1 Crônicas 29:1-30
29 Rü yemawena ga ãẽ̱xgacü ga Dawí rü nhanagürü nüxü̃ ga yema duü̃xü̃gü ga yexma ngutaque̱xexü̃: —Rü daa chaune ya Charumáu nixĩ ya Tupana nüxü̃ unetacü, rü nüma rü nangextü̱xüxüchi rü taxũta cua̱x nüxü̃́ nangexma. Notürü i ngẽma puracü i tá naxüxü̃ rü nataxüchi, erü tama ãẽ̱xgacüpatamare naxü, notürü Cori ya Tupanapata nixĩ ya naxüxü̃ne.
2 Rü yemaca̱x pora naxca̱x chaxü nax chananutaque̱xexü̃ i ngẽmaxü̃gü nax naxüãxü̃ca̱x ya yima Tupanapata. Rü ngẽma chanutaque̱xexü̃ rü úirumü, rü diẽrumü, rü brṍche, rü féru, rü mürapewagü nixĩ. Rü ngẽxgumarüxü̃ ta chananutaque̱xe ya mucüma ya nutagü ya imexechicü ya beríru, rü naigüama ya nutagü ya imexechicü, rü tatanücü ya meruü̃gü. Rü ngẽxgumarüxü̃ ta mucüma ya nuta ya mármo i ĩxtapü̱xruxü̃ chanutaque̱xe.
3 Rü naétüwa i ngẽma ngẽmaxü̃gü i marü naxca̱x chanutaque̱xexü̃ ya yima Tupanapata rü nüxna chanaxã i ngẽma choxrüxüchi ixĩxü̃ i úirumü rü diẽrumü, erü poraãcü choxü̃́ name ya yima Tupanapata.
4 Rü ngẽmaãcü 100,000 quíru naguxü̃ i úiru, rü 230,000 quíru naguxü̃ i diẽrumü i marü memarexü̃ nixĩ i nüxna chaxãxü̃ nax ngẽmamaxã nachaxuxü̃ca̱x i naxtapü̱xgü ya yima Tupanapata.
5 Rü ngẽmaãcü marü nangexma i úiru rü diẽrumü nax ngẽmawa ngẽma puracütanüxü̃ naxügüxü̃ca̱x i naguxü̃raü̃xü̃ i meruü̃gü i Tupanapataca̱x ixĩxü̃. Rü nhu̱xmax ¿Rü texé tanaxwa̱xe nax tümaarü ngúchaü̃maxã itanaxǘxü̃ i tümaarü ãmare naxca̱x ya Cori ya Tupana? —nhanagürü ga Dawí.
6 Rü yexguma ga yema wüxichigü ga papá rü wüxichigü ga yema ãẽ̱xgacügü ga nügütanüxü̃chigü ixĩxü̃, rü yema ãẽ̱xgacügü ga churaragümaxã icuáxü̃, rü yema ãẽ̱xgacügü ga Dawíarü puracümaxã icuáxü̃ rü norü ngúchaü̃maxã ãmare inaxãgü.
7 Rü yema norü ãmaregü ga Tupanapataca̱x inaxãgüxü̃ rü 165,000 quíru naguxü̃ ga úiru nixĩ, rü ngĩétü 10,000 tachinü ngĩxgu̱xcü ga diẽru ga úirungĩxca̱x, rü 330,000 quíru naguxü̃ ga diẽrumü rü wixgutaa̱x 600,000 quíru naguxü̃ ga brṍche, rü 3,300,000 quíru naguxü̃ ga féru.
8 Rü yema nüxü̃́ yexmaxü̃ ga nuta ga imexechicü rü guma rü ta inanana nüxna ga Yeriéu ga Yerchóũtaxa ga Tupanapataarü diẽrumaxã icuáxü̃.
9 Rü nüma ga duü̃xü̃gü rü nataãxẽgü yerü norü ngúchaü̃maxã Cori ya Tupanana nanaxãmaregü ga norü yemaxü̃gü. Rü yexgumarüxü̃ ta rü nüma ga ãẽ̱xgacü ga Dawí rü poraãcü nataãxẽxü̃chi.
