1 Techarónicacü̃ãꞌ 5:1-28
5 Notürü, Pa Chaueneẽgüx, rü ngẽma norü ngunexü̃ rü taunecü i tá nagu nangupetüxü̃ i ngẽma pemaã nüxü̃ chixuxü̃, rü taxuü̃ca̱xma pexca̱x chanaxümatü i ngẽmachiga.
2 Erü pematama meã nüxü̃ pecua̱x rü ngẽma ngunexü̃ i taxúema nagu ínaṉg̱uxẽẽxü̃gu tá nixĩ i ínanguxü̃ ja tórü Cori ja Ngechuchu. Rü nhama wüxi i ngĩ́ta̱xáxü̃ i ngürüãchi chütacü ínguxü̃rüü̃ tá nixĩ.
3 Rü ngẽxguma duü̃xü̃gü nagu írüxĩnüẽgu na guxü̃ma na mexü̃ rü taxuü̃ma na nüxü̃ üpetüxü̃, rü ngẽma ngunexü̃gügu rü tá ngürüãchi nagu̱x i guxü̃ma. Rü nhama wüxi i ngecü i ãxãcücü rü ngürüãchi ngĩxãcümaã ngu̱xnecacürüü̃ tá nixĩ na taxúema naxchaxwa inhaxü̃ i ngẽma.
4 Notürü pemax, Pa Chaueneẽgüx, rü marü meãma nüxü̃ pecua̱x i ngẽmachiga. Rü ngẽmaca̱x taxuü̃ca̱xma ngürüãchi pexü̃ ínajaḇaixgü ja Cori ja Ngechuchu nhama wüxi i ngĩ́ta̱xáxü̃ ngürüãchi duü̃xü̃güxü̃ íḇaixgüxü̃rüü̃.
5 Erü guxãma i pema rü Tupanaãrü duü̃xü̃gü peixĩgü, rü ngẽmaca̱x ngóonexü̃wa pengẽxmagü rü meãma nüxü̃ pecua̱x na nhuxãcü meã pemaxẽxü̃. Rü jixema rü tama Chatanáãrü duü̃xü̃gü tixĩgü, rü ngẽmaca̱x tama ẽãnexü̃wa tangẽxmagü rü tama tanaxü i ngẽma chixexü̃ i ẽãnexü̃wa naxüxü̃.
6 Rü ngẽmaca̱x tama tanaxwa̱xe i taechita ítamaxẽmare rü itarüchomare ngẽxgumarüü̃ i ngẽma duü̃xü̃gü i tama jaxõgüxü̃. Notürü tanaxwa̱xe i taxuãẽgü, rü meã taãẽgu ítarüxĩnüẽ.
7 Erü ngẽma duü̃xü̃gü i naẽchitamare maxẽxü̃ rü nhama duü̃xü̃gü i chütacü peexü̃rüü̃ nixĩgü. Rü ngẽma duü̃xü̃gü i axegüxü̃ rü chütacü nixĩ i nügü nangãxẽxẽẽxü̃.
8 Notürü i jixema rü ngóonexü̃wa tangẽxmagü, rü ngẽmaca̱x tanaxwa̱xe i guxü̃guma taxuãẽgü. Rü tanaxwa̱xe i aixcuma meã Tupanaãxü̃́ tajaxõgü, rü jigü tangechaü̃gü, rü meã ítanaṉg̱uxẽẽ na Tupana tüxna naxãxü̃ca̱x i ngẽma maxü̃ i taguma gúxü̃. Rü ngẽxguma ngẽmaãcü imaxẽgu, rü ngẽmaãcü tá jigü ítapoxü̃ i ngẽxguma Chataná chixexü̃gu tüxü̃ jixẽẽchaü̃gu.
9 Erü Tupana rü tama tüxü̃ nidexechi na tüxü̃ napocuexü̃ca̱x, notürü tüxü̃ nidexechi na tórü Cori ja Ngechuchu ja Cristugagu najauxgüxü̃ca̱x i maxü̃ i taguma gúxü̃.
10 Rü Ngechuchu ja Cristu rü taxca̱x naju na wüxigu namaã imaxẽxü̃ca̱x i dauxü̃guxü̃ i naãnewa. Rü nüẽ́tama ega woo marü ijujane ínanguxgu rü e̱xna imaxẽjane ínanguxgu, erü dauxü̃guxü̃ i naãnewa rü wüxiwa tá namaã tamaxẽ.
11 Rü ngẽmaca̱x, Pa Chaueneẽgüx, rü name nixĩ i wüxichigü pegü petaãẽxẽẽgü rü pegü peporaexẽẽ i perü õwa ngẽxgumarüü̃ i nhu̱xma na marü ípenaxügüxü̃.
