1 Crónicas 17:1-27
17 Rü yexguma marü napatawa nayexmagu ga Dawí rü Tupanaarü orearü uruxü̃ ga Natáũmaxã nidexa rü nhanagürü nüxü̃: —Dücax, chama rü wüxi ya ĩpata ya ocayiwanaxca̱x íxüxü̃newa changexma. Notürü ngẽma baú i Tupanaarü mugü nawa ngẽxmaxü̃ rü wüxi ya ĩpata ya naxchirumarenaxca̱x ixĩxü̃newa nangexma —nhanagürü.
2 Rü nüma ga Natáũ rü nanangãxü̃ rü nhanagürü: —¡Ẽcü naxü i ngẽma nagu curüxĩnüxü̃! Erü ngẽma nixĩ i Tupanaarü ngúchaü̃ —nhanagürü.
3 Notürü yematama chütaxü̃gu rü nüma ga Tupana rü Natáũmaxã nidexa rü nhanagürü nüxü̃:
4 —¡Ẽcü yimá chorü duü̃ ya Dawíxü̃tawa naxũ rü namaxã nüxü̃ ixu rü chama ya Cori ya Tupana rü marü nhacharügü nüxü̃: “Taxũtáma cuma nixĩ i cunaxüxü̃ ya yima ĩpata ya nawa tá changexmane!
5 Rü yexguma Eyítuanewa perü o̱xigüxü̃ íchanguxü̃xẽẽ̱xgucürüwa rü nhamamarema rü taguma wüxi ga ĩpata ga taxü̃newa chayexma. Rü ixügüxüne ga ĩpatawamare chiyexmachigü.
6 Rü yexguma namaxã ichixũxgu ga yema chorü duü̃xü̃gü rü nüxü̃ chaxunetagügu ga norü ãẽ̱xgacügü, rü taguma wüxi ga yema Iraéutanüxü̃arü ãẽ̱xgacüxü̃ chamu nax cha̱u̱xca̱x naxügüãxü̃ca̱x ga wüxi ga ĩpata ya ocayiwamaxã ãxtapǘne”, nhacharügü nüxü̃.
7 Rü ngẽmaca̱x i nhu̱xmax rü ¡namaxã nüxü̃ ixu ya yimá chorü duü̃ ya Dawí rü chamax ya Cori ya Tupana ya guxãétüwa ngẽxmacü nax chixĩxü̃ rü nhachagürü: “Chama rü cuxü̃ íchamuxũchi ga carnérugüpǘxü̃wa rü cuxü̃ chayaxu nax marü tama carnérugüna cudauxü̃ca̱x! Rü nhu̱xmax, rü chanaxwa̱xe nax cuma namaxã icucuáxü̃ i ngẽma chorü duü̃xü̃gü i cutanüxü̃gü i Iraéuanecüã̱xgü.
8 Rü chama rü marü cuxü̃ íchixümücü ga ngextá cuma ícuxũxü̃wa rü marü chanadai ga guxü̃ma ga curü uanügü ga cuxü̃ ima̱xgüchaü̃xü̃. Rü marü cuxü̃ chatachigaxẽxẽ naxrüxü̃ i ngẽma yatügü i nhama i naanewa itaégatanücüüxü̃.
9 17:9-10 Rü chorü duü̃xü̃gü i Iraéutanüxü̃ca̱x rü chanamexẽxẽ ga wüxi ga naane. Rü yemawa nixĩ ga chanangugüxẽẽxü̃ nax norü naanegutama naxãchiü̃güxü̃ca̱x i ngextá taxúema ínachixewexü̃wa rü bai i ngẽma norü uanügü ga noxri chixri namaxã inacua̱xgüxü̃ ga yexguma Iraéutanüxü̃güarü ãẽ̱xgacügü ga guxchaxü̃arü mexẽẽruü̃güme̱xẽwa chanayexmagüxẽẽgurüxü̃. Rü chama rü tá chanaxãneexẽxẽ i guxü̃ma i curü uanügü. Rü nhu̱xmax rü cumaxã chanaxuegu rü ngẽma cutaagü rü tá nüxí Iraéutanüxü̃arü ãẽ̱xgacü nixĩgü cuxrüxü̃ i nhu̱xmax ãẽ̱xgacü nax quixĩxü̃.
10 Nüü̃ nadau 17:9
11 Rü ngẽxguma marü cuyu̱xguwena, rü chama rü tá nüxü̃ chaxuneta i wüxi i cune nax nüxí ãẽ̱xgacü yixĩxü̃ca̱x.
12 Rü yimá ãẽ̱xgacü tá nixĩ ya naxücü ya chapata. Rü chama rü tá nüxü̃ charüngü̃xẽẽ nax ngẽma nataagü ya cune rü nüxí guxü̃gutáma Iraéutanüxü̃arü ãẽ̱xgacü yixĩgüxü̃ca̱x.
13 Rü chama rü tá nanatü chixĩ rü nüma rü tá chaune nixĩ. Rü tagutáma nüxü̃ charüxo nax nüxü̃ changechaü̃xü̃, rü taxũtáma nüxü̃ chaxo yema ãẽ̱xgacü ga Chaúxü̃ nax chaxoxü̃rüxü̃.
14 Rü yimá ãẽ̱xgacü ya chama nüxü̃ chaxunetacü rü chorü duü̃xü̃gümaxã tá inacua̱x rü tá Iraéuanecüã̱xgümaxã inacua̱x i guxü̃gutáma. Rü tagutáma ínanguxuchi nax ãẽ̱xgacü yixĩxü̃” —nhanagürü ga Tupana.
15 --
16 --
17 --
18 --
19 --
20 --
21 --
22 --
23 --
24 --
25 --
26 --
27 --
