1 Techarónicacü̃ãꞌ 2:1-20
2 Pa Chaueneẽgüx, rü pematama nüxü̃ pecua̱x rü tama notüca̱xmamare nixĩ na pexü̃tawa taxĩxü̃.
2 Rü pema nüxü̃ pecua̱x rü naxü̃pa ga pexü̃tawa na tangugüxü̃ rü chixri tomaã nachopetü ga duü̃xü̃gü ga Piripuwa rü tomaã naguxchigagü. Notürü Tupana toxü̃ narüngü̃xẽẽ na pemaã nüxü̃ tixuxü̃ca̱x ga norü ore i tüxü̃ maxẽxẽẽxü̃. Rü jemaca̱x tama tamuü̃ẽãcüma pemaã nüxü̃ tixu ga jema ore, woo ga torü uwanügü ga tama toxü̃́ irüxĩnüẽchaü̃xü̃ rü poraãcü toxü̃́ naguxchaxẽẽgüãgu.
3 Rü jexguma pemaã nüxü̃ tixuxgu ga jema ore, rü tama ítatüeãcüma pemaã nüxü̃ tixu. Rü tama chixexü̃ pemaã taxügüchaü̃ãcüma rü tama pexü̃ tawomüxẽẽgüchaü̃ãcüma pemaã nüxü̃ tixu ga jema ore.
4 Jerü Tupana nixĩ ga toxü̃ unetacü rü toxü̃ mucü na pemaã nüxü̃ tixuxü̃ca̱x ga norü ore i mexü̃ i tüxü̃ maxẽxẽẽxü̃. Rü jemaca̱x Tupana naxwa̱xexü̃ãcüma pemaã nüxü̃ tixu ga jema ore. Rü tama duü̃xü̃güxü̃mare na tataãẽxẽẽgüxü̃ca̱x pemaã nüxü̃ tixu, notürü nüxü̃ tixu na Tupanaxü̃ tataãẽxẽẽgüxü̃ca̱x. Rü nüma ja Tupana nixĩ i tüxü̃ nacuáxü̃ rü tüxü̃ nadauxü̃ rü nangugüãxü̃ i ngẽma nagu rüxĩnüẽxü̃.
5 Rü pema nüxü̃ pecua̱x rü taguma pepe̱xewa pexü̃ ticua̱xüü̃gü na toga pexĩnüẽxü̃ca̱x, rü taguma pexü̃ tawomüxẽẽgü na ngĩxü̃ tajauxgüxü̃ca̱x ga perü dĩẽru. Rü Tupana nixĩ ja toxü̃ daucü na taguma jemaãcü na tanaxüxü̃.
6 Rü taguma naxca̱x tadaugü na duü̃xü̃gü toxü̃ icua̱xüü̃güxü̃ca̱x, rü bai i pema rü bai i togü i duü̃xü̃gü.
7 Rü woo Cristutama toxü̃ namu na jaxõgüxü̃ãrü ãẽ̱xgacügü na tixĩgüxü̃ notürü tama nhama wüxi ga ãẽ̱xgacürüü̃ pemaã tamaxẽ. Notürü meãmare pemaã tamaxẽ, nhama wüxi i mama i ngĩxãcügüna meã da̱xcürüü̃ pemaã tixĩgü.
8 Rü poraãcü pexü̃ tangechaü̃, rü jemaca̱x pemaã nüxü̃ tixu ga Tupanaãrü ore. Rü tama jemaxicatama pexna taxãxchaü̃ ga jexguma. Notürü marü ítamemare ta ga pexca̱x na tajuexü̃, jerü poraãcü pexü̃ tangechaü̃gü.
9 Pa Chaueneẽgüx, pema nüxü̃ pecua̱x ga nhuxãcü poraãcü na tapuracüexü̃ na torü õnaca̱x tataxegüxü̃ca̱x. Rü woo chütacü rü woo ngunecü tapuracüe na taxúeaxü̃́ma wüxi ga guxchaxü̃ tixĩgüxü̃ca̱x ga jexguma petanüwa tajexmagügu rü pemaã nüxü̃ tixuxgu ga Tupanaãrü ore.
10 Pa Duü̃xü̃gü i Tupanaãxü̃́ Jaxõgüxü̃, pema nixĩ ga toxü̃ pedaugüxü̃ rü Tupana rü ta toxü̃ nadau ga nhuxãcü meã na tamaxẽxü̃ ga petanüwa, rü nhuxãcü taxuü̃ma ga chixexü̃ na taxüxü̃ ga jexguma.
11 Rü pema nüxü̃ pecua̱x ta ga nhuxãcü pexü̃́ na tanangúchaü̃xẽẽxü̃. Rü jexguma pengechaü̃gügu, rü pexü̃ tataãẽxẽẽgü nhama wüxi i papa i naxãcügüxü̃ taãẽxẽẽgüxü̃rüü̃.
