1 Techarónicacü̃ãꞌ 4:1-18
4 Rü nhu̱xma Pa Chaueneẽgüx, rü nangẽxma i ṯacüca̱x tórü Cori ja Ngechuchuégagu pexü̃ taca̱a̱xü̃ rü pexü̃ tamu. Rü ngẽma nixĩ na guxü̃guma Tupanaca̱x meã pemaxẽxü̃ jema pexü̃ tangúexẽẽxü̃rüü̃ rü nhu̱xma marü penaxüxü̃rüü̃.
2 Pema rü marü nüxü̃ pecua̱x ga jema torü ucu̱xẽgü ga tórü Cori ja Ngechuchu toxü̃ muxü̃ na pexü̃ tangúexẽẽxü̃ca̱x.
3 Rü Tupana nanaxwa̱xe na aixcuma namexü̃ i perü maxü̃ rü naxca̱xicatama na pemaxẽxü̃. Rü tama name i chixrimare pemaxẽ i nape̱xewa, rü to i ngexü̃maãmare pengẽãẽgümare.
4 Rü wüxichigü tanaxwa̱xe na aixcuma tümama̱xü̃ tangechaü̃xü̃, rü ngĩmaãxĩcatama na tamaxü̃xü̃.
5 Rü tama name i ngĩxü̃ na pecuáxchaü̃marexü̃ca̱x ngĩmaã pexãma̱x i wüxi i nge erü ngẽmaãcü namaxẽ i ngẽma duü̃xü̃gü i tama Tupanaãxü̃́ jaxõgüxü̃.
6 Rü tama name i texé ngĩmaã tamaxü̃ i tümaẽneẽ ja jaxõcü nama̱x. Erü jexgumarüü̃ ga marü pemaã nüxü̃ tixuxü̃rüü̃, rü Tupana tá poraãcü tüxü̃ napocu ja guxãma ja jíxema ngẽmaãcü maxẽxẽ.
7 Erü Tupana tüxü̃ nidexechi na meã naxca̱x imaxẽxü̃ca̱x rü tama chixri na imaxẽxü̃ca̱x.
8 Rü ngẽmaca̱x ega texé tama naga ĩnügu i nhaã ngu̱xẽẽtaegü, rü pemaã nüxü̃ chixu rü tama wüxi i duü̃xü̃ga nixĩ i ngẽma nüxü̃ taxoxü̃, notürü Tupanagatama nixĩ i nüxü̃ taxoxü̃. Rü guma nixĩ ga pexna namucü ga Naãẽ i Üünexü̃.
9 Rü ngẽma na pegü pengechaü̃güxü̃chiga, rü taxuü̃ca̱xma pexca̱x chanaxümatü i poperawa. Jerü Tupanatama marü pexü̃ nangúexẽẽ i ngẽma na nhuxãcü aixcuma pegü pengechaü̃güxü̃.
10 Rü aixcuma nixĩ i guxü̃guma meã nüxü̃ pengechaü̃güxü̃ i guxü̃ma i taeneẽgü i Machedóniããnewa ngẽxmagüxü̃. Notürü, Pa Toeneẽgüx, rü pexü̃ taca̱a̱xü̃gü na jexeraãcü meã nüxü̃ pengechaü̃güxü̃ca̱x.
11 ¡Rü meã pegümaã pemaxẽ, rü pexrütama maxü̃gu perüxĩnüẽ, rü tama i togüarü maxü̃gu! ¡Rü pematama naxca̱x pepuracüe i perü ngẽmaxü̃gü ga jexgumarüü̃ ga marü pemaã nüxü̃ na tixuxü̃rüü̃!
12 Rü ngẽxguma ngẽmaãcü pemaxẽgu, rü ngẽma duü̃xü̃gü i tama jaxõgüxü̃ rü tá pexü̃ nangechaü̃gü, rü pema rü taxuü̃táma pexü̃́ nataxu.
Nhuxãcü tá nixĩ i ngẽxguma nataegugu ja tórü Cori
13 Pa Chaueneẽgüx, rü ngẽxguma wüxie ju̱xgux, rü tanaxwa̱xe i nüxü̃ na pecua̱xgüxü̃ na ṯacü tüxü̃ ngupetüxü̃, na tama pengechaü̃güxü̃ ngẽxgumarüü̃ i ngẽma duü̃xü̃gü i tama jaxõgüxü̃ rü tama nüxü̃ cua̱xgüxü̃ na wena tá namaxẽxü̃ i juexü̃.
14 Erü jixema na jaxõgüxü̃ na najuxü̃ rü wena namaxü̃xü̃ ga Ngechuchu, rü ngẽxgumarüü̃ ta tajaxõgü na Tupana tá ínadagüxẽẽxü̃ i guxü̃ma i ngẽma Ngechuchuaxü̃́ jaxõgüãcüma juexü̃, rü wüxigu tá Ngechuchumaã nügüxü̃tawa nanagagü.
15 Rü ngẽmaca̱x pemaã nüxü̃ tixu i ngẽma ore ga tórü Cori ja Ngechuchu namaã ngu̱xẽẽtaexü̃. Rü ngẽxguma wena núma naxũxgu ja tórü Cori ja Ngechuchu rü jixema na imaxẽxü̃ i nhama i naãnewa rü tãũxü̃táma jixira nape̱xe taxĩ i ngẽma juexü̃.
16 Erü nümatama ja Cori ja Ngechuchu rü dauxü̃wa tá ínarüxĩ, rü tá nangẽxma i wüxi i naga i taxü̃ i dauxü̃wa inaxũxü̃ i tüxü̃ muxü̃, rü tá nüxü̃ taxĩnüẽ i Tupanaãrü orearü ngeruü̃güarü ãẽ̱xgacü i tagaãcü dauxü̃wa icagüxü̃, rü tá jacuegüxü̃ ja Tupanaãrü corneta. Rü ngẽxguma i ngẽma juexü̃ i Cristuaxü̃́ jaxõgüxü̃ rü tá ínarüdagü.
17 Rü ngẽmawena i jixema na imaxẽxü̃ rü Tupana tá wüxigu caixanexü̃gu tüxü̃ nigagü namaã i ngẽma duü̃xü̃gü i juewa írüdagüxü̃. Rü ngẽmaãcü dauxü̃gu tá tórü Cori ja Ngechuchuxü̃ tajangaugü na guxü̃gutáma naxü̃tawa ingẽxmagüxü̃ca̱x.
18 Rü ngẽmaca̱x chanaxwa̱xe i nhaã oremaã pegü petaãẽxẽẽgü.