1 Crônicas 10:1-14
10 Rü nüma ga Firitéutanüxü̃gü rü Iraéuanecüã̱xgüca̱x ínayaxüãchi. Rü ma̱xpǘne ga Yibóagu nügü nadai. Rü muxü̃ma ga Iraéuanecüã̱xgü yexma nayue rü yemaca̱x Firitéutanüxü̃gücha̱xwa nibuxmü.
2 Rü yexguma ga nüma ga Firitéutanüxü̃gü rü Chaúwe rü nanegüwe nangẽgü, rü nanadai ga Chaú nanegü ga Yónataü̃ rü Abinadábi rü Maquichúa.
3 Rü yemawena rü Chaúca̱x nibuxmü rü yema würamaxã ixã̱xnexü̃ rü Chaúmaxã namexchinügü rü poraãcü nanapi̱xẽẽgü.
4 Rü yexguma ga nüma ga Chaú rü yema norü poxü̃ruü̃xü̃ nhanagürü: —¡Nayaxu i ngẽma curü tara rü ngẽmamaxã choxü̃ nacaná! Erü tama chanaxwa̱xe i choxü̃ ngúxü̃ ningexẽẽgü i yea duü̃xü̃gü i tama Tupanaaxü̃́ yaxõgüxü̃ —nhanagürü. Notürü nüma ga gumá norü poxü̃ruxü̃ rü tama nanacanápacütüü̃chaü̃ yerü namuü̃. Rü yexguma ga nüma ga Chaú rü nanayaxu ga norü tara rü nümatama nagu nügü nangu̱xẽxẽ.
5 Rü nüma ga gumá norü poxü̃ruxü̃ rü nüxü̃ nadau ga nax nayuxü̃ ga Chaú rü yemaca̱x ga nüma rü ta nügütama norü taragu nügü nangu̱xẽxẽ rü nayu.
6 Rü yemaacü nixĩ ga nayuexü̃ ga Chaú rü nanegü rü guxü̃ma ga natanüxü̃gü.
7 Rü guxü̃ma ga yema togü ga Iraéuanecüã̱x ga guma ma̱xpǘnearü tuãchigu ipeaxü̃, rü yexguma nüxü̃ nadaugügu ga nax yabuxmüxü̃ ga Chaúarü churaragü rü marü nax nayuexü̃ ga Chaú rü nanegü, rü yexguma ga nüma ga yexma ãchiü̃güxü̃ rü ínachoxü̃ nawa ga guma ĩanegü rü nüma rü ta nibuxmü. Rü nüma ga Firitéutanüxü̃gü rü yéma nangugü rü yexma naxãchiü̃gü nagu ga guma ĩanegü.
8 Rü yexguma nügü nadaixgu wenaxarü moxü̃ãcü rü nüma ga Firitéutanüxü̃gü rü yema nügü ínadaixü̃wa naxĩ nax tüxü̃ yadexenegüxü̃ca̱x ga guxema yuexe. Rü yexma Chaúxü̃ rü nanegüxü̃ nayangaugü ga yexma yuexü̃ nagu ga guma ma̱xpǘne ga Yibóa.
9 Rü nüma ga Firitéutanüxü̃gü rü Chaúxü̃ ínacuxü̃xü̃ne rü nanade ga naxne. Rü nayadaerugü rü nayangegü ga naeru rü naxnegü. Rü nhu̱xũchi guxü̃ma ga Firitéutanüxü̃güarü ĩanegüwa norü tupanachicüna̱xãpatawa duü̃xü̃gümaxã nüxü̃ nixugüetanü ga nachiga ga marü nax nayuxü̃.
10 Rü nhu̱xũchi ga guma naxnegü, rü nüma ga Firitéutanüxü̃gü rü norü tupanagüchicüna̱xãpataü̃gu nayanu. Rü yema naeru rü norü tupana ga Dagóũarü tupaucaarü ĩxtapü̱xgu nayacho.
11 10:11-12 Rü guxü̃ma ga yema Iraéuanecüã̱xgü ga ĩane ga Yabécüã̱x ga Yiriáyianewa yexmane, rü yexguma nüxü̃ nacua̱xgügu ga yema Firitéutanüxü̃gü Chaúmaxã ügüxü̃, rü guxü̃ma ga yema yatügü ga tama muü̃ewa̱xexü̃ rü wüxigu nügümaxã nagu narüxĩnüe nax yadeaxü̃ca̱x ga yema Chaúxü̃ne rü nanegüxüne. Rü Yabéwa nanana. Rü yexma nixĩ ga nata̱xgüaxü̃ ga yema naxü̃negü natüü̃gu ga wüxi ga carabáyu. Rü yemawena 7 ga ngunexü̃ naxauree.
12 Nüü̃ nadau 10:11
13 10:13-14 Rü yemaacü nixĩ ga nayuxü̃ ga Chaú nagagu ga yema chixexü̃ ga naxüxü̃. Yerü nüma ga Chaú rü tama Tupanaga naxĩnü rü nhu̱xũchi yuüxü̃ ga ẽxü̃guxü̃xü̃ cuáxü̃na nayaca. Rü tama nüxna naca ga Tupana. Rü yemagagu nixĩ ga nüma ga Tupana ga nayuxẽẽãxü̃ rü Yeché nane ga Dawíxü̃ naxunetaxü̃ nax nüma Iraéuanecüã̱xgüarü ãẽ̱xgacü yixĩxü̃ca̱x.
14 Nüü̃ nadau 10:13
