1 Crônicas 21:1-30
21 Rü nüma ga Chataná rü Iraéuanecüã̱xgümaxã nanu, rü yemaca̱x Dawíãxẽwa ínananguxẽxẽ nax Iraéuanecüã̱xgüxü̃ yaxugüxü̃ca̱x.
2 Rü nüma ga Dawí rü nanamu ga Yoábe rü norü churaragüarü ãẽ̱xgacügü rü nhanagürü nüxü̃: —¡Ẽcü ipexĩãchi rü peyaxugü i ngẽma Iraéuanecüã̱xgü! Rü ĩane ya Bechébawa ipenaxügü nax peyaxugüxü̃ rü nhu̱xmatáta Dáü̃arü ĩanewa nangu! ¡Rü ngẽmawena rü nhu̱xũchi nua penange i napane nax nüxü̃ chacuáxü̃ca̱x nax nhuxre yixĩxü̃ i norü mu i ngẽma duü̃xü̃gü! —nhanagürü.
3 Notürü nüma ga Yoábe rü nanangãxü̃ rü nhanagürü: —Ngẽxgumachi Cori ya Tupana naxwa̱xegu ¿rü taux ẽ̱xna nüxü̃́ natauxcha nax 100 e̱xpü̱xcüna yamuxẽẽãxü̃ i norü duü̃xü̃gü? ¿Rü taux ẽ̱xna guxü̃ma i ngẽma duü̃xü̃gü rü chi cuxme̱xwa nangexmagüxü̃, Pa Ãẽ̱xgacüx? ¿Rü tü̱xcüü̃ i cumax i cunaxwa̱xexü̃ nax tayaxugüxü̃? ¿Rü ngẽmaãcü ẽ̱xna chixexü̃gu cunayi̱xẽẽchaü̃xü̃ i Iraéuanecüã̱xgü? —nhanagürü.
4 Notürü nüma ga ãẽ̱xgacü rü nanamuama, rü düxwa nüma ga Yoábe rü nanaxü ga yema ãẽ̱xgacü namaxã nüxü̃ ixuxü̃. Rü inaxũãchi rü guxü̃ma ga Iraéuanegu nixũgü. Rü yemawena rü Yerucharéü̃ca̱x natáegu.
5 Rü nüma ga Yoábe rü Dawímaxã nüxü̃ nixu nax nhuxre yixĩxü̃ ga norü mu ga yema yatügü ga marü churarawa imexü̃. Rü Iraéuanewa rü 1,100,000 wa nangu ga yema yatügü ga marü nagu imexü̃ nax churara yixĩgüxü̃, rü Yudáanewa rü 470,000 nixĩ.
6 Notürü tama nayaxugü ga yema Lewítanüxü̃ rü Bẽyamítanüxü̃ yerü nüma ga Yoábe rü tama norü me nixĩ ga yema ãẽ̱xgacü nüxü̃ üxẽẽxü̃.
7 Rü nüma ga Tupana rü tama norü me nixĩ ga yema nax yaxugüxü̃ ga duü̃xü̃gü, rü yemaca̱x yema Iraéuanecüã̱xgüxü̃ napoxcu.
8 Notürü nüma ga Dawí rü Tupanamaxã nüxü̃ nixu ga yema norü chixexü̃ rü nhanagürü: —Rü aixcuma cupe̱xewa poraãcü chixexü̃ chaxü. Notürü cuxna chaca nax choxü̃́ nüxü̃ curüngümaxü̃ca̱x erü wüxi i duü̃xü̃ i naechitamare maxü̃xü̃ãcü íchanaxü —nhanagürü.
9 Rü yexguma ga Cori ya Tupana rü Dawíarü ucu̱xẽruxü̃ ga Gáyixü̃ namu yerü gumá nixĩ ga Dawímaxã Tupanaarü orexü̃ ixucü. Rü nüma ga Tupana rü Gáyixü̃ nhanagürü:
10 —¡Ẽcü Dawíxü̃tawa naxũ rü namaxã nüxü̃ yarüxu i nhaa tamaepü̱x i poxcu nax nüxü̃ yaxuxü̃ca̱x rü ngexü̃rüüxü̃ i ngẽma poxcu nixĩ i nanaxwa̱xexü̃ nax namaxã chanapoxcuexü̃ i Iraéuanecüã̱xgü! —nhanagürü.
11 Rü nüma ga Gáyi rü Dawíxü̃tawa naxũ rü nhanagürü nüxü̃: —Cori ya Tupana rü cumaxã nüxü̃ nixu i tamaepü̱x i poxcu nax cuma nüxü̃ quixuxü̃ rü ngexü̃rüüxü̃ yixĩxü̃ i ngẽma cuma cunaxwa̱xexü̃.