10 Rü yexguma ga nüma ga Dawí rü Cori ya Tupanaxü̃ nicua̱xüxü̃ nape̱xewa ga guxü̃ma ga yema duü̃xü̃gü ga yexma ngutaque̱xexü̃ rü nhanagürü: —Pa Cori ya Tonatügüarü Tupanax, rü guxü̃gutáma cuxü̃ ticua̱xüxü̃gü.
11 Rü cumax, Pa Corix, rü guxü̃étüwa cungexma, rü cupora rü cuxüüne rü namaxã icucua̱x i guxü̃ma. Erü guxü̃ma i ta̱xacü i ngẽxmaxü̃ i dauxü̃guxü̃ i naanewa rü nhama i naanewa rü cuxrü nixĩ. Rü cuxrügü ta nixĩ i guxü̃ma i naanegü erü guxü̃étüwa cungexma.
12 Rü cuma nixĩ i cunango̱xẽẽxü̃ i guxü̃ma i úirugü rü diẽrugü rü ngẽmaxü̃gü. Rü cugagu nixĩ i mea tochiga yadexagüxü̃ i duü̃xü̃gü. Rü cuma nixĩ i namaxã icucuáxü̃ i guxü̃ma. Rü cuwa nixĩ i ne naxũxü̃ i pora. Rü cuxme̱xwa nangexma nax toxü̃ cutaxẽẽxü̃ rü toxü̃ cuporaexẽẽxü̃ ya guxãma.
13 Rü ngẽmaca̱x, Pa Torü Tupanax, i nhu̱xmax rü moxẽ cuxna taxãxü̃ rü cuxü̃ ticua̱xüü̃güxü̃ erü cuxüüne.
14 ¿Rü ta̱xacü ẽ̱xna chixĩ i chamax, rü ta̱xacügü nixĩ i ngẽma chorü duü̃xü̃gü nax ngẽmaãcü toxü̃́ natauxchaxü̃ nax cuxna tanaxãxü̃ i muxü̃ma i ngẽmaxü̃gü? Rü dücax i guxü̃ma i ngẽma rü cuxü̃tawa ne naxũ, rü ngẽma cuxna taxãxü̃ rü cuxü̃tawa tayaxuxü̃ nixĩ.
15 Rü cupe̱xewa i nhama i naanewa rü toma rü nhama duü̃xü̃gü i ĩanetanüxü̃rüü̃mare tixĩgü nax paxaãchi i nhama i naanewa tangexmagüxü̃ yema nũxcüma ga torü o̱xigürüxü̃. Rü ngẽma torü maxü̃ i nhama i naanewa rü nhama wüxi i naxchipetarüxü̃ paxa inarütauxmare.
16 Pa Corix, Pa Torü Tupanax, cuxrügü nixĩ i guxü̃ma i nhaa ngẽmaxü̃gü i tanutaque̱xexü̃ rü cuxme̱xwa nixĩ i ne naxĩxü̃ nax naxügüãxü̃ca̱x ya yima cupata ya cuxca̱x taxüxü̃ne, Pa Tupana ya Üünecüx.
17 Rü chama rü nüxü̃ chacua̱x nax guxü̃guma mea cunangugüxü̃ i torü ĩnü rü namaxã cutaãxẽxü̃ nax tixaixcumagüxü̃. Rü ngẽmaca̱x aixcuma mexü̃gu charüxĩnüãcüma chorü ngúchaü̃maxã cuxna chanana i guxü̃ma i nhaa ãmaregü. Rü nhu̱xmax rü chataãxẽ erü nüxü̃ chadau i nhaa curü duü̃xü̃gü i nuxã ngutaque̱xexü̃ rü guxü̃ma i norü ngúchaü̃maxã cuxna nanana i ngẽma norü ãmaregü.
18 Pa Corix i Torü O̱xigü i Abraáü̃ rü Isáqui rü Iraéuarü Tupanax ¡ẽcü nüxü̃ rüngü̃xẽxẽ i nhaa curü duü̃xü̃gü nax guxü̃guma nüxü̃́ nangúchaü̃xü̃ca̱x nax cuga naxĩnüexü̃, rü tagutáma nüxü̃ naxoexü̃ca̱x nax cuxü̃ nangechaü̃güxü̃!
