1 Corĩ́tiucü̃ãꞌ 9:1-27
9 Rü pemaã nüxü̃ chixu rü tórü Coritama nixĩ ja choxü̃ jaxucü rü choxü̃ mucü na norü puracü chaxüxü̃ca̱x, rü ngẽmaca̱x taxuü̃ma i duü̃xü̃güme̱xẽwa changẽxma i nhu̱xmax. Rü chamatama chauxetümaã tórü Cori ja Ngechuchuxü̃ chadau, rü ngẽma puracü i nüxü̃́ chaxüxü̃gagu nixĩ i pejaxõgüxü̃ i pemax.
2 Rü woo togü i duü̃xü̃gü tama choxü̃ cua̱xgüchaü̃gu na tórü Cori choxü̃ muxü̃, notürü i pema rü meãma nüxü̃ pecua̱x na nüma jiĩxü̃ ga choxü̃ namuxü̃. Jerü chauxü̃tawa nixĩ ga tórü Coriaxü̃́ pejaxõgüxü̃, rü ngẽmawa nüxü̃ pecua̱x na aixcuma jiĩxü̃ na nüma choxü̃ namuxü̃.
3 9:3-4 Rü nhaã nixĩ i chorü dexa i namaã chanangãxü̃xü̃ i ngẽma duü̃xü̃gü i chauchiga idexagüxü̃:“¿E̱xna tama inamexü̃ na duü̃xü̃gü choxna naxãxü̃ i chorü õna rü chorü axexü̃ naxca̱x i chorü puracü?
4 Nüü̃ nadau 9:3
5 ¿E̱xna tama inamexü̃ ta na wüxi i ngexü̃ i jaxõxü̃maã na chaxãmaxü̃ na chajagaxü̃ca̱x ngẽxgumarüü̃ na naxãmaxü̃ i Pedru, rü naẽneẽgü ja tórü Cori, rü ngẽma togü i jatügü i Tupana imugüxü̃?
6 ¿Rü e̱xna pema nagu perüxĩnüẽgu rü chama rü Barnabéxicatama i tama namexü̃ na toxü̃ perüngü̃xẽẽgüxü̃ ngẽma togü i orearü uruü̃güxü̃ na perüngü̃xẽẽgüxü̃rüü̃?
7 ¿Ṯacü rü duü̃xü̃ i churarawa ũxü̃ i nügüxü̃́tama naxütanüxü̃ i norü õna? ¿Rü ṯacü rü duü̃xü̃ i ori itoxü̃ i tama namúxü̃ i norü o? ¿Rü ṯacü rü duü̃xü̃ i carnerugüna dauxü̃ i tama nagünenixü̃ ne ixaxüxü̃?” Ngẽma nhacharügü nüxü̃ i ngẽma duü̃xü̃gü i chauchiga idexagüxü̃.
8 ¡Rü nhu̱xma rü tãũxü̃táma nagu perüxĩnüẽ na chorü orexicatama jiĩxü̃ i nhaã nüxü̃ chixuxü̃! Erü Tupanaãrü ore ga Muĩsé ümatüxü̃wa rü ta ngẽma nhanagürü.
9 Erü ngẽma ore rü nhanagürü:“¡Rü ngẽma woca i aruchuarü pute̱xewa puracüxü̃, rü tãũxü̃táma cunaw̱ẽxnagu na tama jima aruchuwa nachibüxü̃ca̱x!”
nhanagürü i ngẽma ore. Rü nüxü̃ tacua̱x na tama wocagügu naxĩnüxü̃ ga Tupana ga jexguma jema nhaxgu.
10 Notürü pemaã nüxü̃ chixu rü tagu nixĩ ga naxĩnüxü̃ ga jexguma jema nhaxgu ga Tupana. Rü tachiga nixĩ ga naxümatüxü̃ ga jema ore. Erü jíxema aruchunecü ǘxe rü jíxema norü oarü pu̱xwa puracüxe, rü ngẽxguma tapuracüejane rü tanaxwa̱xegü na ítanaṉg̱uxẽẽgüxü̃ i ngẽma norü o i tüxna üxü̃.