Pauru rü najaxucu̱xẽgü ga jema jaxõgüxü̃
12 Pa Chaueneẽgüx, pexü̃ taca̱a̱xü̃gü na nüxü̃ pengechaü̃güxü̃ca̱x i ngẽma taeneẽgü i petanüwa puracüexü̃ rü pemaã icua̱xgüxü̃ rü pexü̃ ngúexẽẽxü̃ i Cori ja Ngechuchuarü ore.
13 Rü name nixĩ i namaã petaãẽgü rü aixcuma meã nüxü̃ pengechaü̃gü i ngẽma taeneẽgü, erü nümagü nixĩ i pexü̃ nangü̃xẽẽgüxü̃. Rü name nixĩ i pegü pengechaü̃güãcüma pemaxẽ.
14 Rü pemaã nüxü̃ tixu ta na penaxucu̱xẽgüxü̃ i ngẽma duü̃xü̃gü i oexü̃ i tama puracüechaü̃xü̃. ¡Rü nüxü̃́ penangúchaü̃xẽẽgü i ngẽma duü̃xü̃gü i marü nüxü̃ rüxoechaü̃xü̃ na jaxõgüãxü̃! ¡Rü nüxü̃ perüngü̃xẽẽgü i ngẽma duü̃xü̃gü i turaexü̃ i norü õwa! ¡Rü name nixĩ i jaxna namaã pexĩnüẽ i guxü̃ma i ngẽma taeneẽgü!
15 Rü ngẽxguma texé chixexü̃ pemaã ü̱xgu, rü tama name i chixexü̃maã penataeguxẽẽ. ¡Notürü name nixĩ i naxca̱x pedau na guxü̃guma mexü̃ pexügüxü̃ i pegütanüwa rü guxü̃ma i togütanüwa rü ta!
16 Rü name nixĩ i guxü̃guma petaãẽgü.
17 ¡Rü guxü̃guma pejumuxẽgü!
18 ¡Rü woo ṯacü pexü̃ ngupetügu, rü Tupanana moxẽ pexãgü! Erü ngẽmaãcü nanaxwa̱xe ja Tupana na pemaxẽxü̃ i pema i Ngechuchu ja Cristuarü duü̃xü̃gü na peixĩgüxü̃.
19 Rü tama name i nüxü̃ pexoe i Tupanaãẽ i Üünexü̃.
20 Rü tama name i nüxü̃ pexoe i Tupanaãrü ore ega texéwa pemaã jadexagu ja Tupana.
21 Notürü name nixĩ i meãma penangugü i guxü̃ma i oregü na nüxü̃ pecuáxü̃ca̱x rü ngoxi aixcuma jiĩxü̃ i ngẽma ore rü e̱xna tama. ¡Rü ngẽma ore i aixcuma mexü̃xĩcatama peixõgü!
22 ¡Rü nüxna peixĩgachi i nagúxü̃raü̃xü̃ i chixexü̃gü!
23 Rü chanaxwa̱xe i nümatama ja Tupana ja tüxü̃ taãẽxẽẽcü pexü̃ imexẽẽ na aixcuma nape̱xewa pemexü̃ca̱x. Rü chanaxwa̱xe i guxü̃wama pexna nadau i peãẽwa rü pexenewa na nataxuxü̃ca̱x i ṯacü i perü chixexü̃ i ngẽxguma wenaxãrü núma naxũxgu ja tórü Cori ja Ngechuchu ja Cristu.
24 Rü guxü̃ma i ngẽma rü tá pexca̱x nanaxü ja Tupana ja pexü̃ idexechicü, erü nüma rü aixcuma najanguxẽẽ i ngẽma tamaã inaxunetaxü̃.
Pauru rü wenaxãrü jema duü̃xü̃güxü̃ narümoxẽ rü naxca̱x ínaca na Cori ja Ngechuchu ja Cristu meã nüxü̃ rüngü̃xẽẽxü̃ ga jema jaxõgüxü̃
25 Pa Chaueneẽgüx, ¡Toxca̱x pejumuxẽgü!
26 Rü chanaxwa̱xe i chauégagu meã nüxü̃ perümoxẽgü i guxü̃ma i taeneẽgü.
27 Rü Cori ja Ngechuchuégagu pexü̃ chamu na guxü̃ i taeneẽgüpe̱xewa na nüxü̃ pedaumatüxü̃ i nhaã popera i pexca̱x ngẽ́ma chamuxü̃.
28 Rü chanaxwa̱xe i tórü Cori ja Ngechuchu ja Cristu pexü̃ narüngü̃xẽẽ i guxãma i pemax.
Rü nuãma pexna,
Pauru