12 Rü nhu̱xma na Tupanaãrü peixĩgüxü̃, rü pexü̃ taxucu̱xẽgü na meã naxca̱x pemaxẽxü̃. Rü nüma nixĩ i pexca̱x nangemaxü̃ na ngextá ãẽ̱xgacü íjiĩxü̃wa pengugüxü̃ca̱x na ngẽ́ma mexü̃wa pengẽxmagüxü̃ca̱x.
13 Rü ngẽmaca̱x guxü̃guma pexca̱x Tupanana moxẽ taxã, jerü jexguma noxri nüxü̃ pexĩnüẽgu ga jema norü ore ga pemaã nüxü̃ tixuxü̃, rü meã penajauxgü, jerü nüxü̃ pecua̱xgü rü aixcuma Tupanaãrü ore nixĩ rü tama duü̃xü̃güarü oremare nixĩ. Rü jema ore nixĩ ga naxüchicüüxü̃ ga perü maxü̃ ga jexguma pejaxõgügu.
14 Pa Chaueneẽgüx, nüxü̃ tacua̱x na nhuxãcü ngúxü̃ peingegüxü̃ jerü petanüxü̃gütama pechi naxaie rü chixri pemaã nachopetü. Notürü jemaãcütama nüxü̃ nangupetü ga Tupanaãrü duü̃xü̃gü ga Ngechuchu ja Cristuaxü̃́ jaxõgüxü̃ ga Judéaanewa jexmagüxü̃. Jerü natanüxü̃gütama ga Judéugü rü chixri namaã nachopetü.
15 Rü jema Judéugü nixĩ ga tórü Cori ga Ngechuchuxü̃ ima̱xgüxü̃, jexgumarüü̃ ga norü o̱xigü rü nuxcümaxü̃güxü̃ ga Tupanaãrü orearü uruü̃güxü̃ na naḏaixü̃rüü̃. Rü jema Judéugü nixĩ ga towe ingẽxü̃tanüxü̃. Rü Tupanamaã rü guxü̃ i duü̃xü̃gümaã narüxuwanügü.
16 Rü ngẽxguma ngẽma duü̃xü̃gü i tama Judéugü ixĩgüxü̃maã nüxü̃ tixuxchaü̃gu i Tupanaãrü ore na nümagü rü ta nüxü̃́ nangẽxmagüxü̃ca̱x i maxü̃, rü ngẽma Judéugü rü toxna nanachu̱xu. Rü ngẽmaãcü i ngẽma Judéugü rü poraãcüxü̃chima chixexü̃ naxügü. Rü ngẽmaca̱x i nhu̱xma rü düxwa marü nüxna nangu i ngẽma Tupanaãrü pocu i ãũcümaxü̃chixü̃.
Pauru rü nüxü̃́ nangúchaü̃ na wenaxãrü natanüwa naxũxü̃ ga jema jaxõgüxü̃ ga Techarónicawa jexmagüxü̃
17 Pa Chaueneẽgüx, jexguma pexna ítixĩxguwena, rü woo tama pexü̃tawa na tajexmagüechaxü̃, notürü guxü̃guma pegu tarüxĩnüẽ, rü poraãcü toxü̃́ nangúchaü̃ na pexü̃tawa taxĩxü̃ na wenaxãrü pexü̃ ítajadaugüxü̃ca̱x.
18 Rü aixcuma ngẽ́ma taxĩxchaü̃. Rü chamatama i muẽ̱xpü̱xcüna rü chanaxwa̱xe na ngẽ́ma pexü̃tawa taa̱x chaxũũxü̃ẽ́gaxü̃ notürü ṉg̱oxo i Chataná rü guxü̃guma toxü̃́ nanaguxchaxẽẽ na tama ngẽ́ma taxĩxü̃ca̱x.
19 Notürü pexü̃ ítajadaugüchaü̃ãma erü ngẽxguma wenaxãrü núma naxũxgu ja tórü Cori ja Ngechuchu ja Cristu rü ¿ta̱cüca̱x tá nixĩ i Tupanape̱xewa tataãẽgüxü̃ i tomax? Rü aixcuma pewa tá nixĩ i ítanaṉg̱uxẽẽxü̃ na tomaã nataãẽxü̃ ja Tupana. Rü pema tá nixĩ i torü taãẽ peixĩgüxü̃. Rü pegagu tá nixĩ i aixcuma togümaãtama tataãẽgüxü̃ i nape̱xewa.
20 Rü ngẽmáãcü pegagu nixĩ i togümaãtama tataãẽgüxü̃, rü pema nixĩ i torü taãẽ peixĩgüxü̃.