12 Rü wüxi nixĩ nax tamaepü̱x ya taunecü taiya ngẽxmaxü̃ i Iraéuanewa. Rü to nixĩ nax tamaepü̱x ya tauemacügu perü uanügü pexü̃ daixü̃. Rü to nixĩ nax tamaepü̱x i ngunexü̃ Cori ya Tupana ínanguxẽẽxü̃ i da̱xaweane rü ngẽma norü duü̃xü̃ i dauxü̃cüã̱x rü poraãcü nachixexẽẽxü̃ i guxü̃ma i Iraéuanewa. Rü nhu̱xmax rü chanaxwa̱xe nax chamaxã nüxü̃ quixuxü̃ rü ngexü̃rüüxü̃ yixĩxü̃ i ngẽma cuma cunaxwa̱xexü̃ nax namaxã nüxü̃ chixuxü̃ca̱x ya yimá cuxü̃tawa choxü̃ mucü —nhanagürü.
13 Rü nüma ga Dawí rü Gáyixü̃ nangãxü̃ rü nhanagürü: —Nhu̱xma rü taxü̃ma i guxchaxü̃ chauétü nangu. Rü cha̱u̱xca̱x narümemae nax Tupaname̱xẽgu changuxü̃ erü nüma rü poraãcü nüxü̃́ tangechaü̃tümüxü̃. Erü tama chanaxwa̱xe nax tórü uanügüme̱xẽgu iyixü̃ —nhanagürü.
14 Rü yexguma ga nüma ga Cori ya Tupana rü Iraéuanecüã̱xgüca̱x yéma nanamu ga da̱xaweane rü 70,000 ga Iraéuanecüã̱xgü nayue.
15 Rü nüma ga Tupana rü yema da̱xaweanemaxã yéma nanamu ga wüxi ga dauxü̃cüã̱x ga norü orearü ngeruxü̃ nax yemamaxã Yerucharéü̃cüã̱xü̃ nadaixü̃ca̱x. Notürü yexguma marü Yerucharéü̃wa nanguxchaü̃gu nax duü̃xü̃güxü̃ nadaixü̃ ga yema dauxü̃cüã̱x, rü nüma ga Cori ya Tupana rü nüxü̃́ nangechaü̃tümüxü̃ ga duü̃xü̃gü rü yemaca̱x nüxna nachogü ga yema dauxü̃cüã̱x rü nhanagürü nüxü̃: —¡Rü marütama nax cunadaixü̃! —nhanagürü nüxü̃. Rü nüma ga yema dauxü̃cüã̱x rü marü gumá Yebuchéutanüxü̃ ga Orná trígu ípúxü̃wa nayexma ga yexguma Tupana nüxna chogügu.
16 Rü nüma ga Dawí rü dauxü̃gu nadawenü, rü nüxü̃ nadau ga yema dauxü̃cüã̱x ga Cori ya Tupanaarü orearü ngeruxü̃. Rü dauxü̃guxü̃ ga naane rü nhama i naanearü ngãxü̃machate̱xewa nayexma namaxã ga norü tara ga naxchixü̃wa natúxuchixü̃. Rü Yerucharéü̃guama namaxã nabuenüchacüxü. Rü yemaca̱x nüma ga Dawí rü guxü̃ma ga yema Iraéuanecüã̱xgüarü ãẽ̱xgacügü rü témüxü̃ ga naxchirugu icu̱xgüxü̃ rü nhaxtüanegu nanangücuchitanü rü yemaacü Tupanaxü̃ naca̱a̱xü̃gü.
17 Rü nüma ga Dawí rü Tupanaxü̃ naca̱a̱xü̃ rü nhanagürü: —Chama nixĩ ga chanamuxü̃ ga nax yaxugüxü̃ ga duü̃xü̃gü. Rü chama nixĩ i chixexü̃ chaxüxü̃ rü chanaxüxü̃ i pecádu. ¿Rü ta̱xacürü chixexü̃ naxüe i nhaa duü̃xü̃gü rü ngẽmaca̱x cunadaixü̃? Pa Corix, Pa Chorü Tupanax, cuxna chaca nax choxü̃ rü chauxacügüxü̃waxi nax cupoxcuxü̃, rü marütama nax cunadaixü̃ i duü̃xü̃gü —nhanagürü.
Dawí nanaxü ga wüxi ga ãmarearü guchicaxü̃
18 Rü yexguma ga nüma ga yema dauxü̃cüã̱x ga Tupanaarü orearü ngeruxü̃ rü Gáyixü̃ namu nax Dawímaxã nüxü̃ yanaxuxü̃ca̱x nax Tupanaca̱x wüxi ga ãmarearü guchicaxü̃ naxüxü̃ nagu ga yema nachica ga Orná ga Yebuchéutanüxü̃ nawa trígu púxü̃.
