1 Techarónicacü̃ãꞌ 1:1-10
1 Pa Techarónicawa Ngẽxmagüxü̃ i Toeneẽgü i Jaxõgüxü̃ i Tanatü ja Tupana rü Tórü Cori ja Ngechuchu ja Cristuarü Duü̃xü̃gü Ixĩgüxü̃x, chama i Pauru rü namaã i taeneẽ i Siuwánu rü Timúteu nixĩ i pexca̱x tanaxümatüxü̃ i nhaã popera. Rü tanaxwa̱xe i Tanatü ja Tupana rü tórü Cori ja Ngechuchu ja Cristu pexü̃ narüngü̃xẽẽ rü pexü̃ nataãẽxẽẽ.
Meãma najaxõgü ga jema Techarónicawa jexmagüxü̃ rü jemaãcü wüxi ga cua̱xruü̃ ga mexü̃ nixĩgü
2 Rü torü jumuxẽwa rü guxü̃guma pexna tacua̱xãchigü, rü pexca̱x Tupanana moxẽ taxã.
3 Rü guxü̃guma i ngẽxguma Tanatü ja Tupanamaã tidexagügu, rü taguma nüxü̃ itajarüngümaẽ na nhuxãcü meã pejaxõgüãcüma penaxüxü̃ i Tupanaãrü puracü, rü nhuxãcü nüxü̃ pengechaü̃güãcüma togüxü̃ perüngü̃xẽẽxü̃. Rü taguma nüxü̃ itajarüngümaẽ na nhuxãcü aixcuma meã ípenaṉg̱uxẽẽxü̃ ja tórü Cori ja Ngechuchu ja Cristu rü ngẽmaca̱x jaxna namaã pexĩnüẽ i ngẽma ngúxü̃ i nhu̱xma peingexü̃.
4 Pa Chaueneẽgüx, Tupana pexü̃ nangechaü̃, rü nüxü̃ tacua̱x rü nümatama nixĩ i pexü̃ jadexechixü̃.
5 Rü jexguma pemaã nüxü̃ tixuxgu ga Tupanaãrü ore i tüxü̃ maxẽxẽẽxü̃, rü tama toechama tidexagümare, jerü Tupanaãẽ i Üünexü̃ toxü̃ narüngü̃xẽẽ na norü poramaã pemaã nüxü̃ tixuxü̃. Rü meã nüxü̃ tacuáãcüma pemaã nüxü̃ tixu ga jema ore jerü toõẽwatama nüxü̃ tacua̱x na aixcuma jiĩxü̃. Rü pematama nüxü̃ pecua̱x ga nhuxãcü meã pepe̱xewa na tamaxẽxü̃ ga jexguma na jemaãcü pexü̃ tarüngü̃xẽẽgüxü̃ca̱x.
6 Rü pema rü meãma penaxügü ga jema pexü̃ tangúexẽẽxü̃ rü jema tüxü̃ nangúexẽẽxü̃ ga tórü Cori ja Ngechuchu. Rü Tupanaãẽ i Üünexü̃ pexü̃ taãẽxẽẽãcüma penajauxgü ga jema ore ga woo jemaca̱x poraãcü ngúxü̃ na peingegüxü̃.
7 Rü jemaãcü ga pema rü wüxi ga cua̱xruü̃ ga mexü̃ peixĩgü naxca̱x ga guxü̃ma ga jema jaxõgüxü̃ ga Machedóniããnewa rü Acajaanewa jexmagüxü̃.
8 Rü jemaãcü petanüwa ínaxũxü̃ ga tórü Cori ja Ngechuchuarü ore rü guxü̃wama nanguchigü. Rü ngẽmaca̱x i nhu̱xma rü Machedóniããnewa rü Acajaanewa rü guxü̃wama nüxü̃ nacua̱xgü na nhuxãcü meã Tupanaãxü̃́ pejaxõgüxü̃. Rü ngẽmaca̱x marü taxuü̃ca̱xma tü̱xcüü̃ i toma rü namaã nüxü̃ tixu i ngẽma ore i mexü̃ i pechiga.
9 Erü nümagütama i ngẽma duü̃xü̃gü rü marü nüxü̃ nixugügü ga nhuxãcü ga pema rü meã toxü̃ na pejauxgüxü̃ ga jexguma petanüwa taxĩxgu. Rü nüxü̃ nixugügü ta ga nhuxãcü nüxü̃ na perüxoexü̃ ga perü tupananetachicüna̱xãgü na Tupanaxü̃chi ja maxü̃cü rü ixaixcumacüwe perüxĩxü̃ca̱x rü nüxü̃́ pepuracüexü̃ca̱x.
10 Rü nüxü̃ nixugügü ta na nhuxãcü aixcuma ípenaṉg̱uxẽẽxü̃ na wenaxãrü dauxü̃wa ne naxũxü̃ ja Ngechuchu ja Tupana Nane ga juwa ínadaxẽẽãcü. Rü jima Ngechuchu nixĩ ja tüxü̃ ínguxü̃xẽẽcü nüxna i ngẽma pocu i ãũcümaxü̃ i tá ínguxü̃.
