1 Juã́ũ 5:1-21
5 Ngechuchu rü Tupana Nane ja Cristu nixĩ. Rü guxãma ja jíxema nüxü̃́ jaxṍxẽ, rü Tupanaxãcü tixĩgü. Rü jíxema Tanatü ja Tupanaxü̃ ngechaü̃xẽ, rü nüxü̃ tangechaü̃ ta i guxü̃ma i naxãcügü.
2 Rü ngẽxguma Tupanaxü̃ ingechaü̃gügu rü naxü̱xgu i ngẽma nüma tüxü̃ namuxü̃, rü nüxü̃ tacua̱x na aixcuma nüxü̃ ingechaü̃güxü̃ i ngẽma naxãcügü ixĩgüxü̃.
3 Rü ngẽxguma aixcuma Tupanaxü̃ ingechaü̃gügu rü naga taxĩnüẽ i ngẽma tüxü̃ namuxü̃. Rü ngẽma tüxü̃ namuxü̃ rü tama naguxcha na naga ixĩnüẽxü̃.
4 Erü guxãma ja aixcuma Tupanaxãcü ixĩxẽ, rü tama nhama i naãneãrü ngúchaü̃ i chixexü̃gu tarüxĩnü. Rü jixema rü tajaxõgü, rü ngẽmaca̱x tama name i nhama i naãneãrü ngúchaü̃ i chixexü̃gu tarüxĩnüẽ.
5 Rü jíxema jaxṍxẽ na Tupana Nane jiĩxü̃ ja Ngechuchu, rü jíxema tixĩ ja tama nhama i naãneãrü ngúchaü̃ i chixexü̃gu rüxĩnüxẽ.
Ore i Tupana Nanechiga
6 Rü nüxü̃ tacua̱x na aixcuma Tupana Nane jiĩxü̃ ja Ngechuchu. Jerü jexguma nhama ga naãnewa najexmagu rü dexáwa ínabaiegu, rü nümatama ga Tupana nüxü̃ nixu na Nanexü̃chi jiĩxü̃. Rü jexguma curuchagu naju̱xgu rü nagü inabaãgu ga Ngechuchu, rü Tupana rü wenaxãrü inanawe̱x na aixcuma Nane na jiĩxü̃. Rü ngẽxgumarüü̃ ta i ngẽma Naãẽ i Üünexü̃ i taguma idoraxü̃, rü tüxü̃ nüxü̃ nacua̱xẽẽ na aixcumaxü̃chi Tupana Nane na jiĩxü̃.
7 Rü ngẽmaãcü tüxü̃́ nangẽxma i tamaẽ̱xpü̱x i cua̱xruü̃gü i tüxü̃ nüxü̃ cua̱xẽẽxü̃ na aixcuma Tupana Nane jiĩxü̃ ja Ngechuchu.
8 Rü ngẽma norü wüxi nixĩ i Naãẽ i Üünexü̃, rü ngẽma norü taxre nixĩ ga jema Tupanaga ga jexguma Ngechuchu dexáwa íbaiegu, rü ngẽma norü tomaẽ̱xpüx nixĩ ga jema Tupana üxü̃ ga jexguma curuchagu nagü inabaãgu ga Ngechuchu. Rü guxü̃ma i ngẽma tamaẽ̱xpü̱x, rü wüxigu nüxü̃ nixu na aixcuma Tupana Nane jiĩxü̃ ja Ngechuchu.
9 Nüxü̃́ tajaxõgü i duü̃xü̃gü ega ṯacüxü̃ tamaã jaxugügu. Notürü Tupanaãrü ore nixĩ i jexeraãcü aixcumaxü̃chi ixĩxü̃. Rü Tupana nixĩ ja tamaã nüxü̃ ixucü na Ngechuchu rü Nane jiĩxü̃.
10 Rü jíxema nüxü̃́ jaxṍxẽ ja Tupana Nane rü nüxü̃ tacua̱x na aixcuma jiĩxü̃ i ngẽma ore i Tupana nüxü̃ ixuxü̃ i Nanechiga. Notürü jíxema tama Tupanaãxü̃́ jaxṍxẽ rü dorata̱a̱x nüxü̃ tawogü ja Tupana erü tama tajaxõ i ngẽma ore i Tupana nüxü̃ ixuxü̃ i Nanechiga.
