1 Juã́ũ 2:1-29
2 Pa Chauxacügüx, pexca̱x chanaxümatü i nhaã ore na tama chixexü̃ pexügüxü̃ca̱x. Notürü ngẽxguma chi wüxie chixexü̃ ü̱xgu, rü nangẽxma ja tümaẽ́tüwa chogücü nüxna ja Tanatü ja Tupana na tama tüxü̃ napocuxü̃ca̱x. Rü jima nixĩ ja Ngechuchu ja Cristu ja aixcuma mecü ixĩcü.
2 Rü guma Ngechuchu ja Cristu rü nügü inaxã rü naju na naxütanüãxü̃ca̱x ga tórü pecadugü. Rü tama tórü pecadugüxicatama naxütanü, notürü guxü̃ma i duü̃xü̃güarü pecadugü ta naxütanü.
3 Rü ngẽxguma chi naga ixĩnüẽgu i ngẽma tüxü̃ namuxü̃ ja Tupana, rü nüxü̃ tacua̱x na aixcuma nüxü̃ icuáxü̃.
4 Rü ngẽxguma chi wüxie:
“Chama rü Tupanaxü̃ chacua̱x”, nhagügu, notürü tama naga taxĩnügu i ngẽma tüxü̃ namuxü̃ ja Tupana, rü wüxi i dorata̱xáxü̃ tixĩ.
5 Notürü jíxema naga ĩnüxẽ i ngẽma tüxü̃ namuxü̃ ja Tupana, rü aixcumaxü̃chi Tupanaxü̃ tangechaü̃. Rü ngẽmawa nüxü̃ tacua̱xgü na aixcuma Tupanaãrü duü̃xü̃gü ixĩgüxü̃.
6 Rü jíxema:
“Tupanaãrü duü̃xü̃ chixĩ”, nhagüxe, rü name nixĩ na meã tamaxü̃xü̃ jema Ngechuchu ja Cristu meã maxü̃xü̃rüü̃.
Tupanaãrü mu i ngexwacaxü̃xü̃chiga
7 Pa Chaueneẽgüx, tama wüxi i ngexwacaxü̃xü̃ i Tupanaãrü mu nixĩ i pexca̱x chaxümatüxü̃. Notürü nhaãtama noxriarü ügügumama pexü̃́ jexmaxü̃ ga mu nixĩ. Rü nhaãtama nixĩ i Tupanaãrü mu ga nuxcümaü̃xü̃ ga marü nüxü̃ pexĩnüẽxü̃.
8 Notürü nhaã Tupanaãrü mu i pexca̱x chaxümatüxü̃ rü guxü̃guma nangexwacaxü̃. Rü ngẽxguma naga pexĩnüẽgu i nhaã Tupanaãrü mu na pegü pengechaü̃güxü̃, rü tama ẽãnexü̃watama pemaxẽ, notürü Cristurüü̃ ngẽma ngóonexü̃ i aixcuma ixĩxü̃wa pengẽxmagü.
9 Rü ngẽxguma chi wüxie:
“Chama rü ngẽma ngóonexü̃wa changẽxma”, nhagügu, notürü tümaẽneẽchi taxaixgu, rü ẽãnexü̃watama tangẽxma.
10 Jíxema tümaẽneẽxü̃ ngechaü̃xẽ rü ngóonexü̃wa tamaxü̃, rü taxuü̃ca̱xma tü̱xcüü̃ pecadu taxü.
11 Notürü jíxema tümaẽneẽchi aixe, rü ẽãnexü̃watama tamaxü̃, rü ẽãnexü̃gu tixũ. Rü tama nüxü̃ tacua̱x na ngextá taxũxü̃, erü tümaca̱x naxẽãne.
12 Pa Chauxacügüx, pexca̱x chanaxümatü erü Cristugagu Tupana marü pexü̃́ nüxü̃ nangechaü̃ i perü pecadugü.
13 Pa Papagüx, pexca̱x chanaxümatü i nhaã ore erü nüxü̃ pecua̱xgü ja Tanatü ja Tupana ga noxriarü ügügumama jexmacü. Pa Ngextü̱xücügüx, pexca̱x chanaxümatü erü marü nüxü̃ perüjexera i ngẽma ṉg̱oxo i Chataná i chixexü̃ãrü üruü̃.
14 Pa Buxü̃güx, pexca̱x chanaxümatü erü marü nüxü̃ pecua̱xgü ja Tanatü ja Tupana. Pa Papagüx, pexca̱x chanaxümatü erü marü nüxü̃ pecua̱xgü ja Tanatü ja Tupana ga noxriarü ügügumama jexmacü. Pa Ngextü̱xücügüx, pexca̱x chanaxümatü erü peporae, rü guxü̃guma peãẽwa nangẽxma i Tupanaãrü ore, rü marü nüxü̃ perüjexera i ngẽma ṉg̱oxo i Chataná i chixexü̃ãrü üruü̃.
15 ¡Tãṹ i pexü̃́ nangúchaü̃xü̃ i nhama i naãne rü norü ngẽmaxü̃gü! Ngẽxguma chi texéaxü̃́ nangúchaü̃gu i nhama i naãne rü tama Tanatü ja Tupanaxü̃ tangechaü̃.
