1 Juã́ũ 3:1-24
3 ¡Dücax, Pa Chaueneẽgüx, nhuxãcü poraãcü tüxü̃ nangechaü̃ ja Tanatü ja Tupana! Rü ngẽmaca̱x nixĩ i naxãcügümaã tüxü̃ naxuxü̃ i nümax. Rü aixcuma naxãcügü tixĩgü. Rü ngẽmaca̱x nhama i naãnecü̱̃ã̱x i duü̃xü̃gü rü tama tüxü̃ nacuáxchaü̃ erü Tupanaxü̃ rü ta tama nacuáxchaü̃gü.
2 Pa Chaueneẽgü ja Pexü̃ Changechaü̃güxe, nhu̱xma rü marü Tupanaxãcügü tixĩgü woo tama tüxü̃ nüxü̃ nacua̱xẽẽ na nhuxãcü tá ixĩgüxü̃ i jixcüra. Notürü nüxü̃ tacua̱xgü na Ngechuchurüü̃ tá ixĩgüxü̃ i ngẽxguma nango̱xgu, erü tá nüxü̃ tadaugü na nhuxãcü jiĩxü̃ i nümax.
3 Rü guxãma ja jíxema jaxṍxẽ na Ngechuchurüü̃ tá tiĩxü̃, rü tügüna tadau na Ngechuchu ja Cristurüü̃ aixcuma Tupanape̱xewa tamexü̃.
4 Notürü guxãma ja jíxema pecadu üxe, rü Tupanamaã chixexü̃ taxü. Erü ngẽxguma tama Tupanaga taxĩnügu, rü tapecaduã̱x.
5 Pema nüxü̃ pecua̱x rü Ngechuchu ja Cristu rü nhama ga naãnewa naxũ na ijanaxoxẽẽãxü̃ca̱x i tórü pecadugü. Rü nüma rü taguma pecadu naxü.
6 Rü ngẽmaca̱x guxãma ja jíxema aixcuma nüxü̃́ jaxõgüxe, rü tama pecadu taxügüecha. Notürü guxãma ja jíxema pecadu üechaxe, rü ngẽmaãcü tamaxẽ erü taguma Cristuxü̃ tadau, rü taguma nüxü̃ tacua̱x.
7 Pa Chauxacügüx, ¡tãṹ i naga pexĩnüẽxü̃ i ngẽma duü̃xü̃gü i pexü̃ ijarütauxexẽẽchaü̃xü̃! Jíxema mexü̃ ǘxe rü aixcuma mecü tixĩ, ngẽxgumarüü̃ ja Cristu na aixcuma mecü jiĩxü̃rüü̃.
8 Notürü jíxema pecadu üechaxe rü ngẽmawa tüxü̃ tacua̱x na Chatanáãrü duü̃xü̃ tiĩxü̃, erü nüma i Chataná rü noxriarü ügügumama pecadu naxüecha. Rü jemaca̱x ga Tupana Nane rü nhama ga naãnewa naxũ na ijanaxoxẽẽãxü̃ca̱x ga jema Chataná üxü̃.
9 Rü jíxema Tupanaxãcü ixĩxẽ rü tama pecadu taxüecha, erü naxãcüxü̃chi tixĩ. Rü taxuacüma pecadu taxüecha erü Tupana nixĩ ja tümanatü.
10 Jíxema chixexü̃ ǘxe rü tümaẽneẽchi aixe, rü tama Tupanaxãcü tixĩ. Rü ngẽmawa nüxü̃ tacua̱x na texé tixĩgüxü̃ ja Tupanaxãcügü rü texé tixĩgüxü̃ ja Chatanáxãcügü.
Name nixĩ na jigü ingechaü̃güxü̃
11 Name nixĩ na jigü ingechaü̃güxü̃ i wüxichigü. Rü jematama ore nixĩ ga noxriarü ügügumama nüxü̃ pexĩnüẽxü̃.
12 Rü tama tanaxwa̱xe na Caĩ́rüü̃ ṉg̱oxo i Chatanáxãcü ixĩgüxü̃. Jerü nüma rü naẽneẽxü̃ nima̱x. ¿Rü ṯacüca̱x nixĩ ga jamáãxü̃? Najama̱x jerü jema nüma naxüxü̃ rü tama name, rü jema naẽneẽ üxü̃ rü name.