11 Rü nhaã nixĩ i norü ore ja Tupana i tamaã nüxü̃ jaxuxü̃, rü:“Chamatama marü pexna chanaxã i maxü̃ i taguma gúxü̃. Rü nhaã maxü̃ rü Chaunegagu pexü̃́ nangẽxma”,
nhanagürü.
12 Jíxema nüxü̃́ jaxṍxẽ ja Tupana Nane rü tüxü̃́ nangẽxma i ngẽma maxü̃ i taguma gúxü̃. Notürü jíxema tama nüxü̃́ jaxṍxẽ ja jima Nane rü tama tüxü̃́ nangẽxma i ngẽma maxü̃.
Juã́ũ rü nhuxre ga norü ucu̱xẽmaã inajacua̱xẽẽ ga norü popera
13 Pa Chaueneẽgüx ja Tupana Naneãxü̃́ Jaxõgüxex, pexca̱x chanaxümatü i nhaã ore na nüxü̃ pecuáxü̃ca̱x na pexü̃́ nangẽxmaxü̃ i ngẽma maxü̃ i taguma gúxü̃.
14 Rü ngẽmaca̱x tama taxãneẽ na nüxna ingaicamagüxü̃ ja Tupana. Rü nüxü̃ tacua̱xgü ega ṯacüca̱x nüxna icaxgu, rü nüma tüxü̃ naxĩnü i ngẽxguma norü ngúchaü̃ jixĩgu i ngẽma naxca̱x nüxna ic̱axü̃.
15 Rü ngẽxguma nüxü̃ icua̱xgu na nüma tüxü̃ naxĩnüxü̃ i ngẽxguma ṯacüca̱x nüxna icaxgu, rü nüxü̃ tacua̱x ta na tüxna naxããxü̃ i ngẽma naxca̱x nüxna ic̱axü̃.
16 Rü ngẽxguma chi texé nüxü̃ da̱xgu i tümaẽneẽ na pecadu naxüxü̃, rü name nixĩ na naxca̱x tajumüxẽ́xü̃ ega tama pecadu i ijanatauxẽẽxü̃ jixĩgu. Rü Tupana tá nanamaxẽẽ i ngẽma tümaẽneẽ ega tama pecadu i ijanatauxẽẽxü̃ jixĩgu. Nangẽxma i pecadu i tüxü̃ ijarütauxẽẽxü̃. Rü ngẽxguma ngẽma pecaduwe naxũãmagu i wüxi i peeneẽ, rü tama pemaã nüxü̃ chixu na naxca̱x pejumuxẽgüxü̃.
17 Guxü̃ma i chixexü̃ i ixüxü̃, rü pecadu nixĩ. Notürü nangẽxma i pecadu i tama tüxü̃ ijarütauxẽẽxü̃.
18 Rü nüxü̃ tacua̱x, rü jíxema Tupanaxãcü ixĩxẽ, rü tama pecadu taxüecha, erü nüma ja Tupana Nane rü tüxna nadau. Rü taxuacüma tüxna nangaicama i ṉg̱oxo i Chataná i tüxü̃ pecaduã̱xẽẽchaü̃xü̃.
19 Nüxü̃ tacua̱xgü na Tupanaxãcügü ixĩgüxü̃, notürü guxü̃ma i nhama i naãnecü̱̃ã̱x rü ṉg̱oxo i Chatanáme̱xẽwa nangẽxmagü.
20 Rü nüxü̃ tacua̱x ta na nhama ga naãnewa nanguxü̃ ga Tupana Nane, rü tüxna nanaxã ga cua̱x na nüxü̃ icua̱xgüxü̃ca̱x ja jima aixcumaxü̃chi Tupana ixĩcü. Rü norü duü̃xü̃gü tixĩgü ja jima aixcumaxü̃chi Tupana ixĩcü, erü Nane ja Ngechuchu ja Cristuarü duü̃xü̃gü tixĩgü. Rü nüma ja Tupana Nane nixĩ i aixcumaxü̃chi Tupana jiĩxü̃ rü tüxna naxããxü̃ i maxü̃ i taguma gúxü̃.
21 Pa Chauxacügüx, ¡Pegüna pedaugü na tama nüxü̃́ pejaxõgüxü̃ca̱x i tupanachicügü! Rü ngẽxĩcatama nixĩ i chorü ore i pemaã nüxü̃ chixuxü̃.
Rü nuãma pexna,
Juã́ũ