16 Erü guxü̃ma i ngúchaü̃gü i nhama i naãnewa ngẽxmaxü̃ rü nhama i naãneãrütama nixĩ rü tama Tupanaãrü nixĩ. Rü ngẽma ngúchaü̃gü rü ngẽma nixĩ i taxüneãrü ngúchaü̃gü, rü taxetüarü ngúchaü̃gü, rü jigü na icua̱xüü̃güxü̃ tórü ngẽmaxü̃gümaã.
17 Notürü nhama i naãne rü guxü̃ma i ngúchaü̃gü i nawa ngẽxmaxü̃ rü tá nagu̱x. Notürü jíxema Tupanaga ĩnüxẽ rü guxü̃gutáma tamaxü̃.
Ore i aixcuma ixĩxü̃chiga rü ore i dora ixĩxü̃chiga
18 Pa Chauxacügüx, paxa tá nagu̱x i nhama i naãne. Pema rü marü nüxü̃ pexĩnüchiga rü tá ínangu i wüxi i Cristuarü uwanü, notürü marü ínangugü i muxü̃ma. Rü ngẽmawa nüxü̃ tacua̱x na marü nagúxchaü̃xü̃ i nhama i naãne.
19 Rü ngẽma Cristuarü uwanügü rü tatanüwatama nangẽxmagüchire̱x, notürü tama aixcuma tatanüxü̃ nixĩgü, erü ngẽxguma chi tatanüxü̃ jixĩgügu rü tatanügu chitama narücho. Notürü marü tatanüwa ínachoxü̃ na meãma nüxü̃ icuáxü̃ca̱x na tama aixcuma tatanüxü̃ jixĩgüxü̃.
20 Notürü pema rü Cristu marü pexna nanamu i Naãẽ i Üünexü̃, rü ngẽmaca̱x meãma nüxü̃ pecua̱x i Tupanaãrü ore.
21 Rü nhu̱xma rü tama nixĩ na tama nüxü̃ pecuáxü̃ca̱x na pexca̱x chaxümatüxü̃. Notürü pexca̱x chanaxümatü erü marü meãma nüxü̃ pecua̱x i ngẽma ore i aixcuma ixĩxü̃. Rü nüxü̃ pecua̱x rü ngẽma ore i aixcuma ixĩxü̃wa rü nataxuma i dora.
22 ¿Texé tiĩxü̃ ja jíxema idorata̱xáxe? Jíxema:
“Ngechuchu rü tama aixcuma Cristu ja Tupana Nane nixĩ”, nhagüxe, tixĩ ja idorata̱xáxe. Jíxema tixĩ ja Cristuarü uwanü, erü tama nüxü̃ tacuáxchaü̃ ja Tanatü ja Tupana rü Nane ja Ngechuchu.
23 Guxãma ja jíxema tama nüxü̃ cuáxchaü̃xẽ ja Tupana Nane ja Ngechuchu, rü tama nüxü̃ tacuáxchaü̃ ta ja Tanatü ja Tupana. Notürü jíxema Ngechuchuaxü̃́ jaxṍxẽ, rü Tanatü ja Tupanaãxü̃́ rü ta tajaxõ.
24 Rü ngẽmaca̱x name nixĩ i pejaxõgüama i ngẽma ore ga noxri nüxü̃ pexĩnüẽxü̃. Rü ngẽxguma pejaxõgüamagu i ngẽma ore ga noxri nüxü̃ pexĩnüẽxü̃, rü aixcuma norü duü̃xü̃gü peixĩgü ja Tupana Nane ja Ngechuchu rü Tanatü ja Tupana.
25 Rü nümatama ja Ngechuchu ja Cristu nixĩ i tamaã inaxunetaxü̃ na tüxna naxããxü̃ca̱x i maxü̃ i taguma gúxü̃.
26 Nangẽxma i duü̃xü̃gü i chixexü̃wa pexü̃ gagüchaü̃xü̃. Rü ngẽmachiga nixĩ i pexca̱x chanaxümatüxü̃ i nhaã ore.
27 Notürü pema rü marü Cristu pexna nanamu i Naãẽ i Üünexü̃, rü guxü̃guma pewa nangẽxma. Rü ngẽmaca̱x tama penaxwa̱xe i to i perü ngúexẽẽxü̃ erü nümatama i Naãẽ i Üünexü̃ rü pexü̃ nangúexẽẽ i guxü̃ma. Rü norü ngu̱xẽẽtae rü aixcuma nixĩ rü tama dora nixĩ. Rü ngẽmaca̱x name nixĩ na guxü̃guma Cristuaxü̃́ pejaxõgüxü̃, ngẽma Naãẽ i Üünexü̃ pexü̃ ngúexẽẽxü̃ãcüma.
28 Rü nhu̱xmax, Pa Chauxacügüx, rü name nixĩ na meãma Cristuaxü̃́ pejaxõgüxü̃ na tama nüxü̃ imuü̃ẽxü̃ca̱x, rü tama ixãneẽxü̃ca̱x nape̱xewa i ngẽxguma wena nuã naxũxgu.
29 Pema nüxü̃ pecua̱x na Cristu rü aixcuma mecü jiĩxü̃. Rü ngẽxgumarüü̃ ta name nixĩ na nüxü̃ pecuáxü̃ na guxü̃ma i duü̃xü̃gü i mexü̃ ügüxü̃ rü Tupanaxãcügü na jixĩgüxü̃.