19 Rü yexguma ga nüma ga Dawí rü nanaxü ga yema Cori ya Tupanaégagu Gáyi namaxã nüxü̃ ixuxü̃.
20 Rü nüma ga Orná rü norü trígu ínapu̱x. Rü yexguma nügüweama nada̱xgux rü nüxü̃ nadau ga yema dauxü̃cüã̱x ga Tupanaarü orearü ngeruxü̃. Notürü gumá ãgümücü ga nane ga namaxã yéma nayexmacü rü nibuxmü rü nicu̱xgü ga yexguma nüxü̃ nadaugügu.
21 Rü yexguma Dawí Ornáxü̃tawa nguxgu, rü nüma ga Orná rü Dawíxü̃ nadawenü. Rü yexguma Dawíxü̃ yacua̱xãchigu, rü nüma ga Orná rü ínaxũxũ ga trígu ínapúxü̃wa rü Dawípe̱xegu nanangücuchiãchi.
22 Rü yexguma ga nüma ga Dawí rü nhanagürü nüxü̃: —¡Choxna naxã i nhaa nachica i trígu nawa cupúxü̃ nax ngẽxma Cori ya Tupanaca̱x chanaxüxü̃ca̱x i wüxi i ãmarearü guchicaxü̃! ¡Rü ngẽma cunaxwa̱xexü̃e̱xpü̱x choxü̃ namaxã nataxe, rü tá cuxü̃́ chanaxütanü nax ngẽmaãcü yaxũgachixü̃ca̱x i ngẽma da̱xaweane i duü̃xü̃gü namaxã yuexü̃! —nhanagürü.
23 Rü nüma ga Orná rü Dawíxü̃ nangãxü̃ rü nhanagürü: —Pa Ãẽ̱xgacüx ¡ẽcü nayaxu i nhaa naane rü nagu naxü i ta̱xacü i cuma cunaxwa̱xexü̃! Rü chama tá cuxna chanamugü i nhaa tuirugü nax ngẽma Tupanaca̱x ícuguxü̃ca̱x. Rü yimatama naixmena̱xãgü ya trígu namaxã chapoxü̃nemaatama naxüxǘxü̃. Rü nhaatama trígu rü wüxigu ngẽma wocagümaxã rü cuxna chanaxãmare nax Tupanana cuxãmarexü̃ca̱x, Pa Ãẽ̱xgacüx —nhanagürü.
24 Notürü nüma ga ãẽ̱xgacü ga Dawí rü nanangãxü̃ rü nhanagürü: —Moxẽ cuxna chaxã notürü chanaxwa̱xe nax naxca̱x cuxü̃ chataxexü̃ rü chamaxã cuxãtanüxü̃ i guxü̃ma i ngẽma. Rü tama chanaxwa̱xe i ngetanüãcüma cuxna chanayaxuxü̃ i ngẽma cuxrü ixĩxü̃, erü tama chanaxwa̱xe i ta̱xacü i choxü̃́ ngetanüxü̃ Cori ya Tupanaca̱x íchagu —nhanagürü.
25 Rü nüma ga Dawí rü Ornáaxü̃́ nanaxütanüama. Rü 600 tachinü ga diẽru ga úiru ngĩxca̱x nüxna ngĩxü̃ naxã.
26 Rü yexma Tupanaaxü̃́ nanaxü ga ãmarearü guchicaxü̃ rü yéma ínanagu ga ãmaregü ga norü chixexü̃arü ütanüruxü̃ nax Tupanaxü̃ nangüxmüxẽẽxü̃ca̱x. Rü nhu̱xũchi Cori ya Tupanamaxã nidexa rü nüxü̃ naca̱a̱xü̃. Rü nüma ga Cori ya Tupana rü nanangãxü̃ rü dauxü̃guxü̃ ga naanewa üxüema narünguxẽxẽ, rü yema ãmarearü guchicaxü̃étügu nangu.
27 Rü nüma ga Cori ya Tupana rü yema dauxü̃cüã̱xü̃ namu nax naxchixü̃gu yaxücuchiãxü̃ca̱x ga norü tara.
Dawí rü nüxü̃ naxuneta ga Tupanapatachica
28 Rü yexguma nüxü̃ nada̱xgux ga Dawí nax Cori ya Tupana nüxü̃ ngãxü̃xü̃ nawa ga yema nachica ga Orná ga Yebuchéutanüxü̃ trígu nawa púxü̃, rü wena yéma Tupanaca̱x ínanagu ga ãmaregü.
29 Rü yexgumaü̃cüxü ga guma Tupanapata rü yema ãmarearü guchicaxü̃ ga chianexü̃gu Moiché üxü̃ne, rü marü Gabaóũarü ma̱xpǘnewa nanangegü rü yemaca̱x yéma nayexma.
30 Notürü nüma ga Dawí rü taxucürüwa Gabaóũwa naxũ nax yéma Tupanaca̱x ãmare yanaguxü̃ca̱x rü Tupanana yaca̱xaxü̃ca̱x, yerü namuü̃ ga yexguma nüxü̃ nada̱xgux ga yema Tupanaarü orearü ngeruxü̃ ga norü taramaxã yexma chixü̃.
