1 Juã́ũ 1:1-10
1 Pexca̱x tanaxümatü nachiga ja Tupana Nane ja Cristu ja jima woetama marü nüxĩra jexmacü ga jexguma noxritama taũta naãne ü̱xgu. Rü nüma rü Ore i Maxẽxẽẽruü̃ nixĩ i naẽ́ga erü nüma nixĩ i tamaã nüxü̃ jaxuxü̃ i Tupanachiga rü tüxü̃ namaxẽxẽẽxü̃. Rü toma ga norü ngúexü̃gü na tixĩgüxü̃, rü nüxü̃ taxĩnüẽ rü toxetümaã nüxü̃ tadaugü rü tome̱xmaã nüxü̃ tingõgügü.
2 Rü jima Maxẽxẽẽruü̃ ja Cristu rü toxü̃ nügü nawe̱x. Rü nüxü̃ tadaugü rü duü̃xü̃gümaã nüxü̃ tixu na nhuxãcü jiĩxü̃. Rü nhu̱xma rü pemaã rü ta nüxü̃ tixuchiga ja jima Cristu ja tüxna naxãcü i maxü̃ i taguma gúxü̃. Rü noxri rü Nanatüxü̃tawa najexma, notürü nhama ga naãnewa nangu rü toxca̱x nango̱x.
3 Rü jema toma nüxü̃ tadaugüxü̃ rü nüxü̃ taxĩnüẽxü̃ rü pemaã nüxü̃ tixu na tomücügü peixĩgüxü̃ca̱x, ngẽxgumarüü̃ i toma na Tanatü ja Tupana rü Nane ja Ngechuchu ja Cristumücügü tixĩgüxü̃rüü̃.
4 Rü ngẽmaca̱x pexca̱x tanaxümatü i nhaã ore na wüxigu aixcumaxü̃chi itaãẽgüxü̃ca̱x.
Nhama ngóonexü̃rüü̃ name ja Tupana
5 Rü nhaã nixĩ ga ore ga tomaã nüxü̃ jaxuxü̃ ga Ngechuchu ja Cristu. Rü pemaã nüxü̃ tixu na nhama ngóonexü̃rüü̃ namexü̃ ja Tupana, rü nawa rü nataxuma i chixexü̃ i nhama ẽãnexü̃rüü̃ ixĩxü̃, rü bai i íraxü̃.
6 Rü ngẽxguma chi:
“Tanatü ja Tupanamücügü tixĩgü”, nhagügu, notürü chixri imaxẽgu, rü tidoraemare erü tama aixcuma meã tamaxẽ.
7 Rü ngẽxguma chi Tupanarüü̃ ngóonexü̃wa imaxẽgu, rü jigümücügü tixĩgü i jixema, rü Tupana Nane ja Ngechuchu rü nagümaã tüxü̃́ inajanatauxẽẽ i guxü̃ma i tórü chixexü̃.
8 Ngẽxguma chi nüxü̃ ixuxgu rü:
“Changearü pecaduã̱x”, nhagügu, rü jigütama tawomüxẽẽ, rü tidoraemare.
9 Notürü ngẽxguma chi Tupanamaã nüxü̃ ixuxgu i tórü pecadugü, rü nüma tüxü̃́ nüxü̃ nangechaü̃ rü tüxü̃́ inajanatauxẽẽ i guxü̃ma i tórü chixexü̃, erü nüma rü mecü nixĩ rü taguma tüxü̃ nawomüxẽẽ.
10 Notürü ngẽxguma chi:
“Tangearü pecaduã̱xgü”, nhagügu, rü dorata̱a̱x nüxü̃ tawogü ja Tupana rü tama aixcuma tawa nangẽxma i norü ore.
