1 Juã́ũ 4:1-21
4 Pa Chaueneẽgü ja Pexü̃ Changechaü̃güxex, ¡Tãṹ i nüxü̃́ pejaxõgüxü̃ i guxü̃ma i orearü uruü̃gü i nügü ixugügüxü̃ na aixcuma Tupanaãrü orearü uruü̃gü jixĩgüxü̃! Notürü name nixĩ i penangugü i norü ore na nüxü̃ pecuáxü̃ca̱x ngoxita aixcuma Tupanaãẽ jiĩxü̃ i nawa idexaxü̃ rü e̱xna tama. Erü nhama i naãnewa rü guxü̃wama nangẽxma i muxü̃ma i idorata̱a̱xgüxü̃ i nügü ixugüxü̃ na Tupanaãrü orearü uruü̃gü jixĩgüxü̃.
2 Rü tá pemaã nüxü̃ chixu na nhuxãcü tá nüxü̃ pecuáxü̃ na texé tiĩxü̃ ja jíxema aixcuma Tupanaãẽ tümawa ngẽxmaxẽ. Rü dücax, guxü̃ma i orearü uruü̃gü i nüxü̃ ixugüxü̃ na Tupana duü̃xü̃xü̃ jaxĩxẽẽxü̃ ja Ngechuchu ja Cristu, rü ngẽma nixĩ i aixcuma Tupanaãẽ nawa idexaxü̃.
3 Notürü guxü̃ma i ngẽma orearü uruü̃gü i tama nüxü̃ ixugüxü̃ na Tupana duü̃xü̃xü̃ jaxĩxẽẽxü̃ ga Ngechuchu, rü ngẽma rü tama nüxü̃́ nangẽxma i Tupanaãẽ i Üünexü̃. Notürü Cristuarü uwanüãẽ nixĩ i nawa ngẽxmaxü̃. Marü nüxü̃ pexĩnüẽ na ínanguxchaü̃xü̃ i Cristuarü uwanü, notürü nhu̱xma rü marü nhama i naãnewa nangẽxma.
4 Pa Chauxacügüx, pema rü Tupanaxãcügü peixĩgü. Rü marü nüxü̃ perüjexera i ngẽma tama aixcuma Tupanaãrü orearü uruü̃gü ixĩgüxü̃. Erü ngẽma Tupanaãẽ i Üünexü̃ i peãẽwa ngẽxmaxü̃ rü nüxü̃ narüjexera i ngẽma Cristuarü uwanüãẽ i nhama i naãnecü̱̃ã̱xgüwa ngẽxmaxü̃.
5 Rü nüma i Cristuarü uwanüãrü duü̃xü̃gü rü nhama i naãnecü̱̃ã̱xgü nixĩ. Rü ngẽmaca̱x nhama i naãnechigagu nidexagü. Rü nhama i naãnecü̱̃ã̱x i duü̃xü̃gü rü nüxü̃́ inarüxĩnüẽ.
6 Notürü i jixema rü Tupanaxãcügü tixĩgü. Rü jíxema Tupanaxü̃ cuáxe rü tüxü̃́ itarüxĩnü. Notürü jíxema tama Tupanaxü̃ cuáxe rü tama tüxü̃́ itarüxĩnü. Rü ngẽmawa nüxü̃ tacua̱xgü na texé tixĩgüxü̃ ja aixcuma Tupanaãrü duü̃xü̃gü ixĩgüxe rü texé tixĩgüxü̃ ja Cristuarü uwanüãrü duü̃xü̃gü ixĩgüxe.
Tupana tüxü̃ nangechaü̃
7 Pa Chaueneẽgü ja Pexü̃ Changechaü̃güxex, name nixĩ na jigü ingechaü̃güxü̃, erü Tupana nixĩ ja tüxü̃ ngúexẽẽcü na jigü ingechaü̃güxü̃. Rü guxãma ja jíxema tümaẽneẽxü̃ ngechaü̃xẽ rü Tupanaxãcü tixĩgü rü Tupanaxü̃ tacua̱x.
8 Jíxema tama tümaẽneẽxü̃ ngechaü̃xẽ rü tama Tupanaxü̃ tacua̱x, erü Tupana nixĩ ja tüxü̃ ngúexẽẽcü na jigü ingechaü̃güxü̃.