13 Pa Chaueneẽgüx, ¡tãṹ i peḇaixãchiãẽgüxü̃ ega pechi naxaiegu i nhama i naãnecü̱̃ã̱x i duü̃xü̃gü!
14 Jixema rü marü nüxna ítanguxü̃ i ngẽma ju rü nhu̱xma rü marü maxü̃waama tangẽxmagü. Nüxü̃ tacua̱xgü i ngẽma erü nüxü̃ tangechaü̃gü i taeneẽgü. Jíxema tama tümaẽneẽxü̃ ngechaü̃xẽ rü juwatama tangẽxma.
15 Rü jíxema tümaẽneẽchi aixe rü wüxi i máẽtaxü̃rüü̃ tixĩ. Rü pema nüxü̃ pecua̱xgü i wüxi i máẽtaxü̃ rü nüxü̃́ nataxuma i norü maxü̃ i taguma gúxü̃.
16 Rü Ngechuchu ja Cristu rü tórü pecaduca̱x naju, rü jemaãcü tüxü̃ nüxü̃ nadauxẽẽ i ngẽma ngechaü̃ i aixcuma ixĩxü̃. Rü ngẽxgumarüü̃ ta i jixema, rü tanaxwa̱xe na íimemarexü̃ na nüxü̃ rüngü̃xẽẽxü̃ i taeneẽgü woo nagagu iju̱xgu.
17 Notürü ngẽxguma chi wüxi i jatüãxü̃́ nangẽxmagu i muxü̃ma i norü ngẽmaxü̃gü, rü chi nüxü̃ nada̱xgu i namücü na nüxü̃́ nataxuxü̃, rü taxuacüma:
“Chama rü Tupanaxü̃ changechaü̃”, nhanagürü, ega tama nüxü̃ nangü̃xẽẽgu i namücü.
18 Pa Chauxacügüx, tama name i taa̱xmaã rü tórü oremaãxĩcatama nüxü̃ tangechaü̃ i taeneẽ. Notürü tanaxwa̱xe i tórü maxü̃maã rü tórü ü i mexü̃maã nüxü̃ tangechaü̃.
Tama taxãneẽ na Tupanana ingaicamagüxü̃
19 3:19-20 Rü ngẽxguma aixcuma jigü ingechaü̃gügu, rü nüxü̃ tacua̱x na aixcuma naga ixĩnüẽxü̃ i ngẽma ore i aixcuma ixĩxü̃, rü Tupanape̱xewa rü aixcuma naxãcügü ixĩgüxü̃, woo ngẽxguma taãẽwa nagu rüxĩnügu rü:“Tama Tupanaxãcü chixĩ”, nhagügu. Erü nüxü̃ tacua̱x rü Tupana nixĩ i taãẽãrü jexera, rü nüma nüxü̃ nacua̱x i guxü̃ma.
20 Nüü̃ nadau 3:19
21 Pa Chaueneẽgü ja Pexü̃ Changechaü̃güxex, ngẽxguma taãẽwa nüxü̃ icua̱xgu na Tupanaxãcüxü̃chi ixĩgüxü̃, rü tama taxãneẽ na nüxna ingaicamagüxü̃ ja Tanatü ja Tupana.
22 Rü nüma tá tüxna nanaxã i guxü̃ma i ṯacü i naxca̱x íic̱axü̃ erü naga taxĩnüẽ i ngẽma tüxü̃ namuxü̃ rü tanaxü i ngẽma nüma namaã nataãẽxü̃.
23 Rü nüma tüxü̃ namu na Nane ja Ngechuchu ja Cristuaxü̃́ jaxõgüxü̃ rü jigü ingechaü̃güxü̃, jema nüma tüxü̃ namuxü̃ãcü.
24 Rü jíxema naga ĩnüẽxẽ i ngẽma Tupana tüxü̃ muxü̃, rü aixcuma Tupanaãrü duü̃xü̃gü tixĩgü rü nüma ja Tupana rü aixcuma tümawa namaxü̃. Rü nhu̱xma rü nüxü̃ tacua̱x na aixcuma Tupanaãrü duü̃xü̃gü ixĩgüxü̃ rü tawa namaxü̃xü̃, erü Naãẽ i Üünexü̃ ga tüxna namuxü̃ tüxü̃ nüxü̃ nacua̱xẽẽ.