11 Rü toma rü wüxi ja nanetüchire ja itatoxü̃nerüü̃ tixĩgü ga jexguma pemaã nüxü̃ tixuxgu ga Tupanaãrü ore. ¿Rü nhu̱xma rü tama e̱xna i pexca̱x namexü̃ na toxna penaxãxü̃ i ṯacü i toxü̃́ taxuxü̃?
12 Rü ngẽxguma ngẽma togü i orearü uruü̃gü petanüwa najauxgügu i ngẽma nüxü̃́ taxuxü̃, rü maneca toma rü jexera name nixĩ i petanüwa tanajaxu i ngẽma toxü̃́ taxuxü̃. Notürü i toma rü tama ngẽmaãcü tanaxü. Erü toma rü guxü̃ i guxchaxü̃maã taporae na tama pexü̃́ tanaguxchaxẽẽxü̃ca̱x na Cristuaxü̃́ pejaxõgüxü̃.
13 Pema nüxü̃ pecua̱x rü guxü̃ma i duü̃xü̃gü i tupauca ja taxü̃newa puracüexü̃, rü ngẽma õna ja jima tupaucawa ngẽxmaxü̃tama nangõ̱xgü. Rü ngẽma duü̃xü̃gü i tupaucagu Tupanaca̱x naxü̃nagü ḏaixü̃, rü nanade i nhuxre i ngẽma namachi norü ngõ̱xruü̃.
14 Rü ngẽxgumarüü̃ ta ja jíxema nüxü̃ ixugüxe i ore i tüxü̃ maxẽxẽẽxü̃, rü tórü Cori nüxü̃ nixu rü name nixĩ i tümaãrü puracüca̱x tanajaxu i tümaãrü natanü na ngẽmamaã tamaxẽxü̃ca̱x.
15 Notürü i chama rü taguma ngẽmaãcü chanaxü. Rü nhu̱xma na pexca̱x chanaxümatüxü̃ i nhaã popera, rü tama ṯacü choxna pexãxü̃ca̱x nixĩ. Erü ngẽma na taguma texéxü̃tawa ṯacüca̱x íchac̱axü̃, rü wüxi i chorü taãẽ nixĩ. Rü narümemaẽ chierü nixĩ na chajuxü̃ naxü̃pa na texé choxna najaxuxü̃ i nhaã taãẽ i choxü̃́ ngẽxmaxü̃.
16 Rü nhu̱xma na nüxü̃ chixuxü̃ i ngẽma ore i tüxü̃ maxẽxẽẽxü̃, rü taguma ngẽmaca̱x chaugü chicua̱xüü̃. Erü woetama ngẽma nixĩ i chorü puracü ga Tupana choxna ãxü̃, rü ngẽmaca̱x taxucürüwama chanangexrü. Rü poraãcü chi chachixexü̃gu i ngẽxguma tau chima nüxü̃ chixuxgu.
17 Rü ngẽxguma chi chaugagu chitama chanaxü̱xgu i ngẽma puracü, rü nagu chi charüxĩnü na choxü̃́ naxãtanüxü̃. Notürü ngẽxguma Tupana choxü̃ muxü̃ãcüma chanaxü̱xgu, rü chanaxüama erü woetama ngẽma nixĩ i chorü puracü ga Tupana choxna ãxü̃.
18 ¿Rü nhu̱xma rü ṯacü tá nixĩ i chorü natanü naxca̱x i ngẽma puracü i chaxüxü̃? Rü dücax, rü chorü natanü nixĩ i ngẽma taãẽ i chajaxuxü̃ i ngẽxguma ngetanüãcüma nüxü̃ chixuxgu i ngẽma ore i tüxü̃ maxẽxẽẽxü̃. Rü ngẽmaãcü, rü woo Tupanape̱xewa name na petanüwa chanajaxuxü̃ i chorü natanü na ngẽmamaã chamaxü̃xü̃ca̱x, notürü taguma chanaxü i ngẽma.
19 Rü woo taxúxeme̱xẽwa changẽxma i chamax, notürü guxãme̱xẽwa chaugü changẽxmaxẽẽ, na ngẽmaãcü jexeraãcü muxü̃ma i duü̃xü̃güxü̃ charüngü̃xẽẽxü̃ca̱x na Cristuaxü̃́ jaxõgüãxü̃ca̱x.
