracü nhama tangema̱xgüxü̃rüü̃.
30 Rü jíxema ngexwaca jutanügüxe rü jixema peta ügüxe rü jíxema itaxegüxe, rü tama name i ngẽmaca̱x Tupanaãrü puracü na ítange̱xgüxü̃.
31 Rü jíxema tüxü̃́ nangẽxmaxẽ i tümaãrü ngẽmaxü̃gü i nhama i naãnewa, rü tama name i ngẽmaca̱x Tupanaãrü puracüxü̃ na ítange̱xgüxü̃. Erü nhama i naãne i nhu̱xma nüxü̃ idauxü̃ rü paxa tá nagu̱x.
32 Rü tama chanaxwa̱xe na ṯacüca̱x pexoegaãẽgüxü̃. Rü ngẽxguma wüxi i jatü ngema̱xgu, rü Tupanaãrü puracügu narüxĩnü rü nagu narüxĩnü na nhuxãcü Tupanaãrü ngúchaü̃ naxüxü̃.
33 7:33-34 Notürü ngẽxguma naxãma̱xgu i wüxi i jatü, rü nhama i naãneãrü ngẽmaxü̃gu narüxĩnü rü nagu narüxĩnü na nhuxãcü nama̱xãrü ngúchaü̃ naxüxü̃. Rü ngẽmaãcü muxü̃gu narüxĩnü. Rü ngẽxgumarüü̃ ta nixĩ i ngexü̃gü. Rü ngẽma ngexü̃ i ngetexü̃ rü Tupanaãrü puracügu narüxĩnü, erü marü Tupanana nügü naxã rü guxü̃ i naxü̃nemaã rü naãẽmaã naxca̱x namaxü̃. Notürü ngẽma ngexü̃ i ãtexü̃ rü nhama i naãneãrü ngẽmaxü̃gu narüxĩnü, rü nagu narüxĩnü na nhuxãcü natearü ngúchaü̃ naxüxü̃.
34 Nüü̃ nadau 7:33
35 Rü perü mexü̃ca̱x nixĩ i pemaã nüxü̃ chixuxü̃ i ngẽma, rü tama pexna na chanachu̱xuxü̃ca̱x nixĩ. Notürü ngẽma nhacharügü na meã pemaxẽxü̃ca̱x rü aixcuma penaxüxü̃ca̱x i tórü Coriarü puracü.
36 Rü ngẽxguma texé nagu rüxĩnügu na tümaxãcü rü marü na napaxü̃, rü tümaca̱x rü marü namexgu na naxãtexü̃, rü marü name i ngĩxü̃ taxüte ega aixcuma tümaca̱x rü ngẽmaãcü namemaẽgu. Rü ngẽma na naxãtexü̃ i tümaxãcü rü tama pecadu nixĩ.
37 Notürü ngẽxguma wüxi i jatü nüxü̃́ nangẽxmagu i norü pacü rü tama nanaxwa̱xegu na ngĩxü̃ naxütexü̃, rü marü name i ngẽma rü ta. Erü naxme̱xwa ingẽxma rü taxuü̃ca̱xma texé tanachixewe na ngĩxü̃ naxütexü̃ca̱x.
38 Rü ngẽmawa nüxü̃ tadau rü ngẽma jatü i naxãcü ngĩxü̃ ütexü̃ rü mexü̃ naxü. Rü ngẽma jatü i tama naxãcü ngĩxü̃ ütexü̃ rü jexeraxü̃ i mexü̃ naxü.
39 Rü wüxi i nge i ãtecü rü ngĩteme̱xẽwa ingẽxma i ngẽxguma namaxü̃gu ja ngĩte. Notürü ngẽxguma naju̱xgu ja ngĩte, rü marü name ega to i jatü i ngĩma ngĩxü̃́ ngúchaü̃xü̃maã naxãtegu. Notürü inaxwa̱xe na wüxi ja jatü ja jaxõcümaã naxãtexü̃.
40 Notürü chauxca̱x rü jexeraãcü chi itaãẽ i ngẽxguma chi tau chima wena naxãtegu. Rü ngẽma ore rü choxrütama nixĩ, notürü nagu charüxĩnü rü Tupanaãẽ i Üünexü̃ãrü ore ta nixĩ.