9 Tupana rü nhama ga naãnewa nanamu ga Nane ja nügümaã wüxicacü na jimagagu tüxü̃́ nangẽxmaxü̃ca̱x i maxü̃ i taguma gúxü̃. Rü jemawa Tupana tüxü̃ nüxü̃ nadauxẽẽ na nhuxãcü tüxü̃ nangechaü̃xü̃.
10 Rü woo Tupanaxü̃ tangechaü̃gü, notürü ngẽma ngechaü̃ i guxü̃ãrü jexera ixĩxü̃ nixĩ na nüma tüxü̃ nangechaü̃xü̃ rü nhama ga naãnewa na namuãxü̃ ga Nane na taxca̱x najuxü̃ca̱x rü naxütanüãxü̃ca̱x ga tórü pecadugü.
11 Pa Chaueneẽgü ja Pexü̃ Changechaü̃güxex, jexguma jemaãcü tüxü̃ nangechaü̃gu ga Tupana, rü ngẽmaca̱x name nixĩ i jixema rü ta jigü tangechaü̃gü.
12 Taguma texé Tupanaxü̃ tadau. Notürü ngẽxguma aixcuma jigü ingechaü̃gügu, rü Tupana rü tawa namaxü̃ rü norü ngechaü̃ rü aixcumaxü̃chi tórü maxü̃wa nango̱x.
13 Rü nüma rü marü tüxna nanamu ga Naãẽ i Üünexü̃. Rü ngẽmawa nüxü̃ tacua̱x na aixcuma norü duü̃xü̃gü ixĩgüxü̃ rü nüma rü tawa na namaxü̃xü̃.
14 Rü tomatama nüxü̃ tadaugü rü nüxü̃ tixuchigagü na Tanatü ja Tupana núma namuxü̃ ga Nane na guxü̃ma i duü̃xü̃güxü̃ namaxẽxẽẽxü̃ca̱x.
15 Rü jíxema jaxṍxẽ rü nüxü̃ ixuchigaxe na Tupana Nane jiĩxü̃ ja Ngechuchu, rü aixcuma Tupanaãrü duü̃xü̃ tixĩ, rü Tupana rü tümawa namaxü̃.
16 Rü jixema nüxü̃ tacua̱xgü rü tajaxõgü na Tupana rü poraãcü tüxü̃ nangechaü̃xü̃, erü nüma nixĩ i aixcuma guxãxü̃ nangechaü̃xü̃. Rü jíxema aixcuma tümaẽneẽxü̃ ngechaü̃xẽ, rü Tupanaãrü duü̃xü̃ tixĩ, rü nüma ja Tupana rü aixcuma tümawa namaxü̃.
17 Rü ngẽxguma aixcuma Tupanaxü̃ ingechaü̃gügu, rü tórü maxü̃wa nango̱x i ngẽma, rü tãũxü̃táma nüxü̃ tamuü̃ẽ i ngẽma ngunexü̃ i nagu tüxü̃ jacagüxü̃gu naxca̱x i tórü maxü̃. Erü woo nhama i naãnewa tangẽxmagü, notürü nape̱xewa rü Cristurüü̃ tixĩgü.
18 Rü ngẽxguma aixcuma Tupanaxü̃ ingechaü̃gügu, rü nüxü̃ tacua̱x na tãũxü̃táma tüxü̃ napocuexü̃, rü ngẽmaca̱x taxuü̃ca̱xma nüxü̃ tamuü̃ẽ. Notürü ngẽxguma chi nüxü̃ imuü̃ẽgu, rü nüxü̃ tacua̱x na tama aixcuma nüxü̃ ingechaü̃güxü̃.
19 Rü jixema rü Tupanaxü̃ tangechaü̃gü, jerü nüxĩra tüxü̃ nangechaü̃ ga nümax.
20 Ngẽxguma chi texé:
“Chama rü Tupanaxü̃ changechaü̃”, nhagügu, notürü tümaẽneẽchi taxaixgu, rü tidora. Erü ngẽxguma tama nüxü̃ tangechaü̃gu i tümaẽneẽ i nüxü̃ tadauxü̃ rü taxuacüma nüxü̃ tangechaü̃ ja Tupana ja tama nüxü̃ tadaucü.
21 Rü Ngechuchu ja Cristu tüxü̃ namu rü nhanagürü:“Jíxema Tupanaxü̃ ngechaü̃xẽ, rü name nixĩ na tümaẽneẽxü̃ rü ta tangechaü̃xü̃”,
nhanagürü.