20 Rü ngẽxguma Judéugütanüwa changẽxmagu, rü Judéurüü̃ chaugü chixĩxẽẽ na ngẽmaãcü nüxü̃ charüngü̃xẽẽxü̃ca̱x na Cristuaxü̃́ jaxõgüãxü̃ca̱x. Rü woo tama jema Muĩsé ümatüxü̃ ga mugütüü̃wa changẽxmagu, notürü chajanguxẽẽãma i ngẽma mugü na ngẽmaãcü Cristuxü̃tawa chanagagüxü̃ i ngẽma duü̃xü̃gü i nhu̱xma rü ta nagu ĩxü̃ i ngẽma mugü ga Muĩsé ümatüxü̃.
21 Rü ngẽxguma natanüwa changẽxmagu i ngẽma duü̃xü̃gü i tama Judéugü ixĩgüxü̃, rü ngẽma duü̃xü̃gürüü̃ chaugü chixĩxẽẽ na ngẽmaãcü nüxü̃ charüngü̃xẽẽxü̃ca̱x na Cristuaxü̃́ jaxõgüãxü̃ca̱x. Notürü taguma íchanange̱x i Tupanaãrü mugü erü guxü̃guma Cristuarü mugütüü̃wa changẽxma.
22 Rü ngẽxguma natanüwa changẽxmagu i ngẽma duü̃xü̃gü i tama poraãcü Cristuchigaxü̃ cua̱xgüxü̃, rü chama rü ta ngẽma duü̃xü̃gürüü̃ chaugü chixĩxẽẽ, na ngẽmaãcü nüxü̃ charüngü̃xẽẽxü̃ca̱x na Cristuaxü̃́ jaxõgüãxü̃ca̱x. Rü ngẽmaãcü guxü̃ma i duü̃xü̃gürüü̃ chaugü chixĩxẽẽ, rü nagúxü̃raü̃ãcüma naxca̱x chadau na ngẽmaãcü düxwa Tupanaxü̃tawa chanagagüxü̃ca̱x i nhuxre i nümagü.
23 Rü ngẽmaãcü nixĩ i chapuracüxü̃ na guxü̃wama nanguxü̃ca̱x i ngẽma ore i tüxü̃ maxẽxẽẽxü̃. Erü chanaxwa̱xe na chama rü ta choxü̃́ nangẽxmaxü̃ i ngẽma maxü̃ i taguma gúxü̃, naxrüü̃ i guxü̃ma i ngẽma duü̃xü̃gü i nüxü̃́ jaxõgüxü̃.
24 Pema rü meãma nüxü̃ pecua̱x i wüxi i inüca i nawa inhaãchixü̃ rü muxü̃ma inaxü̃ãchi, notürü wüxixicatama nixĩ i ngẽma nüxĩra ínguxü̃ rü najaxuxü̃ i norü ãmare. Rü name nixĩ i meã na pemaxẽxü̃ na Tupanaxü̃tawa penajaxuxü̃ca̱x i ngẽma perü ãmare.
25 Guxü̃ma i ngẽma duü̃xü̃gü i nügü mexẽẽxü̃ naxca̱x i wüxi i inüca i nawa inhaãchixü̃, rü meã nügüna nadau na taxuü̃ma nachixexẽẽxü̃ca̱x i naxü̃ne. Rü ngẽmaãcü nanaxü na najauxgüãxü̃ca̱x i norü ãmare i paxaãchixü̃mare ixĩxü̃. Notürü jixema na jaxõgüxü̃ rü jigüna tadaugü na meã naxügüxü̃ca̱x rü meã imaxẽxü̃ca̱x na najauxgüxü̃ca̱x i tórü ãmare i taguma gúxü̃.
26 Rü ngẽmaca̱x i chama rü tama nhama chauechitamare chinhaxü̃rüü̃ chixĩ, rü tama nhama ṯacü i nügü ḏaixü̃ i ngürüanegumare idagüxü̃rüü̃ chixĩ.
27 Rü ngẽmaca̱x meã chaugüna chadau i chaxunewa na taxuü̃ma i chaxuneãrü ngúchaü̃ chaxüxü̃ca̱x. Erü tama chanaxwa̱xe i mexü̃maã togüxü̃ changu̱xẽẽchire̱xãcüma choxü̃́ nataxu i chorü ãmare.