19 Rü ngẽxgumarüxü̃ ta ya yimá chaune ya Charumáu ¡rü nüxna naxã i wüxi ya maxü̃ne ya cugu rüxĩnüne nax ngẽmaãcü mea nagu namaxü̱̃xü̃ca̱x i ngẽma curü mugü rü curü ucu̱xẽgü rü cucümagü, rü ngẽmaãcü naxüãxü̃ca̱x ya yima cupata ya naxca̱x chananutaque̱xene i ngẽmaxü̃gü! —nhanagürü ga Dawí.
20 Rü yemawena rü nüma ga Dawí rü nhanagürü nüxü̃ ga guxü̃ma ga yema duü̃xü̃gü ga yexma ngutaque̱xegüxü̃: —Rü nhu̱xmax rü chanaxwa̱xe i nüxü̃ pecua̱xüxü̃gü ya Cori ya tórü Tupana —nhanagürü. Rü yexguma ga yema duü̃xü̃gü rü Cori ya Tupanaxü̃ nicua̱xüxü̃gü, rü Tupanape̱xegu rü ãẽ̱xgacü ga Dawípe̱xegu nacaxã́pü̱xügü.
21 Rü moxü̃ãcü rü yéma nanagagü ga 1,000 ga wocaxacügü ga yexwaca yaexü̃, rü 1,000 ga carnérugü. Rü Tupanaca̱x nanadai ga yema naxü̃nagü rü ãmare ga wíũ naétü naba, rü yemaacü guxü̃ma ga Iraéuanecüã̱xégagu Tupanaca̱x ínanagu.
22 Rü yema ngunexü̃gu rü meama nachibüe rü naxaxegü rü poraãcü nataãxẽgü nape̱xewa ga Cori ya Tupana. Rü nhu̱xũchi wenaxarü nüxü̃ nixugüe nax Charumáu ga Dawí nane nax ãẽ̱xgacü yixĩxü̃ca̱x. Rü Tupanape̱xewa chíxü̃maxã nanabaerugü nax nüma Iraéuanecüã̱xgümaxã inacuáxü̃ca̱x. Rü yexgumarüxü̃ ta nüxü̃ naxunetagü ga Chadóchi nax chacherdótegüarü ãẽ̱xgacü yixĩxü̃ca̱x.
23 Rü yemaacü nixĩ ga Tupana nüxü̃ unetaxü̃ ga Charumáu nax nüxí nanatü ga Dawíchicüxü yangucuchixü̃ca̱x. Rü guxü̃ma ga Iraéuanecüã̱xgü rü naga naxĩnüe rü yemaacü mea inixũ ga guxü̃ma.
24 Rü guxü̃ma ga Iraéuanecüã̱xgüarü ãẽ̱xgacügü rü churaragüerugü rü Charumáueneegü rü namaxã nüxü̃ nixugüe ga naga tá nax naxĩnüexü̃.
25 Rü nüma ga Cori rü poraãcü nanatachigaxẽxẽ ga guxü̃ma ga Iraéuanewa. Rü yexeraãcü namuarü yemaxü̃ã̱x rü nanatüarü yexera nüxü̃ nicua̱xüxü̃gü.
Nayu ga Dawí
26 29:26-27 Rü Dawí ga Yeché nane rü 40 ga taunecü nixĩ ga ãẽ̱xgacü yixĩxü̃ ga Iraéuanewa. Rü 7 ga taunecü nixĩ ga ãẽ̱xgacü yixĩxü̃ ga Ebróü̃wa rü 33 ga taunecü nixĩ ga Yerucharéü̃wa.
27 Nüü̃ nadau 29:26
28 Rü yexguma nayu̱xgu rü poraãcüxüchima marü naya rü namuarü yemaxü̃ã̱x. Rü duü̃xü̃gü rü poraãcüxüchima namaxã nataãxẽgü. Rü nane ga Charumáu nixĩ ga nachicüxü ãẽ̱xgacüxü̃ ingucuchicü.
29 --
30 --
